Lesona 1
O Le Ata o le Faaolataga
Folasaga
Sa faatonuina e Peresitene Boyd K. Packer o le Korama a Aposetolo e Toasefululua ia faiaoga seminare e tuuina atu se aotelega puupuu o le ata o le faaolataga i le amataga o tausaga faaleaoaoga taitasi:
“O se aotelega puupuu o le ‘fuafuaga o le fiafia’ … afai e tuuina atu i le amataga lava ma toe foi faafia i ai, o le a avea ma vaega taua tele mo au tamaiti aoga. …
“E mafaufau tagata talavou pe ‘aisea?’— Aisea ua poloaiina ai i tatou e fai nisi o mea, ae aisea ua poloaiina ai i tatou e aua le faia isi mea? O se malamalama i le ata o le faaolataga, e tusa lava po o se tulaga otooto, e mafai ona tuuina atu ai i mafaufau talavou se ‘aisea’“ (”O Le Fuafuaga Sili o le Fiafia” [saunoaga i faiaoga o mataupu faalelotu a le OAE, 10 Aok., 1993], LDS.org).
O lenei lesona e tuuina atu ai se aotelega puupuu o le ata o le faaolataga. O loo taulai atu i le Togiola a Iesu Keriso, o “le mea moni tutotonu lea, o le faavae taua lea, ma le aoaoga faavae autu o le ata sili ma le faavavau o le faaolataga” (Jeffrey R. Holland, “Missionary Work and the Atonement,” Ensign, Mat. 2001, 8).
Fautuaga mo le Aoaoina Atu
O le fuafuaga o le fiafia a le Tama Faalelagi
Valaaulia se tagata o le vasega e faitau leotele le Mose 1:39. (Pe e mafai foi ona tauloto e le tagata o le vasega pe afai ua ia taulotoina.) Fai i tagata o le vasega e mulimuli i le faitauga, ma vaavaai mo le mea na ta’u mai e le Tama Faalelagi o le faamoemoega o Lana galuega. Tusi le faamatalaga lenei i luga o le laupapa: O le faamoemoega o le fuafuaga a le Tama Faalelagi, ina ia saunia se ala mo i tatou e maua ai le tino ola pea ma le ola e faavavau.
-
O le a le eseesega i le va o le tino ola pea ma le ola e faavavau? (O le tino ola pea o le ola e faavavau i se tulaga toetu; e ala i le Togiola a Iesu Keriso, o le a maua e tagata uma lenei meaalofa. O le ola e faavavau, po o le faaeaga, o le ola ai i le afioaga o le Atua e faavavau ma o tatou aiga; o lenei meaalofa e maua foi e ala i le Togiola a Iesu Keriso, ae e mo na o i latou o e usitai i tulafono ma sauniga o le talalelei.)
Ina ia fesoasoani i tagata o le vasega ia malamalama lelei i le upu “ola e faavavau,” valaaulia se tagata o le vasega e faitau le faamatalaga lenei mai ia Elder Bruce R. McConkie o le Korama a Aposetolo e Toasefululua:
O le soifuaga o le Atua o le ola e faavavau; o le ola e faavavau o le soifuaga lea o le Atua —e uiga tutusa lava ia faaupuga” (Mormon Doctrine, 2nd ed. [1966], 237).
-
O a ni nisi o faamanuiaga e tuuina mai ia i latou o e maua le ola e faavavau?
Tusi le ata o loo faaalia atu i luga o le laupapa. Valaaulia tagata o le vasega e tusi le ata pe tusi ni faamatalaga i a latou api o le vasega po o api talaaga mo le suesueina o tusitusiga paia a o latou aoao e uiga i le ata o le faaolataga i lenei lesona.
Faamalamalama atu faapea, i lo tatou olaga i le muai olaga, sa tatou nonofo o ni agaga i le afioaga o lo tatou Tama Faalelagi. O iina na tatou aoao ai e uiga i le fuafuaga a le Tama Faalelagi mo lo tatou fiafia ma le pe faapefea i le mulimuli i lena fuafuaga ona fesoasoani ia i tatou e faataunuu Ona faamoemoega mo i tatou (tagai i le MF&F 138:55–56; Aperaamo 3:22-28).
-
Na faapefea ona ese i tatou mai lo tatou Tama Faalelagi i le olaga i le muai olaga? (Sa i ai Lona tino ma uiga na faaatoatoaina. Ae o i tatou e leai.)
-
I le olaga i le muai olaga, o le a le mea na faailoa mai e le Tama Faalelagi ia i tatou e fesoasoani ina ia tatou maua ai le tino ola pea ma le ola e faavavau? (O le ata o le faaolataga.)
Faamalamalama atu tatou te faaaogaina le upu olaga i le tino e faatatau i lo tatou olaga i le lalolagi. E pei ona faaalia i le ata o loo i ai , faaopoopo atu i le laupapa se li’o laumiumi e faatusa i ai le olaga i le lalolagi, ma faailoga ai i le fuaitau Olaga i le tino. Tusi se aū mai le olaga a’o le’i o mai i le lalolagi e agai atu i le Olaga i le tino.
Tuu atu i tagata o le vasega se taimi e mafaufau loloto ai i le fesili lenei:
-
Aisea na manaomia ai ona tatou tuua le afioaga o le Atua ina ia mafai ona [tatou] avea atili e faapei o Ia? (O tali a tagata o le vasega e mafai ona aofia ai le faamatalaga lenei: ina ia maua se tino; ia aoao ma tuputupu ae e ala i le faaaogaina o lo tatou faitalia.)
A uma ona tali mai ni nai tagata o le vasega, valaaulia se tagata o le vasega e faitau leotele le faamalamalamaga lenei a Peresitene Spencer W. Kimball:
“Ua tuuina mai e le Atua ia i tatou se fuafuaga. Ua Ia auina mai i tatou uma i le lalolagi ia maua ni tino, ma ia maua ai le poto masani ma le tuputupu ae” (The Teachings of Spencer W. Kimball, ed. Edward L. Kimball [1982], 25).
-
E tusa ai ma le saunoaga a Peresitene Kimball, o a nisi o mafuaaga ua auina mai ai e le Atua i tatou i le lalolagi? (A o tali mai tagata o le vasega, e tatau ona latou faailoa mai le upumoni lenei: Ua auina mai i tatou e le Atua i le lalolagi ia maua ni tino, ma ia maua ai le poto masani ma le tuputupu ae.)
-
O le a le matafaioi a luitau o le faaosoosoga, ma‘i, faanoanoa, tiga, lotovaivai, manaoga faapitoa, ma isi faigata faaletino i a tatou taumafaiga e maua le ola e faavavau?
Valaaulia se tagata o le vasega e faitau leotele le Mataupu Faavae ma Feagaiga 20:19–20. Fai atu i le vasega e mulimuli i le faitauga ma faailoa mai faafitauli e mafai ona taofia ai i tatou mai le mauaina o le ola e faavavau.
-
O a nisi o faafitauli tatou te feagai i le olaga nei e mafai ona taofia i tatou mai le mauaina o le ola e faavavau? (A o tali mai tagata o le vasega, fesoasoani ia i latou e faailoa mai le upumoni lenei: O le agasala e taofia ai i tatou mai le avea e faapei o le Tama Faalelagi ma le toe foi atu e mau faatasi ma Ia. Tagai foi i le Mose 6:57, lea e aoao mai e faapea, o le salamo tatou te toe foi atu ai e mau faatasi ma le Atua.)
I luga o le laupapa, tusi le Agasala i luga o le ata o loo lata ane i le upu Olaga Faaletino. Valaaulia se tagata se toatasi o le vasega e faitau leotele le 1 Nifae 10:21, ae o le isi e faitau le Mose 6:57, ma le isi e faitau le Alema 41:10–11. Fai atu i le vasega e mulimuli i le faitauga, ma vaavaai mo mafuaaga, pe aisea e taofia ai e le agasala i tatou mai le avea e pei o le Tama Faalelagi ma le mauaina o le ola e faavavau.
-
E tusa ai ma nei fuaiupu, aisea e taofia ai e le agasala i tatou mai le avea e faapei o le Tama Faalelagi ma le mauaina o le ola e faavavau? (E mafai ona tuuina mai e tagata o le vasega ni tali eseese. Fesoasoani ia i latou e faailoa mai le upumoni lenei: E leai se mea eleelea e mafai ona nofo i le afioaga o le Atua.)
Valaaulia ni tagata se toalua o le vasega e o mai i luma o le potuaoga. Fai atu i se tasi e uu se ata o Iesu o loo Tatalo i Ketesemane (Tusi Ata o le Talalelei [2009], nu. 56; tagai foi i le LDS.org) ma le isi e uu se ata O Le Faasatauroga (nu. 57). Valaaulia se tagata lona tolu o le vasega e faitau leotele le Mataupu Faavae ma Feagaiga 76:40–42 . Fai atu i le vasega e mulimuli i le faitauga ma faailoa mai le mea na tuuina mai e le Tama Faalelagi ina ia mafai ona tatou faatoilalo le agasala.
-
E tusa ai ma le Mataupu Faavae ma Feagaiga 76:40–42, o le a le mea e mafai ona tatou faatoilalo ai le agasala? (Atonu e tali mai tagata o le vasega i ni upu eseese, ae ia mautinoa latou te faailoa mai le upumoni lenei: Na puapuagatia Iesu Keriso ma sa faasatauroina mo agasala a tagata uma.)
Fai atu i tagata o le vasega o loo uuina ata e faamatala mai, po o le a le mea e faia e mea na tutupu o loo faaalia mai i a latou ata, i o tatou gafatia e faatoilalo aafiaga o le agasala. Faaali atu ata i luga o le laupapa e pei ona faaalia i le ata o loo auina atu ai.
Tusi mau faasino nei i luga o le laupapa: MF&F 18:22-23; MF&F 25:13, 15. Tofitofi tagata o le vasega e galulue taitoalua. Fai atu i le isi paga e faitau le Mataupu Faavae ma Feagaiga 18:22-23, ae fai atu i le isi e faitau le Mataupu Faavae ma Feagaiga 25:13, 15. Fai atu ia te i laua uma e vaavaai mo mea e tatau ona tatou faia e faaaoga ai le mana faamama o le Togiola ma maua ai le ola e faavavau. Valaaulia i latou e faasoa atu i a latou paga mea na latou maua.
-
O le a se mea e tatau ona tatou faia e o mai ai ia Iesu Keriso ma maua ai faamanuiaga o Lana taulaga togiola? (O tali atonu e aofia ai le faaalia o le faatuatua ia Iesu Keriso, salamo, papatisoina, mauaina o le Agaga Paia, tumau i le faatuatua, tausia o feagaiga, ma usiusitai i poloaiga. E pei ona faaalia i le ata o loo sosoo ai, tusi se aū mai le agavale agai i le taumatau e oo atu i le li’o pito i lalo. Tusi tali a tagata o le vasega i luga o le faasologa o le aū.)
Fai se aotelega o tali a tagata o le vasega i le molimau atu afai tatou te usiusitai i mataupu faavae ma sauniga o le talalelei, e mafai ona tatou faatoilaloina agasala e ala i le Togiola a Iesu Keriso. Ia faamatala atu, pe a tatou osia ma tausia feagaiga o le papatisoga, e faamagaloina i tatou ma le alofa mai ia tatou agasala pe afai tatou te salamo. E le gata i lea, e ala i le meaalofa o le Agaga Paia, tatou te maua ai i aso taitasi le fesoasoani i le ala e agai atu i le ola e faavavau.
-
E faapefea ona fesoasoani le Atua ia te oe e ala i le Agaga Paia i au taumafaiga i aso taitasi e ola i le talalelei?
Faamalamalama atu e faaopoopo atu i le agasala, e i ai se puniala lona lua e tatau ona faatoilalo ina ia mafai ona tatou maua le ola e faavavau. Fesili atu i tagata o le vasega pe mafai ona latou faailoa mai lenei faafitauli.
A uma ona tali mai tagata o le vasega, tusi le Oti Faaletino i luga o le ata i talane o le upu Agasala. Valaaulia se tagata o le vasega e faamatala mai le mea e tupu i o tatou agaga ma tino pe a tatou oti. Valaaulia se tagata o le vasega e faitau leotele le Mataupu Faavae ma Feagaiga 93:33–34 ae o le isi tagata o le vasega e faitau leotele le Mataupu Faavae ma Feagaiga 130: 22. Fai atu i le vasega e mulimuli i le faitauga, ma vaavaai mo se tali i le fesili lenei:
-
E faapefea ona avea le tuueseesega tumau o o tatou agaga ma tino ma se puniala i le avea ai faapei o le Atua? (E tatau ona faailoa mai e tagata o le vasega le aoaoga faavae lenei: E le mafai ona avea i tatou faapei o le Tama Faalelagi e aunoa ma se tino o aano ma ivi.)
Faaali atu i le vasega le ata o Maria ma Iesu Keriso Toetu (Tusi Ata o le Talalelei, nu. 59; tagai foi i le LDS.org), ma fai atu i se tagata o le vasega e faamatala mai le mea o loo tupu i le ata. Ona valaaulia lea o se tagata o le vasega e faitau leotele le Alema 11:42–44. Fai atu i le vasega e mulimuli i le faitauga ma faailoa mai mea na faia e Iesu Keriso ina ia mafai ona tatou faatoilaloina le puniala o le oti faaletino.
-
E tusa ai ma nei fuaiupu, o le a le mea na faia e Iesu Keriso ina ia mautinoa ai e mafai ona tatou faatoilaloina le oti faaletino? (Fesoasoani i tagata o le vasega ia iloa le aoaoga faavae lenei: Ona o le Toetu o Iesu Keriso, o le a toetutu ai tagata uma ma o le a ola e faavavau.)
Valaaulia ni nai tagata o le vasega e feauauai e faitau leotele mai i le Mataupu Faavae ma Feagaiga 138:14–17.
-
E faapefea ona aumai e le “faamoemoe mo se toetu mamalu” le olioli ia te oe ma lou aiga?
Faamanatu i tagata o le vasega o le tino ola pea o se meaalofa o le a mauaina e tagata uma. Ae o le ola faavavau, o le meaalofa lea a le Alii mo na o i latou o e usitai i tulafono ma sauniga o Lana talalelei. Tuu le ata o Maria ma Iesu Keriso Toetu i luga o le laupapa i talane o isi ata. Tusi le O Le Togiola a Iesu Keriso i luga a’e o ata e tolu.
Tusi se isi lio i totonu o le li’o laumiumi pito i luga ma faaigoa o le Ola Faavavau. Tusi se aū e alu i luga ma lalo mai le i’u o le aū o loo i le pito i lalo o le ata e agai atu i upu Ola Faavavau.
Fai atu i tagata o le vasega e aotele mai mea ua latou aoaoina e uiga i le fuafuaga a le Tama Faalelagi mo lo tatou fiafia. Valaaulia i latou e vaavaai mo se avanoa e aoao atu ai le fuafuaga o le fiafia i se tagata o le aiga po o se uo.
Ina ia faaiu le lesona, faamatala atu i tagata o le vasega, i a latou suesuega o le Mataupu Faavae ma Feagaiga, o le a latou aoao ai nisi upumoni se tele e faatatau i le fuafuaga o le fiafia. O lenei lesona ua tuuina atu ai na o sina aotelega puupuu. Faasoa atu lau molimau e uiga i upumoni na talanoaina e le vasega i lenei lesona.
Tala ma Faamatalaga o Talaaga
O le Togiola ua i le totonugalemu o le ata o le faaolataga
Sa molimau mai Elder Dallin H. Oaks o le Korama a Aposetolo e Toasefululua:
“Ua ta‘ua le taulaga togiola a Iesu Keriso o le ’mea aupito sili ona taua o mea uma na tutupu mai le gafoaga o le foafoaga seia oo i tausaga e le muta o le faavavau.’ [Bruce R. McConkie, The Promised Messiah: The First Coming of Christ (1981), 218.] …
“O lena taulaga—o leTogiola a Iesu Keriso—ua i ai lea i le totonugalemu o le ata o le faaolataga” (“Ositaulaga,” Ensign po o le Liahona, Me 2012, 19).
O lesona o le olaga faitino
Ua aoao mai e Elder Joseph B. Wirthlin o le Korama a Aposetolo e Toasefululua, o luitau tatou te feagai i le olaga faitino e mafai ona faamamaina ai i tatou:
“O le aoao e onosaia taimi o faanoanoaga, mafatiaga, ma le faavauvau o se vaega o lo tatou aotauina i mea moni o le olaga. O nei aafiaga, e ui ina e masani ona faigata ona onosaia i le taimi e tupu ai, ae o ituaiga aafiaga moni ia e faalauteleina ai o tatou malamalamaaga, fausia o tatou tagata, ma faateleina lo tatou agalelei mo isi” (“Ia Tuu Po o le A Lava se Mea e Tupu, Ia Fiafia Pea,” Ensign po o le Liahona, Nov. 2008, 27).
Ua aoao mai le Tusi a Mamona, o se tasi o faamoemoega o le olaga faaletino o le olioli: “Na paʼū Atamu ina ia i ai tagata; ma ua i ai tagata, ina ia latou maua le olioli” (2 Nifae 2:25).
O loo faatali mai le Tama Faalelagi i lo tatou toe foi atu
Na molimau mai Peresitene Thomas S. Monson i le naunautaiga o le Atua mo Ana fanau taitoatasi e toe foi atu i Lona afioaga:
“O le mamalu selesitila lea tatou te sailia. O le i ai i le afioaga o le Atua lea tatou te mananao e nonofo ai. O se aiga e faavavau lea tatou te mananao e avea ai. O na faamanuiaga e maua i se olaga atoa o le taumafai, saili, salamo, ma i’u ai ina faamanuiaina. …
E olioli lo tatou Tama Faalelagi ia i latou o e tausia Ana poloaiga. E popole foi o Ia mo le tamaitiiti ua leiloa, le tagata talavou faiaga, le talavou ua se, ma le matua faatamala. E fetalai mai ma le agalelei le Matai ia i latou nei ma o le mea moni lava, i tagata uma: ‘Foi mai. O mai i luga. O mai i totonu. O mai i le fale. O mai ia te a’u.’
“… I le avea ai o Sana molimau faapitoa, ou te molimau atu ia te outou, o loo soifua o Ia ma o loo faatali mai i lo tatou toe foi manumalo atu” (“O Le Tausinioga o le Olaga,” Ensign po o le Liahona, Me 2012, 93).
“Avea ma tagata o loo finagalo lo tatou Tama Faalelagi e avea ai i tatou”
Na aoao mai Elder Dallin H. Oaks:
“O le Faamasinoga Mulimuli ua le na o se iloiloga o le aofaiga atoa o amioga lelei ma leaga—o mea ua tatou faia. O se faailoaga o aafiaga mulimuli o a tatou galuega ma mafaufauga—o tagata ua aveaai i tatou. E lē lava mo soo se tasi le tau lava ina faatino. O poloaiga, sauniga, ma feagaiga o le talalelei e le o se lisi o ni tupeteu ua manaomia e fai ai se teugatupe faalelagi. O le talalelei a Iesu Keriso o se fuafuaga ua tau mai ai ia te i tatou le ala e avea ai i tatou ma e ua finagalo ai lo tatou Tama Faalelagi” (“O Le Luitau ia Avea ma se Tasi,” Liahona, Ian. 2001, 40).
O le a le eseesega i le va o le tino ola pea ma le ola e faavavau?
Na aoao mai Elder Joseph B. Wirthlin:
“O le ola faavavau … o se mea e matuai ese lava [mai le tino ola pea]. O le tino ola pea e faatatau i le aofai. O le ola e faavavau e faatatau i le tulaga lelei. …
“O le ola e faavavau o le faatumutumuga lea o le olaga. I le avea ai ma fanau faaleagaga a le Atua, o oe ma au o ni suli i lenei tamaoaiga taugata, o le au lagolagosua i se lumanai matagofie, o e mauaina le alofa tunoa.
“Afai o le tino ola pea o le galuega lea a le Atua, o lona uiga la o le ola e faavavau o le mamalu lea o le Atua” (“What Is the Difference between Immortality and Eternal Life?” New Era, Nov. 2006, 8).