Lesona 125

Mataupu Faavae ma Feagaiga 119–120

Folasaga

I le taumafanafana o le 1838, sa oo ai le Au Paia i faigata tele tautupe a o latou taumafai e atina’e le Ekalesia i Misuri i matu. Sa saili atu e le Perofeta o Iosefa Samita le taitaiga mai le Alii, ma i le aso 8 o Iulai, 1838, na ia maua ai faaaliga ua faamaumauina i le Mataupu Faavae ma Feagaiga 119 ma le 120. I nei faaaliga, na aoao mai ai e le Alii le tulafono o le sefuluai ma faatagaina ni taitai faapitoa o le Ekalesia e iloilo auala e faaaogaina ai tupe o le sefuluai.

Fautuaga mo le Aoaoina Atu

Mataupu Faavae ma Feagaiga 119:1–4

Ua faaali mai e le Alii le tulafono o le sefuluai

Valaaulia se tagata aoga e faitau leotele le tala lenei na faamatalaina e Peresitene Gordon B. Hinckley:

“… [O] se fafine i Sāo Paulo, i Pasila, sa faigaluega o ia ma alu i le aoga ina ia lava mea e tausi ai lona aiga. Ou te faaaogaina ana lava upu e faamatala ai lana tala. Sa fai mai o ia:

“‘O le iunivesite sa ou aoga ai, sa i ai se tulafono e faasa ai tamaiti aoga sa nofo aitalafu ona sue i suega.’ …

“’Ou te manatuaina se taimi sa ou … feagai ai ma faigata ogaoga o mea tau tupe. … Ina ua ou tago e faavasega lau paketi faalemasina, sa ou vaaia o le a le lava se tupe e totogi [uma] ai lau sefuluai ma lau aoga. Sa tatau ona ou filifili i mea e lua. O suega e tailua masina ma fai, o le a amata i le vaiaso e sosoo ai, ma afai ou te le sue ai o lona uiga, e le aoga atoa le tausaga o le aoga. Sa ou matua mafatia lava. O se faaiuga tiga lea na taatia nei i o’u luma, ma sa ou le iloa pe o le a le tonu e fai’” (“O Le Faatuatua Ua Matou Savavali Ai,“ Liahona, Iulai 2002, 81-82).

• O le a sau tala e fai atu i se tasi e oo i se faafitauli faapena?

Valaaulia se tagata aoga e faitau le faaauauga o le tala:

“O lenei lagona sa mafatia ai lo’u agaga ma sa i ai pea ia te au [mo le tele o aso]. O iina na ou manatua ai, ina ua ou papatiso, sa ou ioe ai ou te ola i le tulafono o le sefuluai. Sa ou tauaveina i ou luga se matafaioi, mai lou Tama Faalelagi, ae le o faifeautalai. O le taimi lena, sa amata ai ona mou atu le mafatia, ae avanoa ai le nofoaga mo se lagona malie o le toafilemu ma le naunautai.

“‘O le po lena ina ua ou tatalo, sa ou ole atu ai i le Alii e faamagalo mai au i lo’u le mautonu. I le Aso Sa, … sa ou totogia la’u sefuluai ma taulaga ma lo’u fiafia tele. O se aso faapitoa lena. Sa ou lagona lava le fiafia ma le toafilemu ia te au lava ia ma le Tama Faalelagi’” (“O Le Faatuatua Ua Matou Savavali Ai,“ 82).

Fai atu i tagata aoga e mafaufau loloto i auala e mafai ona latou tali atu ai i lenei tulaga. Valaaulia tagata aoga e vaavaai mo mataupu faavae i le taimi o a latou suesuega o tusitusiga paia i le aso, e mafai ona fesoasoani ia i latou ao latou feagai ma ni tulaga talitutusa faapea.

Faamalamalama atu e faapea, i le amataga o le 1837, sa oo ai le Ekalesia i ni faigata e tele tautupe, e pei ona sa oo i ai le tele o tagata taitoatasi o le Ekalesia. O nei faafitauli tautupe na mafua mai i le pau o le tamaoaiga o le atunuu, vevesiga a le au faatupu faalavelave i Misuri ma Ohaio, lea na tutuliesea ai le Au Paia mai o latou fale, ma le le mananao o nisi o le Au Paia e ola i le tulafono o le faapaiaga. E oo ane i le 1838, faatasi ai ma le faatoateleina o le Au Paia ua faapotopoto atu i le Itumalo o Caldwell, Misuri, na manaomia ai e le Ekalesia ni tupe e ausia ai mea na poloaiina ai i latou e le Alii e fai, e pei o le fausiaina o le malumalu i Sisifo Mamao. Sa uunaia e epikopo i Ohaio ma Misuri le Au Paia e aumai a latou sefuluai ma taulaga i le faleteuoloa.

Valaaulia se tagata aoga e faitau leotele le folasaga o le vaega o le Mataupu Faavae ma Feagaiga 119. Fai atu i le vasega e mulimuli i le faitauga, ma vaavaai mo le mea na talosagaina e Iosefa Samita i lena taimi.

• O le a le mea na talosagaina e Iosefa Samita i le Alii?

Valaaulia se tagata aoga e faitau leotele le Mataupu Faavae ma Feagaiga 119:1–4. Fai atu i le vasega e mulimuli i le faitauga, ma vaavaai mo le tali a le Alii i le talosaga a Iosefa Samita.

• E tusa ai ma le fuaiupu e 4, o le a le sefuluai? (E tatau ona faailoa mai e tagata aoga le poloaiga lenei: Ua poloaiina i tatou e le Alii e totogi atu ia te Ia le tasi-vae-sefulu o a tatou mea faaopoopo ia avea o se sefuluai. Atonu e te manao e tusi le poloaiga lenei i luga o le laupapa.)

Ina ia fesoasoani i tagata aoga ia malamalama i le uiga o le upu mea faaopoopo i le fuaiupu e 4, valaaulia se tagata aoga e faitau leotele le saunoaga lenei mai ia Peresitene Howard W. Hunter:

“O le tulafono o loo faapea mai o le ‘tasi-vaesefulu o a latou mea faaopoopo uma.’ O mea faaopoopo o lona uiga o le polofiti, taui, po o le faaopoopoga. O le totogi o se tagata e faigaluega, o le polofiti mai le faagaoioia o se pisinisi, o le faaopoopoga a se tagata e totoina pe gaosia, po o le tupe maua a se tagata mai soo se punavai lava. Ua fetalai mai le Alii o se tulafono tumau ‘faavavau’ e pei ona sa i ai i taimi ua mavae” (i le Conference Report, Ape. 1964, 35).

• O le a se mea ua e aoao mai i le poloaiina e le Alii o le Au Paia e totogi sefuluai i se taimi sa matuai faigata ai ia i latou ona faia lena mea?

• O a ni itu e avea ai le totogi o le sefuluai o se faatinoga o le faatuatua?

Ina ia fesoasoani i tagata aoga ia malamalama i le auala e totogi ai sefuluai, ia faaali atu se fomu o Sefuluai ma Isi Taulaga. Fai atu i tagata aoga e vaai faalemafaufau e faapea, ua faatoa latou maua lava se tupe maua. Valaaulia se tagata aoga e ta’u mai se aofaiga.

• E fia le sefuluai e tatau ona totogi i lena aofaiga o le tupe?

Tusi le aofai o le sefuluai i le vaega sa‘o i luga o le fomu ma fai atu le fesili lenei:

• A tatou vaevaeina le 10 pasene o le tatou tupe maua i vaega eseese o le foai i luga o le fomu, pe ua tatou totogia se sefuluai atoa? (Ia mautinoa e malamalama tagata aoga o le 10 pasene o le latou tupe maua e tatau ona tusia o le sefuluai. Soo se foai latou te faia i isi tupe e faaopoopo atu lena i le 10 pasene.)

Vaevae tagata aoga i ni paga. Fai atu ia i latou e faamatala atu i le tasi ma le isi o latou malamalamaaga e uiga i auala e faaaogaina ai tupe o le sefuluai. Ona valaaulia lea o i latou e faitau le faamalamalamaga a le Alii i le Mataupu Faavae ma Feagaiga 119:2.

• E tusa ai ma le fuaiupu e 2, o a mea e faaaoga i ai tupe o le sefuluai? (O sefuluai e faaaoga “mo le fausiaina o maota o le [Alii]” [fausiaina o malumalu] ma “mo le faataatiaina o le faavae o Siona ma mo le perisitua” [faatupeina o isi vaega o le galuega a le Alii, e pei o le fausiaina ma le taulimaina o falelotu, faaliliuina ma le lolomiina o tusitusiga paia, ma le lagolagoina o le galuega faafaifeautalai ma talafaasolopito o aiga i le lalolagi atoa]. Atonu e te manao e faailoa atu e faapea, o aso nei e le o i ai se aitalafu a le Ekalesia. Tusi le upumoni lenei i luga o le laupapa: O tupe o le sefuluai e faaaoga e fausia ai malumalu ma faataunuu ai le galuega a le Alii.)

Mataupu Faavae ma Feagaiga 119:5-7

Ua faamalamalama mai e le Alii le tulafono o le sefuluai

Tala-faatino

O tala-faatino e fesoasoani i tagata aoga e faataitai ai le faaaogaina o aoaoga faavae ma mataupu faavae i tulaga moni o le olaga. O le a sili atu le aoga o tala faatino pe afai e lava ni faamatalaga ma se taimi e te tuuina atu i tagata auai e saunia ai. A o fai e tagata aoga tala faatino, latou te ono faia ni mea sese. Ia nofouta i o latou lagona ma uiga faaalia, ma ia faaeteete ia aua le faitio i a latou mea sese. I le faaiuga o le tala faatino, e mafai ona aoga le fesili atu i le au matamata pe i ai ni isi manatu atonu latou te ta’ua pe ana latou auai i le tala faatino.

Valaaulia ni tagata aoga se toalua ina ia auai i se tala faatino. Tofi se tagata aoga se toatasi e fai ma tagata faamaoni o le Ekalesia, ae o le tagata aoga lona lua e faia le matafaioi o se tasi e le auai i le Ekalesia. Tuu atu i le tagata aoga lona lua se fasi pepa ua tusia ai le fesili lenei: Sa ou faalogo e te aveina atu le 10 pasene o lau tupe maua i le tou ekalesia. Aisea o le a e manao ai e fai lena mea?

Fai atu i le tagata aoga lona lua e faitau leotele le fesili, ma valaaulia le tagata aoga muamua e tali i ai. A uma le faatinoga, fesili atu i le vasega pe mata o le a se latou tali i ai. Faailoa atu e tele tali lelei o loo i ai i lenei fesili.

Valaaulia se tagata aoga e faitau leotele le Mataupu Faavae ma Feagaiga 119:6-7. Fai atu i le vasega e vaavaai mo le mea e ausia e ala i le usiusitai i le tulafono o le sefuluai.

• E tusa ai ma le fuaiupu e 6, o le a le mea e ausia e ala i le usiusitai i le tulafono o le sefuluai? (Faapaiaina o le laueleele o Siona i le Alii.)

Ina ia fesoasoani i tagata aoga ia malamalama i lenei fuaiupu, faamatala atu faapea, o le faapaiaina e faatatau i le saoloto mai agasala—atoatoa, mama, ma paia e ala i le Togiola a Iesu Keriso. E le gata i lea, faamanatu atu i tagata aoga o Siona e sili atu nai lo o se nofoaga faaletino; o tagata o e “loto mama” (MF&F 97:21).

Valaaulia tagata aoga e aotele mai i a latou lava upu, aafiaga o le usiusitai i le tulafono o le sefuluai. E ui e ono faaaoga e tagata aoga isi faaupuga, e tatau ona latou faailoa mai le mataupu faavae lenei: O le totogiina o le sefuluai e faapaiaina ai i tatou o ni tagata taitoatasi ma o se Ekalesia. Tusi lenei mataupu faavae i luga o le laupapa. Atonu e te manao e fautua atu i tagata aoga e tusi i le laina i autafa o a latou tusitusiga paia.

Ina ia fesoasoani i tagata aoga ia malamalama ma lagona le taua o lenei mataupu faavae, fai atu ia te i latou e tali mai i se tasi o fesili nei i totonu o a latou api o le vasega po o api talaaga mo le suesueina o tusitusiga paia:

• E faapefea ona fesoasoani le totogiina o le sefuluai e faapaia ai oe?

• O a ni auala e te manatu o le a fesoasoani ai le totogiina o sefuluai i se tasi ina ia faapaiaina?

A maea le taimi, valaaulia ni nai tagata aoga e faamalamalama mai mea ua latou tusia. Atonu foi e te manao e faasoa atu se aafiaga, ma tuu atu lau molimau e uiga i le tulafono o le sefuluai.

Mataupu Faavae ma Feagaiga 120

Ua faatulaga e le Alii se aufono mo le vaaia o le auala e faaaogaina ai tupe o le sefuluai

Valaaulia se tagata aoga e faitau leotele le folasaga o le Mataupu Faavae ma Feagaiga 120. Fai atu i le vasega e mulimuli i le faitauga, ma vaavaai mo le faamoemoega o le faaaliga lenei.

Valaaulia se tagata aoga e faitau leotele le Mataupu Faavae ma Feagaiga 120:1. Fai atu i le vasega e mulimuli i le faitauga, ma vaavaai po o ai na filifilia e le Alii e avea ma se vaega o le aufono e filifili pe faapefea ona faaalu tupe o le sefuluai.

• O ai e iloiloaina auala e faaaogaina ai tupe o le sefuluai?

Atonu e te manao e faamalamalama atu e faapea, o le aufono o loo ta’ua i le Mataupu Faavae ma Feagaiga 120 e nafa ma le vaaiga o tupe e totogi atu ma tupe faaalu mo le Ekalesia atoa. O lenei aufono ua ta’ua i aso nei o le Aufono mo le Pulefaasoasoaina o Sefuluai ma e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu.

• E tusa ai ma le Mataupu Faavae ma Feagaiga 120:1, e faapefea ona filifili sui o lenei aufono i auala e faaaoga ai tupe o le sefuluai? (E ala i le “leo [o le Faaola] ia te i latou” I se isi faaupuga, e ala i faaaliga.)

Valaaulia tagata aoga e aotele i a latou lava upu le mea ua aoao mai e lenei faaaliga, po o ai e faatonuina le faaaogaina o tupe o le sefuluai. (E ui lava e mafai ona faaaoga e tagata aoga ni faaupuga eseese, ae e tatau ona latou faailoa mai le mataupu faavae lenei: O le Alii e taitaia le faaaogaina o tupe o le sefuluai e ala i Ana auauna filifilia.)

Ina ia fesoasoani i tagata aoga ia malamalama i le ala e faagaoioia ai lenei mataupu faavae i le Ekalesia i aso nei, faamalamalama atu, e auina atu e uarota po o paranesi taitasi ana tupe o le sefuluai na aoina i le laumua o le Ekalesia. E le iloiloina e taitai i le lotoifale le auala e faaaogaina ai nei tupe paia. O le Aufono mo le Pulefaasoasoaina o Sefuluai e faia na faaiuga i lalo o le taitaiga a le Alii.

Na saunoa Peresitene Gordon B. Hinckley e uiga i le faaaloalo loloto o loo i ai a le Aufono mo le Pulefaasoasoaina o Sefuluai i tupe o le sefuluai:

“Ou te teuina i luga o se kesi lauitiiti i tua o la’u kesi, ni tupe iti a le fafine ua oti lana tane, sa tuuina mai ia te au i Ierusalema i tausaga e tele ua mavae, o se faamanatu tumau, o le paia o tupe e tatau ona matou taulimaina. E aumaia mai le fafine ua oti lana tane, o ni tupe o sana taulaga faapea ma se sefuluai a se alii mauoa, ma e tatau ona faaaogaina ma le faaeteete ma le faautauta, mo faamoemoega o le Alii. Matou te taulimaina ma le faaeteete ma le malupuipuia, ma taumafai i soo se auala matou te mafai, ma ia mautinoa o loo faaaoga e pei ona matou lagona e finagalo ai le Alii mo le atinaeina o Lana galuega ma le faaleleia o Ona tagata” (“Na Le Faia Faalilolilo Lenei Mea,” Liahona, Ian. 1997, 58).

Valaaulia tagata aoga e faasoa mai soo se malamalamaaga faaopoopo po o a latou molimau e uiga i le tulafono o le sefuluai.

Tala ma Faamatalaga o Talaaga

Mataupu Faavae ma Feagaiga 119. O le tulafono o le sefuluai

Na faamalamalama e Elder Robert D. Hales o le Korama a Aposetolo e Toasefululua, nisi o faamoemoega faaleagaga o le totogiina o a tatou sefuluai:

“O le faavae o le ola faautauta o le tulafono o le sefuluai. O le faamoemoega autu lava o lenei tulafono o le fesoasoani lea ia tatou atiina ae le faatuatua i lo tatou Tama Faalelagi ma Lona Alo o Iesu Keriso. O le sefuluai e fesoasoani tatou te faatoilaloina ai o tatou manao mo mea o lenei lalolagi ma fai ai ma le lotomalie ni osigataulaga mo isi. O le sefuluai o le tulafono sili lea ua laugatasia ai [le au paia uma], e tusa lava pe o le a le mauoa po o le mativa tatou te i ai, e tutusa uma lava mea tatou te totogiina, le tasi vaesefulu o a tatou mea uma e maua i tausaga taitasi (tagai i le MF&F 119:4) ma e maua e i tatou uma le anoanoai o faamanuiaga ‘ina seia silisili ona tele’ (Malaki 3:10)” (“Ia Avea ma E Tuuina Atu ma le Faautauta Mea e Manaomia Faaletino ma le Faaleagaga,” Ensign po o le Liahona, Me 2009, 9).

Mataupu Faavae ma Feagaiga 120. O Le Aufono mo le Pulefaasoasoaina o Sefuluai

I le amataga, na faatonuina ai le au fautua maualuga i Misuri ina ia auai i le Aufono mo le Pulefaasoasoaina o Sefuluai. Mulimuli ane, sa tuuina atu ai le matafaioi i le Korama a Aposetolo e Toasefululua. O lea la, i le Ekalesia i le taimi nei, o le Aufono mo le Pulefaasoasoaina o Sefuluai ua aofia ai le Au Peresitene Sili, o le Korama a le Toasefululua, ma le Au Epikopo Pulefaamalumalu.

Na faamatala e Elder Robert D. Hales e uiga i sona aafiaga i le avea ai o se tasi o le Aufono mo le Pulefaasoasoaina o Sefuluai, i le taimi muamua a’o avea ma se Epikopo Pulefaamalumalu ma mulimuli ane, o se tasi o le Korama a Aposetolo e Toasefululua:

“Ma e pei ona faaalia mai e le Alii, o le faaaogaina o le sefuluai e fuafua lea e se aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu. O lo o patino lava le ta’u mai e le Alii, o le galuega a le aufono lea e taitaia i “la’u lava faatonuga ia te i latou’ [MF&F 120:1]. Ua faaigoaina lea aufono o le “Aufono mo le Pulefaasoasoaina o Sefuluai.

“E maoae foi le molimauina o lenei aufono a o gauai atu i le siufofoga o le Alii. E silafia e uso taitasi [o lea aufono] ma e latou te auai foi i le faatinoina o faaiuga uma a le aufono. E leai se faaiuga e faia sei vagana ua autasi i ai finagalo. O tupe uma o le sefuluai, e faaalu mo faamoemoega o le Ekalesia, e aofia ai le uelefea—o le tausiga o e matitiva ma e le tagolima, o malumalu, fauina ma le tausiga o falelotu, o aoga, mataupu aoaoina—a faapuupuu—o le galuega a le Alii. …

“Mo tagata o le Ekalesia ma i si i le lalolagi atoa, ou te molimau atu i le faamaoni o le Aufono mo le Pulefaasoasoaina o Sefuluai. … [ua ou saofai i] lenei aufono, a o avea ma Epikopo Pulefaamalumalu o le Ekalesia ma le taimi nei a o avea ma se tasi o le Korama a Aposetolo e Toasefululua. E aunoa lava ma se tuusaunoaga, o lo o faaaogaina tupe o le sefuluai a lenei Ekalesia mo Ona faamoemoega” (“O Le Sefuluai: O Se Tofotofoga o le Faatuatua ma Faamanuiaga e Faavavau,” Liahona, Nov. 2002, 28).