Mataupu Faavae ma Feagaiga 41–44 (Iunite 10)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 41–44 (iunite 10) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 41)

Mai le Mataupu Faavae ma Feagaiga 41, na aoaoina ai e tagata aoga e fiafia le Alii e faamanuia i tatou pe a tatou faalogo ma usitai ia te Ia, ma e avea i tatou ma soo o Iesu Keriso pe a tatou maua Ana tulafono ma mulimuli i ai. O le suesueina o le valaauga a Eteuati Paterika e avea ma uluai epikopo o le Ekalesia, na aoao ai foi e tagata aoga, o epikopo ua valaauina e le Atua, lagolagoina i le leo o le au paia, ma faauuina e ala i le pule tatau.

Aso 2 (Mataupu Faavae ma Feagaiga 42:1-29)

O leMataupu Faavae ma Feagaiga 42 ua lauiloa o le “tulafono a le Ekalesia.” A o suesueina e tagata aoga le vaega muamua o le tulafono a le Ekalesia, sa latou iloa ai, afai tatou te tatalo i le faatuatua, e mafai ona tatou maua le Agaga e fesoasoani ia i tatou e aoao atu i isi. E le gata i lea, na aoaoina e tagata aoga o le Agaga Paia e silafia mea uma ma e molimau i le Tama ma le Alo. I le tele o tulafono ma poloaiga na suesueina i le vaega lenei o le Mataupu Faavae ma Feagaiga 42, na suesue ai e tagata aoga le upumoni e faapea, afai tatou te tuinanau atu i se isi tagata, o lona uiga ua tatou teena le faatuatua ma aluese le Agaga.

Aso 3 (Mataupu Faavae ma Feagaiga 42:30-93)

A o latou suesueina ma aoaoina e uiga i le tulafono a le Alii o le faapaiaga, na aoao ai e tagata aoga, e tatau ona tatou tausia e e matitiva ma i latou e manaomia le fesoasoani, ma a tatou faia mea lelei i isi tagata, ua tatou faia lea i le Atua. Na faailoa mai foi e tagata aoga le mataupu faavae e faapea, afai tatou te ole atu, o le a tuuina mai e le Alii ia i tatou le malamalama lea o le a aumaia ia i tatou le filemu ma le olioli. Na latou faaiuina le lesona i le aoaoina e faapea, o soligatulafono e faia faalilolilo e tatau ona foia ia le faalauaiteleina.

Aso 4 (Mataupu Faavae ma Feagaiga 43–44)

I le Mataupu Faavae ma Feagaiga 43, na aoaoina ai e tagata aoga e faapea, e na o le Peresitene o le Ekalesia o le a mauaina faaaliga mo le Ekalesia atoa. Na oo foi ina malamalama tagata aoga e faapea, o le faamoemoega o sauniga a le Ekalesia o le, ia aoao ma faagaeetia le tasi ma le isi, ma e tatau ona noatia i tatou lava ia galulue i upumoni tatou te aoaoina. Ina ua uma ona suesue i le ala ua poloaiina ai e le Alii ia Lana fanau ia salamo ma saunia i latou lava mo le Afio Mai Faalua o Iesu Keriso, na aoaoina ai e tagata aoga e faapea, i le taimi o le Meleniuma, o le a saisaitia Satani ma o le a nofotupu Iesu Keriso faatasi ma Lona nuu i le lalolagi.

Folasaga

I lenei lesona, o le a taulai atu ai tagata aoga i aoaoga a le Alii o loo i le Mataupu Faavae ma Feagaiga 42 e faatatau i le maliu ma le faamalologa, lea sa le’i aofia i lesona a tagata aoga e suesue i le aiga.

Fautuaga mo le Aoaoina Atu

Mataupu Faavae ma Feagaiga 42:43–52

Ua tuuina mai e le Alii ia fautuaga e faatatau i le maliu ma le faamalologa

I se lima e tasi, uu i luga se fagu po o se koneteina laitiiti o le suauu olive paia mo le faamanuiaina o e mamai; i le isi ou lima, uu ai i luga se fagu o se vai mai le fomai.

O a mea e faaaoga i ai ia aitema?
O fea o mea nei e tatau ona tatou faalagolago i ai i taimi o ma‘i?

A uma ona faasoa puupuu mai e tagata aoga o latou manatu, valaaulia se tagata aoga e faitau leotele le Mataupu Faavae ma Feagaiga 42:43–44. Fai atu i le vasega e vaavaai mo faatonuga a le Alii e faatatau i mea e tatau ona tatou faalagolago i ai i taimi e mama’i ai. Ina ia fesoasoani i tagata aoga ia malamalama i nei fuaiupu, atonu o le a fesoasoani le faamatala atu e faapea, o laau afu ma meaai vaivai o loo ta‘ua i le fuaiupu e 43 e faatatau i togafitiga faafomai ia sa masani ona faataunuuina i le vaitau o le taimi lea na tuuina mai ai le faaaliga lenei.

Ina ia fesoasoani i tagata aoga ia malamalama o le faamalologa e mafai ona oo mai e ala i le faatuatua ma togafitiga faafomai, fai atu i se tagata aoga e faitau leotele le saunoaga lenei mai ia Elder Dallin H. Oaks o le Korama a Aposetolo e Toasefululua. A o faitau le tagata aoga, valaaulia le vasega e faalogologo mo le auala e mafai ai ona oo mai le faamalologa e ala i le faatuatua ma togafitiga faafomai.

“E talitonu le Au Paia o Aso e Gata Ai i le faaaogaina o le atamai ma auala faasaienisi e sili ona lelei ua maua. Tatou te faaaogaina taumafa paleni, faamalositino, ma isi gaoioiga e faaumiumi ai le ola maloloina ma tatou te sailia fesoasoani a fomai faamalolo, e pei o fomai lautele ma fomai tipitipi, e toe maua ai le ola maloloina.

“O le faaaogaina o saienisi faafomai e le o feteenai ma a tatou tatalo o le faatuatua ma lo tatou faalagolago i faamanuiaga faaleperisitua. …

“Ioe, tatou te le faatali seia oo ina le aoga isi auala uma ona faatoa tatou tatalo lea ma le faatuatua pe tuu atu faamanuiaga faaleperisitua mo le faamalologa. I faalavelave faafuasei, e muamua lava tatalo ma faamanuiaga. O le tele o taimi tatou te faia ai i le taimi e tasi ia taumafaiga uma” (“Faamaloloina o e Mama’i,” Ensign po o le Liahona, Me 2010, 47)

Aisea e te manatu e taua ai ona tatou faaaoga le tatalo ma faamanuiaga faaleperisitua, faapea foi ma togafitiga faafomai mo le faamalologa i taimi e mama’i ai?
E tusa ai ma le fuaiupu e 44, pe o le a faamaloloina uma ea tagata mama’i o e maua se faamanuiaga faaleperisitua?

Tau atu i tagata aoga, na faamalamalama mai e le Alii le pogai atonu e le toe manuia ai nisi o e maua ni faamanuiaga faaleperisitua. Valaaulia se tagata aoga e faitau leotele le Mataupu Faavae ma Feagaiga 42:48. Fai atu i le vasega e mulimuli i le faitauga, ma vaavaai mo mataupu faavae e pulea ai pe o le a faamaloloina se tasi, o se taunuuga o se faamanuiaga faaleperisitua.

E tusa ai ma le fuaiupu e 48, o le a le vaega autu e iloa ai le taunuuga o se faamanuiaga faaleperisitua? (Afai e i ai le faatuatua o se tagata ia Iesu Keriso ma e le’i tofia e oti, o le a faapea ona faamaloloina o ia. Atonu e manaomia ona e faamalamalama atu o le fuaitau “lē tofia e oti” e faatatau i le mea moni e faapea, o le oti po o le faamalologa o le a tupu e tusa ai ma le taimi, poto, ma le finagalo o le Alii.)
Aisea o le a le faamaloloina ai tagata uma o e e faatuatua ia Iesu Keriso?
Aisea e taua ai le i ai o le faatuatua i le finagalo ma le taimi a le Atua mo i tatou taitoatasi?

Valaaulia tagata aoga e faailoa mai se mataupu faavae e mafai ona tatou aoao mai i le Mataupu Faavae ma Feagaiga 42:48 e uiga i le faamaloloina mai o tatou le atoatoa faaletino pe faalemafaufau. E ui e ono faaaoga e tagata aoga ni faaupuga eseese, ae e tatau ona atagia i a latou tali le mataupu faavae lenei: Afai tatou te faatuatua ia Iesu Keriso, e mafai ona faamaloloina i tatou e tusa ai ma Lona finagalo. Atonu e te manao e fautua atu i tagata aoga e faailoga upu po o fasifuaiupu i le fuaiupu e 48 o loo aoao mai ai lenei mataupu faavae.

Ina ia fesoasoani i tagata aoga ia malamalama, e tatau ona totonugalemu o tatou faatuatua ia Iesu Keriso, nai lo o taunuuga faapitoa tatou te mananao i ai, fai atu i se tagata aoga e faitau leotele le saunoaga lenei mai ia Elder Dallin H. Oaks o le Korama a Aposetolo e Toasefululua. Valaaulia le vasega e faalogologo mo se mafuaaga pe aisea e taua ai ona faatotonugalemu o tatou faatuatua ia Iesu Keriso.

“I le avea ai ma fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Sa ou lagonaina lena talitonuina i se lauga na tuuina atu e lo’u tausoga i le falelauasiga o se tamaitai talavou o le na maliu i se gasegase tigaina. Sa ia tautalagia upu nei na muamua ou te’i ai ona faatoa ou malamalalma ai lea: ‘Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia ni faamanuiaga faaleperisitua. Sa tusia lona igoa i lisi tatalo i le malumalu. O ia o le autu o le faitau selau o talosaga mo le toe faafoisia mai o lona malosi. Ma ou te iloa ua lava ma totoe le faatuatua o lenei aiga e faamaloloina ai o ia, vagana ai o le finagalo o le Alii e foi atu o ia i le taimi nei.’ Na ou lagonaina foi lena talitonuina i upu a se tama o se isi teineitiiti lelei na maliu i lona talavou, ona o le kanesa. Sa ia tautino mai, ‘O le faatuatua o lo matou aiga o loo ia Iesu Keriso, ae e le faalagolago i taunuuga.’ E tatagi pea le moni o na aoaoga ia te a’u. Tatou te faia mea uma tatou te mafaia mo le faamaloloina o se pele, ona tatou faalagolago lea i le Alii mo le taunuuga” (“Faamaloloina o e Mama’i,” 50).

Na faapefea ona faaali le faatuatua o tagata sa saunoa e uiga i ai Elder Oaks ia Iesu Keriso?
O nisi taimi e manaomia ai se faatuatua sili atu e vaai ai i le maliu o se tasi e pele ia i tatou, pe onosaia ai se gasegase faaumiumi nai lo le vaaia o i latou o soifua pe faamaloloina. Aisea e te manatu e faapea ai?
Aisea e te manatu e taua ai le faaali o le faatuatua ia Iesu Keriso, e ui lava atonu tatou te le maua le taunuuga tatou te mananao i ai?

Fesili atu i tagata aoga pe latou te iloa se tagata na maliu e ui lava ina sa mulimuli i fautuaga sa’o faafomai, ma saili mo le faamalologa e ala i le tatalo ma faamanuiaga faaleperisitua. (Ia nofouta faapitoa i lagona o i latou o e atonu na oo i ai lenei tulaga.) Valaaulia se tagata aoga e faitau leotele le Mataupu Faavae ma Feagaiga 42:45–47. Fai atu i le vasega e mulimuli i le faitauga, ma vaavaai mo upu po o fasifuaitau e ono aumai ai le faamafanafanaga i se tagata ua i ai se aafiaga i le maliu o se tasi e pele ia te ia.

O le fuaiupu e 45 o loo ta’u mai ai ia i tatou, o le a tatou faavauvau e pei ona faamoemoeina, i le maliu o i latou tatou te alolofa i ai. O le a le aoaoga faavae o loo aoao mai i le fuaiupu e 46 e ono aumaia ai le faamafanafanaga ia i latou o e faavauvau i le maliu o se tasi e pele ia i latou? (O le oti e suamalie ia te i latou o e oti i le Alii. (Atonu e te manao e fautua atu i tagata aoga e faailoga upu ma fasifuaitau o loo aoao mai ai lenei upumoni.)
O le a sou manatu i le uiga o le oti i le Alii? (O le tasi o auala e faamalamalama ai lenei mea o le, o se tasi na tumau faamaoni ma tausia feagaiga paia seia oo lava i le taimi o le oti.)
O le a sou manatu i le uiga o le oti o le a “suamalie” ia i latou o e oti i le Alii? (Atonu e manaomia lou faamalamalama atu e faapea, e ui lava ina mafatia se tagata faamaoni ua maliu i tiga faaletino, ae o lenei folafolaga e faatatau i le filemu ma le malologa o le a ia oo i ai i le lalolagi o agaga.)

Valaaulia tagata aoga e mafaufau loloto pe o loo latou ola i ni olaga o le a faapea ona “suamalie” ai le oti ia i latou pe ana faapea e oo ia i latou i le aso. (Atonu e te manao e valaaulia tagata aoga e tusi o latou manatu i a latou api o le vasega po o api talaaga mo le suesueina o tusitusiga paia.)

Faaiu i le faasoa atu o lau molimau e uiga i upumoni na aoaoina i le lesona i le asō.

Iunite e Sosoo ai (Mataupu Faavae ma Feagaiga 45–48)

Fesili atu i tagata aoga pe na i ai se taimi na latou lagonaina ai le atuatuvale po o le popole e uiga i le Afio Mai Faalua o Iesu Keriso. Faamalamalama atu e faapea, i le iunite e sosoo ai, o le a latou aoao atili ai e uiga i faailoga o le afio Mai Faalua o le Faaola. O le a le mea o le a tupu pe a afio mai Iesu Keriso? O a ni mea e mafai ona tatou faia e saunia ai mo lena taimi?