I le taumafanafana o le 1831, na amatalia ai e nisi o le Au Paia o e na faapotopoto i Ohaio la latou malaga e nonofo i le eria o le Itumalo o Jackson, Misuri. I se faaaliga i le Perofeta o Iosefa Samita i le aso 20 o Iulai, 1831, na tofiaina ai e le Alii ia Initipene, Misuri, e avea ma “nofoaga tutotonu lea” o Siona (MF&F 57:3). Sa tatau ona amata faatau mai e le Au Paia ni fanua i le eria, ma sa tatau foi ona latou tausia poloaiga a le Alii e sauniuni ai mo le fausiaina o Siona. Ae peitai, i le aluga o taimi, na tulai mai ni finauga i le va o le Au Paia ma le toatele o tagatanuu o le itumalo o Jackson, Misuri, lea na iu ai i sauaga a vaega faatupu vevesi e faasaga i le Au Paia. Sa faamalosia le Au Paia e tuua le Itumalo o Jackson ia Novema ma Tesema 1833.
Fautuaga mo le Aoaoina Atu
Na tofia e le Alii ia Initipene, Misuri, e avea ma nofoaga tutotonu o Siona
A o lei amataina le vasega, tusi le upu Katelani, Ohaio i luga o se tagavai ma tuu i luga o se tasi o itu o le potu. I le isi itu o le potu, faaali ai se tagavai e faitauina Initipene, Misuri. Ia, pe afai foi e te manao i ai, e mafai ona e tusia i luga o le laupapa se faafanua faigofie o le ogatotonu i sisifo o le Iunaite Setete, ae faailoga manino ai Katelani, Ohaio, ma Initipene, Misuri, (tagai i Faafanua o le Talafaasolopito o le Ekalesia, Faafanua 6, “O Le Solo Atu i Sisifo o le Ekalesia”). Ia faatatau atu i le faafanua ao e aoao atu le lesona.
Amata i le fai atu i tagata o le vasega e vaai faalemafaufau o loo latou tolauapi ae latou iloa ai e i ai se matagi malosi ua latalata mai.
O a ni isi o auala e te ono maua ai le puipuiga mai le matagi malosi? O le a se auala atonu e aoga ai se faleie i lenei tulaga?
Faamalamalama atu na faaalia e le perofeta o Isaia ia Siona o se faleie tele. Sa ia faapea mai, “Ia faalautele le mea e tu ai lou faleie; ia faloina ie puipui o mea e te nofo ai: aua e te faaitiita, ia faauumiina au maea, ma ia malolosi au fao” (Isaia 54:2). I le faataunuuga o lenei valoaga, na faaauau ai ona taiala e le Alii le Au Peresitene Sili ma le Korama a Aposetolo e Toasefululua i le faavaeina o siteki o Siona i le lalolagi atoa.
Valaaulia se tagata o le vasega e faitau leotele le Mataupu Faavae ma Feagaiga 64:41–43. Fai atu i le vasega e mulimuli i le faitauga, ma vaavaai mo faamanuiaga na folafola mai e le Alii i e amiotonu o e e faapotopoto i Siona.
O a faamanuiaga na folafola mai e le Alii i e amiotonu o e e faapotopoto i Siona?
Faamalamalama atu e faapea, ia Iulai 1831, na folafola mai ai e le Alii, o le laueleele o Misuri o le laueleele folafolaina lea o Siona, ma o Initipene, Misuri, o le “nofoaga tutotonu lea” o le aai o Siona (tagai i le MF&F 57:1–3).
Valaaulia se tagata o le vasega e tu pe nofo i talane o le tagavai o Initipene, Misuri. Valaaulia se tagata o le vasega e tusi se ata o se faleie i luga o le laupapa. (Afai e lava le tele o le potuaoga, atonu e te mafaufau e aumai se faleie i le vasega ma valaaulia se tagata se toatasi pe toalua o le vasega e fofola e faatusa i le Au Paia ua amata ona fausia se nuu o le sulufaiga.)
Pe sa i ai se taimi na sese ai lou faatuina o se faleie, pe sa e taumafai ai e faatulaga se faleie ae le’o i ai uma ona vaega? O le a le mea na tupu?
Valaaulia tagata o le vasega e faitau filemu le Mataupu Faavae ma Feagaiga 105:5, ma vaavaai pe faapefea ona fausia le “faleie” o Siona ina ia talia ai e le Alii. Fai atu i tagata o le vasega e lipoti mai mea ua latou mauaina.
Tusi le mataupu faavae lenei i luga o le laupapa: E tatau ona faatuina Siona i luga o mataupu faavae o le tulafono o le malo selesitila. Faamalamalama atu e faapea, ina ua uma ona faaalia mai e le Alii le tulaga o le laueleele o Siona i le 1831, na Ia tuuina mai ni faaaliga i le lua tausaga na sosoo ai e faamatala mai ai mataupu faavae ia e tatau ona fausia ai i luga e le Au Paia ia Siona.
Vaevae tagata o le vasega i ni vaega se fa, ma tofi atu i vaega taitasi se mau se tasi o loo lisiina i luga o le laupapa. Valaaulia ia vaega e faitau ia mau ua atofa atu ia te i latou, ma vaavaai mo mataupu faavae o le amiotonu po o ni poloaiga o le a manaomia ona mulimuli ai le Au Paia ina ia faamanuiaina i le fausia o Siona.
A uma ona suesue e tagata o le vasega a latou mau atofaina, valaaulia i latou e lipoti mai mea na latou mauaina. Valaaulia se tagata o le vasega e tusi a latou tali i luga o le laupapa. (O tali a tagata o le vasega e tatau ona aofia ai le faamatalaga nei: ola i le tulafono o le faapaiaga ma saili atu mo le manuia o isi [MF&F 82:17–19]; fausia se malumalu ma maua ai faatonuga iina [MF&F 97:10–14]; ia loto mama [MF&F 97:16, 21]; ia tausi i poloaiga [MF&F 97:25–26]; ma ia faapaiaina ma “o ese ia i fafo mai Papelonia,” o lona uiga o le liliuese mai mea o le lalolagi [MF&F 133:4–5].)
O a ni auala na mafai e le ola ai i nei mataupu faavae o le amiotonu, ona fesoasoani i le Au Paia e fausia Siona ma puipuia ai mai matagi faaleagaga? E ono mafai faapefea e le ola ai i nei mataupu faavae ona puipuia i tatou i aso nei?
Atonu e te mafaufau e valaaulia ni nai tagata o le vasega e aumai a latou tusitusiga paia ma tutu pe nonofo i talane o le tagavai o Katelani, Ohaio, ma fai atu i se toatasi pe toalua o nei tagata o le vasega e o atu i le tagavai o Initipene, Misuri ma tutu pe nofonofo ai iina. Faamalamalama atu e faapea, ina ua uma ona faaali mai e le Alii le tulaga o Siona ia Iulai, 1831, e toatele le Au Paia na malaga atu i le toeitiiti 900 maila i Initipene, Misuri, e nonofo ma fausia ai Siona. Sa nonofo pea isi i Katelani, ma i isi vaega o le itu i sasae. O le a faatulagaina se siteki i Katelani i le aso 17 o Fepuari, 1834.
Tusi atu i le ata o le faleie (po o le faleie na e aumaia i le vasega). Faamalamalama atu e faapea, a o galulue faatasi le Au Paia e fausia Siona, sa faalautele atu faamanuiaga o le puipuiga o Siona ia i latou uma, e oo lava ia i latou o e sa le’i nonofo i Initipene, Misuri. Sa galulue faatasi le Au Paia e foai atu tupe ma punaoa e faataatia ai le faavae o le aai o Siona. Fai atu i tagata o le vasega e vaai faalemafaufau i se faalautelega o le faleie o Siona e aofia ai le Au Paia i Katelani.
Ua tulai mai finauga i le va o le Au Paia ma isi tagatanuu o Misuri
Ina ia fesoasoani i tagata o le vasega ia malamalama i mea na tutupu i Ohaio ma Misuri i le va o le 1831 ma le 1833, fai atu i se tagata o le vasega o loo i talane o le tagavai o Katelani e faitau leotele le faamalamalamaga lenei o le auala na lagolagoina ai e le Au Paia i le siteki o Siona o Katelani le fausiaina o le nofoaga tutotonu o Siona i Misuri. Valaaulia le vasega e faalogologo mo mea na faia e nisi o le Au Paia i Katelani e fesoasoani ai e faatu Siona.
Katelani, Ohaio: I le taimi o se faasologa o konafesi na faia ia Novema 1831, na tuufaatasi ai e Iosefa Samita ma isi taitai o le Ekalesia ia faaaliga na maua e oo mai i le taimi lena ma le fuafuaina e lolomi ni kopi e avea o se tusi. Na maua e Oliva Kaotui ma Ioane Uitimera le tiutetauave o le ave atu lea o faaaliga i Misuri ina ia mafai e William W. Phelps ona lolomi ia avea ai ma Tusi o Poloaiga. I le vaitaimi o le 1831 i le 1832, sa faaauau pea ona maua e Iosefa ni faaaliga ma faaliliu le Tusi Paia. I le tautotogo o le 1832, na malaga atu ai Iosefa i Misuri e asiasi i le Au Paia i Siona, ina ia lapatai atu ia te i latou o loo taumafai Satani e “liliu ese o latou loto mai le upumoni” (MF&F 78:10), ma ia faamaopoopo taumafaiga o faleteuoloa a epikopo i Katelani ma Initipene. Sa foai atu e nisi o tagata o le Ekalesia i Ohaio ni tupe e fesoasoani e faatau mai ai fanua ma sapalai i Misuri. O le toatele o le Au Paia sa faaauau pea ona siitia atu i Siona, ma e oo ane i le faaiuga o le 1832 pe a ma le tasi vae tolu o tagata o le Ekalesia ua nonofo i le Itumalo o Jackson.
Na faapefea ona fesoasoani atu Iosefa Samita ma isi tagata o le Au Paia i Katelani i le Au Paia i Misuri e amata ona faatu Siona?
Fai atu i se tagata o le vasega e faitau leotele le faamatalaga e uiga i taumafaiga a le Au Paia e fausia le aai o Siona. Valaaulia le vasega e vaavaai mo mea na sa’o ona fai ma mea sa le sa’o ona fai e le Au Paia a’o amata ona latou fausia Siona.
Initipene, Misuri: Na faamatalaina e Pale P. Palate le nofoia e le Au Paia o Siona i le faapea mai, “o le filemu ma le mau sa faapaleina ai a latou galuega, ma sa avea le vaomatua ma fanua uluola” (Autobiography of Parley P. Pratt, ed. Parley P. Pratt Jr. [1938], 93). Sa galue taitai o le Ekalesia i Misuri e taulima manaoga o le Au Paia na malaga mai. Na aofia ai le faatauina mai o fanua ma le faatuina o se faleoloa ma se fale lomitusi. E oo ane ia Iulai 1833, ua faatoateleina le faitau aofai o le Au Paia o Aso e Gata Ai i le toeitiiti 1,200. Ae sa le aunoa taitai ma le Au Paia ma o latou faafitauli. Na faatagaina e nisi tagata o le ekalesia lo latou manatu faapito ma le faaloloto e taofia ai i latou mai le ola i le tulafono o le faapaiaga.
E faaopoopo atu i faafitauli na mafua mai i le Au Paia ona o lo latou lava le usiusitai, sa latou feagai ma feteenaiga ma uluai tagata na nofoia le eria. Sa faateteleina le popole o tagata Misuri i le vave o le ola o “Mamona” ma lo latou aafiaga i le tamaoaiga ma tulaga faaupufai i le lotoifale. Sa le talitonuina e taitai faalelotu o le lotoifale ia talitonuga o le Au Paia. Sa faasalalau e se tasi o taitai faalelotu ni tala pepelo e uiga i tagata o le Ekalesia, ma uunaia tagatanuu e faia ni galuega o sauaga e faasaga ia i latou. Ma ia Iulai 1833, na lomia ai e W. W. Phelps se tusiga na faaautuina “Free People of Color,” lea na lapataia ai faifeautalai e uiga i le talai atu i totonu o tagata pologa. Sa faapea ona ave sese ai e tagatanuu o Misuri, o e na matele i le fautuaina o faiga faapologa, e faapea, sa taumafai le Au Paia e valaaulia atu pologa na faasaolotoina i Misuri. Na faaopoopo atu lenei mea i se tulaga atuatuvale ua uma ona i ai. I le aso 20 o Iulai, 1833, na togi ai i le aualatele e se vaega faatupu vevesi le masini lomitusi, faaleaga le tele o itulau sa le’i faapipiiina o le Tusi o Poloaiga, faataina ma faafulumanuina ia Epikopo Paterika ma le tagata liliu mai o Charles Allen, ma faamata’uina le aai. Na faaauau pea tulaga faatupu faalavelave ma sa faapea ona faamalosia ai le Au Paia e tuua le Itumalo o Jackson ia Novema ma Tesema o le tausaga lena.
O le a sou manatu, o a ni ou lagona i le avea ai ma se tasi o Au Paia amiotonu, na faamoemoe mo le puipuiga mai le Alii, ae na faamalosia e tuua le Itumalo o Jackson?
Afai e fesili atu se tasi ia te oe pe aisea na le mafai ai e le uluai Au Paia ona fausia le aai o Siona, o le a sau tala e fai atu? (Ina ia fesoasoani i tagata o le vasega e tali lenei fesili, atonu e te manao e valaaulia i latou e faitau le Mataupu Faavae ma Feagaiga 101:6–7; 103:2–4; 105:3–4, 9.)
Afai e te le’i fai atu i tagata o le vasega e toe foi atu i o latou nofoa, fai atu loa i ai i le taimi lenei.
O le a le lumanai o Siona?
Valaaulia se tagata o le vasega e faitau leotele le Mataupu Faavae ma Feagaiga 97:21. Fai atu i le vasega e mulimuli i le faitauga, ma vaavaai pe na faapefea ona faamatalaina e le Alii ia Siona. Atonu e te manao e fautua atu i tagata o le vasega e faailoga upu o loo aoao mai ai le upumoni lenei: O Siona o e ua loto mama. Tagai i le lisi o mataupu faavae ma amioga o loo i luga o le laupapa ma fai atu fesili nei:
O a ni auala e fesoasoani ai nei mataupu faavae amiotonu i se nuu ina ia avea ma e loto mama?
O le a la tatou matafaioi i le fausiaina o Siona i aso nei? (E mafai ona tatou ola amiotonu ma uunaia isi ia ola amiotonu. A o tatou ola ma faasoa atu le talalelei, e faalauteleina tuaoi o Siona, e faamalolosia ona siteki, ma faamanuia e le Atua le Au Paia i le puipuiga.)
Valaaulia tagata o le vasega e mafaufau i mataupu faavae o le amiotonu o loo lisiina i luga o le laupapa. Uunaia i latou e tusi se sini i a latou api o le vasega po o api talaaga mo le suesueina o tusitusiga paia, ia sili atu ona faamaoni i le ola ai i se tasi o mataupu faavae.
Tala ma Faamatalaga o Talaaga
E tatau ona faatuina Siona i luga o mataupu faavae o le amiotonu
Na saunoa Elder D. Todd Christofferson o le Korama a Aposetolo e Toasefululua, e uiga i le mea e manaomia e fausia ai Siona i luga o mataupu faavae o le tulafono o le malo selesitila:
Ata
Elder D. Todd Christofferson
“O le tele o le galuega e tatau ona faia i le faatuina o Siona e aofia ai a tatou taumafaiga faaletagata lava ia ina ia avea ma ‘e ua loto mama’ (MF&F 97:21). ‘E le mafai foi ona atiina ae Siona vagana e faia i mataupu faavae o le tulafono a le malo selesitila,’ na fetalai mai ai le Alii, ‘a leai ou te le mafai ona talia o ia ia te au’ (MF&F 105:5). Ioe, o le tulafono o le malo selesitila, o le tulafono ma feagaiga o le talalelei, lea e aofia ai lo tatou manatuaina pea o le Faaola ma la tatou tautinoga ia usiusitai, ositaulaga, faapaiaina, ma faamaoni aiai.
“Sa le fiafia le Faaola i nisi o le Au Paia anamua ona o o latou ‘manao … tuinanau’ (MF&F 101:6; tagai foi i le MF&F 88:121). O tagata nei sa ola i se lalolagi sa leai ni televise, leai ni tifaga, leai se Initoneti, leai ni iPod. I se lalolagi ua lilofia i le taimi nei i vaaiga ma musika e faaalia ai tulaga o feusuaiga, mata ua aunoa ai i tatou mai manao tuinanau ma mea leaga ia e o mai faatasi ai? Ia taumamao mai le taumafai e tauamiotonu lavalava e le talafeagai tele e faapea e lelei, po o le aafia i amioga le mama a isi tagata e ala i le matamataina o ponokarafi, ae tatau ona tatou fiaaai ma fiafeinu i le amiotonu. Ina ia o mai i Siona, e le lava mo oe ma au ona faapea ia laitiiti ifo le amioleaga nai lo isi. E le gata ia avea i tatou ma ni tagata lelei ae ia avea o ni alii ma ni tamaitai paia. E manatua ai le saunoaga a Elder Neal A. Maxwell, ia tatou atiina ae nei loa o tatou fale i Siona ae lafoai loa le fale o le taumafanafana i Papelonia (tagai Neal A. Maxwell, A Wonderful Flood of Light [1990], 47)” (“O Mai i Siona,” Ensign po o le Liahona, Nov. 2008, 38–39).
Na lisiina e Epikopo Keith B. McMullin o le Au Epikopo Pulefaamalumalu nisi o mataupu faavae e tatau ona fausia ai i luga Siona:
Ata
Epikopo Keith B. McMullin
“O le feagaiga o le faapaiaga e aofia ai le osi taulaga; po o se vaega o lona uiga o le alofa, galue, ma le faalagolago o le tagata ia te ia lava; ma e taua tele foi i le faatuina o le malo o le Atua. ‘E le mafai ona faatuina Siona,’ ua fetalai mai le Alii, ‘sei vagana e faia i mataupu faavae o le tulafono a le malo selesitila’ [MF&F 105:5.] O le feagaiga o le faapaiaga o le totonugalemu lea o lenei tulafono. E i ai se aso tatou te faaaogaina ai i lona atoatoa. O lenei feagaiga e aofia ai le ‘tuuina atu e se tasi o lona taimi, taleni ma ana mea e fesoasoani ai e tausia e matitiva ma e le tagolima—pe o le faaleagaga pe faaletino—ma le fausiaina o le malo o le Alii.’ [Tagai i le Ensign, Aok. 1984, 4; Liahona, Tes. 1984, 7.]
“O nei mataupu faavae o le alofa, galue, o le faalagolago o le tagata ia te ia lava, ma le faapaiaga e aumai mai le Atua. O i latou o e taliaina ma taitaiina i latou lava e tusa ai ma nei mea, e avea ma e ua loto mama. O le lotogatasi i le amiotonu o le faamatalaina lena o uiga o o latou tagata. O lo latou filemu ma le fiafia e avea ma tagavai i malo uma. Ua saunoa mai le Perofeta o Iosefa Samita:
“O le fausiaina o Siona o se mafuaaga ua faafiafiaina ai tagata o le Atua o soo se matua lava; o se autu na laugaina e perofeta, faitaulaga, ma tupu, faatasi ma se loto malie ma se faamamafaga faapitoa; … ua tuua mo i tatou ina ia tatou vaavaai i ai, auai ma fesoasoani i le tuleiina i luma o le mamalu i aso e Gata Ai [o Siona] … o se galuega ua faamoemoeina e aumaia ai le faafanoga i mana o le pouliuli, toe faafouina o le lalolagi, mamalu o le Atua, ma le faaolataga o le auaiga o tagata soifua.’ [Aoaoga a le Perofeta o Iosefa Samita, sel. Joseph Fielding Smith (1976), 231–32; ua faaopoopo le faamamafa.]” (“O mai i Siona! O mai i Siona!” Ensign po o le Liahona, Nov. 2002, 96).
Aisea na toilalo ai le uluai Au Paia i le fausia o le aai paia?
Na aoao mai Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
“I lalo o le taitaiga a le Perofeta o Iosefa Samita, sa taumafai ai tagata anamua o le Ekalesia e faatu le nofoaga tutotonu o Siona i Misuri, ae sa le’i agavaa i latou e fausia le aai paia. Na faamalamalama mai e le Alii se tasi o mafuaaga o lo latou toilalo:
“’E lei aoaoina e i latou le usiusitai i mea na ou manaomia mai ia i latou, a ua tumu i amioleaga eseese, ua le tuuina atu foi i ai a latou mea, e pei ona tatau ai i le au paia, i e matitiva ma e mafatia ia te i latou;”
“’Ua le au faatasi foi e tusa ma le faatasiga e ao ina faia i le tulafono o le malo selesitila’ (MF&F 105:3–4).
“’Sa i ai misa, ma fefinauaiga, ma losilosivalega, ma tauaimisaga, ma manao tuinanau ma le faaloloto ia te i latou; o lea na latou faaleagaina ai o latou tofi i ia mea’ (MF&F 101:6).
“Nai lo le faamasinoina ma le faalealofa o le Au Paia anamua, e tatau ona tatou vaai ifo ia i tatou lava pe o faapeī i tatou.
“O Siona e Siona ona o aga, uiga, ma le faamaoni o ona tagatanuu. Manatua, ‘sa taua e le Alii lona nuu o Siona, aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa’ (Mose 7:18). Afai o le a tatou fausia Siona i o tatou aiga, paranesi, uarota ma siteki, e ao lava ona tatou ausia lenei tulaga. O le a manaomia (1) ia lotogatasi i le loto e tasi ma le manatu e tasi; (2) ia avea ma ni tagata paia taitoatasi ma tuufaatasi; ma (3) ia tausia e matitiva ma e le tagolima i se lelei ia faapea ona leai ai se tasi e mativa ia i tatou. E le mafai ona tatou faatalitali sei iloga e oo mai Siona ona faatoa tupu lea o nei mea—o le a oo mai Siona pe afai e faia ia mea” (“O Mai i Siona,” Ensign po o le Liahona, Nov. 2008, 37–38).
O le foafoaga o siteki e pei o le faavaeina o aai o Siona
Na faamalamalama mai e Elder Bruce R. McConkie e faapea, o siteki o nofoaga e faapotopoto i ai le Au Paia o loo soifua i le lalolagi atoa:
Ata
Elder Bruce R. McConkie
“O loo i ai i se siteki ni ona tuaoi eleele. O le faatuina o se siteki e pei lava o le faavaeina o se Aai Paia. O siteki uma i le lalolagi o le nofoaga lea e faapotopoto i ai mamoe ua se o Isaraelu o e nonofo i lona eria. …
“E mafai e i tatou uma taitoatasi ona atiinae Siona i o tatou lava olaga e ala i le loto mama. Ma o le folafolaga ua tuuina mai, ‘Amuia e loto mama: aua latou te iloa atu le Atua.’ (Mataio 5:8.) E mafai e i tatou taitoatasi ona faaopoopoina atu tuaoi o Siona i le faapotopotoina mai lea o a tatou uo ma tuaoi i le lafu a Isaraelu” (“Come: Let Israel Build Zion,” Ensign, Me 1977, 118).
O le malaga toe foi atu a Iosefa Samita i Katelani mai Misuri
Sa tusia e Iosefa Samita le faamatalaga lenei e uiga i lana malaga toe foi atu i Katelani ina ua uma ona ia asiasi atu i le Au Paia i Misuri:
Ata
Perofeta o Iosefa Samita
“I le aso 6 o Me [1832] sa ou faamavae atu ai i le usoga i Initipene, ma, faatasi ai ma Uso Rikitone ma Whitney, na amata ai ona toe foi atu i Katelani, e ala i se taavale solofanua i St. Louis, ma mai iina i Vincennes, Initiana; ma mai iina i New Albany, latalata i le afu o le vaitafe o Ohaio. Ae matou te le’i taunuu i le nofoaga mulimuli, sa faapea ona fefefe solofanua, ma a’o taufetuli i le saoasoa na gata ai, sa taumafai Epikopo Whitney e oso i fafo mai le taavale solofanua, ae peitai sa mau lona ofutele ma lavea ai lona vae i le uili, ma faapea ona gau ai lona ogavae ma lona vae i ni vaega se tele ae o le taimi lava lea na ou puna ai i fafo e aunoa ma se afaina. Sa matou nonofo i le maota mo tagata lautele a Mr. Porter i Greenville, mo le fa vaiaso, ae o Elder Rikitone na alu sa‘o lava i Katelani. I lenei taimi atoa, sa le’i misi se mea tausami po o se moe i le po a Uso Whitney, ae o Dr. Porter, o le uso o le pule o le matou fale, o le sa tausiaina o ia, na faapea mai, o se faanoanoaga ona matou te le’i maua atu ni ‘Mamona’ iina, aua e mafai ona latou faaleleia ponaivi gaui pe faia soo se mea lava. Sa ou nofo ia Uso Whitney ma tausia o ia seia o’o ina mafai ona fealuai. A’o i ai i lenei nofoaga, sa masani ona ou savalivali i le togavao, lea sa ou vaaia ai ni tuugamau fou; ma i se tasi aso ina ua ou aluese mai i le laulau ai, sa ou savali sao atu i le faitotoa ma amata ona faasuati malosi lava. Sa tele le palapala ma ni mea oona na ou faasuatia mai, ma sa matua tele naua le femilosa’i o maso o lo’u tino, na faapea ona pi’o ai lo’u auvae i ni nai taimi. Sa mafai ona ou faaleleia lenei mea i le suia i ai o o’u lava lima, ma ou savali atu ia Uso Whitney (o le sa i luga o le moega), i le vave e mafai ai; sa ia faaee ona lima i o’u luga ma faamanuia ia te a’u i le suafa o le Alii, ma sa ou malolo ai lava i le taimi lea, e ui lava ina sa malosi tele aafiaga o le oona, lea na mafua ai ona toulu le tele o lo’u lauulu. E faafetaia ai lava lo’u Tama Faalelagi mo Lona faasalavei mai ia te a’u i lenei taimi taua, i le suafa o Iesu Keriso. Amene.
“Na toeitiiti atoa le fa vaiaso e le’i minoi le vae o Uso Whitney mai le moega, i le taimi na ou alu atu ai i lona potu, i le mavae ai o se savaliga i le togavao, ma fai atu ia te ia pe ioe e amata loa ona ma o i le fale i le taeao, o le a ma o i le taavale toso e oo atu i le vaitafe, pe a ma le fa maila, ma o le a faatali mai ai iina se vaa e aveina faavave i ma’ua i le isi itu, lea o le a tatou maua ai se solofanua e aveina atu sa’o i maua i le vaega mulimuli o le malaga, lea o le a ma maua ai se vaa, o loo faatali mai ai, ma o le a matou o atu i le vaitafe a’o le’i taina le sefulu, ma maua ai se malaga fiafia i le fale. Sa lototele o ia ma fai mai ia te a’u o le a alu. Sa ma amata i le taeao na sosoo ai, sa maua mea uma e pei na ou tauina atu ia te ia, aua sa vave ona matou uia le vaitafe a’o lei taina le sefulu, ma, na taunuu loa i Wellsville, ona faaaoga loa lea o se taavale solofanua e o atu ai i Chardon, mai iina i se taavaletoso i Katelani, lea sa ma taunuu ai i se taimi o Iuni” (i le History of the Church, 1:271–72). (Tagai foi i le Church History in the Fulness of Times Student Manual, 2nd ed. [Church Educational System manual, 2003], 116.)
Tulaga faatupu faalavelave i le Itumalo o Jackson
“A o lei uma Aperila i le [1833], sa faapea ona aliali mai ai le agaga o sauaga. I le amataga lava, sa lapataiina ai e tagatanuu o le lotoifale ia tagata o le Ekalesia e faapea, sa latou le fiafia i le taunuu atu o le toatele naua o le Au Paia o Aso e Gata Ai, o e, sa latou popole, o le a le umi ae latou lofituina i latou i faiga palota. O le Au Paia sa tele lava ina o mai mai setete i matu ma sa masani ona tetee i le faapologaina o tagata uli, lea sa faatagaina i lena taimi i le setete o Misuri. …
“Sa feaveai solo ai e le au tetee se faaaliga, o nisi taimi sa ta’ua o se faavae faalilolilo, ina ia maua ai ni saini a i latou o e na mananao e aveese le ‘sasa o Mamona.’ O nei lagona o le inoino sa faateteleina i le aso 20 o Iulai 1833, ina ua feiloai se vaega o tagata faatupu vevesi, pe a ma le 400 o alii, i le falefaamasino i Initipene e faamaopoopo ai a latou taumafaiga. Na folasia i luma o taitai o le Ekalesia ni poloai tusitusia e valaauina ai le Au Paia e o ese ma le Itumalo o Jackson; ia taofia le lolomiina o le latou nusipepa, o le Evening and the Morning Star; ma ia le faatagaina soo se tagata faaopoopo o le Ekalesia ona sau i totonu o le Itumalo o Jackson. Ina ua iloa e tagata faatupu vevesi e le mafai ona ioe taitai o le Ekalesia i nei manaoga faasolitulafono, sa latou osofaia le ofisa nusipepa, lea sa avea foi ma fale o le faatonu o William W. Phelps. Sa gaoi e le au osofai le masini lomitusi ma faaleagaina le fale. …
“Sa toe o mai foi le vaega faatupu vevesi i le aso 23 o Iulai [1833], ma sa ofoina atu e taitai o le Ekalesia i latou lava o se totogi pe afai latou te le faia se mea e afaina ai tagata. Ae sa faamatau mai e le au faatupu vevesi le faamanualia o le Ekalesia atoa ma faamalosia ai le usoga e malilie o le a o ese uma le Au Paia o Aso e Gata Ai mai le itumalo. E ui o faatinoga a le au faatupu vevesi sa faasolitulafono, e faasaga i faavae o le Iunaite Setete ma le setete o Misuri, sa faapea ona saili ai e taitai o le Ekalesia le fesoasoani a le kovana o le setete, o Daniel Dunklin. Sa ia fautuaina i latou i o latou aia tatau faalemalo ma faatonuina le Au Paia e saili se fautuaga faaletulafono. …
“I le faaiuga o le 1833 na sopoia ai e le toatele o le Au Paia le Vaitafe o Misuri i matu e ui atu i le Itumalo o Clay ma maua ai se sulufaiga le tumau iina” (Our Heritage: A Brief History of The Church of Jesus Christ of Latter-day Saints [1996], 40, 42, 43).