Mataupu Faavae ma Feagaiga 133–135 (Iunite 29)

Sauniuniga o Anomea mo le Faiaoga o Suesuega e Fai i le Fale

Aotelega o Lesona o Suesuega e Fai i le Fale i Aso Taitasi

O le aotelega lenei o aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 133–135 (iunite 29). E le o faamoemoe e aoao atu o se vaega o lau lesona. O le lesona e te aoaoina atu i le iunite 29, e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 (Mataupu Faavae ma Feagaiga 133:1–35)

A o suesueina e tagata aoga aoaoga a le Alii e faatatau i Lona Afio Mai Faalua, na latou iloa ai, i Lona Afio Mai Faalua, o le a afio mai o Ia i le faamasinoga e faasaga i ē amioleaga. Na faailoa mai foi e tagata aoga ni auala e mafai ona tatou saunia ai i tatou lava ma isi mo le Afio Mai Faalua. O lenei sauniuniga e aofia ai le salamo ma le le toe foi atu i le agasala sa i ai muamua.

Aso 2 (Mataupu Faavae ma Feagaiga 133:35-74)

I lenei lesona, na faaauau ai e tagata aoga a latou suesuega o aoaoga a le Alii e faatatau i Lona Afio Mai Faalua. Na latou aoaoina, i le avea ai o ni auauna a le Atua, e mafai ona latou fesoasoani i isi ia saunia mo le Afio Mai Faalua e ala i le faasoa atu o le talalelei ia i latou. Na iloa foi e tagata aoga ua saunia e le Alii ni faamanuiaga maoae mo i latou o e faatalitali ia te Ia, ma o i latou o e salamo ma faapaia i latou lava o le a maua le ola faavavau.

Aso 3 (Mataupu Faavae ma Feagaiga 134)

A o suesueina e tagata aoga lenei folafolaga e uiga i talitonuga o le Ekalesia, e faatatau i malo ma tulafono, sa faapea ona latou faailoa mai ai upumoni nei: O malo na faavaeina e le Atua mo le manuia o tagata, ma e tali atu malo i le Atua i le puipuia o aia tatau a tagata taitoatasi, e aofia ai le saolotoga o tapuaiga. Na latou aoaoina foi e faapea, ua noatia i tatou e lagolago ma faamalosia le malo i mea o loo tatou nonofo ai, ma o le a faamasino i tatou e le Atua mo le solia o Ana tulafono ma tulafono a tagata.

Aso 4 (Mataupu Faavae ma Feagaiga 135)

O se vaega o lenei lesona, na aoao ai tagata aoga e uiga i mea na tutupu e fesootai ma le maliliu faamaturo o Iosefa ma Ailama Samita, ma aoaoina se faasilasilaga sa tusia e uiga i lo laua maliu. O le faia o lena mea, na iloa ai e tagata aoga sa faamauina e Iosefa ma Ailama Samita a laua molimau e uiga i le moni o le talalelei toefuataiina i o laua ola.

Folasaga

O lenei lesona o le a fesoasoani i tagata aoga ia malamalama i nisi o galuega ua faia e le Perofeta o Iosefa Samita mo le faaolataga o tagata. O le a maua foi e tagata aoga se avanoa e faasoa mai ai a latou molimau e uiga i le Perofeta o Iosefa Samita ma le Toefuataiga o le talalelei

Fautuaga mo le Aoaoina Atu

Mataupu Faavae ma Feagaiga 135:1–7

Na faasilasilaina mai le maliliu faamaturo o Iosefa ma Ailama Samita

A o lei amataina le vasega, faaali atu se ata o Iosefa Samita (tagai i le Tusi Ata o le Talalelei [2009], nu. 87; tagai foi i le LDS.org). Atonu e te mafaufau e usu e le vasega le pese “Viia le na Fetaia‘i” (Viiga, nu. 15) mo le viiga o le faigalotu. A o lei amataina le faigalotu, faamatala atu na tusia e W. W. Phelps upu o lenei viiga e manatua ai Iosefa Samita, a’o le’i leva talu ona faamaturoina le Perofeta.

Amata le lesona i le fai atu o fesili nei:

Pe ua outou talanoa ea ma se tasi e le auai i le Ekalesia e uiga i le Perofeta o Iosefa Samita? Afai o lea, o le a se mea na oulua talanoa e uiga i ai? (Afai e leai se tasi sa i ai lenei aafiaga, fesili atu i tagata aoga po o a ni mea o le a latou mananao e ta’u atu i tagata e uiga ia Iosefa Samita.)

Faamanatu atu i tagata aoga o le Mataupu Faavae ma Feagaiga 135 o loo i ai se faasilasilaga o le maliliu faamaturo o Iosefa ma Ailama Samita. Valaaulia se tagata aoga e faitau leotele le fuaiupu muamua o le Mataupu Faavae ma Feagaiga 135:3. Fai atu i le vasega e mulimuli i le faitauga.

O le a le savali o le fuaiupu lenei? (E tatau ona faailoa mai e tagata aoga e faapea, e tele atu mea na faia e Iosefa Samita, vagana ai lava Iesu Keriso, mo le faaolataga o tagata i lenei lalolagi, nai lo se isi lava tagata na ola ai.)
O a mea ua faia e le Perofeta o Iosefa Samita mo lo tatou faaolataga ma le faaeaga? (Tusi tali a tagata aoga i luga o le laupapa.)

Valaaulia se tagata aoga e faitau leotele le Mataupu Faavae ma Feagaiga 135:3. Fai atu i le vasega e mulimuli i le faitauga, ma vaavaai mo fasifuaitau o loo faamatala ai mea na faia e Iosefa Samita mo lo tatou faaolataga. Fai atu i tagata aoga e vaavaai mo ni mea faaopoopo e faaopoopo atu i le lisi i luga o le laupapa.

Valaaulia se tagata aoga e faitau le saunoaga lenei mai ia Peresitene Iosefa F. Samita Fai atu i le vasega e faalogologo po o ai ua uunaia e le galuega a le Perofeta o Iosefa Samita.

“O le galuega na faia e Iosefa Samita sa le na o lenei olaga na pau mai ai, ae e faatatau foi i le olaga a sau, ma i le olaga sa i ai. I se isi faaupuga, e faatatau ia i latou o e sa ola i luga o le fogaeleele, ia i latou o loo ola ai ma i latou o e o le a mulimuli mai ia i tatou. E le o se mea lea e faatatau i na o tagata a’o soifua o ia i le tino, ae i le aiga atoa o tagata mai le vavau e oo i le faavavau” (Gospel Doctrine, 5th ed. [1939], 481).

Tagai i le faamatalaga e uiga ia Iosefa i le aumaia o le Tusi a Mamona ma le Mataupu Faavae ma Feagaiga i le fuaiupu e 3. Ina ia fesoasoani i tagata aoga ia malamalama atili i le taua o lenei galuega, valaaulia se tagata aoga e faitau leotele le Mataupu Faavae ma Feagaiga 135:6. Fai atu i le vasega e mulimuli i le faitauga, ma vaavaai mo se mafuaaga na aumaia ai le Tusi a Mamona ma le Mataupu Faavae ma Feagaiga.

E tusa ai ma le fuaiupu e 6, aisea na aumaia ai le Tusi a Mamona ma le Mataupu Faavae ma Feagaiga? (Atonu e faaaoga e tagata aoga isi faaupuga, ae e tatau ona latou faailoa mai le upumoni lenei: Na aumaia le Tusi a Mamona ma le Mataupu Faavae ma Feagaiga mo le faaolataga o le lalolagi.)
O a ni auala e saofaga ai nei tusi mo le faaolataga o le lalolagi?
E tusa ai ma le fuaiupu e 6, o le a le mea e avea ai le Tusi a Mamona ma le Mataupu Faavae ma Feagaiga o nisi o tusi e sili ona taua e te ono anaina?

Fai atu i tagata aoga e mafaufau loloto i mea ua latou faia i le Tusi a Mamona ma le Mataupu Faavae ma Feagaiga i o latou olaga.

O le a se mea e mafai ona tatou faia e faaali atu ai lo tatou agaga faafetai mo le ositaulaga na faia e Iosefa ma Ailama Samita ina ia aumai ai nei tusi?

Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, se auala faapitoa e mafai ona latou faaali atu ai lo latou agaga faafetai mo osigataulaga na faia ina ia aumai ai nei tusi.

Tagai i le lisi na tusia i luga o le laupapa i le amataga o le lesona. Molimau atu, o le fesoasoani ai e toefuatai mai tusitusiga paia, aoaoga faavae moni, pule ma ki o le perisitua, sauniga, ma le faatulagaga o le Ekalesia a Iesu Keriso, na fesoasoani ai Iosefa Samita i fanau uma a le Atua ia maua uma faamanuiaga o le Togiola.

Faamatala atu, atonu e ono ave sese e nisi o tagata ia lagona o le Au Paia o Aso e Gata Ai e faatatau atu po o talitonuga e uiga i le Perofeta o Iosefa Samita. Valaaulia se tagata aoga e faitau leotele le saunoaga lenei mai ia Peresitene Gordon B. Hinckley. Fai atu i le vasega e faalogologo po o a manatu o tagata o le Ekalesia ia Iosefa Samita e faatatau i le Tama Faalelagi ma Iesu Keriso. Afai e mafai, atonu e te manao e tuu atu i tagata taitasi o le vasega se kopi o lenei saunoaga.

“Matou te le tapuai i le Perofeta. Matou te tapuai i le Atua lo tatou Tama Faavavau ma le Alii toetu o Iesu Keriso. Ae peitai, matou te talisapaia le Perofeta; matou te talai atu o ia; matou te faaaloalo ia te ia; matou te ava ia te ia o se mea faigaluega i aao o le Silisili Ese i le toefuataiina i le lalolagi o upu moni anamua o le talalelei paia, faatasi ai ma le perisitua lea e mafai ai ona faaaoga le pule a le Atua i le faagaoioiga o mataupu o Lana Ekalesia ma mo le faamanuiaina o Ona tagata” (“Iosefa Samita le Itiiti—O Le Perofeta a le Atua, Auauna Maoae,” Liahona, Tes. 2005, 4).

I au lava upu, e faapefea ona e faamatalaina lagona o tagata o le Ekalesia e uiga i le Perofeta o Iosefa Samita?

Valaaulia tagata aoga e mafaufau i le aafiaga o le galuega a le Perofeta o Iosefa Samita ua faia i o latou olaga ma i olaga o le faitau miliona i le lalolagi atoa. Tusi fesili nei i luga o le laupapa, ma fai atu i tagata aoga e tali i ai i totonu o a latou api talaaga mo le suesueina o tusitusiga paia:

O a ni auala faapitoa atonu e ese ai lou olaga pe ana leai le galuega a le Perofeta o Iosefa Samita?

O a ni auala ua uunaia ai e le Perofeta o Iosefa Samita lou iloa e uiga i le, ma le sootaga ma le Tama Faalelagi ma Iesu Keriso?

Valaaulia tagata aoga e faaaoga le taimi o totoe o le vasega e faasoa mai ai o latou lagona ma molimau e uiga i le Perofeta o Iosefa Samita ma le Toefuataiga o le talalelei. Valaaulia i latou e mafaufau e faaaoga a latou tali mai le gaoioiga tusitusi na muamua atu, a o faailoa mai o latou lagona ma molimau.

Faaiu i le faasoa atu o lau molimau e uiga i le Perofeta o Iosefa Samita ma le Toefuataiga. Valaaulia tagata aoga e vaavaai mo ni avanoa i nai aso e sosoo ai, e faasoa atu ai i isi a latou molimau e uiga i le Perofeta o Iosefa Samita ma lana matafaioi i le toefuataiga o le talalelei. E mafai foi ona e faamalosiau ia i latou e faamaumau a latou molimau e uiga i le Perofeta o Iosefa Samita ma le Toefuataiga o le talalelei i a latou api talaaga faaletagata lava ia.

Manatua: O le tuuina atu i tagata aoga se taimi ia lava e faasoa mai ai a latou molimau i le faaiuga o lenei lesona, e sili atu ona taua nai lo le faamaeaina o le gaoioiga lenei. Afai e uma le taimi o lau vasega i molimau a tagata aoga, atonu e te manao e faaaoga le gaoioiga lenei i se isi aso pe a lava se taimi.

Tuu atu i tagata aoga se lisi o tusi o mau tauloto e 25 mo le Mataupu Faavae ma Feagaiga ma le talafaasolopito o le Ekalesia. Valaaulia i latou e mafaufau po o le fea o mau tauloto e mafai ona latou faaaogaina e aoao ai se tasi e uiga i le Toefuataiga o le talalelei e ala i le Perofeta o Iosefa Samita. Fai atu i tagata aoga e tusi se lesona puupuu po o se lauga e faaaoga ai nisi o fuaitau o mau tauloto na latou faailoaina mai. E mafai ona latou tusia a latou lesona po o lauga i ni fasi pepa po o totonu o a latou api talaaga mo le suesueina o tusitusiga paia. Mafaufau e valaaulia ni nai tagata aoga e aoao mai a latou lesona pe faitau a latou lauga i le vasega o se vaega o faigalotu o vasega i le lumanai

Iunite e Sosoo Ai (O Le Solo Atu i Sisifo)

Fai atu i tagata aoga e vaai faalemafaufau e faapea, ua saunoa atu le perofeta ia i latou e tapena ni nai a latou meatotino laiti ma malaga mo le fiaselau maila i se taavaletoso po o le tulei o se taavaletosolima i se laueleele e le’i faato’aina. Faamatala atu, o le iunite e sosoo ai, o le a latou aoao ai e uiga i le savaliga sopo a le Au Paia i sisifo. O le a latou aoao ai foi i auala sa faaauau ona taitai ai e le Alii le Ekalesia, e aofia ai le faatuina o le taitai na sosoo ai, ina ua mavae le maliu o le Perofeta o Iosefa Samita.