Mataupu Faavae ma Feagaiga 93:21–53

Folasaga

O le lona lua lea o lesona e lua o le Mataupu Faavae ma Feagaiga 93. Na maua e le Perofeta o Iosefa Samita lenei faaaliga i le aso 6 o Me, 1833. I le vaega mulimuli o le faaaliga, na faaali mai ai e le Alii upumoni taua e uiga i lo tatou muai olaga. I le taimi na maua ai lenei faaaliga, e toatele tagata sa talitonu na amata ona tatou i ai i le afuafuaga po o le fanau mai. O lenei manatu e taatele foi i aso nei. Sa aoao mai e le Alii ia Iosefa Samita e faapea “sa i ai foi le tagata i le amataga faatasi ma le Atua” (MF&F 93:29) ma o o tatou agaga e faavavau. Sa ia aoao mai foi le auala e mafai ona tatou maua ai le upumoni ma le malamalama, ma faatonuina le Perofeta ma isi taitai o le Ekalesia e faatulaga tatau o latou aiga, ina ia mafai ona faamalosia ma puipuia o latou auaiga.

Fautuaga mo le Aoaoina Atu

Mataupu Faavae ma Feagaiga 93:21-39

Ua faatonu e le Alii Ana auauna i le auala e maua ai le upumoni ma le malamalama

Fai atu i tagata aoga po o ai o i latou o ulumatua i o latou aiga ae tutu i luga.

O a ni o outou manatu i nisi o tiutetauave o le avea ma se ulumatua?

Fai atu i tagata aoga e nonofo i lalo. Ona valaaulia lea o se tagata aoga e faitau leotele le Mataupu Faavae ma Feagaiga 93:21–23. Fai atu i le vasega e mulimuli i le faitauga, ma vaavaai mo mea ua faaalia mai e Iesu Keriso e uiga ia te Ia lava.

E tusa ai ma le fuaiupu e 21, o a ni eseesega o i ai a Iesu Keriso i fanau agaga uma a le Tama Faalelagi? (E tatau ona faailoa mai e tagata aoga le aoaoga faavae lenei: O Iesu Keriso o le ulumatua o fanau agaga uma a le Tama Faalelagi.)

Faamalamalama atu talu ai o Iesu Keriso o le Ulumatua a le Tama, o Ia “ua tofia” i mea uma o loo i le Tama (Eperu 1:2). Ae peitai, e finagalo o Ia ina ia tofusia uma fanau a le Tama Faalelagi i lenei tofi. Ua tatou maua le avanoa e avea ma “suli-faatasi ma Keriso” (Roma 8:17) ma faitaulia faatasi ma “le ekalesia a le Ulumatua” (MF&F 93:22; tagai foi i le MF&F 76:51–54). I le auala lenei e mafai foi ona tatou maua ai mea uma o loo i ai i le Tama (tagai i le MF&F 76:55; 84:37–38).

E tusa ai ma le Mataupu Faavae ma Feagaiga 93:22, o a mea e tatau ona tatou faia ina ia tofusia ai i le mamalu a le Ulumatua na Fanaua?
O le a le uiga o le fanauina e ala ia Iesu Keriso? (Ina ia toefanauina faaleagaga ma faamamaina mai agasala uma e ala i le mana o le Togiola.)
Matau i le fuaiupu e 21 na fetalai Iesu Keriso, sa i ai o Ia “i le amataga faatasi ma le Tama.” E tusa ai ma le fuaiupu e 23, o ai isi sa i ai i le amataga ma le Tama? (O le upu outou i lenei fuaiupu e faatatau i fanau agaga uma a le Tama Faalelagi. Atonu e te manao e fautua atu i tagata aoga e sui le upu outou i le fuaiupu e 23 i o latou lava igoa ma tusi ai i autafa o a latou tusitusiga paia.)

Faamalamalama atu, a o tatou nonofo faatasi ai ma le Tama Faalelagi ma Iesu Keriso i le muai olaga, sa aoaoina i tatou e le Tama ma le Alo ma sa maua le avanoa e talia ai pe teena le upumoni. Valaaulia se tagata aoga e faitau leotele le Mataupu Faavae ma Feagaiga 93:24–26. Fai atu i le vasega e mulimuli i le faitauga, ma vaavaai mo le mea na aoao mai e le Alii e uiga i le upumoni i nei fuaiupu.

O le a le mea ua e aoaoina mai le faauigaga a le Alii o le upumoni i le fuaiupu e 24?
O ai o loo faamatala mai i le fuaiupu e 25? (Satani.)
E faapefea ona saili Satani e faatosina lo tatou malamalama o le upumoni? (O le fuaitau “ma o soo se mea e tele atu pe itiiti mai i lo lea” ua ta‘u mai ai o loo saili Satani e faasese ma faaitiitia lo tatou malamalama o le upumoni.)
O le a se mea tatou te aoao mai i le fuaiupu e 26 e uiga ia Iesu Keriso?

Valaaulia tagata aoga e faitau filemu le Mataupu Faavae ma Feagaiga 93:36-37 ma faailoa mai nisi upumoni faaopoopo na faaali mai e le Alii e uiga i le malamalama ma le upumoni.

O le a le mea na faaali mai e le Alii e uiga i le malamalama ma le upumoni i nei fuaiupu? (Fesoasoani i tagata aoga ia malamalama o le malamalama ma le upumoni, e taua foi o le poto, o uiga auaumama ia o Iesu Keriso ma le Tama Faalelagi.)
E faapefea ona faamanuiaina i tatou e ala i le mauaina o le malamalama ma le upumoni? (E mafai ona tuuina mai e tagata aoga ni tali eseese. A o latou tali mai, fesoasoani ia i latou e faailoa mai le mataupu faavae lenei: E ala i le mauaina o le malamalama ma le upumoni, e mafai ai ona tatou avea e faapei o Iesu Keriso ma le Tama Faalelagi.)

Ata

malamalama ma le upumoni

Kopi ata lenei i luga o le laupapa, ae aua le aofia ai faamatalaga o loo i pusa e lua. O le a iloa e tagata aoga nei mataupu faavae a’o faagasolo le lesona. Atonu e te manao e valaaulia tagata aoga e kopi le ata i a latou api o le vasega po o api talaaga mo le suesueina o tusitusiga paia.

Valaaulia se tagata aoga e faitau leotele le Mataupu Faavae ma Feagaiga 93:26-28. Fai atu i le vasega e mulimuli i le faitauga, ma vaavaai mo mea e tatau ona tatou faia ina ia maua ai le upumoni ma le malamalama.

O a mea e tatau ona tatou faia e maua ai le upumoni ma le malamalama? (E tatau ona faailoa mai e tagata aoga le mataupu faavae lenei: Tatou te maua le upumoni ma le malamalama ao tatou tausia poloaiga. Tusi lenei mataupu faavae i le pusa i le itu taumatau o le ata o loo i luga o le laupapa.)
E faapefea e le usitaia o poloaiga, ona fesoasoani ia i tatou e maua ai le upumoni ma le malamalama?
O le a se taimi na e lagonaina ai lou mauaina o le upumoni ma le malamalama e ala i le tausia o poloaiga?

Faamalamalama atu faapea, a o tatou mau faatasi ma le Atua ae tatou te le‘i fananau mai, sa i ai lo tatou faitalia—o le gafatia e filifili ai ma faatino mo i tatou lava. Valaaulia se tagata aoga e faitau leotele le Mataupu Faavae ma Feagaiga 93:29-32. Fai atu i le vasega e mulimuli i le faitauga, ma vaavaai pe faapefea ona aafia lo tatou gafatia ona maua le malamalama ma le upumoni i lo tatou faaaogaina o le faitalia. Fai atu i tagata aoga e lipoti mai mea ua latou mauaina.

E tusa ai ma fuaiupu e 31–32, o le a le taunuuga pe afai tatou te filifili e le maua le malamalama? (Ua tatou tuuina i tatou lava i lalo o le tausalaga. O lona uiga ua tatou taofiofia lo tatou alualu i luma faaleagaga e ala i le musu e maua le malamalama o loo avanoa mo i tatou.)

Valaaulia tagata aoga e mafaufau loloto i fesili nei:

E mafai ona toe aveesea le malamalama ma le upumoni ua uma ona tatou mauaina? (Ina ia fesoasoani i tagata aoga e tali lenei fesili, valaaulia i latou e sailiili i le Mataupu Faavae ma Feagaiga 93:39. Atonu foi e te manao e valaaulia i latou e sailiili i le Alema 12:10–11.)
O le a le mea e mafua ai ona tatou aveesea le malamalama ma le upumoni? (E tatau ona faailoa mai e tagata aoga le mataupu faavae lenei: O le le usiusitai ma uputuu sese e mafua ai ona tatou le maua le malamalama ma le upumoni. Tusi lenei mataupu faavae i le pusa i itu agavale o le ata o loo i luga o le laupapa.)
O a nisi o faataitaiga o tu ma aga masani, po o gaoioiga e masani ona faia e le toatele o tagata, lea e mafua ai ona aveese mai ia i tatou le malamalama ma le upumoni mai lo tatou Tama Faalelagi?

E mafai ona fesoasoani le gaoioiga lenei e faailoa ai pe mafai faapefea e a tatou filifiliga patino e usitai pe le usitai i poloaiga a le Atua, ona aafia ai lo tatou gafatia ona maua o le malamalama ma le upumoni pe aveesea foi. Faaali atu le faamatalaga lenei i luga o le laupapa, pe kopi i luga o se pepa e tufa atu mo tagata aoga taitoatasi. Valaaulia se tagata aoga e faitau leotele le palakalafa muamua. Fai atu i le vasega e faamatala mai pe mafai faapefea e filifiliga a Maria ona, ma aisea foi o le a, aafia ai lona gafatia ona maua le malamalama ma le upumoni. A uma ona lipoti mai e tagata aoga ia mea latou te maua, toe fai lenei faagasologa i le parakalafa 2–4.

E tatalo Maria i taeao ma afiafi taitasi. Na te lagonaina le olioli i le tuuina atu o le auaunaga, tausia ana feagaiga, ma suesue i tusitusiga paia i aso taitasi. E masani ona fesoasoani e faapotopoto mai lona aiga mo le suesueina o tusitusiga paia ma tatalo faaleaiga. E tulimatai atu o ia e ai ma inu i le faamanatuga i vaiaso taitasi i le lotu.
O loo tatalo lava Maria ma suesue i tusitusiga paia i le tele o taimi ae e le o aso uma. E tele ina auai o ia i le lotu ma e masani ona faalogo ia i latou e lauga ma aoao mai. E alu o ia i gaoioiga a Tamaitai Talavou pe afai na te iloa o le a i ai iina ana uo.
E tatalo Maria pe a le lelava pe a le nanati foi. E fesoasoani ma le musua i le aiga ma faitau tusitusiga paia pe a talafeagai ai. E masani ona ia faamisia gaoioiga a le Ekalesia ma Tamaitai Talavou. E i ai taimi na te solia ai le Upu o le Poto.
E le taitai tatalo Maria, faitau tusitusiga paia, pe auai i sauniga Lotu. Ua talosagaina e le epikopo e fia vaai ia te ia, ae o le a le talanoa atu o ia ia te ia. E masani ona ia solia le Upu o le Poto. E finau soo o ia ma tagata o le aiga. Ua ia lagona le taumamao mai le Tama Faalelagi.

E faavae i nei faataitaiga, e faapefea ona e aoteleina le taua o a tatou faaiuga i aso taitasi ma lo latou aafiaga i le malamalama ma le upumoni tatou te maua?

Mataupu Faavae ma Feagaiga 93:40-53

Ua fautua mai le Alii i Ana auauna e faatulaga tatau o latou aiga

Valaaulia tagata aoga e talanoaina le fesili lenei faatasi ma se paga:

E mafai faapefea e a outou fegalegaleaiga ma ou matua po o isi tagata o le aiga, ona fesoasoani ia te oe e tuputupu ae i le malamalama ma le upumoni?

A uma ona talanoaina e tagata aoga le fesili, valaaulia nisi o i latou e faasoa mai a latou tali i le vasega. Valaaulia se tagata aoga e faitau leotele le Mataupu Faavae ma Feagaiga 93:40. Fai atu i le vasega e mulimuli i le faitauga, ma vaavaai mo le tiutetauave ua tuuina mai e le Atua i matua.

O le a le tiutetauave ua tuuina mai e le Atua i matua?
E faapefea ona tausia e matua a latou fanau “i le malamalama ma le upumoni”?

Otooto le Mataupu Faavae ma Feagaiga 93:41–48 i le faamatala atu e faapea, na faatonuina e le Alii ia Feterika G. Viliamu, Sini Rikitone, ma Iosefa Samita le Itiiti, ina ia faaleleia le aoaoina o a latou fanau i le malamalama ma le upumoni ma ia faatulaga lelei o latou aiga. Valaaulia se tagata aoga e faitau leotele le Mataupu Faavae ma Feagaiga 93:49-50. Fai atu i le vasega e mulimuli i le faitauga, ma vaavaai mo se lapataiga e faatatau i o tatou aiga.

O a ni lapataiga na tuuina mai e le Alii i nei fuaiupu? (Fesoasoani i tagata aoga e faailoa mai le mataupu faavae lenei: E tatau ona tatou tatalo e le aunoa ma ia filiga atili ma popole i le aiga, a leai o le a i ai le mana o le amio leaga i o tatou luga.)
O le a sou manatu i le uiga o le “filiga atili ma popole i le aiga”?

Faamanino atu faapea, e ui lava o lenei lapataiga sa tuuina mai i tamā, ae sa faatatau foi i o latou aiga. Valaaulia tagata aoga e fautua mai ni auala e mafai ai e le autalavou ona filiga tele ma popole i le aiga. Fai atu i se tagata aoga e tusi tali mai le vasega i luga o le laupapa.

Faaiu le lesona lenei i le molimau atu e uiga i aoaoga faavae ma mataupu faavae na aoaoina e tagata aoga i lenei lesona. Tusi fesili nei i luga o le laupapa, ma valaaulia tagata aoga e tali se tasi o fesili ia latou api o le vasega po o api talaaga mo le suesueina o tusitusiga paia:

Faailoa mai se poloaiga se tasi e mafai ona e usitai ma le faamaoni atili i ai, ina ia mafai ona faateleina lo outou malamalama ma le upumoni. O le a se mea o le a e faia ina ia e faamaoni atili ai i le tausiga o lena poloaiga?
E mafai faapefea ona e filiga atili ma popole i le aiga? Tusi se sini ma ta‘u mai ai se auala se tasi o le a e taumafai e faaleleia i le aluga o le vaiaso fou.

Tala ma Faamatalaga o Talaaga

Mataupu Faavae ma Feagaiga 93:40–50. Tausiga o fanau i le malamalama ma le upumoni

Na tuuina mai e le Au Peresitene Sili le fautuaga lenei:

“Matou te valaau atu i matua ina ia tuuto atu a latou taumafaiga aupito sili i le aoaoina ma le tausiaina o a latou fanau i mataupu faavae o le talalelei lea o le a latou latalata ai pea i le Ekalesia. O le aiga o le faavae lea o se ola amiotonu, ma e leai lava se isi auala e mafai ona suia lona tulaga pe faataunuu ai lana galuega taua i le tauaveina o lenei tiutetauave na tuuina mai e le Atua.

“Matou te fautua atu i matua ma fanau ina ia tuu atu le faamuamua aupito maualuga i tatalo faaleaiga, afiafi faaleaiga, suesuega ma aoaoga o le talalelei, ma gaoioiga lelei atoatoa faaleaiga. Peitai, tusa pe o le a le taua ma le talafeagai o isi faatonuga po o gaoioiga, e le tatau ona faatagaina e suitulaga i tiute ua faatonuina mai e le Atua, ia e na o matua ma aiga e mafai ona faatinoina lelei” (Tusi a le Au Peresitene Sili, Fep. 11, 1999, sii mai i le Tusitaulima 2: Taitaiina o le Ekalesia [2010], 1.4.1).