Lesona 31
Mataupu Faavae ma Feagaiga 24 ma le 26
Folasaga
Ia Iuni ma Iulai 1830, sa fetaiai ai Iosefa Samita ma isi tagata o le Ekalesia ma sauaga mamafa. I lenei taimi o faigata, sa faamalosia ai e le Alii ia Iosefa Samita ma Oliva Kaotui, ma faatonuina i laua e uiga i o laua tiutetauave e ala i le faaaliga o loo i ai i le Mataupu Faavae ma Feagaiga 24. Na tuuina mai foi e le Alii ni faatonuga mo le faiga masani o le manatu autasi i le Ekalesia, o loo maua i le Mataupu Faavae ma Feagaiga 26.
Fautuaga mo le Aoaoina Atu
Mataupu Faavae ma Feagaiga 24:1–12
Ua maua e Iosefa Samita ma Oliva Kaotui fautuaga e faatatau i o laua valaauga
A o lei amataina le vasega, tusi le fesili lenei i luga o le laupapa: O le a sau mea e fai pe a faigata le olaga?
Fai atu i tagata o le vasega e mafaufau i se taimi faigata po o le le fiafia na latou oo i ai, ma pe na faapefea ona latou taulimaina le faafitauli. Valaaulia ni nai tagata o le vasega e faasoa mai o latou aafiaga. (Faamanatu atu i tagata o le vasega o nisi o aafiaga e paia, pe le patino tele mo le faasoaina mai.)
Faamalamalama atu sa feagai Iosefa Samita ma le tele o faigata i lona olaga. Fai atu i se tagata o le vasega e faitau leotele le ulutala o le vaega e 24. Valaaulia le vasega e mulimuli i le faitauga ma faailoa mai tulaga na maua ai le faaaliga lenei ma isi faaaliga e lua e sosoo ai.
Ina ia faailoa atu le sauaga sa feagai ma Iosefa Samita ma isi i le taimi lea, ia mafaufau e fai atu i se tagata o le vasega e aotele faaleotele le talaaga faasolopito lenei (atonu e manaomia ona tuuina atu lenei faamatalaga a’o lei amataina le vasega, ina ia maua e le tagata o le vasega se taimi e saunia ai):
Ia Iuni 1830, na o atu ai Iosefa Samita ma ni nai uo i Colesville, Niu Ioka, e feiloai ma tagata o e sa fia papatisoina. Sa faia se faatanoa i se auvai e sauniuni ai mo papatisoga i le aso na sosoo ai (Aso Sa), ae na faaleagaina e se vaega faatupu vevesi le faatanoa i le po. O le taeaopo o le Aso Gafua, sa toe fausia ai le faatanoa ma e toa 13 tagata na papatisoina, e aofia ai ma Ema Samita. Ae peitai, e oo ane i le taimi na ma’ea ai papatisoga, ua faapotopoto se vaega faatupu vevesi pe a ma le 50 o alii, ma faalumaina ma taufaamatau ane e lamatia le Au Paia. O lena afiafi, sa feiloai ai le Au Paia e faamau papatisoga o i latou na papatisoina i le taeao o lena aso, ae a’o lei mafai ona faia faamauga, sa taofia Iosefa i moliaga o le ‘avea ma se tagata le amio pulea, ona o le faavevesiina o le atunuu e ala i le talaiga o le Tusi a Mamona.” (Tagai i le History of the Church, 1:86–88.)
A o agai atu i lona faamasinoga, sa sola ese ai Iosefa mai se vaega faatupu vevesi faatasi ai ma le fesoasoani a se leoleo agalelei na faafeaoina o ia. Ina ua uma ona tulai i le faamasinoga ma taumamaina i moliaga, sa vave lava foi ona toe taofia Iosefa e se leoleo mai se itumalo e ese mai. O le po lena sa tauemuina ma sauaina ai Iosefa e “ni alii,” ae o le taeao na sosoo ai sa tulai ai i le faamasinoga. Sa toe taumamaina foi Iosefa i moliaga ma sola ese ai ma se isi vaega o tagata faatupu vevesi a’o agai atu o ia i le fale. (Tagai i le History of the Church, 1:88-96.)
Sa toe taumafai Iosefa Samita ma Oliva Kaotui e toe faatasi atu ma le au paia na faatoa liliu mai i Colesville, ae na faapotopoto foi se vaega faatupu vevesi a’o lei leva ona taunuu atu i laua. Sa faamalosia ona sosola ese Iosefa ma Oliva, ma e le’i leva lava ona sosola ae tuli atu i laua e le vaega faatupu vevesi i le po atoa (tagai i le History of the Church, 1:97). Na saunoa Iosefa e uiga i lenei taimi faigata, “E ui lava i le matamataita o o maua fili, ae sa maua se faamafanafanaga tele, ma e tele ni mea na tutupu e faamalosia ai lo maua faatuatua ma le fiafia i o maua loto” (i le History of the Church, 1:101).
Fai atu i se tagata o le vasega e faitau leotele le fuaiupu mulimuli o le ulutala o le vaega mo le Mataupu Faavae ma Feagaiga 24. Atonu e te manao e fautuaina tagata o le vasega e faailoga le fuaiupu lenei. Valaaulia i latou e mafaufau i le taimi o le lesona, pe mafai faapefea e le fautuaga a le Alii ia Iosefa Samita ma Oliva Kaotui ona fesoasoani ia i latou pe a latou oo i se taimi faigata.
Tusi le upu nei i luga o le laupapa:
|
Faamalosia ma Uunaia |
A’oa’o |
|---|---|
Tofi tagata o le vasega e suesue taitoalua le Mataupu Faavae ma Feagaiga 24:1–12. Valaaulia se tagata se toatasi o le vasega e faitau filemu ia fuaiupu, ma vaavaai mo fasifuaitau ia sa ono faamalosia ma uunaia ai le Perofeta ma Oliva Kaotui. Valaaulia le tagata lona lua o le vasega e faitau ia fuaiupu, e sue ai faatonuga na tuuina mai e le Alii. A maea le taimi, faatonu tagata o le vasega e faasoa atu ia latou paga mea na latou mauaina. Valaaulia le paga e filifili se fasifuaitau se tasi na taua ia i laua, ma ia aofia i la laua talanoaga, pe o le a so latou manatu i le auala atonu na fesoasoani ai lena faamalosiauga patino po o le faatonuga mai le Alii ia Iosefa Samita ma Oliva Kaotui.
A uma ona talanoaina e paga taitasi le Mataupu Faavae ma Feagaiga 24:1–12, valaaulia ni nai tagata o le vasega e lipoti mai mea na latou aoaoina. A o tuuina mai e tagata o le vasega o latou malamalamaaga, fai se lisi o upu o le faamalosiauga ma aoaoga na latou mauaina i lalo o ulutala talafeagai i luga o le laupapa.
-
O a mataupu faavae e mafai ona tatou aoaoina mai le Mataupu Faavae ma Feagaiga 24:8 e faatatau i mea e mafai ona fesoasoani ia i tatou i o tatou puapuaga? (Atonu e te manao e faamalamalama atu o se puapuaga o se mafuaaga po o se tulaga o le tiga, faanoanoa, po o mafatiaga. E mafai e tagata o le vasega ona faaaoga upu eseese, ae ia mautinoa ua latou faailoa mai le mataupu faavae lenei: Afai tatou te lava papale ma onosaia o tatou mafatiaga, o le a faatasi le Alii ia i tatou. Tusi lenei mataupu faavae i luga o le laupapa.)
Ina ia fesoasoani i tagata o le vasega ia malamalama i lenei mataupu faavae, fai atu ia i latou e tusi i a latou api o le vasega po o api talaaga mo le suesueina o tusitusiga paia, po o le a le uiga i lona uiga ia lava papale ma onosai. Valaaulia ni nai tagata o le vasega e faitau leotele a latou faamatalaga. Faaopoopo atu i o latou malamalamaaga i le faamatala atu e faapea, i le talaaga o le talalelei, o le onosai i puapuaga e mafai ona faauiga o le tumau faamaoni i le Alii ma tetee atu ai i tofotofoga ma le lototele.
-
Aisea e faigata ai ona onosai i taimi o puapuaga?
-
O le a se taimi na e vaai ai o faaaoga e tagata le onosai ma tumau le faamaoni i taimi o puapuaga?
-
Na faapefea ona faaali atu e le Alii i na tagata sa faatasi o Ia ma i latou?
Ina ia fesoasoani i tagata o le vasega e faailoa mai se upumoni e faatatau i le mataupu faavae ua tusiaina i luga o le laupapa, valaaulia se tagata o le vasega e faitau leotele le Mataupu Faavae ma Feagaiga 24:10–12. Fai atu i le vasega e mulimuli i le faitauga ma faailoa mai le faamanuiaga na folafola mai e le Alii ia Oliva Kaotui pe afai o le a faaauau pea ma le faamaoni i lona valaauga e talai atu le talalelei.
-
O a faamanuiaga na folafola mai e le Alii ia Oliva pe afai o le a ia tumau pea ma le faamaoni i le faia o mea na talosagaina e le Alii? (Fesoasoani i tagata o le vasega ia iloa le folafolaga lenei: “Ua Ou faatasi ma ia e oo i le iuga” [fuaiupu e 10]. “O aʼu e maua ai e ia le mamalu” [fuaiupu e 11]. “O le a Ou tuu atu ia te ia se ituaiga o malosi e lei iloa lava i totonu o tagata” [fuaiupu e 12].)
Tusi le faamatalaga lenei i luga o le laupapa: Afai … , ona …
Valaaulia tagata o le vasega e faailoa mai se faamatalaga o le “afai-ona” e faaalia ai se mataupu faavae na aoao mai i le Mataupu Faavae ma Feagaiga 24:10–12. (E mafai ona faailoa mai e tagata o le vasega ni mataupu faavae eseese, ae ia mautinoa e faamamafa atu le mataupu faavae lenei: Afai tatou te faia ma le faamaoni mea ua poloai mai e le Alii ia i tatou, o le a Ia faamalosia i tatou. Faatumu le avanoa i luga o le laupapa e faauma ai le mataupu faavae.)
-
O faapefea ona faamalosia oe e le Alii ao e faamaoni ia te Ia?
Valaaulia tagata o le vasega e tusi i lalo se mea e mafai ona latou faia ina ia onosai ai ma tumau i le faatuatua i le Alii pe a feagai ma faigata i o latou olaga. Mafaufau e faasoa atu pe na faapefea ona faamalosia oe ma faatasi mai le Alii ia te oe ona o lou onosai faamaoni i taimi o faigata.
Mataupu Faavae ma Feagaiga 24:13-19
Ua faatonuina e le Alii ia Iosefa Samita ma Oliva Kaotui e uiga i la laua galuega ma e uiga ia i latou e tetee ia te i laua
Otooto le Mataupu Faavae ma Feagaiga 24:13–19 i le faamatala atu, na faatonuina e le Alii ia Iosefa Samita ma Oliva Kaotui e faatatau i vavega e mafai ona la faia i Lona suafa. Sa ia ta’u mai foi ia i laua e uiga i le puipuiga e mafai ona la maua pe a tetee tagata ia i laua. Atonu e te manao e faamalamalama atu, na tuuina mai e le Alii ia i laua ni faatonuga na ese mai i faatonuga ua maua e faifeautalai i le taimi nei. Mo se faataitaiga, na Ia tuuina mai ia te i latou le faatagaga e “tutu ese lea o le efuefu o o [laua] vae” o se molimau e faasaga ia te i latou o le a le talia i laua (MF&F 24:15). O lenei faiga e taofiofi lava mo tulaga sili ona ogaoga. O faifeautalai faamisiona e le faatagaina ona faia lenei mea i aso nei. Na poloaiina foi Iosefa Samita ma Oliva Kaotui “ia lē ave se ʼatotupe, po o se ete” (MF&F 24:18), o lona uiga sa la malaga e aunoa ma se tupe, e faalagolago i le agalelei o tagata o le Ekalesia ma isi e tuuina atu ni meaai ma malutaga. I le taimi nei, e le o poloaiina faifeautalai faamisiona e o e aunoa ma se atotupe po o se ete.
Mataupu Faavae ma Feagaiga 26
Ua faatonu e le Alii Iosefa Samita, Oliva Kaotui, ma Ioane Uitimera
Faamalamalama atu e faapea, o le Mataupu Faavae ma Feagaiga 26:1 o loo i ai nisi faatonuga ia Iosefa Samita, Oliva Kaotui, ma Ioane Uitimera e faatatau i le galuega faaleagaga ma faaletino o le a latou faia. Ona toe faamamafaina mai lea e le Alii se mataupu faavae taua e faatatau i le taitaiga o le Ekalesia. Ina ia faailoa atu lenei mataupu faavae, uunaia tagata o le vasega e mafaufau e faapea, ua latou o atu ma se uo e le auai i le ekalesia i se fonotaga na faapea ona lagolagoina ai tofi o le Ekalesia. Fesili atu pe faapefea ona latou faamatala atu i la latou uo le faiga o le lagolagoina o [tofiga]. (Mafaufau e valaaulia ni tagata se toalua o le vasega e faatino le vaaiga lenei.)
Valaaulia se tagata o le vasega e faitau leotele le Mataupu Faavae ma Feagaiga 26:2. Fai atu i le vasega e mulimuli i le faitauga, ma vaavaai mo se fasifuaitau e faatatau i le faiga o le lagolagoina [o tofiga]. A uma ona faitau le fuaiupu, fesili atu i tagata o le vasega po o le a le mea na latou mauaina. Atonu e te manao e fautua atu ia latou faailogaina upu o loo ta‘u mai ai le mataupu faavae lenei: O mea uma i le Ekalesia o le a faia e ala i le finagalo autasi.
-
O le a sou manatu i le uiga o le “finagalo autasi”? (Atonu e manaomia ona e faamalamalama atu, o le “finagalo autasi” e faatatau i tagata o le Ekalesia e faaaoga o latou faitalia e faailoa ai lo latou naunau po o le le naunau foi e lagolago se finagalo folasia mai se taitai o le Ekalesia. I le sauniga faamanatuga ma i konafesi a le siteki ma konafesi aoao, e talosagaina ai i tatou e faaali atu le autasi e ala i le sii o o tatou lima taumatau.)
-
O le a le eseesega i le va o le lagolagoina e ala i le finagalo autasi ma le palota?
Atonu e manaomia ona e faamalamalama atu, i le malo o le Alii, e masani ona faaali mai e le Alii ni faaiuga i Ana taitai ua tofiaina. Ae ui i lea, i nisi tulaga, e tuu mai ai e Ia i taitai e faia faiuga e ala i le pule ua tuuina mai ia i latou. O le Agaga Paia e faamautuina na filifiliga, ona faaaoga lea e tagata o le Ekalesia o latou faitalia e faailoa ai lo latou naunautai e lagolago le faaiuga. O le tulafono o le finagalo autasi e faatatau mo valaauga o le Ekalesia, faauuga i le perisitua, ma faaaliga. Tatou te auai i le tulafono o le finagalo autasi i taimi taitasi e sii ai o tatou lima e lagolago se tagata po o se faaiuga i se sauniga a le Ekalesia.
Ina ia fesoasoani i tagata o le vasega ia malamalama atili i le uiga pe a tatou lagolagoina isi, fai atu i se tagata o le vasega e faitau leotele le saunoaga lenei a Peresitene Gordon B. Hinckley. Valaaulia le vasega e faalogologo mo ni mea se tolu tatou te tautino atu e fai pe a tatou lagolagoina isi e ala i le finagalo autasi.
“O le faiga o le lagolagoina e sili atu nai lo na o le siiga masani o le lima. O se tautinoga e puipui, e lagolago, e fesoasoani ia i latou o e ua filifilia” (“This Work Is Concerned with People,” Ensign, Me 1995, 51).
-
O le a le mea tatou te tautino atu e fai pe a sii o tatou lima e lagolago ai isi?
Fai atu i tagata o le vasega pe na lagolagoina i latou mo se faauuga, siitia [o le perisitua], po o se valaauga.
-
Na faapei ou lagona i le lagolagoina o oe?
-
E faapefea ona tatou lagolagoina isi i auala e tolu ua faamatala mai e Peresitene Hinckley? (Tusi tali a tagata o le vasega i luga o le laupapa.)
Valaaulia tagata o le vasega e tusi i lalo le igoa o se tagata ua latou lagolagoina e ala i le siiina o o latou lima (mo se faataitaiga, o le perofeta, aposetolo, epikopo, taitai po o le autalavou). Fai atu i tagata o le vasega e tusi i lalo se mea se tasi o le a latou faia e faaleleia atili ai lo latou lagolagoina o lenei tagata. Faasoa atu lau molimau i faamanuiaga e oo mai i le lagolagoina o taitai o le Ekalesia.
Tala ma Faamatalaga o Talaaga
Mataupu Faavae ma Feagaiga 24:13. Vavega
O vavega o loo ta‘ua i le Mataupu Faavae ma Feagaiga 24:13 o faailoga ia na fetalai mai le Faaola o le a mulimuli ia i latou o e talitonu (tagai i le Mareko 16:17–18). Na aoao mai Peresitene Spencer W. Kimball, “o le mea na i ai le perisitua [a le Alii] ma o le mea na maua i ai le faatuatua, o le a i ai iina faailoga o le mana, e le mo le faaalialia ae mo se faamanuiaga i tagata” (“President Kimball Speaks Out on Administration to the Sick,” New Era, Oke. 1981, 45). I o tatou aso, e maua e e faatuatua le faamalologa ma vavega e pei lava ona sa masani ona latou maua ai. Ae peitai, tatou te le faalogo e uiga i faamalologa ma vavega uma e tutupu. O aafiaga faapena e paia. E tele taimi, o tagata e mauaina ni vavega faapena, e lagona le uunaia e taofiofi i latou ma le filemu ma le le faalauaiteleina.
Mataupu Faavae ma Feagaiga 24:15. O le a le uiga o le “tutu ese lea o le efuefu o o oulua vae”?
Na aoao mai Elder James E. Talmage o le Korama a Aposetolo e Toasefululua:
“O le luluina soo o le pefu o vae o se tasi e avea ma se molimau e faasaga i se isi, o se malamalamaaga lea a Iutaia e faailoga ai le taofiga o le faaaumea ma le teena o tiutetauave uma mo taunuuga e ono mulimuli mai. Na avea ma se sauniga o tuuaiga ma le molimau e ala i faatonuga a le Alii i Ana aposetolo. … I le tisipenisione i le taimi nei, ua faatonuina foi faapena e le Alii ia Ana auauna faatagaina e molimau atu faasaga ia i latou o e tetee ma le faalealofa i le upumoni pe a tuuina atu ma le mausali (tagai i le Mataupu Faavae ma Feagaiga 24:15; 60:15; 75:20; 84:92; 99:4). O le tiutetauave o le molimau atu i luma o le Alii e ala i lenei faailoga o le tuuaiga e maoae tele, o lea e na o lalo lava o tulaga e le masani ai ma ogaoga e mafai ona faaaogaina ai, pe a faatonu ai e le Agaga o le Alii” (Jesus the Christ, 3rd ed. [1916], 345; tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 50).
Mataupu Faavae ma Feagaiga 26:1. “Ona faailoa atu ai lea o le a le mea e tatau ona e faia”
I se faaaliga ia Iosefa Samita, Oliva Kaotui, ma Ioane Uitimera, na fetalai ai le Alii i “le konafesi e sosoo ai … [o le a] faailoa atu ai lea o le mea [e tatau ona latou] faia” (MF&F 26:1). O lenei faaaliga na tuuina mai ia Iulai 1830. I se konafesi na faia ia Setema 1830, “na tofia [ai Iosefa Samita] e ala i le leo o le Konafesi e maua ma tusi Faaaliga & Poloaiga mo lenei Ekalesia” (i le Far West Record: Minutes of The Church of Jesus Christ of Latter-day Saints, 1830–1844, ed. Donald Q. Cannon ma Lyndon W. Cook [1983], 3).
Mataupu Faavae ma Feagaiga 26:2. Aisea o le a faia ai e se tagata se palota e le autasi?
Na aoao mai Peresitene Iosefa Filitia Samita e uiga i tulaga o le a tuuina atu ai se palota e le autasi:
“Sa leai sa’u aia tatau e sii ai lo’u lima e tetee i se tagata ua filifilia i soo se tofiga i lenei Ekalesia, ona na o le faapea, ou te le fiafia ia te ia, pe ona o nisi o feeseeseaiga faaletagata lava ia po o o’u lava lagona, ae e na o ni pogai lava e faapea ua tausalaina o ia i le faia o se mea sese, o se solitulafono i tulafono a le Ekalesia lea o le a faaleagaoina ai o ia mo le tofiga ua valaauina o ia e umia” (Doctrines of Salvation, comp. Bruce R. McConkie, 3 vols. [1954–56], 3:124; tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 52).