Lesona 17
Mataupu Faavae ma Feagaiga 9
Folasaga
Ia Aperila 1829, sa folafola mai foi ia Oliva Kaotui e mafai ona ia maua le meaalofa e faaliliu ai (tagai i le MF&F 6:25–29). Mulimuli ane, sa faatonuina ai Oliva i le mauaina o faaaliga i le faagasologa o le faaliliuga (tagai i le MF&F 8:1-4), ma sa taumafai o ia e faaliliu. E ui ina sa foliga mai na lelei lona amataga, ae sa “lē faaauau pea [o ia] e pei ona sa [ia] amata mai” (MF&F 9:5). Na maua e le Perofeta o Iosefa Samita se faaaliga e faamatala mai ai le mafuaaga sa le faamanuiaina ai taumafaiga a Oliva e faaliliu. I le faaaliga, na fetalai mai ai le Alii e le tatau ia Oliva ona toe faaliliu. Na tuuina mai foi e le Alii ni fautuaga faaopoopo i le mauaina o faaaliga.
Fautuaga mo le Aoaoina Atu
Mataupu Faavae ma Feagaiga 9:1–6, 11
Na faamalamalama mai e le Alii le mafuaaga na faafaigata ai ia Oliva Kaotui ona faaliliu
Fai i tagata o le vasega e ta‘u mai nisi o faaiuga taua o le a latou faia i le tausaga a sau. Ona fai atu lea i ai e lisi mai ni filifiliga taua o le a latou faia i le isi 5 i le 10 tausaga a sau. A o tali mai tagata o le vasega, atonu e te manao e tusi a latou tali i luga o le laupapa. Fai atu i tagata o le vasega e mafaufau i se tasi o nei faaiuga e faatatau i le fesili lenei.
-
O le a faapefea ona fesoasoani le sailia o le taitaiga mai le Alii ia te oe e faia ai lenei faaiuga?
A uma ona tali mai se tagata se toatasi pe toalua o le vasega, faailoa atu i tagata o le vasega, o lenei lesona o le a latou aoao ai i se aafiaga na tupu ia Oliva Kaotui a’o taumafai e faaliliu. Uunaia tagata o le vasega e vaavaai mo aoaoga ma mataupu faavae a o latou suesue i le Mataupu Faavae ma Feagaiga 9 e mafai ona fesoasoani ia i latou e maua ma iloa ai le taitaiga a le Alii a o latou faia ni faaiuga taua.
Faamanatu atu i tagata o le vasega, sa tuuina mai e le Alii ia Oliva se meaalofa o le faaliliu ma le faatagaga e faaliliu ai pe a manao i ai o ia (tagai i le MF&F 6:25-28). Na ta‘u mai e le Alii ia Oliva o lenei meaalofa o le faaliliu o le a oo mai i le mana o le Agaga Paia (tagai i le MF&F 8:1-2). Sa lelei lava le amataga o le taumafaiga a Oliva e faaliliu, ae mulimuli ane sa le’i faamanuiaina o ia. I le mavae ai o le taumafaiga a Oliva e faaliliu, na maua ai e Iosefa Samita le faaaliga lea ua tusia nei i le Mataupu Faavae ma Feagaiga 9.
Valaaulia se tagata o le vasega e faitau leotele le Mataupu Faavae ma Feagaiga 9:1-4, ma fai atu i le vasega e vaavaai mo le galuega na valaauina ai e le Alii ia Oliva e fai nai lo o le faaliliu.
-
O le a le galuega na tau e le Alii ia Oliva e fai?
Valaaulia se tagata o le vasega e faitau leotele le Mataupu Faavae ma Feagaiga 9:5–6, 11 . Fai atu i le vasega e mulimuli i le faitauga, ma vaavaai mo mafuaaga na le faamanuiaina ai Oliva ina ua ia taumafai e faaliliu.
Ina ia fesoasoani i tagata o le vasega ia malamalama atili i le fuaitau “sa e lē faaauau pea e pei ona sa e amata mai” (MF&F 9:5), valaaulia se tagata o le vasega e faitau le faamalamalamaga lenei a Peresitene Iosefa Filitia Samita:
“Na mafua le toilalo o Oliva ona sa le faaauau pea ona ia faia e pei ona sa ia amata ai, ma o le galuega o se galuega faigata, ae na aluese mai ia te ia lona faatuatua” (Church History and Modern Revelation [1953], 1:51).
-
E tusa ai ma le saunoaga a Peresitene Samita, aisea na le mafai ai e Oliva ona faaauau e pei ona sa ia amata ai? (Sa vaivai lona faatuatua.)
-
O a nisi o auala e mafai ai e le fefe, po o le leai o se faatuatua ona taofia i tatou mai le mauaina po o le galue foi i faaaliga mai le Alii?
-
O le a se mea ua aoao mai e le aafiaga o Oliva ia i tatou e uiga i le auala e maua ai faaaliga mai le Alii? (O se tasi o mataupu faavae e mafai ona faailoa mai e tagata o le vasega o le, ina ia maua faaaliga, e tatau ona tatou galulue i le faatuatua. (Atonu e te manao e tusi le mataupu faavae lenei i luga o le laupapa.)
Ina ia fesoasoani i tagata o le vasega ia malamalama lelei i le mataupu faavae lenei, fai atu i se tagata o le vasega e faitau le faamatalaga lenei mai ia Elder Jeffrey R. Holland, o le Korama a Aposetolo e Toasefululua:
“I le faagasologa o faaaliga ma le faia o faaiuga taua, o le fefe e i ai sona sao faataumaoi, o nisi taimi e taotaomia ai. Ia Oliva Kaotui, o le na misia le avanoa e na o le tasi le taimi e oo mai ai ona na te le’i faaaogaina le avanoa ina ua ia mauaina, sa fetalai mai le Alii, ‘Sa e lē faaauau pea e pei ona sa e amata mai.’ Pe le o se faaupuga masani ea lea ia i latou o e ua faatonuina ae ua fati ona o le faaluafesasi ma le toe tepa i tua i masalosaloga? …
“… A uma ona e mauaina le savali, a uma ona e totogia le tau e lagona ai Lona alofa ma faalogo i le afioga a le Atua, ia agai loa i luma. Aua le fefe, aua le faatautu, aua le taulai atu i mea e faaletaua, aua le faitio. … Faatea ese lou fefe ae saga’i ane e galue i le faaaliga ua e maua” (“Cast Not Away Therefore Your Confidence,” Ensign, Mat. 2000, 10).
-
O le a se taimi na e mauaina ai se tali mai le Alii ma e galue loa e fai e aunoa ma le faatuai? (Ia mautinoa ua malamalama tagata o le vasega e le tatau ona latou faasoaina mai ni aafiaga e patino naua pe le faalauaiteleina.)
Mataupu Faavae ma Feagaiga 9:7–10
Ua faaali mai e le Alii mataupu faavae o le puleaina o faaaliga
Faamalamalama atu na faaali mai e le Alii se mataupu faavae taua e uiga i auala e saili ai Lana taitaiga. Valaaulia se tagata o le vasega e faitau leotele le Mataupu Faavae ma Feagaiga 9:7–8. Fai atu i le vasega e mulimuli i le faitauga, ma vaavaai mo le isi mafuaaga na faafaigata ai ia Oliva ona maua le fesoasonai a le Alii i ana taumafaiga e faaliliu.
-
E tusa ai ma le Mataupu Faavae ma Feagaiga 9:7, o le a le mea na manatu Oilva sa na o le pau lea o le mea na manaomia ona ia faia e maua ai faaaliga a’o faaliliu?
-
O le a le mea na aoao mai e le Alii ia Oliva e tatau ona ia faia a’o le’i ole atu mo se taitaiga?
A o tali mai tagata o le vasega, atonu e te manao e fautuaina e maka le fautuaga a le Alii i a latou tusitusiga paia. Ina ia fesoasoani i tagata o le vasega e suesue ma malamalama i le uiga o nei fuaiupu, fai atu fesili nei:
-
O le a sou manatu i le uiga o le “e ao ina e suesue i ai i lou mafaufau”? (Ia mafaufau i faaiuga ma filifiliga, iloilo totoa isi mea e filifili ai.) Na faapefea ona e faia lenei mea ina ua manaomia ona e faia ni faaiuga?
-
E tusa ai ma le Mataupu Faavae ma Feagaiga 9:8, o a mea e tatau ona tatou faia pe a uma ona tatou sailiilia le mataupu o loo tatou mafaufau i ai? (Filifili po o le fea filifiliga tatou te talitonu o le mea tonu ona ave lea o le tatou faaiuga i le Tama Faalelagi i le tatalo.)
-
O a ni lesona e mafai ona tatou aoaoina mai i le Mataupu Faavae ma Feagaiga 9:8 e uiga i le mea ua faamoemoe mai e le Alii ia i tatou a o tatou sailia Lana taitaiga ma le taialaina? (E mafai ona tali mai tagata o le vasega i se mea e pei o le upumoni lenei: O le mauaina ma le iloaina o faaaliga e manaomia ai taumafaiga i la tatou pitolaau. (Tusi le upumoni lenei i luga o le laupapa.)
Ina ia fesoasoani i tagata o le vasega ia malamalama i lenei upumoni, fai atu le fesili lenei:
-
O le a lou manatu, e mafai faapefea e le suesue i ai o lou loto, ona fesoasoani i lou mauaina o faaaliga?
Ina ia fesoasoani i tagata o le vasega ia malamalama i le auala e mafai ona fesootai ai lenei upumoni i tulaga o o latou olaga, faitau faataitaiga lenei. A uma faataitaiga taitasi, ia valaaulia tagata o le vasega e faamatala mai, pe e mafai faapefea ona faaaoga e tagata taitoatasi o loo faamatalaina ona faaaoga upumoni o loo i le Mataupu Faavae ma Feagaiga 9:7-8 e maua ai faaaliga.
-
Ua maua e se alii talavou se ofo mo se galuega lelei, ae e manaomia ai lona faigaluega i le Aso Sa. O loo taumafai o ia e filifili pe talia le galuega.
-
Sa mafaufau se tamaitai talavou e uiga i uo o loo latou fegalegaleai faatasi ma aafiaga le lelei o loo faia ia te ia. E manao o ia e taofi le tafafao ma i latou, ae na te le iloa le auala sili ona lelei e aluese mai ai ia i latou.
-
O se tamaitai talavou o loo mafaufau i mea e tatau ona ia faia pe a maea le aoga maualuga. Na te iloa na te manao e faaauau lana aoga, ae e le o mautinoa po o le fea o faalapotopotoga faaleaoaoga e tatau ona ia auai.
A uma ona talanoaina faataitaiga nei ma le vasega, tuu atu i tagata o le vasega e mafaufau i o latou aafiaga i lenei mataupu faavae e ala i le tusia o le fesili lenei i luga o le laupapa: O le a se taimi na e lagonaina ai o au taumafaiga na fesoasoani i lou mauaina o faaaliga mai le Alii?
Valaaulia tagata o le vasega e mafaufau loloto i lenei fesili mo sina taimi. Ona fai atu lea i ni nai tagata o le vasega o e naunau e faasoa mai o latou aafiaga i le vasega atoa.
Valaaulia tagata o le vasega e iloilo le Mataupu Faavae ma Feagaiga 9:8, ma vaavaai pe mafai faapefea ona iloa e Oliva po o sa’o lana faaiuga po o le filifiliga.
-
O le a se mea e mafai ona tatou aoao mai i le fuaiupu 8 i le pe faapefea ona tali mai le Alii ia tatou fesili? (E mafai ona oo mai faaaliga e ala i o tatou lagona a’o tatou ole atu i le Alii mo le taitaiga. Tusi le upumoni lenei i luga o le laupapa.)
Atonu e te manao e faamanino atu, o le mu o le loto i totonu, lea na folafola mai ia Oliva, ua na o se auala lea e tasi e mafai ona faamautu mai ai e le Agaga se filifiliga sa’o. O faamauga a le Agaga e mafai ona oo mai i ni auala eseese e patino ma o’oo’o.
Ina ia fesoasoani i tagata o le vasega ia malamalama i auala atonu e faia e le Alii ina ia tatou “lagona ai ua sao [se faaiuga]” (MF&F 9:8), valaaulia se tagata o le vasega e faitau le faamalamalamaga lenei a Elder Richard G. Scott:
“O le lagona o le toafilemu o le molimau masani faamautu lea ua ou iloaina. Pe a oo ina ou matua popole lava e uiga i se mataupu taua, ma tauivi e foia e aunoa ma le faamanuiaina, ou te faaauau pea lava na taumafaiga i le faatuatua. Mulimuli ane, ona oo mai lea o se toafilemu e faatumulia ai au, ma foia o’u atugaluga, e pei lava ona sa Ia folafola mai” (“Faaaogaina o le Meaalofa Faalelagi o le Tatalo,” Ensign po o le Liahona, Me 2007, 10).
-
O le a se taimi na e lagonaina ai sa faamautu mai e le Alii se faaiuga na e faia? O a ni ou lagona e uiga i lena faamautinoaga? (Faamanatu atu i tagata o le vasega e le tatau ona latou faasoaina mai ni aafiaga ua patino naua pe le faalauaiteleina.)
Valaaulia se tagata o le vasega e faitau leotele le Mataupu Faavae ma Feagaiga 9:9. Fai atu i tagata o le vasega e faailoa mai fasifuaitau o loo faamatala ai auala e mafai ai ona tatou iloa o se faaiuga ua tatou faia e sa’o. Ina ia fesoasoani i tagata o le vasega ia malamalama i le fuaitau “o le mafaufauga papa,” valaaulia se tagata o le vasega e faitau le saunoaga lenei a Elder Richard G. Scott, lea o loo ia faamalamalama mai ai se tasi o auala e mafai ona oo mai ai se mafaufauga papa:
“Ia te a’u lava ia, o se lagona le mautonu, ma le manuia lena [mafaufauga papa]” (Faaaogaina o le Meaalofa Faalelagi o le Tatalo,” 10).
Valaaulia tagata o le vasega e tusi i a latou api o le vasega po o api talaaga mo le suesueina o tusitusiga paia, mea ua latou aoaoina e uiga i le mauaina o faaaliga, e mafai ona fesoasoani ia i latou e fai ai faaiuga taua.
Mataupu Faavae ma Feagaiga 9:12–14
Ua faamalosiau le Alii ia Oliva ia faaauau pea i le galuega ua valaauina o ia e fai
Faamanatu atu i tagata o le vasega e uiga i le valaauga o Oliva e avea ma se tusiupu mo le Perofeta (tagai i le MF&F 9:1, 4). Valaaulia tagata o le vasega e faitau le leoa le Mataupu Faavae ma Feagaiga 9:12–14 , ma vaavaai mo upu po o fasifuaitau atonu na faalototeleina ia Iosefa Samita ma Oliva Kaotui i lenei taimi. Valaaulia tagata o le vasega e faasoa mai upu ma fasifuaitau ua latou maua e anoa ma faamatala mai pe aisea.
Ina ia faaiuina lenei lesona, atonu e te manao e faasoa atu lau molimau e mafai ona tatou maua faaaliga faaletagata lava ia, a o tatou mulimuli i mataupu faavae o loo otooto mai i le Mataupu Faavae ma Feagaiga 9.
Tala ma Faamatalaga o Talaaga
Mataupu Faavae ma Feagaiga 9:7–9. Iloatino o tali i tatalo
Na tuuina mai e Elder Richard G. Scott o le Korama a Aposetolo e Toasefululua se fautuaga, i le mafuaaga tatou te lagona ai i nisi o taimi tatou te le’i mauaina se tali vave i tatalo:
“O le a lau mea e fai pe a ua uma ona e saunia ma le faaeteete, ua tatalo faatauanau, faatalitali mo se taimi umi mo se tali, ae e te le o lagonaina lava se tali? E mafai ona e manao e faaali atu le faafetai pe a tupu mai lena mea, aua o se faamaoniga lena o Lona talitonuina. Afai e te ola agavaa ma o loo ogatusa lau filifiliga ma aoaoga a le Faaola ma e manaomia ona e gaoioi, ia faia loa ma le faatuatuaina. A o e mataalia i uunaiga a le Agaga, e tasi lava pe lua ni mea o le a tulai moni mai i le taimi talafeagai: a le o le oo mai o le pogisa o le mafaufau, e ta’u mai ai o se filifiliga e le lelei, po o le toafilemu po o le mu o le loto o le a lagonaina, e faamautu ai e sa’o lau filifiliga. Afai e te ola amiotonu ma o loo e faatinoina ma le faatuatuaina, o le a le tuuina lava oe e le Atua e te alu mamao ese atu e aunoa ma se uunaiga lapata’i pe afai e sese lau faaiuga ua fai” (“Faaaogaina o le Faalelagi Meaalofa o le Tatalo,” Ensign po o le Liahona, Me 2007, 10).
Mataupu Faavae ma Feagaiga 9:7–9. O le a le mu o le loto?
Na faamalamalama mai e Elder Dallin H. Oaks:
“Ua ou feiloai i tagata sa fai mai ia te au, latou te lei mauaina lava se molimau mai le Agaga Paia ona latou te lei lagonaina le ’mu o o latou loto i totonu’ o i latou.
“O le a le uiga o le ‘mu o lou loto i totonu’? Pe e tatau ona pei o se faalogona o le vevela, e pei o le mu lea e maua mai i le afi? Afai o le uiga lena, ou te le’i lagonaina lava la se mu i totonu o lo’u loto. E mautinoa lava, o le upu ‘mu’ i lenei mau o lona uiga o se lagona o le mafanafana ma le toafimalie. O le molimau lena e maua e le toatele. O le ala lena e galue ai faaaliga.
“E moni lava, o le leo malu, ma itiiti, o lena tonu lava, e ‘malu’ ma ‘itiiti’” (“Teaching and Learning by the Spirit,” Ensign, Mat. 1997, 13).