Lesona 108: Mataupu Faavae ma Feagaiga 103

Lesona 108

Mataupu Faavae ma Feagaiga 103

Folasaga

I se fonotaga a fautua maualuga a Katelani i le aso 24 o Fepuari, 1834, na saili ai e Pale P. Palate ma Laimani Uaite se taitaiga mai le aufono e faatatau i le auala e mafai ai e le Au Paia i Misuri ona maua se toomaga le tumau ma toe maua le umiaina o o latou laueleele i le Itumalo o Jackson. O lena lava aso, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 103, lea na folafola mai ai le Alii o le a toe maua mai le laueleele o Siona. Na faatonuina e le Alii ia taitai o le Ekalesia e faapotopoto punaoa ma ia saili nisi e fesoasoani i le Au Paia i Misuri. O lenei vaega sa faapea ona ta’ua o le Tolauapiga a Siona.

Fautuaga mo le Aoaoina Atu

Mataupu Faavae ma Feagaiga 103:1–20

Ua folafola mai e le Alii o le a laveaiina Siona

Amata le vasega e ala i le fai atu o le fesili lenei:

O a fili o e amiotonu o loo i ai i aso nei?

Fai atu i tagata aoga e mafaufau e uiga i le auala o loo saili ai fili o le Alii e taofia lo latou alualu i luma faaleagaga.

Aisea e te manatu ai e mafai e fili o le Alii ona taofia le alualu i luma faaleagaga o nisi o tagata o le Alii?

A o amataina e tagata aoga ona suesue ma talanoaina le Mataupu Faavae ma Feagaiga 103, uunaia i latou e vaavaai mo mataupu faavae o le a fesoasoani ia i latou e faatoilalo ai fili faapena.

Valaaulia se tagata aoga e faitau leotele le vaega o le folasaga o le Mataupu Faavae ma Feagaiga 103. Fai atu i le vasega e mulimuli i le faitauga, ma vaavaai mo mafuaaga na o mai ai Pale P. Palate ma Laimani Uaite i Katelani, Ohio, mai Misuri.

Aisea na o mai ai Uso Palate ma Uso Uaite i Katelani?

Faamalamalama atu, na maua e Iosefa Samita le faaaliga ua faamaumauina i le Mataupu Faavae ma Feagaiga 103 i le aso lava lea na feiloai ai nei taitai e toalua ma ia ma le fautua maualuga i Katelani.

Valaaulia se tagata aoga e faitau leotele le Mataupu Faavae ma Feagaiga 103:1–4. Fai atu i le vasega e vaavaai mo ni mafuaaga se lua na tuu atu ai e le Alii ia Ona fili e faasaua i le Au Paia i Misuri.

E tusa ai ma fuaiupu 3–4, o a mafuaaga e lua na tuu atu ai e le Alii ia Ona fili e faasaua i le Au Paia? (O se tasi o mafuaaga ina ia tuu le au faaoosala e “faatumuina le fuataga o a latou amioletonu, ina ia tumu la latou ipu”—i se isi faaupuga, ina ia ta’uamiotonuina Ana famasinoga o e amioleaga. O le isi mafuaaga ina ia aoaia le Au Paia le usiusitai.)
E tusa ai ma le fuaiupu e 4, aisea na manaomia ai ona aoaiina le Au Paia? O le a sou manatu i le uiga o le fuaitau, “sa latou lē faalogo atoa mai”? (Sa le’i usiusitai atoatoa i latou i le Alii.)

Valaaulia se tagata aoga e faitau leotele le Mataupu Faavae ma Feagaiga 103:5-7. Fai atu i le vasega e vaavaai mo mea na aoao mai e le Alii i le Au Paia, e ao ona latou faia ia manumalo ai i Ona fili. (Atonu e te manao e faamalamalama atu o le upu manumalo o lona uiga ia malosi atu nai lo o se fili po o le ia manumalo.)

Afai o le a mulimuli le Au Paia i fautuaga a le Alii “mai [lena] lava itula”, o a faamanuiaga o le a latou maua? (O le a latou manumalo e faasaga i fili o le Alii “mai [lena] lava itula.”)
O a ni mea ua aoao mai e nei fuaiupu e uiga i le auala e mafai ona tatou manumalo ai e faasaga i faatosinaga a le lalolagi? (E mafai ona faaaoga e tagata aoga ni upu eseese, ae e tatau ona latou faamatala mai le mataupu faavae lenei: Pe a amata ona tatou mulimuli i fautuaga a le Alii, tatou te maua le malosi e amata ai ona manumalo e faasaga i le lalolagi.)

Valaaulia se tagata aoga e faitau leotele le Mataupu Faavae ma Feagaiga 103:8-10. Fai atu i le vasega e mulimuli i le faitauga ma vaavaai mo le mea na lapatai mai le Alii o le a tupu pe afai tatou te filifili e le usitai i Ana afioga.

O a nisi o taunuuga o le filifili e le usitai i afioga uma a le Alii? (E mafai ona faailoa mai e tagata aoga ni mataupu faavae eseese, e aofia ai mea nei: Afai tatou te le usiusitai i poloaiga a le Alii, o le a manumalo le lalolagi ia i tatou. Afai tatou te le tausia afioga uma a le Alii, o le a tatou le maua le gafatia e avea ai ma se malamalama i isi.)
Aisea e te manatu ai, o se tasi e le usitai pe usitai i na o ni vaega o [poloaiga] a le Alii, e ono le mafai ona manumalo i fili o le Alii?
O a nisi o faataitaiga o auala e mafai ona manumalo ai tagata i se fili o le Alii e ala i le taumafai e usitai i afioga a le Alii? (O faataitaiga e mafai ona aofia ai tagata o e, e ala i le usiusitai, ua mauaina le malosi mai le Alii e faatoilalo ai mea na fai ma vaisu, po o le ola i le talalelei i le mavae ai o le ola i se olaga faalelalolagi.)

Atonu e te manao e faamalamalama atu e faapea, e ui atonu tatou te le atoatoa ona usiusitai i afioga uma a le Alii, ae a tatou taumafai ma le maelega e usitai ia te Ia ma salamo faamaoni pe a tatou sese, o le a fesoasoani mai le Alii ina ia tatou manumalo i Ona fili.

Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, se mataupu faavae se tasi e mafai ona latou amata mulimuli ai “mai lenei lava itula” ina ia faalogo ma usitai lelei i le fautuaga a le Alii.

Otooto le Mataupu Faavae ma Feagaiga 103:11–20 i le faamalamalama atu na folafola mai e le Alii i le Au Paia e faapea, a mavae o latou puapuaga, o le a laveaiina Siona e Lona mana. Ae peitai, afai e faaleagaina e le Au Paia o latou tofi, o le a faapea ona aveesea mai ai i latou.

Mataupu Faavae ma Feagaiga 103:21-40

Ua faaali mai e le Alii le ala o le a laveaiina ai le laueleele o Siona

A o lei amataina le vasega, fai se faailo e faitauina faapea MANAOMIA NI VOLENITIA! Faaali atu i se mea e mafai ona iloa mai ai e tagata aoga. Ma le isi, ia saunia le faasilasilaga lenei i luga o se fasi pepa:

Manaomia ni volenitia! Ua tutulia faamalosi ese ia uso a Au Paia i le Itumalo o Jackson, Misuri, mai o latou laueleele e vaega faalealofa o tagata faatupu vevesi. Auai i le aumaia o le toomaga i nei Au Paia ma fesoasoani e puipui i latou a’o amata ona toe maua mai ma faatumauina o latou laueleele i Siona. Tuua Katelani, Ohaio, i le aso 1 o Me, 1834.

Valaaulia se tagata aoga e faitau leotele le Mataupu Faavae ma Feagaiga 103:21-23. Fai atu i le vasega e mulimuli i le faitauga, ma vaavaai mo le taitaiga a le Alii i taitai o le Ekalesia i le mea e fai e laveai mai ai le laueleele o Siona. Fai atu i tagata aoga e lipoti mai mea ua latou mauaina.

Fai atu i se tagata aoga e tu i tafatafa o le faailo lea e faitauina MANAOMIA NI VOLENITIA! Tuu atu i le tagata aoga le faasilasilaga ua e saunia a o lei amataina le vasega, ma fai i ai e faitau leotele. Ona fai atu lea i tagata aoga ia fesili nei:

Mata e te manatu o le a e naunau e alu atu i le Itumalo o Jackson e fesoasoani ai i le Au Paia? Aisea e ioe pe aisea foi e leai ai?

Faamalamalama atu e faapea, o le vaega o alii lea o le a taitai atu e Iosefa Samita i Misuri, na ta’ua o le Tolauapiga a Siona. (Atonu e manaomia ona e faamalamalama atu o le tolauapiga o le isi lea upu mo le autau [tagai i le Noah Webster, An American Dictionary of the English Language, facsimile of the first edition (1828; repr., 1967), “Camp”].) E lua faamoemoega autu sa i ai o le Tolauapiga a Siona. Muamua, ina ia latou aumai ni punaoa i le Au Paia i Misuri e tuuina atu ai le toomaga, ma mafai ai ona toe foi atu i o latou fale ma faatau mai ni fanua faaopoopo. Lona lua, e pei ona faatagaina ai e le Kovana o Misuri o Daniel Dunklin, ina ua uma ona faafeao atu e le vaegaau o le setete o Misuri le Au Paia e toe foi atu i le Itumalo o Jackson, o le a tuua ai le Tolauapiga a Siona e fesoasoani e tausisia le nofolelei ma le filemu iina.

Ana faapea na avea oe ma se tagata o le Ekalesia i lena vaitaimi, o a ni popolega atonu e ono i ai ia te oe e uiga i le volenitia e auai i le Tolauapiga a Siona?

Valaaulia tagata aoga e faitau filemu le Mataupu Faavae ma Feagaiga 103:20.

O a auala e aafia ai lau filifiliga e volenitia ona o le folafolaga o loo i lenei fuaiupu?

Faamalamalama atu e faapea, o le auai i le Tolauapiga a Siona e manaomia ai le tuua o tiutetauave o le aiga ma galuega ina ia savavali e tusa ma le 900 maila (1,450 kilomita) i tulaga matuai leaga e agai atu i se siosiomaga [e tele ai le] inoino ma le lamatia. Valaaulia se tagata aoga e faitau leotele le Mataupu Faavae ma Feagaiga 103:27-28. Fai atu i le vasega e mulimuli i le faitauga, ma vaavaai mo le fetalaiga a le Alii ia i latou o e o le a auai i le Tolauapiga a Siona. Fai atu i tamaiti aoga e lipoti mai mea latou te maua.

O le a sou manatu i le uiga o le fuaitau “tuu atu lona ola ona o aʼu”?
E tusa ai ma nei fuaiupu, o le a le igoa e ta’u ai e le Alii se tagata e naunau e tuu atu lona ola mo le Alii? (A uma ona tali mai tagata aoga, tusi le faamatalaga lenei i luga o le laupapa: O soo o Iesu Keriso e naunau e tuuina atu o latou ola mo Ia.)

Ta’u atu e faapea, mo le Au Paia i le Tolauapiga a Siona, o le avanoa e ono maumau ai o latou ola sa moni. E ui atonu tatou te le feagai ma ia ituaiga tulaga lamatia, ae o lenei upumoni e mafai lava ona faatatau ia i tatou. Valaaulia se tagata aoga e faitau leotele le saunoaga lenei a Peresitene James E. Faust o le Au Peresitene Sili. Fai atu i le vasega e faalogologo mo se auala se tasi e mafai e i tatou uma ona tuu atu ai o tatou ola mo le Alii.

“Mo le toatele o i tatou, o le mea o loo manaomia e le o le oti mo le Ekalesia ae ia ola mo le Ekalesia. Mo le toatele, o le ola i se olaga faaKeriso i aso taitasi e mafai ona sili atu ona faigata nai lo le tuuina atu o le ola o se tasi” (“Avea ma Soo,” Ensign po o le Liahona, Nov. 2006, 22).

Aisea e te manatu atonu e sili atu ona faigata le ola mo le Alii nai lo le oti mo Ia?

Valaaulia tagata aoga e faitau filemu le Mataupu Faavae ma Feagaiga 103:30–34, ma vaavaai pe toafia ni volenitia sa manaomia e le Alii mo le Tolauapiga a Siona.

E fia ni volenitia sa finagalo i ai le Alii? (500.) O le aofaiga aupito laitiiti na manaomia e le Alii? (100.)

Faamalamalama atu e faapea, i le faaiuga o le fonotaga a fautua maualuga lea na talanoaina ai e taitai o le Ekalesia le tulaga o le Au Paia i Misuri, sa saunoa atu ai Iosefa Samita o le a malaga o ia i Siona e fesoasoani e laveai mai. E tusa ma le 30 pe 40 alii sa auai sa faapea ona volenitia ai foi. Ona tofia lea e le Alii o ni alii se toa 8 e o atu i aulotu taitasi o le Ekalesia e saili mai ni volenitia mo le Tolauapiga a Siona ma saili mai ni saofaga o ni mea e faaaoga ma tupe mo le Au Paia i Misuri (tagai i le MF&F 103:37–40). E tusa ma le 200 tagata na o ma le Tolauapiga a Siona, e aofia ai nisi o tamaitai ma tamaiti.

Valaaulia se tagata aoga e faitau leotele le Mataupu Faavae ma Feagaiga 103:35-36. Fai atu i le vasega e faailoa mai mea na manaomia e le Au Paia ona fai ina ia faamanuiaina i a latou taumafaiga e laveai Siona.

E tusa ma le folafolaga a le Alii i nei fuaiupu, o a ni mataupu faavae e mafai ona tatou aoaoina e uiga i le auala e mafai ona tatou maua uma ai le manumalo ma le mamalu? (E tatau ona faailoa mai e tagata aoga le mataupu faavae lenei: O le manumalo ma le mamalu uma e aumai ia te i tatou e ala i lo tatou filiga, faamaoni, ma tatalo o le faatuatua.)

Molimau atu, o le a tatou maua le manumalo i luga o fili a le Alii a o tatou taumafai ma le filiga ma le faamaoni e usitai i afioga uma a le Alii. Uunai tagata aoga e faaaoga mea ua latou tusia i a latou api o le vasega po o api talaaga mo le suesueina o tusitusiga paia “mai lenei lava itula.”

Tala ma Faamatalaga o Talaaga

Mataupu Faavae ma Feagaiga 103. Kovana o Misuri o Daniel Dunklin

A o onosaia e le Au Paia le inoino o tagata tetee i Mamona i Misuri i le 1833 ma 1834, sa faafia ona saili atu taitai o le Ekalesia mo se fesoasoani mai taitai o le setete ma le malo, e aofia ai le Kovana o Misuri o Daniel Dunklin. E laitiiti se fesoasoani na ofoina mai e kovana Dunklin e tali mai ai i talosaga a le Au Paia. Ia Oketopa 1833, sa ia fautuaina ai taitai o le Ekalesia e saili le fofo ma le puipuiga e ala i faamasinoga i le Itumalo o Jackson. Sa ia folafola mai afai e le manuia nei taumafaiga, o le a ia faaaogaina isi auala e faamalosia ai le tulafono. Ae peitai, sa faamaonia le le aoga ma le faigata o le fautuaga a Kovana Dunklin, ona o nisi o tagata faigaluega i le faamasinoga i le Itumalo o Jackson sa faatasi ma i latou o e sa taumafai e aveese faamalosi tagata Mamona. (Tagai i le Church History in the Fulness of Times Student Manual, 2nd ed. [Church Educational System manual, 2003], 134–35.)

I le faaiuga o le tautoulu o le 1833, sa faamalosia le faate’a ese o le Au Paia mai le Itumalo o Jackson. O le toatele o i latou sa maua ni malutaga lē tumau i le Itumalo tuaoi o Clay, ae o le toatele sa maua ni mea e nonofo ai i isi itumalo lata ane. O le tautotogo na sosoo ai, a’o faatulagaina le Tolauapiga a Siona ma amata lana savaliga agai atu i Misuri, sa faaauau pea ona talosaga atu taitai o le Ekalesia ia Kovana Dunklin mo se faamautinoaga o le a ia tuuina mai le lagolago e fesoasoani ai i le Au Paia ia toe maua o latou fale ma fanua ma ola filemu i le Itumalo o Jackson. Na faailoa atu e le kovana e faapea, na ta’useseina le Au Paia, ma na ia iloaina o se autau faaauupegaina e auina mai e le setete, o le a manaomia e toe avatu ai tagata Mamona i o latou laueleele ma puipui ai i latou a’o faia faaiuga a faamasinoga i faafitauli faaletulafono na aafia ai. (Tagai i le Church History in the Fulness of Times, 135–37, 146.)

Ae peitai, ia Iuni 1834, sa faapea ona sui ai e Kovana Dunklin le itu na tu ai. Sa ia fai mai o le valaauina mai o le vaegaau, e masalo o le a vave ona amata ai se taua i le setete. Nai lo le ofoina atu o le lagolagosua, sa ia fautuaina le Au Paia ina ia aloese mai le faamasaaina o le toto, e tatau ona latou lafoai a latou aia tatau, faatau atu o latou laueleele, ma faamautu i se isi nofoaga. Sa ia toe fautuaina foi i latou e toe fai se apili i le faamasinoga. O nei fautuaga sa le taliaina e taitai o le Ekalesia, ma sa afaina ai o latou faamoemoe e ono faatagaina le Au Paia e toe foi atu i o latou fale ma le filemu. (Tagai i le Church History in the Fulness of Times, 146–47.)

Mataupu Faavae ma Feagaiga 103:1, 13. O le laveaiga o Siona

Mulimuli ane, o le laveaiga o Siona e le faatatau i le na o le toe mauaina o laueleele. O Siona o se nofoaga faaletino ma se lotoifale e i ai se ituaiga tagata faapitoa. A o lei toe maua mai ai le laueleele o Siona ma fausia le aai o Siona, e tatau ona faapaiaina le nuu o le Atua.

Na faamalamalama mai e Elder D. Todd Christofferson o le Korama a Aposetolo e Toasefululua e faapea:

O Siona e Siona ona o aga, uiga, ma le faamaoni o ona tagatanuu. Manatua, ‘sa taua e le Alii lona nuu o Siona, aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa’ (Mose 7:18). Afai o le a tatou fausia Siona i o tatou aiga, paranesi, uarota ma siteki, e ao lava ona tatou ausia lenei tulaga. O le a manaomia (1) ia lotogatasi i le loto e tasi ma le manatu e tasi; (2) ia avea ma ni tagata paia taitoatasi ma tuufaatasi; ma (3) ia tausia e matitiva ma e le tagolima i se lelei ia faapea ona leai ai se tasi e mativa ia i tatou. E le mafai ona tatou faatalitali sei iloga e oo mai Siona ona faatoa tupu lea o nei mea—o le a oo mai Siona pe afai e faia ia mea” (“O Mai i Siona,” Ensign po o le Liahona, Nov. 2008, 38).

Mataupu Faavae ma Feagaiga 103:15–18. “O le laveaiina o Siona e ao ina oo mai e ala i le mana”

O le faamoemoega o le Tolauapiga a Siona, sa le o le toe mauaina o fanua o le Au Paia i le Itumalo o Jackson e ala i le malosiaga faamiliteli, e ui ina sa talitonu nisi o tagata o le tolauapiga e faapea o le tulaga lena sa i ai. Sa saunia alii e tau pe afai na lamatiaina ai o latou ola, ae sa le manaomia e le Alii ona faalagolago i le malosi o le tagata e laveai ai Siona.

Sa tusi Peresitene Iosefa Filitia Samita i le mana lea o le a laveaiina ai Siona:

“O le laveaiina o Siona e ao ina oo mai e ala i le mana. E le o le mana o auupega ma le faamasaaina o le toto; ae o le mana o le Alii” (Church History and Modern Revelation [1953], 1:484).

Sa ta’ua e le Alii le matafaioi o Lona mana i le laveaiga o Siona, ina ua Ia fetalai o le Au Paia o le a “taitai ese … i fafo mai le nofo pologa i le mana, ma le aao faaloaloa atu” (MF&F 103:17). O le “aao faaloaloa atu” o se faaupuga faafaatusa e faatatau i le faaaogaina e le Atua o Lona mana (ua faatusaina i Lona aao) e fai ma sui o Ona tagata. E na o le mana lava o le Atua o le a maua ai e le Au Paia le manumalo i le laveaiina o Siona, ma e mafai ona latou maua lenei mana i le usitaia o ana afioga uma.

Mataupu Faavae ma Feagaiga 103:27. “O lē e tuu atu lona ola ona o aʼu o le a toe maua e ia”

Na faamalamalama mai e Elder Franklin D. Richards o le Fitugafulu, le mea o le a tupu pe afai e tuu atu o tatou ola mo le Faaola:

“E manino lava o le tele o faamanuiaga maoae e faavae lea i luga o le usiusitai i le tulafono e faavavau o le ositaulaga.

“Na fetalai le Faaola, ‘Ia leai se tagata e fefe e tuu atu lona ola ona o a’u; aua o lē e tuu atu lona ola ona o a’u o le a toe maua e ia.’ (MF&F 103:27.)

“O le mea lea, o le ositaulaga silisili o le ola o se tasi e tauia e ala i le toe mauaina e lena tagata o lona ola, ‘o le ola e faavavau’ (MF&F 98:13.)” (i le Conference Report, Aperila 1967, 75).