Lesona 50
Mataupu Faavae ma Feagaiga 43–44
Folasaga
Ia Fepuari 1831, na taunuu ai Iosefa Samita i Katelani, Ohaio. I lona taunuu atu, sa ia iloa ai ua faaseseina le Au Paia i Katelani e ala i faaaliga sese. Mo se faataitaiga, na fai mai se tamaitai na igoa ia Mrs. Hubble o ia o se perofeta fafine ma ona maua faaaliga mo le Ekalesia. O le popole i faatosinaga na oo mai i le Au Paia i Katelani, na faapea ona ole atu ai Iosefa i le Alii po o le a se mea e tatau ona fai. I le tali mai, na ia mauaina ai le faaaliga lea ua tusia nei i le Mataupu Faavae ma Feagaiga 43. I lena faaaliga, na faatonuina ai e le Alii le Au Paia i mea na tatau ona latou faia e aloese ai mai le faaseseina. O le faaaliga i le Mataupu Faavae ma Feagaiga 44 sa maua foi ia Fepuari 1831, na tuuina mai ai faatonuga i le perisitua e talai atu le talalelei ma auauna atu i e matitiva.
Fautuaga mo le Aoaoina Atu
Mataupu Faavae ma Feagaiga 43:1–7
Ua tautino mai e le Alii o faaaliga ma poloaiga e na o Lana perofeta filifilia lava e ala mai ai
Filifili ni viiga se lua e usu e le vasega. Ina ia fesoasoani i tagata o le vasega ia malamalama i le faigata o le mulimuli i ni taitai eseese se lua i le taimi e tasi, fai atu i ni tagata se toalua o le vasega e tutu i le pito i luma o le vasega ma taitai le vasega i le usuina o pese e lua i le taimi e tasi. A uma le usuina o ni nai laina o viiga uma e lua, taofi le pepese ae fai atu le fesili lenei:
-
Aisea e faigata ai ona mulimuli i ni taitai eseese ma ni pese se lua i le taimi e tasi?
Faamalamalama atu faapea, ia Fepuari 1831, na sau ai se fafine e igoa Mrs. Hubble i le Au Paia i Katelani, Ohaio. Sa ia fai mai o ia o se perofeta fafine, sa ia mauaina ni faaaliga mo le Ekalesia, sa ia iloaina o le Tusi a Mamona e moni, ma e tatau ona avea o ia ma se faiaoga i le Ekalesia. Sa mafai ona ia faaseseina ai nisi o le Au Paia. Sa popole Iosefa Samita ma isi i lana faatosinaga ma e uiga i isi faaaliga sese i le Au Paia. Sa tonu loa i le perofeta e fesili atu i le Alii i se mea e tatau ona fai, ma sa ia maua ai se faaaliga. Sa tusia e Ioane Uitimera, o le sa le’i leva foi ona taunuu atu i Katelani, “Na tuuina mai e le Alii [lenei] Faaaliga ina ia le faaseseina le Au Paia” (Documents, Volume 1: July 1828–June 1831, vol. 1 of the Documents series of The Joseph Smith Papers [2013], 257).
Valaaulia ni nai tagata o le vasega e feauauai i le faitauina leotele mai o le Mataupu Faavae ma Feagaiga 43:1–5. Fai atu i le vasega e mulimuli i le faitauga, ma vaavaai mo le faamalamalamaga a le Alii e uiga i le e mafai ona maua faaaliga mo le Ekalesia atoa.
-
O ai na tofia i lena taimi e mauaina poloaiga ma faaaliga mo le Ekalesia atoa? (Iosefa Samita.) O ai ua tofia i lena tofiga i le taimi nei? O Le Peresitene o le Ekalesia.)
-
O le a se mea ua tatou aoao mai i nei fuaiupu? (E mafai ona faaaoga e tagata o le vasega ni upu eseese, ae e tatau ona latou faailoa mai le mataupu faavae lenei: E na o le Peresitene o le Ekalesia e mafai ona maua faaaliga mo le Ekalesia atoa. Atonu e te manao e fautua atu ia tusi e tagata o le vasega lenei upumoni i totonu o a latou tusitusiga paia i talane o fuaiupu e 3–4. Ina ia faamamafaina le taua o lenei aoaoga faavae, valaaulia tagata o le vasega e faitau le Mataupu Faavae ma Feagaiga 21:4-6; 28:2–7.)
Faailoa atu e pei o Mrs. Hubble ma isi i le popofou o le Ekalesia, o loo taumafai isi tagata i o tatou vaitaimi e tauanau isi e mulimuli atu ia i latou ma talia a latou aoaoga. Valaaulia se tagata o le vasega e faitau leotele le Mataupu Faavae ma Feagaiga 43:6–7. Fai atu i le vasega e faailoa mai le mamanu na faaali mai e le Alii e puipuia ai i tatou mai le faaseseina e i latou e le faatagaina e taitaia le Ekalesia.
Mataupu Faavae ma Feagaiga 43:8-16
Ua poloaiina toeaina e aoao atu ma faamalamalama e le tasi le isi ma ia faapaiaina
Fai atu i tagata o le vasega e lisi i luga o le laupapa nisi o sauniga latou te auai i le avea ai ma tagata o le Ekalesia. Ona valaaulia lea o tagata o le vasega e vaevae i paga e talanoa ai i le fesili lenei:
-
O a nisi o faamoemoega o nei sauniga?
A uma ona talanoaina e tagata o le vasega lenei fesili, atonu e te manao e fai atu i nisi o i latou e faasoa mai a latou tali i le vasega atoa. Ona fai atu lea i se tagata o le vasega e faitau leotele le Mataupu Faavae ma Feagaiga 43:8, ae valaaulia le vasega e faailoa mai mea o loo aoao mai e lenei fuaiupu e uiga i le faamoemoega o sauniga a le Ekalesia.
-
O le a le mea na fetalai mai le Alii i toeaina o le Ekalesia e tatau ona faia pe a latou faapotopoto? O le a le uiga o le faagaeetia e le tasi le isi? (Ia atiae e le tasi le isi ma ia faamalosi le tasi i le isi.)
-
E tusa ai ma le fuaiupu e 8, o a mea o le a tatou iloa a’o tatou aoao ma faagaeetia e le tasi le isi? (Atonu e eseese tali a tagata o le vasega, ae e tatau ona latou faamatala mai le mataupu faavae lenei: A tatou potopoto faatasi, e tatau ona tatou aoao ma faagaeetia e le tasi le isi, ina ia mafai ona tatou iloa le ala e galulue ma taitai ai le Ekalesia.)
Valaaulia tagata o le vasega e faitau filemu le Mataupu Faavae ma Feagaiga 43:9, 11 ma faailoa mai mea e tatau ona faia pe a uma ona tatou iloa le ala e galulue ai.
-
O a mea e tatau ona tatou faia pe a uma ona aoaoina i tatou i a tatou sauniga o le Ekalesia? (E tatau ona faailoa mai e tagata o le vasega le mataupu faavae lenei: E tatau ona fusia faatasi i tatou e galulue i le malamalama ua tatou maua. Atonu e te manao e fautua atu i tagata o le vasega e faailoga lenei mataupu faavae i le fuaiupu e 9.)
-
E tusa ai ma nei fuaiupu, e faapefea ona faamanuiaina i tatou pe a tatou maua le malamalama ma galue i ai? (A o talanoaina e tagata o le vasega lenei fesili, ia mautinoa e faamamafa atu le mataupu faavae lenei: E faapaiaina i tatou pe a tatou galulue i upumoni ua tatou aoaoina. Atonu foi e te manao e faamalamalama atu, ina ia faapaiaina o le a ia paia, faamamaina mai agasala.)
Tusi le ata lenei i luga o le laupapa.
-
O le a lou manatu i le uiga o le “fusia faatasi [i tatou lava] ia faia”?
-
E faapefea ona fesoasoani le malamalama tatou te maua mai sauniga a le Ekalesia e faapaiaina ai i tatou?
Valaaulia le vasega e mafaufau i faamanuiaga ua latou mauaina ina ua latou faatinoina mea na latou aoaoina i le sauniga a le Ekalesia. Fai atu i ni nai tagata o le vasega e faasoa mai nei aafiaga ma faamalamalama mai pe na faapefea ona faamanuiaina i latou ona o le faatinoina o mea ua latou aoaoina.
Otooto le Mataupu Faavae ma Feagaiga 43:12–14 i le faamatala atu, na fetalai mai le Alii i le Au Paia e faapea, afai latou te mananao e maua upumoni o le talalelei, na manaomia ona latou lagolagoina Iosefa Samita i lona valaauga.
Faamalamalama atu na faaalia mai e le Alii upumoni o loo i le Mataupu Faavae ma Feagaiga 43:15–16 i le Au Paia o Aso e Gata Ai o e na sauni e auauna atu o ni faifeautalai. Ona valaaulia lea o se tagata o le vasega e faitau leotele nei fuaiupu.
-
O le a lou manatu, e faapefea ona faatatau nei fuaiupu i le galuega a faifeautalai faamisiona?
Mataupu Faavae ma Feagaiga 43:17-35
E tatau i auauna a le Atua ona talai atu le salamo e sauniuni ai mo le Afio Mai Faalua ma le Meleniuma
Fai i tagata o le vasega e lisi ni gaoioiga po o mea e tutupu e manaomia ai ni tapenapenaga toto‘a. E mafai ona faasoa mai e tagata o le vasega ni nai faataitaiga, e pei o le faamisiona talai, taaloga, faaaliga o musika, tofiga e faiaoga i le lotu, ma suega i le aoga.
-
E te manatu o a ni lagona o tagata pe afai latou te le’i saunia ae ua oo mai le taimi latou te auai ai i na gaoioiga?
Valaaulia se tagata o le vasega e faitau leotele le Mataupu Faavae ma Feagaiga 43:17-18. Fai atu i le vasega e mulimuli i le faitauga, ma vaavaai mo se mea e manaomia ai a tatou sauniuniga. (“O le aso tele o le Alii,” po o, i se isi faaupuga, o le Afio Mai Faalua.)
Vaevae tagata o le vasega i ni paga. Fai atu i paga taitasi e faitau faatasi le Mataupu Faavae ma Feagaiga 43:17–22, ma vaavaai mo mea na faatonuina e le Alii toeaina e fai, e fesoasoani ai i tagata ina ia saunia mo le Afio Mai Faalua. A uma se taimi na tuu atu i vaega e faitau ai, fai atu i le vasega fesili nei:
-
O le a le mea na faatonu e le Alii toeaina e aoao atu? O a ni upumoni e mafai ona tatou aoao mai i nei fuaiupu? (E tatau ona faaalia e tagata o le vasega e faapea, ina ia saunia i tatou lava mo le Afio Mai Faalua o Iesu Keriso, e tatau ona tatou salamo. Atonu e te manao e tusi lenei mataupu faaavae i luga o le laupapa.)
Faamanatu i tagata o le vasega na folafola mai le Alii e faapotopoto Lona nuu e pei o se matuamoa e ofaofatai lana toloai i lalo o ona apaau, ae sa toatele tagata sa le fia salamo pe saunia i latou lava mo le Afio Mai Faalua (tagai i le MF&F 43:23–24; tagai foi i le MF&F 29:1-2 ma le lesona 35 i lenei tusi lesona).
Fai atu i paga o tagata o le vasega e faitau faatasi le Mataupu Faavae ma Feagaiga 43:25–27, ma vaavaai mo “leo” eseese na faaaoga e le Alii e valaau atu ai i tagata e o mai ia te Ia. A uma ona latou faitau, fai atu fesili nei:
-
O “leo” na e mauaina? Aisea e te manatu e manaomia ai nei leo eseese?
Valaaulia tagata o le vasega e mafaufau loloto i mea patino e tatau ona latou faia, ina ia salamo ma saunia ai mo le Afio Mai Faalua. Ona valaaulia lea o se tagata o le vasega e faitau leotele le Mataupu Faavae ma Feagaiga 43:28–31, ma fai atu i le vasega e vaavaai mo le mea tele lea na valoiaina i nei fuaiupu.
-
O le a le mea tele lea na valoia i nei fuaiupu? (O Le Meleniuma.)
-
O le a le mea o le a tupu i le taimi o le Meleniuma? (E tatau ona faailoa mai e tagata o le vasega le aoaoga faavae lenei: I le taimi o le Meleniuma, o le a saisaitia Satani ae o le a nofotupu Iesu Keriso faatasi ma Lona nuu i le lalolagi. Atonu e te manao e fautua atu i tagata o le vasega e faailoga upu po o fuaitau o loo aoao mai ai lenei upumoni i fuaiupu e 28–31. Ina ia fesoasoani i tagata o le vasega ia malamalama atili i le auala o le a saisaitia ai Satani, ia mafaufau e valaaulia i latou e faitau le 1 Nifae 22:26.)
Faitau leotele le saunoaga lenei a Peresitene George Q. Cannon o le Au Peresitene Sili, ua faamalamalama mai ai le auala o le a saisaitia ai Satani i le taimi o le Meleniuma:
“Tatou te talanoa e uiga i le saisaitia o Satani. O le a saisaitia Satani e le mana o le Atua; ae o le a saisaitia foi o ia i le naunautaiga o tagata o le Atua e le faalogo atu ia te ia, ina ia le puleaina e ia“ (Gospel Truth: Discourses and Writings of President George Q. Cannon, comp. Jerreld L. Newquist, 2 vols. [1957–74], 1:86).
-
E mafai faapefea ona tatou saunia nei ina ia faitauina i totonu o e amiotonu pe a toe afio mai le Faaola? (A o tali mai tagata o le vasega i lenei fesili, atonu e te manao e toe faamanatu ma molimau atu i upumoni na talanoaina i lenei lesona.)
Mataupu Faavae ma Feagaiga 44
Ua poloaiina e le Alii Ana auauna e faapotopoto faatasi
Otooto le Mataupu Faavae ma Feagaiga 44:1–6 i le faamalamalama atu, na faatonuina e le Alii ia toeaina e faapotopoto mo se konafesi. Na folafola mai e le Alii i toeaina, afai latou te faamaoni ma faatuatua ia te Ia, o le a Ia liligi mai Lona Agaga i o latou luga ma faamanuia i latou, ina ia le i ai se mana o o latou fili ia i latou. Na faatonuina i latou e le Alii e talai atu le salamo, ma avatu le toomaga i e matitiva, ma faatulaga i latou lava e tusa ai ma tulafono o le laueleele.
Tala ma Faamatalaga o Talaaga
Mataupu Faavae ma Feagaiga 43:6–7. “O ia o lē ua Ou faauuina”
Sa uunaia i tatou e Peresitene Boyd K. Packer o le Korama a Aposetolo e Toasefululua, e mulimuli i fautuaga a le Peresitene o le Ekalesia ma ia le taitaieseina e tagata taufaasese:
“’O lenei foi Ou te toe fai atu ia te outou, o le a lē tuuina atu i soo se tasi e alu e talai atu la’u talalelei, pe ati a’e la’u ekalesia, vagana ai ua faauuina o ia e se tasi ua i ai le pule, ma ua lauiloa i le ekalesia ua ia te ia le pule ma ua faauuina o ia i le ala e tatau ai e ao o le ekalesia.’ (MF&F 42:11.)
“O loo i ai i totonu o i tatou i le taimi nei, o e e le’i faauuina i taimi uma e taitai o le Ekalesia, o loo fai mai e uiga i vevesi o loo faamalumalu mai i mea faaupufai ma le tamaoaiga, le iuga o le lalolagi.
“Ua fai mai na tagata taufaasese, e le o silafia e le Usoga mea o loo tutupu i le lalolagi pe faapea, ua faamaonia e le Usoga a latou aoaoga, ae le mananao e talanoa e uiga i ai mai le pulelaa. E leai se tasi o na faamatalaga e sa’o. O le Usoga, e ala i le femalagaa’i soo i soo se mea o le lalolagi, e mautinoa lava lo latou silafia o mea o loo tutupu, ma e ala foi i le tofa faaperofeta o loo mafai ai ona latou faitau i faailoga o taimi.
“Aua ne‘i faaseseina e i latou—na tagata taufaasese. Afai e i ai se faapotopotoina, o le a fofogaina e i latou o e ua faauuina e le aunoa ma e ua iloa i le Ekalesia o loo i ai le pule.
“Ia aloalosa mai ni isi lava [tagata taufaasese]. Mulimuli i ou taitai o e ua uma ona faauuina, ma ua lagolagoina faalauaitele, ona le taitaiseseina ai lea o oe”(“To Be Learned Is Good If … ,” Ensign, Nov. 1992, 73). (Tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 87.)
Mataupu Faavae ma Feagaiga 43:7. “Sau i totonu e ala mai i le faitotoa”
Ua fetalai mai le Alii, “O ia o lē ua … faauuina, e sau i totonu e ala mai i le faitotoa” (MF&F 43:7). Na faamalamalama mai e Peresitene Iosefa Filitia Samita lenei folafolaga:
“E finagalo le Alii ina ia tatou iloa, na te faia mea uma i le faatulagaga tatau, ma soo se taimi lava na te valaauina ai se tasi e taitaia le Ekalesia, o lena tagata o le a ui mai i le faitotoa ma ia faauuina e i latou o e o loo umia le pule. O le tulaga lea na i ai mai lava i le amataga ma o le a faaauau ai lava seia oo i le iuga” (Church History and Modern Revelation, 2 vols. [1953], 1:138).
Mataupu Faavae ma Feagaiga 43:22-31. O Le Afio Mai Faalua, o le Meleniuma, ma “se vaitau itiiti”
Na fetalai mai le Alii, a latalata i le faaiuga o le Meleniuma, o le a “toe tatalaina” Satani ae “o le a nofotupu o ia mo nao se vaitau itiitii” (MF&F 43:31). O le ata lenei o se vaaiga faatulaga e fesoasoani e tuu “se vaitau itiiti” i le talaaga.