Seminare ma Inisitituti
Faatomuaga i le Mataupu Faavae ma Feagaiga ma le Talafaasolopito o le Ekalesia o le Tusi Lesona a le Faiaoga Seminare

Faatomuaga i le Mataupu Faavae ma Feagaiga ma le Talafaasolopito o le Ekalesia o le Tusi Lesona a le Faiaoga Seminare

O Lo Tatou Faamoemoega

O Le Sini Faamoemoeina o Seminare ma Inisitituti o Mataupu Faalelotu:

“O lo tatou faamoemoega o le fesoasoani lea i le autalavou laiti ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o o latou aiga, ma isi mo le ola e faavavau faatasi ma lo latou Tama i le Lagi.”

Ina ia ausia la tatou faamoemoega, tatou te aoao atu i tagata aoga ia aoaoga faavae ma mataupu faavae o le talalelei o loo maua i tusitusiga paia ma upu a perofeta. O nei aoaoga faavae ma mataupu faavae e aoao atu i se ala e tau atu ai i le malamalama ma le faagaeetiaina. Tatou te fesoasoani i tagata aoga e faataunuu la latou matafaioi i le faagasologa o le aoaoina ma saunia ai i latou e aoao atu le talalelei i isi.

Ina ia fesoasoani e ausia nei faamoemoega, e unaina oe ma tagata aoga e te aoaoina ia faaaofia ai vaega nei o Mataupu Taua o le Aoaoina Atu ma le Aoaoina Mai o le Talalelei, a o outou suesue faatasi i tusitusiga paia:

  • Aoao atu ma aoao mai e ala i le Agaga.

  • Atiina ae se siosiomaga e aoao ai le alofa, faaaloalo, ma le faamoemoega.

  • Suesue ia tusitusiga paia i aso taitasi ma faitau anotusi mo le kosi. (E mafai ona maua siata mo le tulitulimatagauina o le faitauga o tusitusiga paia i le faaopoopoga o loo i le faaiuga o le tusi lesona lenei, i le LDS.org, ma i le store.lds.org [aitema nu. 10494].)

  • Malamalama i talaaga ma anotusi o tusitusiga paia ma upu a perofeta.

  • Faailoa, malamalama, ma lagona le moni ma le taua o, ma faaaoga ia aoaoga faavae ma mataupu faavae o le talalelei.

  • Faamalamalama, faasoa atu, ma molimau atu e uiga i aoaoga faavae ma mataupu faavae o le talalelei.

  • Ia iloa lelei fuaitau o mau autu ma Aoaoga Faavae Autu.

Ua saunia lenei tusi lesona a le faiaoga e fesoasoani ia te oe ia faamanuiaina i le ausiaina o nei faamoemoega.

teine o loo faitauina tusitusiga paia

Mataupu Aoaoina a le Seminare ma le Autalavou i le Aso Sa

Fesoasoani i le autalavou ia liua i le talalelei a Iesu Keriso

O Se Taumafaiga Tuufaatasi

Ua valaauina e le Au Peresitene Sili ia matua, faiaoga, ma taitai e “fesoasoani i le autalavou e aoao le talalelei e ala i a latou lava suesuega ma le faatuatua, ina ia iloa le moni o le talalelei mo i latou lava, ma ia faamalolosia o latou aiga ma isi e ala i le faasoaina atu o o latou aafiaga, malamalamaaga, ma molimau.” O le faia o lena mea o le a fesoasoani ia i latou e mulimuli ai i le auala “o le a taitai atu ai i latou i le liua” (Aoaoina Atu o le Talalelei i le Ala a le Faaola [2012], 2).

I lalo o le taitaiga a le perisitua, ua galulue ai i se taumafaiga tuufaatasi ia faalapotopotoga a Alii Talavou, Tamaitai Talavou, Aoga Sa, ma le Seminare, e atiina ae ia mataupu aoaoina e fesoasoani ai i le autalavou ia ausia nei faamoemoega. A o i ai i faalapotopotoga taitasi se matafaioi tulaga ese i le faamalolosia o le autalavou, o le faamoemoega autu lava o mataupu aoaoina uma a le autalavou, o le taitai atu lea o le autalavou i le Faaola ma aumaia ai lo latou liua i Lana talalelei. Ua mamanuina ia mataupu aoaoina mo faalapotopotoga taitasi o le autalavou ina ia galulue soosoo tauau ma isi faalapotopotoga a le autalavou. Mo se faataitaiga:

  • O le “Aoao Atu i le Ala a le Faaola” (o se vaega ua lomia i tusi o mataupu aoaoina a le seminare ma le autalavou i Aso Sa) sa atiina ae faatasi e faalapotopotoga a le autalavou e fesoasoani ai i faiaoga, matua, ma taitai e aoao ai i le ala na aoao atu ai le Faaola (tagai i le Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], v–vii; Aoaoina Atu o le Talalelei i le Ala a le Faaola [2012], 4–5). O le “Aoao Atu i le Ala a le Faaola” e suesue ai auala na fesoasoani ai le Faaola i isi e faapatino ia upumoni paia sa Ia aoaoina atu, e ala i le uunaia o i latou e galulue i le faatuatua ona auai lea i se taumafaiga taulamua i le faagasologa o le aoaoina. O nei mataupu faavae o le aoao atu ma le aoaoina mai o le talalelei, ua aofia ai i totonu o mataupu aoaoina mo faalapotopotoga uma a le autalavou.

  • O mataupu aoaoina mo faalapotopotoga uma a le autalavou o loo faamamafa ai ia lava aoaoga faavae autu. O Aoaoga Faavae Autu ua faamamafaina i mataupu aoaoina a le seminare e tutusa ma Mataupu Faaleaoaoga Faavae Autu o loo aoaoina i mataupu aoaoina a le autalavou. I vasega i Aso Sa, e taulai atu mataupu aoaoina a le autalavou i se tasi o aoaoga faavae nei i masina taitasi. I le seminare, e faamamafaina atu nei aoaoga faavae a o suesue e le autalavou ia tusitusiga paia faavae taitasi. O lenei taumafaiga tuufaatasi e fesoasoani e faamalosia ai upumoni o loo aoao e le autalavou i Aso Sa, faapea ma mea o loo latou aoaoina i le potuaoga o le seminare, ma faapena foi i le isi itu. O le faamamafaina o nei aoaoga faavae autu i mataupu aoaoina uma a le autalavou, e mafai ai ona maua se aafiaga sili atu le solomalie ma faaauau pea mo le autalavou, faiaoga ma matua.

  • O mataupu aoaoina mo faalapotopotoga taitasi ua mamanuina e fesoasoani ai i le autalavou e faateleina lo latou malamalamaaga ma molimau o le talalelei ma aoao i auala e aoao atu ai i isi. Ina ia ausia lenei mea, o tusi ma mea e faaaoga i le seminare ma mataupu aoaoina a le autalavou, ua faaagatonu atu i le fesoasoani i le autalavou ina ia atili taulamua i le avea ma nisi e aoaoina le talalelei, iloa upumoni o le talalelei mo i latou lava, ma faamalamalama atu, faasoa atu, ma molimau atu e uiga i nei upumoni i isi.

  • O i latou o e ua valaauina e faiaoga i le Aoga Sa, Alii Talavou, Tamaitai Talavou, po o le Seminare atonu o le a vaai i se faiga faifaipea i le taulimaina o le aoaoina atu ma le aoaoina mai o le talalelei. O tusi ma mea e faaaoga i le seminare ma mataupu aoaoina a le autalavou, e tau fai taulai atu ia fesoasoani i le autalavou e faaloloto lo latou liua. O se taunuuga o lenei faamoemoega fai faatasi, o le tele o punaoa faaleaoaoga ma ala o faasalalauga na atiina ae mo faiaoga e faaaogaina mataupu aoaoina a le autalavou i Aso Sa, e faaaoga faatasi e le seminare ma o loo aofia ai i luga o le LDS.org.

Vaega Tulaga Ese

O faalapotopotoga taitasi o le autalavou ua i ai se matafaioi tulaga ese i le fesoasoani atu i le autalavou ia liuaina i le talalelei (tagai i le Aoaoina Atu o le Talalelei i le Ala a le Faaola, 12–13). Mo se faataitaiga, o le mataupu aoaoina e faaaogaina i le Aoga Sa, Alii Talavou ma Tamaitai Talavou o loo taulai atu i se mataupu faaleaoaoga faavae autu e tasi i masina taitasi. I le faatusatusa atu i ai, o tagata aoga i le seminare e aoao i aoaoga faavae ma mataupu faavae o le talalelei a o latou suesue i tusitusiga paia faavae mai le amataga e oo i le faaiuga.

O le suesueina o le talalelei i autu i vasega i Aso Sa, e mafai ai e le autalavou ona faalolotoina lo latou malamalama i aoaoga faavae patino e ala i le suesueina o itu eseese o na upumoni ma le aoaoina atu i le tasi ma le isi. I le seminare, e mafai e le autalavou ona iloa ma malamalama i na lava aoaoga faavae, i le talaaga o upumoni e faatatau i ai o loo i tusitusiga paia, ma vaaia ai o faaalia i olaga ma aoaoga a tagata i tusitusiga paia. E le gata i lea, o le suesueina o tusitusiga paia mai le amataga i le faaiuga, e mafai ai e le autalavou ona tuputupu ae i lo latou talitonuga e faapea “O loo fetalai moni mai le Tama Faalelagi ia i latou e ala mai i tusitusiga paia, ma [maua] ai le to’a e mafai ona latou liliu atu i tusitusiga paia ma maua ai tali i o latou faafitauli ma a latou tatalo” (Howard W. Hunter, “Eternal Investments” [address to Church Educational System religious educators, Feb. 10, 1989], 2; LDS.org). E oo foi ina masani le autalavou i tusitusiga paia ina ia mafai ona latou faaaogaina ma le mataalia i le avea ai ma ni faifeautalai, taitai ma matua i le lumanai. O ia auala e lua o le suesueina o aoaoga faavae o le talalelei, e galulue faatasi e fesoasoani i le autalavou e faaloloto o latou malamalama o le talalelei ma saunia i latou e aoao atu le talalelei i isi.

Sauniuniga o le Lesona

Na poloaiina e le Alii i latou o e aoao atu Lana talalelei ia “aoao atu …mataupu autu o lau talalelei, ua i ai i totonu o le Tusi Paia ma le Tusi a Mamona, ua i ai le atoatoaga o le talalelei” (MF&F 42:12). Sa Ia faatonu atili mai o nei upumoni e tatau ona aoaoina e pei ona “taitaiina ai …e le Agaga,” lea e “tuu atu …e ala i le tatalo o le faatuatua” (MF&F 42:13–14). A o e saunia lesona taitasi, ia saili ma le agaga tatalo le taitaiga a le Agaga e fesoasoani ia e malamalama i tusitusiga paia ma aoaoga faavae ma mataupu faavae o loo i ai. E faapena foi, mulimuli i uunaiga a le Agaga pe a fuafuaina pe faapefea ona fesoasoani i au tagata aoga ia malamalama i tusitusiga paia, ia aoaoina e le Agaga Paia, ma lagonaina se manao e faaaoga mea ua latou aoaoina.

I lenei kosi, o le Mataupu Faavae ma Feagaiga o lau tusiga autu lea a o e sauniuni ma aoao atu. Ia suesue ma le agaga tatalo ia vaega po o fuaiupu o le a e aoaoina atu. Saili ia malamalama i talaaga ma anotusi o le poloka mau, e aofia ai le tala, tagata, nofoaga, ma mea na tutupu. A o e faamasani i le talaaga ma anotusi o poloka mau taitasi, saili ia faailoa aoaoga faavae ma mataupu faavae o loo i ai, ma filifili po o fea o nei upumoni e sili ona taua ia malamalama ma faaaoga e au tagata aoga. O le taimi lava ua e iloaina ai le vaega e te taulai atu i ai, e mafai ona e iloilo po o le fea o metotia, faiga, ma gaoioiga o le a sili atu ona lelei e fesoasoani ai i au tagata aoga ia aoao ma faaaoga ia upumoni paia o loo maua i tusitusiga paia.

O lenei tusi lesona ua mamanuina e fesoasoani ia te oe i lenei faagasologa. Ia iloilo ma le totoa ia mea e faaaoga i lesona e fetaui ma le poloka mau o le a e aoaoina atu. Atonu e te filifili e faaaoga uma po o se vaega ia fautuaga mo se poloka mau, pe atonu e te fetuunaia ia manatu fautuaina e tusa ai ma manaoga ma tulaga o tagata aoga e aoaoina.

E taua lou fesoasoani i tagata aoga e suesue i le poloka mau atoa i lesona taitasi. O le faia o lena mea, o le a fesoasoani ai i tagata aoga ia maua le savali atoa na faamoemoe le tusi mau e faailoa mai. Ae peitai, ao e fuafuaina lau lesona, e iu ina e iloa e le lava sou taimi i le piriota o le vasega e faaaoga ai fautuaga uma faafaiaoga o loo i le tusi lesona. Saili le taitaiga a le Agaga ma mafaufau ma le agaga tatalo i manaoga o au tagata aoga a o e fuafua po o le fea vaega o le poloka mau e faamamafa atu, ina ia fesoasoani i tagata aoga ia lagona le moni ma le taua o upumoni o le talalelei ma faaaoga ai i o latou olaga. Afai e puupuu le taimi, atonu e manaomia lou fetuunai o isi vaega o le lesona, e ala i le aotele faapuupuu o ni fuaiupu pe taiala tagata aoga e vave faailoa mai se mataupu faavae po o se aoaoga faavae a o lei see atu i le isi vaega o fuaiupu.

A o e mafaufau i auala e fetuunai ai mea e faaaoga o lesona, ia mautinoa e te mulimuli i le fautuaga lenei mai ia Elder Dallin H. Oaks o le Korama a Aposetolo e Toasefululua:

Elder Dallin H. Oaks

“Sa masani ona ou faalogo o aoao mai Peresitene Packer, e tatou te taliaina muamua, ona faafetaui ai lea. Afai ua tatou iloa lelei le lesona faatulagaina lea o le a tatou tuuina atu, ona mafai lea ona tatou mulimuli i le Agaga e fetuunaia” (O Se Talanoaga Faavaega ma Elder Dallin H. Oaks” [Faasalalauga Satelite a Seminare ma Inisitituti o Mataupu Faalelotu, Aok. 7, 2012]).

A o e sauni e aoao atu, ia e magafagafa i tagata aoga o e e i ai ni manaoga faapitoa. Fetuunai ia gaoioiga ma ni faamoemoega e fesoasoani ai ia faamanuiaina i latou. O le fesootai ma matua ma taitai o le a fesoasoani e te nofouta ai i manaoga o tagata aoga ma fesoasoani e te manuia ai i le tuuina atu o se aafiaga anoa ma aoga mo i latou.

I le taimi o le sauniuniga o lau lesona, atonu e te filifili e faaaoga ia punaoa o Faamatalaga ma le Api Talaaga o loo i le LDS.org po o le Potutusi o le Talalelei mo masini feaveai. E mafai ona e faaaogaina nei meafaigaluega e faailoga ai mau, saunoaga o konafesi, tusiga i mekasini a le Ekalesia, ma lesona. E mafai foi ona e faaopoopo ma sefe ia faamatalaga mo le faaaogaina i taimi o au lesona. Ina ia aoao atili e uiga i le auala e faaaoga ai nei meafaigaluega, tagai i le itulau o Notes and Journal Help i luga o le LDS.org.

Faaaogaina o le Tusi Lesona a le Faiaoga mo Aso Taitasi

Folasaga i le Poloka Mau

O folasaga i poloka mau e tuuina atu ai se vaaiga aoao puupuu o le talaaga ma le anotusi o le poloka mau mo lesona taitasi.

Tuuvaegaina o Fuaiupu ma Aotelega o Anotusi

O poloka mau e masani ona vaevaeina i vaega laiti po o vaega o fuaiupu ia e taulai atu i se autu po se faatinoga faapitoa. O tusi o mau mo vaega o fuaiupu e sosoo mai ai ma se aotelega puupuu o mea na tutupu po o aoaoga i totonu o na vaega o fuaiupu.

Fesoasoaniga Faafaiaoga

O fesoasoaniga faafaiaoga e fesoasoani e faamalamalama ai mataupu faavae ma auala o le aoaoina atu o le talalelei. E mafai ona fesoasoani ia te oe i au taumafaiga e faaleleia atili i le avea ai o se faiaoga.

Tino o le Lesona

O le tino o le lesona o loo i ai se taitaiga mo oe a o e suesue ma aoao atu. O loo fautua atu ai manatu mo le aoaoina atu, e aofia ai ni fesili, gaoioiga, upusii, ata, ma siata.

Aoaoga Faavae ma Mataupu Faavae

Ao alia’e aoaoga faavae ma mataupu faavae mai le suesueina o le tusiga o mau, ua faailogaina faamatamatatetele ina ia fesoasoani ia te oe e faailoa ma faamamafa atu i latou i la outou talanoaga ma tagata aoga.

Ata

O ata o taitai o le Ekalesia ma mea na tutupu mai tusitusiga paia, ua fai ma sui o fesoasoani vaaia e mafai ona e faaalia atu, pe afai e maua, ao e aoao atu.

Avanoa o le Koluma

E mafai ona faaaogaina le avanoa o le koluma mo sauniuniga o lesona, e aofia ai le tusitusia o faamatalaga, mataupu faavae, aafiaga, po o isi manatu, ao e lagona le uunaia ai o oe e le Agaga Paia.

Tala ma Faamatalaga o Talaaga

Ua tuuina atu ni upusii faaopoopo ma faamatalaga i le faaiuga o nisi o lesona, e tuu atu ai ia te oe se malamalamaaga faaopoopo i talaaga faasolopito, manatu faavae patino, po o fuaitau o mau. Faaaoga le faamatalaga i le vaega lenei e saunia ai e tali ni fesili pe tuuina atu ni malamalamaaga faaopoopo a’o e aoao atu. E mafai ona maua aitema o faamatalaga faaopoopo i lomiga faafuainumera o le tusi lesona lenei i luga o le LDS.org.

Manatu Faaopoopo mo le Aoaoina Atu

Manatu faaopoopo mo le aoaoina atu e vaaia i le faaiuga o nisi o lesona. O nei manatu e tuuina atu ai ni fautuaga mo le aoaoina atu o aoaoga faavae ma mataupu faavae ia atonu e le’i faailoaina pe faamamafaina i le tino o le lesona. E mafai foi ona tuuina atu ni fautuaga i le faaaogaina o ata, e pei o aoaoga i le DVD ma vitio i luga o le LDS.org. E mafai ona maua manatu faaopoopo mo le aoaoina atu i lomiga faafuainumera o le tusi lesona lenei i luga o le LDS.org.

Polokalama a le Seminare o Aso Taitasi (Seminare i Taimi o Aoga ma le Vaveao)

O lenei tusi lesona o loo maua ai vaega nei mo faiaoga seminare o aso taitasi: 160 lesona a le faiaoga mo aso taitasi, fesoasoaniga faafaiaoga, ma punaoa mo le aoaoina atu o mau tauloto ma Aoaoga Faavae Autu.

Lesona a le Faiaoga mo Aso Taitasi

Mamanu o Lesona

O lesona taitasi i lenei tusi lesona o loo taulai atu i se poloka mau nai lo o se manatu, aoaoga faavae, po o se mataupu faavae patino. O lenei faatulagaga o le a fesoasoani ia te oe ma au tagata aoga e suesue faasolosolo ai mau ma talanoaina aoaoga faavae ma mataupu faavae e tau atu i ai i le anotusi o mau. A o aoao tagata aoga i le talaaga sa maua mai ai se aoaoga faavae po o mataupu faavae, e mafai ona faalolotoina lo latou malamalama e uiga i lena upumoni. E le gata i lea, o le a sili atu ona iloa ma malamalama tagata aoga i le aano atoa o savali na faamoemoe tusitala musuia o tusitusiga paia e faailoa mai. O le aoaoina o tusitusiga paia i lenei ala o le a fesoasoani ai foi i tagata aoga e aoao pe faapefea ona iloa ma faaaoga upumoni e faavavau i a latou suesuega patino o tusitusiga paia.

I lesona taitasi, e le o faamamafaina atu ai vaega uma o se poloka mau. O nisi o vaega e tau le o taua ona e tau le fitoitonu i le savali aoao a le tusitala musuia, pe ona atonu e itiiti sona faatatauga i le autalavou. Ua ia te oe le tiutetauave e fetuunai ai nei mea e faaaoga e tusa ai ma manaoga ma mea e fiafia i ai tagata aoga e te aoaoina. Atonu e te fetuunaia manatu mo lesona i lenei tusi lesona, e ala i le filifili e tuuina atu le faamamafa sili atu i se aoaoga faavae po o se mataupu faavae faapitoa nai lo le mea ua tuuina atu i mea o le lesona, po o le filifili e faaitiiti le faamamafa i se vaega o le poloka mau o loo faasolo ina loloto le talanoaina i le tusi lesona. Saili le taitaiga a le Agaga Paia e fesoasoani e te faia ai nei fetuunaiga pe a e sauni ma aoao atu.

Aoaoga Faavae ma Mataupu Faavae

I le tino o lesona taitasi, o le a e maua ai nisi o aoaoga faavae ma mataupu faavae autu ua faailogaina faamatamatatetele. O nei aoaoga faavae ma mataupu faavae o loo faailoaina i le mataupu aoaoina ona (1) o loo atagia mai ai se savali autu o le poloka mau, (2) e faapitoa ona faatatau i manaoga ma tulaga o tagata aoga, po o le (3) o i latou o ni upumoni autu e mafai ona fesoasoani i tagata aoga e faaloloto o latou sootaga ma le Alii. Ia nofouta o loo aoao mai i le Mataupu Faavae ma Feagaiga le anoano o upumoni e tele atu nai lo o upumoni ua faailoaina mai i le mataupu aoaoina. Na aoao mai Peresitene Boyd K. Packer, o tusitusiga paia o loo i ai “tuufaatasiga e le gata mai o upumoni o le a fetaui ma manaoga o tagata uma taitoatasi i tulaga uma” (“The Great Plan of Happiness” [CES Symposium on the Doctrine and Covenants/Church History, Aug. 10, 1993], LDS.org; tagai foi Teaching Seminary: Preservice Readings [2004], 69, LDS.org).

A o e aoao atu, ia tuu atu i taimi uma i tagata aoga ni avanoa e faailoa mai ai aoaoga faavae ma mataupu faavae o loo i mau. A o tau mai e tagata aoga ia upumoni latou te mauaina, atonu e masani ona latou faaaogaina upu e ese mai le ala o loo taua ai i se aoaoga faavae po o se mataupu faavae i lenei tusi lesona. E mafai foi ona latou maua ni upumoni e le o faailoaina mai i le auivi o le lesona. Ia faaeteete e aua le fautua atu e faapea e sese tali a tagata aoga ona e ese upu o loo latou faaaogaina mai upu o loo faaaogaina i le tusi lesona, pe ona ua latou faailoa mai se upumoni e le o taua i le mataupu aoaoina. Ae ui i lea, afai o le faamatalaga a se tagata aoga e sese le aoaoga faavae, o lou tiutetauave o le fesoasoani malie atu i le tagata aoga e faasa’o lana faamatalaga ae ia faatumauina pea se siosiomaga o le alofa ma le faatuatuaina. O le faia o lena mea e mafai ona tuuina atu ai se aafiaga faaleaoaoga mo tagata aoga i lau vasega.

Saoasaoa

O lenei tusi lesona o loo i ai lesona e 160 a le seminare i aso taitasi. E mafai ona e fetuunaia ia lesona ma le saoasaoa pe a manaomia ai mo le umi o le taimi e tatau ona e aoaoina atu ai lenei kosi. Tagai i le faaopoopoga i le faaiuga o lenei tusi lesona mo se faataitaiga o le taiala o le saoasaoa. O le taiala o le saoasaoa ua faavae i se tausaga faaleaoaoga e 36-vaiaso po o le 180 aso, ma e aofia ai “aso fetuutuunai” e 20 e mafai ona e faaaogaina e fetuunai ai lesona i aso taitasi, fesoasoani i tagata aoga ia malamalama i fuaitau autu o mau tauloto ma Aoaoga Faavae Autu, toe faamanatu mea na aoaoina muamua, ma faataga ai mo taimi e faasalaveia ai le faasologa o lesona.

Galuega Faaatoa

O le Taiala o Suesuega o le Mataupu Faavae ma Feagaiga ma le Talafaasolopito o le Ekalesia mo Tagata Aoga o le Seminare mo Suesuega i le Fale e mafai ona faaaoga i le polokalama o le seminare i aso taitasi o se punaoa e tuu atu ai i tagata aoga ni galuega faaatoa. O lesona i le taiala o suesuega mo tagata aoga e suesue i le fale e ogatasi lava ma lena ua tuuina atu i le tusi lesona lenei. O tagata aoga e tele naua aso e le aooga ai, e mafai ona tofia e faauma ia galuega atofaina i le taiala o suesuega e o faatasi ma anotusi na latou misia i le vasega. E mafai ona lolomi mai galuega atofaina mai le LDS.org, e te le tau tuuina atu atoa le tusi lesona i tagata aoga o e e manaomia ona fai galuega faaatoa. O isi faamatalaga e uiga i le Taiala o Suesuega o le Mataupu Faavae ma Feagaiga ma le Talafaasolopito o le Ekalesia mo Tagata Aoga o le Seminare mo Suesuega i le Fale o loo maua i le vaega ua faaautuina “Polokalama Seminare mo Suesuega i le Fale” i nei faamatalaga tomua.

Fesoasoaniga Faafaiaoga

O fesoasoaniga faafaiaoga e faaali atu i pito i autafa o lenei tusi lesona. O nei fesoasoaniga faafaiaoga e fesoasoani e faamalamalama ma faaali atu ai auala, e mafai e oe ma tagata aoga e te aoaoina ona faaaoga Faiga Faavae o le Aoaoina Atu ma le Aoaoina Mai o le Talalelei, i au suesuega o le Mataupu Faavae ma Feagaiga ma le Talafaasolopito o le Ekalesia. Latou te ofoina atu foi ni fautuaga i auala e faaaoga lelei ai metotia, tomai, ma faiga eseese faafaiaoga. A oo ina e malamalama i mataupu faavae o loo i ai i fesoasoaniga faafaiaoga, ia vaavaai mo auala e faatino ma faaaoga ai pea lava pea i au aoaoga.

Faaaogaina o Lesona mo Suesuega i le Fale

Aotelega o Lesona mo Tagata Aoga

O le a fesoasoani le aotelega e te faamasani ai i le talaaga ma aoaoga faavae ma mataupu faavae o le a aoaoina e tamaiti aoga I le vaiaso I totonu o le Taiala mo suesuega ā le tamaititi aoga.

Folasaga o le Lesona

O le faatomuaga i le lesona o le a fesoasoani ia te oe e iloa ai po o a vaega o le poloka mau o le a faamamafaina i le lesona.

Tino o le Lesona

O le tino o le lesona e tuuina atu ai se taiala mo oe ao e suesue ma aoao atu. O loo fautua atu ai manatu mo le aoaoina atu, e aofia ai ni fesili, gaoioiga, upusii, ata, ma siata.

Tuuvaegaina o Fuaiupu ma Aotelega o Anotusi

O fuaiupu o loo tuuvaegaina e tusa ai ma mea o loo i ai suiga i talaaga po o anotusi i le poloka mau. O tusi o mau mo le tuuvaegaina o fuaiupu taitasi e sosoo ai ma se aotelega puupuu o mea na tutupu po o aoaoga i totonu o lena vaega o fuaiupu.

Aoaoga Faavae ma Mataupu Faavae

Ao alia’e aoaoga faavae ma mataupu faavae mai le suesueina o le faamatalaga o le mau, ua faailogaina faamatamatatetele ina ia fesoasoani e te iloa ai ma faamamafa atu ai i la outou talanoaga ma tagata aoga.

Folasaga i le Iunite e Sosoo Ai

O le palakalafa mulimuli o lesona taitasi ua tuuina atu ai sina vaaiga puupuu i le iunite e sosoo ai. Faasoa atu lenei palakalafa i au tagata aoga i le faaiuga o lesona taitasi, e fesoasoani ia latou tulimatai atu ai i le suesueina o tusitusiga paia i le aluga o le vaiaso a sau.

Polokalama a le Seminare mo Suesuega e Fai i le Fale

I lalo o le taitaiga a taitai perisitua i le lotoifale ma le sui o le S&I, e mafai ai ona faatulaga vasega seminare mo suesuega e faia i le fale i nofoaga e le mafai ona auai atu ai tagata aoga i se vasega i aso taitasi ona o le mamao po o isi tulaga (e pei o se manaoga faapitoa). O vasega o le seminare mo suesuega e faia i le fale, e masani lava ona le maua i nofoaga ia e tuuina atu ai vasega i aso uma (aso o le vaiaso) i le vaveao po o le taimi o le aoga.

O le polokalama mo suesuega e faia i le fale, e mafai ai e tagata aoga ona maua togi i le seminare e ala i le faamaeaina o lesona taitasi i le aiga, nai lo o le auai atu i vasega i aso o le vaiaso. O nei lesona o loo maua i se tusi lesona e ese mai e ta’ua o le Taiala o Suesuega o le Mataupu Faavae ma Feagaiga ma le Talafaasolopito o le Ekalesia mo Tagata Aoga o le Seminare mo Suesuega i le Fale. E tasi i le vaiaso ona feiloai tagata aoga ma le faiaoga seminare e tuu atu i ai a latou galuega ma auai i se lesona i le potuaoga. O le taiala mo suesuega a le tagata aoga ma lesona faalevaiaso i le potuaoga o loo faamalamalama atili atu i lalo.

Taiala o Suesuega mo Tagata Aoga e Faia i le Fale

O le Taiala o Suesuega o le Mataupu Faavae ma Feagaiga ma le Talafaasolopito o le Ekalesia mo Tagata Aoga o le Seminare mo Suesuega i le Fale ua mamanuina e fesoasoani ai i le tagata aoga e suesue i le fale ia maua se aafiaga i le suesueina o le Mataupu Faavae ma Feagaiga ma le talafaasolopito o le Ekalesia, e tutusa ma le aafiaga o le tagata aoga seminare e auai atu i vasega i aso o le vaiaso. O le mea lea, o le saoasaoa o le taiala o suesuega a le tagata aoga, faapea foi ma aoaoga faavae ma mataupu faavae o loo faamamafa atu ai, e ogatasi lea ma mea e faaaoga o loo i lenei tusi lesona. O loo aofia ai foi i le taiala o suesuega a le tagata aoga ia faatonuga mo mau tauloto. O fuaitau o mau tauloto o loo talanoaina i le talaaga a o latou faaali ae i le anotusi o mau, ma e masani lava o gaoioiga tusitusi e tuuina atu i lesona lea o loo aofia ai ia fuaitau.

I vaiaso taitasi, e tatau i tagata aoga seminare e suesue i le fale, ona faamaeaina lesona e fa mai le taiala o suesuega a le tagata aoga ma auai i se lesona i le vaiaso e tuuina atu e lo latou faiaoga seminare. Sa fai e tagata aoga ia galuega atofaina ua faanumeraina mai le taiala suesue i a latou api talaaga mo le suesueina o tusitusiga paia. E tatau i tagata aoga ona i ai ni api talaaga se lua mo le suesueina o tusitusiga paia, ina ia mafai ona latou tuua le tasi i le faiaoga ae faaauau lava ona galulue i le isi. A o feiloai tagata aoga ma lo latou faiaoga i vaiaso taitasi, e ao atu i totonu le api talaaga e tasi i le faiaoga o suesuega e faia i le fale, ae o le isi e toe tuuina atu i le tagata aoga e faaaoga mo le lesona o le vaiaso e sosoo ai. (Mo se faataitaiga, i le aluga o le vaiaso e tasi, e fai ai e le tagata aoga ia galuega atofaina i le api talaaga 1. Ona aumai lea e le tagata aoga le api talaaga lenei i le vasega ma tuu atu i le faiaoga. I le aluga o le vaiaso e sosoo ai, e fai e le tagata aoga ia galuega atofaina i le api talaaga lona 2. A tauaao atu e le tagata aoga le api talaaga lona 2, o le a toe faafoi atu e le faiaoga le api talaaga 1. Ona faaaoga lea e le tagata aoga le api talaaga 1 e fai ai galuega atofaina o le vaiaso e sosoo ai.)

Ua fautuaina tagata aoga seminare uma e suesue i tusitusiga paia i aso uma, ma faitau anomea mo le kosi, ae o tagata aoga mo suesuega e faia i le fale, e tatau ona malamalama ua faamoemoeina ia latou faaaluina le 30 i le 40 minute faaopoopo i lesona taitasi e fa e suesue i le fale i iunite taitasi, ma auai atu i le lesona faalevaiaso o suesuega e faia i le fale.

Lesona Faalevaiaso a le Faiaoga mo Suesuega e Fai i le Fale

O iunite taitasi i le Taiala o Suesuega o le Mataupu Faavae ma Feagaiga ma le Talafaasolopito o le Ekalesia mo Tagata Aoga o le Seminare mo Suesuega i le Fale e fetaui ma lesona e lima i aso taitasi i le tusi lesona a le faiaoga. I le faaiuga o lesona taitasi e lima i lenei tusi lesona, o le a e tau ai i se lesona e tasi faalevaiaso a le faiaoga mo suesuega e faia i le fale. O le lesona mo suesuega e faia i le fale, o le a fesoasoani i tagata aoga e toe faamanatu ai, faaloloto lo latou malamalama e uiga i, ma faaaoga aoaoga faavae ma mataupu faavae sa latou aoaoina a o latou faamaeaina ia lesona i le taiala mo suesuega a le tagata aoga i le aluga o le vaiaso. E mafai foi e nei lesona ona talanoaina ni upumoni faaopoopo e le o aofia i le taiala mo suesuega a le tagata aoga. (Mo se fesoasoani i le fuafuaina o le faasologa o lau lesona, tagai i le taiala o le saoasaoa mo faiaoga o suesuega e faia i le fale, i le faaopoopoga i le faaiuga o lenei tusi lesona.)

I le avea ai ma se faiaoga mo suesuega e faia i le fale, e tatau ona i ai sou malamalamaaga atoatoa i mea o loo suesueina e au tagata aoga i le fale i vaiaso taitasi, ina ia mafai ona e tali atu i fesili ma fatuina ni talanoaga anoa pe a tou feiloai ma i latou. Fai atu i tagata aoga e aumai a latou tusitusiga paia, api talaaga mo le suesueina o tusitusiga paia, ma taiala mo suesuega a tagata aoga i le vasega faalevaiaso ina ia mafai ona latou faatatau atu i ai i le taimi o le lesona. Fetuunai ia lesona e tusa ai ma manaoga o tagata aoga e te aoaoina, ma e tusa ai ma le taitaiga a le Agaga Paia. Atonu foi e te manao e tagai atu i lesona o aso taitasi a le faiaoga o loo i lenei tusi lesona ao e sauni ma aoao atu. O se suesuega o fesoasoaniga faafaiaoga, ma metotia na faaaogaina i lesona i aso taitasi, e mafai ona fesoasoani e faatamaoaiga ai lau aoaoga faalevaiaso. Ia taulima soo se manaoga faapitoa o tagata aoga e te aoaoina. Mo se faataitaiga, afai o se tagata aoga e faigata ona tusitusi, faataga o ia e faaaoga se masini pueleo pe o le faalau atu o [ona] manatu i se tasi o le aiga po o se uo, e mafai ona tusiina i lalo ana tali.

I le faaiuga o lesona taitasi faalevaiaso, ao mai api talaaga mo le suesueina o tusitusiga paia a tagata aoga ma uunaia i latou i a latou suesuega faifai pea. Tuu atu ia te i latou se api talaaga mo le suesueina o tusitusiga paia mo galuega atofaina o le vaiaso e sosoo ai, e pei ona faamatala atu i luga i le vaega ua ta’ua “Taiala o Suesuega mo Tagata Aoga mo Suesuega i le Fale.” (I lalo o le taitaiga a taitai perisitua ma matua, e mafai ai e le faiaoga seminare na [valaauina] a le siteki ona fesootai atu faaeletonika i tagata aoga o le seminare e lesitala i le seminare mo suesuega e faia i le fale).

A o e faitau i galuega atofaina i api talaaga mo le suesueina o tusitusiga paia a tagata aoga, ia tali atu i ai mai lea taimi i lea taimi i a latou galuega, e ala i le tusia o se faamatalaga puupuu po o le faaali atu o se manatu i le isi taimi tou te feiloai ai. Atonu foi e te manao e saili nisi auala e tuuina atu ai le lagolago ma ni finagalo faaalia anoa. O le a fesoasoani lenei mea i tagata aoga e iloa ai e te manatulia a latou galuega ma o le a fesoasoani e faaosofia ai i latou ina ia maeaea lelei a latou tali.

O le tele o taumafaiga a tagata aoga ia malamalama lelei i fuaitau o mau autu, o le a faia a’o latou faamaeaina a latou lesona mo suesuega e faia i le fale. E mafai e faiaoga mo suesuega e faia i le fale ona tulitatao taumafaiga a tagata aoga i le taimi o lesona mo suesuega e faia i le fale, e ala i le valaaulia o tagata aoga e tauloto atu pe toe faamanatu fuaitau o mau tauloto e alia’e i le anotusi mo le iunite suesueina o lena vaiaso.

Isi Punaoa

Galuega Faatino o Pepa a Iosefa Samita

O le tele o faamatalaga faasolopito i lenei tusi lesona sa aumaia mai le History of the Church ma le Galuega Faatino o Pepa a Iosefa Samita. Sa faapitoa le fesoasoani a voluma 1 ma le 2 o faasologa o Pepa o Faamatalaga o The Joseph Smith Papers, ua lolomiina e le Church Historian’s Press (o se faailoga o le Matagaluega o Talafaasolopito a le Ekalesia o Le Ekalesia a Iesu Keriso o le Au Paia o Aso e Gata Ai). Ina ia maimoa i ata faafuainumera ma faitau i tusiga o uluai pepa o faamatalaga i le Joseph Smith Papers Project, [Galuega Faatino o Pepa a Iosefa Samita], asiasi i le josephsmithpapers.org.

Punaoa mo Faamatalaga ma Api Talaaga

O loo maua tusi lesona a le faiaoga seminare ma taiala mo suesuega a le tagata aoga i luga o le LDS.org ma i le Gospel Library mo masini feaveai. E mafai ona faaaoga e faiaoga ma tagata aoga punaoa o Faamatalaga ma Api Talaaga i le initoneti ma telefoni feaveai, e faailoga ma faaopoopo ai ni faamatalaga i lomiga i le initoneti o nei tusi lesona a o latou saunia lesona ma suesue i tusitusiga paia. O loo maua foi tusi lesona a le faiaoga ma taiala mo suesuega a le tagata aoga mo le sii mai i le isi mamanu (e pei o le mamanu PDF, ePub, ma faila mobi [Kindle]) i luga o le LDS.org.

Manatu Faaopoopo

O punaoa nei o loo maua i le initoneti, e ala i lou supavaisa, e ala i faletusi a le Ekalesia i le lotoifale, ma e ala i le faleoloa a le Ekalseia i le initoneti (store.lds.org):