Lesona 53

Mataupu Faavae ma Feagaiga 45: 60–75

Folasaga

A o faapotopoto le Au Paia i Katelani, sa tele tala sese o nusipepa ma tala feaveai na tauseseina ma taufaaleagaina ai le Ekalesia. I le faaaliga ua faamaumauina i le Mataupu Faavae ma Feagaiga 45, na amata ona faaali mai ai e le Alii ni faamatalaga auiliili e uiga i se nofoaga atofaina e faapotopoto ai mo le filemu ma le saogalemu i aso e gata ai, lea o loo folafolaina mai i le Tusi a Mamona ae na muamua ta’ua mai i se faaaliga i le 1830 (tagai i le MF&F 28). Na faamatalaina e le Alii ni faamatalaga auiliili e uiga i lenei laueleele o le faapotopotoina, ua ta’ua o le Ierusalema Fou, po o Siona. Na faatonuina foi e le Alii ia Iosefa Samita e amata ona taulai atu ana taumafaiga o le faaliliuga o le Tusi Paia i le Feagaiga Fou ina ia saunia ai le Au Paia mo mea e oo mai.

Fautuaga mo le Aoaoina Atu

Mataupu Faavae ma Feagaiga 45:60-61

Na faatonuina e le Alii Iosefa Samita e amata lana faaliliuga o le Feagaiga Fou

Fai atu i tagata o le vasega pe i ai se tasi o i latou e mafai ona taulotoina le mataupu faavae lona valu o le faatuatua. Afai latou te manaomia le fesoasoani, fai atu i se tagata o le vasega e sue i Mataupu Faavae o le Faatuatua ma faitau leotele mai le lona valu.

• O le a le mea o loo fautua mai e le fuaitau “e tusa ma mea ua tonu ona faaliliuina” e uiga i le Tusi Paia?

Faamanatu i tagata o le vasega, sa fiafia Iosefa e suesue i le Tusi Paia ma maua ai le faamafanafanaga tele i ona upu. Ae peitai, a o ia suesueina, sa ia matauina ni mea sese ma lagona ai o loo misi pe le o atoatoa foi nisi o faamatalaga. Fai atu i se tagata o le vasega e faitau leotele faamatalaga nei mai le Perofeta o Iosefa Samita e uiga i le Tusi Paia. Fai atu i le vasega e faalogologo mo mea na mafua ai faafitauli na matauina e Iosefa:

“Sa iloa mai ai o le tele o vaega taua e uiga i le faaolataga o le tagata ua aveeseina mai le Tusi Paia, po ua leiloa ao lei tuufaatasia” (Aoaoga a Peresitene o le Ekalesia: Iosefa Samita [2007], 231).

Sa ia ta‘ua foi: “Ou te talitonu i le Tusi Paia i le faitauina mai i tusitusiga a uluai tusiupu. O le au faaliliu le magafagafa, o le au tusitusi faatamala, po o ositaulaga taufaasese ma le le faamaoni ua latou faia mea sese e tele” (Aoaoga: Iosefa Samita, 219).

• E tusa ai ma le faamatalaga a Iosefa Samita, o a mafuaaga e le itiiti ma le tolu ua i ai measese i le Tusi Paia?

Faamanatu i tagata o le vasega o le lesona i le Mataupu Faavae ma Feagaiga 45:16–59, na latou suesue ai i mea na ta‘u atu e Iesu Keriso i Ona soo e uiga i Lona Afio Mai Faalua. O le faaaliga o loo toe faamatalaina ai le tele o mea o loo tusia i le Mataio 24. Ina ua tuuina mai le faaaliga lenei i le 1831, sa galue Iosefa Samita i le iloiloga musuia o le Feagaiga Tuai. Valaaulia se tagata o le vasega e faitau leotele le Mataupu Faavae ma Feagaiga 45:60–61. Fai atu i le vasega e mulimuli i le faitauga, ma vaavaai po o le a le mea na finagalo le Alii e liliu atu i ai le mafaufau o le Perofeta.

• O a auala na fetalai mai le Alii o le a manuia ai le Au Paia i le faaliliuga o le Feagaiga Fou? (O le a faaali mai ai mea e tele atu o le finagalo o le Atua e saunia ai le Au Paia.)

Fai atu i se tagata o le vasega e fai se aotelega o le faamatalaga lenei mo le vasega. (Ina ia maua e le tagata o le vasega se taimi e saunia ai, tuu atu ia te ia le faamatalaga a o lei amataina le vasega.) Atonu e te manao e faailoa atu faamatalaga e le’i faailoaina mai e le tagata o le vasega.

Pe tusa o le tautoulu o le 1830, na poloaiina ai Iosefa Samita e le Alii e faaliliu le Tusi Paia. Na te le’i faaliliuina le Tusi Paia mai se tasi gagana i se isi; pe na ia faaaogaina foi ni uluai tusitusiga faaletusi paia e galue mai ai. Nai lo lena, na faitau ma suesue Iosefa i fuaitau mai le Lomiga a King James o le Tusi Paia, ma ona faia faasa‘oga ma faaopoopoga e pei ona musuia ai e le Agaga Paia. O lea la, o le faaliliuga sa sili atu o se toe iloiloga musuia nai lo o se faaliliuga masani.

O le Faaliliuga a Iosefa Samita e masalo e le itiiti ifo ma le 3,400 fuaiupu i le lomiga a King James o le Tusi Paia ua aafia ai. O nei eseesega e aofia ai faaopoopoga (e faamanino ai uiga po o se talaaga), mea sa tape, toe faatulagaga o fuaiupu, ma le toe faaupuina atoa o ni mataupu patino. O le Faaliliuga a Iosefa Samita ua faamaninoina ai le anotusi faale-aoaoga faavae, ae maise lava o le misiona a Iesu Keriso, o le natura o le Atua, o le natura o le tagata, o le feagaiga faa-Aperaamo, o le perisitua, ma le Toefuataiga o le talalelei.

O le lomiga a le Au Paia o Aso e Gata Ai o le lomiga a King James o le Tusi Paia, na lolomiina i le te’a ai o le 1979, o loo aofia ai le sili atu ma le 600 o suiga mai le Faaliliuga a Iosefa Samita. E i ai suiga pupuu o loo ta’ua i vaefaamatalaga, ae o filifiliga tetele atu o loo maua i le faaopoopoga o le Tusi Paia.

Valaaulia tagata o le vasega e sue le Iosefa Samita—Mataio i le Penina Tau Tele. Faamalamalama atu o le vaega lenei o le Faaliliuga a Iosefa Samita o loo i ai faamatalaga e tele mai le Mataio 24 e uiga i le Afio Mai Faalua o le Alii ma o le faataunuuga o le Mataupu Faavae ma Feagaiga 45:60–61.

Atonu e te manao e fai atu i se tagata o le vasega e toe faamatala leotele lona malamalamaaga po o le a le Faaliliuga a Iosefa Samita. Afai o loo i ai i tagata o lau vasega le lomiga o le Au Paia o Aso e Gata Ai o le lomiga a King James o le Tusi Paia, e mafai ona faaali atu ia i latou ni faataitaiga o vaefaamatalaga o le Faaliliuga a Iosefa Samita i le Feagaiga Fou po o vaega e tele atu o loo i le faaopoopoga o le Tusi Paia. Mo se faataitaiga, i le Mataio 4:1, vaefaamatalaga e fai mai, sa alu Iesu “ina ia faatasi ma le Atua” ae le o le “ina ia faaosoosoina e le tiapolo.” A uma ona faaali atu i tagata o le vasega ni faataitaiga, fesili atu i ai pe mafai faapefea ona fesoasoani le Faaliliuga a Iosefa Samita i a latou suesuega ma malamalamaga o le Tusi Paia.

Mataupu Faavae ma Feagaiga 45:62-65

Ua muai lapataiina le Au Paia e faapotopoto i atunuu i sisifo

Faamalamalama atu na faatonuina e le Alii le Au Paia anamua e siitia atu agai i sisifo, “i fafo mai laueleele i sasae” (MF&F 45:64). Ina ia fesoasoani i tagata o le vasega e vaai faalemafaufau i le siitiaga i sisifo o le a faia e tagata o le Ekalesia i le taimi na tuuina mai ai lenei faaaliga (mai Niu Ioka i Ohaio), e mafai ona fai atu ia te i latou e sue i le Faafanua 3 (“The New York, Pennsylvania, and Ohio Area of the USA”) i le vaega o Faafanua o le Talafaasolopito o le Ekalesia o a latou tusitusiga paia. Valaaulia se tagata o le vasega e faitau leotele le Mataupu Faavae ma Feagaiga 45:62-64. Fai atu i le vasega e mulimuli i le faitauga ma faailoa mai pe aisea na poloaiina ai e le Alii le Au Paia e faapotopoto atu “i itu laueleele i sisifo” (MF&F 45:64).

• A o le a le mea na fetalai mai le Alii sa “i o outou faitotoa lava”? O le a se mea e te manatu o fautuaina mai e nei faatusa?

Faamalamalama atu e faapea, i le 1861, toeitiiti 17 tausaga talu ona maliu Iosefa Samita, sa amataina ai se Taua Faalelotoifale i le Iunaite Setete. E masalo o lenei taua na mafua ai le maliliu o tagata e silia i le 1 miliona, faapea ma le tele o meatotino na faaleagaina, na aumaia ai tulaga faigata i aiga ma nuu i le atunuu atoa. O na Au Paia o e sa faaauau pea ona mulimuli i fautuaga a le Alii e faapotopoto mai sasae, sa faamanuiaina i le filemu ma le saogalemu i Iuta.

Aoaoga e tuuina atu e le faiaoga

O le auai malosi o tagata o le vasega i le faagasologa o le aoaoina e taua i o latou malamalama ma le faaaogaina o tusitusiga paia, ae e le aveesea ai le manaomia e se faiaoga ona tuuina atu i lea taimi ma lea taimi o faamatalaga a’o faalogologo tagata o le vasega. O aoaoga pupuu a le faiaoga e mafai ona mataalia pe a i ai se manaomia e aotele ni faamatalaga tetele, tuuina atu faamatalaga e fou i tagata o le vasega, fai fesuiaiga i se lesona, pe faia ni faaiuga.

Valaaulia se tagata o le vasega e faitau leotele le Mataupu Faavae ma Feagaiga 45:65. Fai atu i le vasega e mulimuli i le faitauga, ma vaavaai mo mea na finagalo le Alii i le Au Paia e fai a’o latou faapotopoto faatasi i itu i sisifo.

• Aisea na tatau ai ona latou faapotopoto a latou oa? (E faatau mai ai fanua e mafai ona nonofo ai ma le lotogatasi, filemu ma saogalemu le Au Paia. Faamalamalama atu o le tofi e faatatau i le fanua e mafai e le Au Paia ona nonofo ma tapuai ai i le Alii.)

Mataupu Faavae ma Feagaiga 45:66-75

Ua faamatala mai e le Alii le Ierusalema Fou po o Siona

Fai atu i tagata o le vasega e mafaufau i le fesili lenei:

• Afai e mafai ona e filifili i soo se mea o le lalolagi e te nofo ai, o fea lea mea? Aisea o le a e manao e te nofo ai iina?

Valaaulia ni nai tagata o le vasega e tali mai. A o latou faia, tusi se laina i lalo o le ogatotonu o le laupapa, e maua ai ni koluma se lua. I le pito i luga o le tasi o koluma, tusi ai igoa o ni atunuu e ta’u mai e tagata o le vasega. I le koluma lava lea e tasi, i lalo ifo o igoa, lisi ai a latou mafuaaga e mananao ai e nonofo i na atunuu.

Valaaulia tagata o le vasega e faitau filemu le Mataupu Faavae ma Feagaiga 45:66–67, ma vaavaai mo le igoa o le laueleele o le tofi o le Au Paia, ma mafuaaga o le a avea ai o se nofoaga moomia mo i latou e nonofo ai. Atonu e te manao e fautua atu i tagata o le vasega e faailoga mea ua latou maua.

• O le a le igoa o le laueleele o le tofi o le Au Paia? (O le Ierusalema Fou, po o Siona. Tusi le upu lenei i luga o le laupapa i le pito i luga o le koluma lona lua.)

Faamalamalama atu i totonu o tusitusiga paia, o le upu Siona o nisi taimi e faaaoga ai e faauiga ai ni nai mea eseese. O nisi taimi o le upu e faatatau i le nuu o Siona ma e faamatalaina ai i latou o e “loto mama” (MF&F 97:21). O isi nofoaga uma, o Siona e faatatau i le Ekalesia atoa ma ona siteki i le lalolagi atoa (tagai i le MF&F 82:14). O le upu Siona e mafai foi ona faasino i tulaga faapitoa faafaafanua. I lenei faaaliga, o Siona na faasino i se aai moni o le a atinaeina e le Au Paia ma faapotopoto i ai.

• Na faapefea ona faamatalaina e le Alii le Ierusalema Fou, po o Siona? (Lisi tali a tagata o le vasega i le koluma lona lua i luga o le laupapa. Atonu latou te faaaogaina ni upu eseese, ae e tatau ona latou faailoa mai le aoaoga faavae lenei: O le Ierusalema Fou o se nofoaga o le filemu ma le saogalemu, ma o le a i ai iina le mamalu o le Alii.)

Valaaulia tagata o le vasega e faatusatusa atunuu na latou filifilia mo o latou fale lelei ma le faamatalaga o Siona.

• E faavae i le faamatalaga e le Alii o Siona, aisea atonu o le a e manao ai e avea ma se vaega o lenei aai?

• O fea na e lagonaina ai le filemu ma le saogalemu? Aisea e taua ai le i ai o nofoaga e mafai ona e saogalemu ma maua ai le filemu?

Valaaulia se tagata o le vasega e faitau leotele le Mataupu Faavae ma Feagaiga 45:68-71. Fai atu i le vasega e mulimuli i le faitauga, ma vaavaai mo mafuaaga faaopoopo latou te ono mananao ai e nonofo i le Ierusalema Fou. Atonu e te manao e fautua atu latou te faailoga mea ua latou maua. Fai atu ia te i latou e lipoti mai mea na latou maua, ma faaopoopo a latou tali i le koluma lona lua i luga o le laupapa.

• O a ni lagona o e amioleaga e uiga ia Siona?

• E tusa ai ma le fuaiupu e 71, o fea o le a o mai ai tagata amiotonu o Siona? (Afai e le’i uma ona ua faailoaina mai, tusi le aoaoga faavae lenei i le koluma lona lua i luga o le laupapa: O tagata amiotonu mai atunuu uma o le a faapotopoto i Siona. (Atonu e te manao e faamalamalama atu, sa tonu lenei mea mo le Siona o loo ta’ua i le faaaliga lenei, ma e tonu foi mo siteki o Siona o loo faatutuina i le lalolagi atoa i aso nei.)

Faitau le saunoaga lenei a le Perofeta o Iosefa Samita e uiga i le mataupu o Siona:

“O Siona … o se nofoaga o le amiotonu, ma o i latou uma o e nonofo ai, e tatau ona tapuai i le Atua moni ma soifua, ma o tagata uma e talitonu i le aoaoga faavae e tasi, o le aoaoga faavae o lo tatou Alii ma le Faaola o Iesu Keriso” (i le History of the Church, 2:254).

Valaaulia tagata aoga e faitau filemu le Mataupu Faavae ma Feagaiga 45:72–73 ma vaavaai mo mea na lapataia e le Alii le Au Paia e aua le faia. Ona otooto lea o fuaiupu mulimuli e lua o lenei faaaliga, i le faamalamalama atu, na faamanatu mai e le Alii i le Au Paia o Lona Afio Mai Faalua o le a matautia mo o latou fili.

Atonu e te manao e faamanatu i tagata o le vasega, na uunaia e le Alii le Au Paia anamua ma i tatou e “faalogo” atu i Lona siufofoga i le faaaliga lenei. Valaaulia tagata o le vasega e toe tepa i tua i le Mataupu Faavae ma Feagaiga 45 ma toe faamanatu le mea na faaali mai e le Alii i le Au Paia e uiga i Lona Afio Mai Faalua ma le Ierusalema Fou. E mafai ona e uunaia i latou e faauma le faamatalaga lenei i a latou api o le vasega po o api talaaga mo le suesueina o tusitusiga paia: “Ona o le ua ou aoaoina i le Mataupu Faavae ma Feagaiga 45, o le a ou saunia mo mea e oo mai e ala i le … “ Faaiu i le uunaia o tagata o le vasega e talanoa i mea na latou aoaoina i lesona o le aso ma se tagata o le aiga.

Tala ma Faamatalaga o Talaaga

Mataupu Faavae ma Feagaiga 45:60–61. O Le Faaliliuga a Iosefa Samita

O le Faaliliuga a Iosefa Samita “o se toe iloiloga po o le faaliliuga o le lomiga a King James o le Tusi Paia, lea na amataina e le Perofeta o Iosefa Samita ia Iuni 1830. Sa tofia o ia mai le lagi e fai le faaliliuga ma faatatau i ai ‘o se vaega o lona valaauga’ o se perofeta.” E ui ina sa faamaeaina le galuega ia Iulai 1833, sa faaauau pea ona faia e le Perofeta ni suiga laiti seia oo ina maliu o ia i le 1844. “O nisi vaega o le faaliliuga na lolomiina i le taimi o lona soifuaga atoa.” (Tagai i le Bible Dictionary, “Joseph Smith Translation.”)

Ae peitai, ona o sauaga, utiuti o punaoa tautupe, ma ona tiutetauave mo le taitaiga o le Ekalesia, sa le mafai ai e Iosefa Samita ona lolomi ma faasalalauina ana faafouga uma o le Tusi Paia a’o lei maliu o ia. E le gata i lea, sa le’i i ai i le Ekalesia le kopi tusilima. Na tumau lava ona taulima e le faletua o Iosefa, o Ema Samita, ina ua mavae lona maliu. I le 1866 sa tuuina atu ai e Ema nei tusiga i le Ekalesia Toe Faatulagaina a Iesu Keriso o le Au Paia o Aso e Gata Ai (RLDS), lea ua ta’ua i aso nei o le Nuu o Keriso, lea na mauaina se puletaofia ma lolomiina le faaliliuga i le 1867. (Tagai i le Robert J. Matthews, “Q and A,” New Era, Ape. 1977, 46–47.)

Mulimuli ane, sa faaliliuina ai tusi o Mose ma le Iosefa Samita—Mataio o se vaega o le Faaliliuga a Iosefa Samita. Peitai, o mea o loo tatou faaaogaina i a tatou tusitusiga paia i le taimi nei, ua na o se vaega o le faaliliuga a Iosefa Samita o le Tusi Paia. “E ui sa i ai ni mafuaaga na le aofia uma ai anotusi o le Faaliliuga a Iosefa Samita i le lomiga o le Tusi Paia a le AAG i le 1979, ae o le le talitonuina o anotusi o le ISF sa le o se tasi lea o ia mafuaaga. Sa taliaina fuaitau o aoaoga faavae taua, ma talu ai o le avanoa sa o se vaega tele lea, o lea sa le’i aofia uma ai mea uma” (Robert J. Matthews, “I Have a Question,” Ensign, Iuni 1992, 29).