Faalapotopotoga ma Polokalama a le Ekalesia

Folasaga

A o faaauau pea ona faatoateleina le Ekalesia, ua musuia e le Alii ia taitai ma tagata o le Ekalesia e faaaoga faalapotopotoga ma polokalama i totonu o le Ekalesia e faamanuia ai le Au Paia. O le taimi muamua na faatuina ai nei faalapotopotoga ma polokalama, sa le’i matuā manaomia tele i latou, ae ona ua faatuputeleina le Ekalesia, ua faapea ona taua ai i latou i le galuega a le Atua mo le faaolataga o Lana fanau.

Fautuaga mo le Aoaoina Atu

O faalapotopotoga ma polokalama a le Ekalesia e fesoasoani tatou te saunia ai ma agai i luma i le ola e faavavau

Amata le vasega i le fai atu i tagata aoga e vaai faalemafaufau faapea, e le manao se uo la te o i fonotaga ma gaoioiga a Tamaitai Talavou. Sa fai mai o ia, e le malie tele ma e maimau ai lona taimi.

A uma ona e tuuina atu lenei faataitaiga, fai atu i tagata aoga e mafaufau filemu, i se faamatalaga latou te ono fai atu e fesoasoani ai i lenei uo ia malamalama i le faamoemoega o fonotaga ma gaoioiga a ana Tamaitai Talavou.

O le a se tala o le a fai atu o le faamoemoega o faalapotopotoga a Alii Talavou ma Tamaitai Talavou?
E mafai faapefea ona fesoasoani le iloaina o le faamoemoega o se faalapotopotoga ia i latou o e o ni vaega [o lea faalapotopotoga]?

Valaaulia tagata aoga e faitau filemu le Mose 1:39 ma vaavaai mo le faamoemoega a le Tama Faalelagi i mea uma e faia e Ia Valaaulia tagata aoga e lipoti mai mea ua latou mauaina. Atonu e tatau ona e faamanatu atu i tagata aoga o le tino ola pea e faatatau i le tulaga o le ola e faavavau i se tulaga o le toetu. E ala i le Togiola a Iesu Keriso, o le a toetutu ai tagata uma, e tusa lava pe latou te amioleaga pe amiotonu i lenei olaga. O le Ola e Faavavau e faatatau i le ola e faavavau o ni aiga i le afioaga o le Atua ma avea e faapei o Ia. E pei o le tino ola pea, o le ola e faavavau e mafai ona maua e ala i le Togiola a Iesu Keriso. Ae peitai, e manaomia ai foi lo tatou “usiusitai i tulafono ma sauniga o le Talalelei” (Mataupu Faavae o le Faatuatua 1:3).

Afai o le faamoemoega o le Tama Faalelagi o le aumaia o le tino ola pea ma le ola e faavavau o Lana fanau, o le a la le faamoemoega o le Ekalesia?

A uma ona tali mai tagata o le vasega, tusi le upumoni lenei i luga o le laupapa: O Le Ekalesia a Iesu Keriso o le Au Paia o Aso e Gata Ai e fesoasoani i le Tama Faalelagi i le aumaia o le ola e faavavau o Ana fanau. Ona fesili atu lea:

O a nisi o auala e fesoasoani ai le Ekalesia i le aumaia o le tino ola pea ma le ola e faavavau o fanau a le Tama Faalelagi?

Faamalamalama atu e faapea, o le Ekalesia e i ai vaega o faalapotopotoga—e ta‘ua o ausilali i le perisitua—ma isi polokalama e fesoasoani ia i tatou e alualu ai i luma i le ola e faavavau. Valaaulia tagata aoga e ta‘u mai nisi o ia faalapotopotoga. (O tali atonu e aofia ai le Aualofa, Alii Talavou, Tamaitai Talavou, Peraimeri, ma le Aoga Sa ma polokalama e pei o afiafi faaleaiga ma Seminare ma Inisitituti o Mataupu Faalelotu.)

Ina ia fesoasoani i tagata aoga ia malamalama i le ala e fesoasoani ai faalapotopotoga ma polokalama a le Ekalesia ina ia tatou aoao ma alualu i luma i le talalelei ina ia mafai ona tatou maua le ola e faavavau, valaaulia se tagata aoga e faitau leotele le saunoaga lenei a Peresitene Boyd K. Packer o le Korama a Aposetolo e Toasefululua. Faamalamalama atu, o le faamatalaga lenei e faatatau lea i polokalama seminare ma inisitituti, ae o le mataupu faavae o loo aoao mai ai, e mafai foi ona faaaoga i isi ausilali ma polokalama a le Ekalesia.

Ata
Peresitene Boyd K. Packer

“Sa amataina nei polokalama i taimi sa manaia ai ae sa le’i matuā manaomia tele. Sa tuuina atu i ai se vaitau e tutupu ma ola ae ai e avea ma se malutaga [puipuiga] mo le Ekalesia. Ua avea nei i latou o se faamanuiaga mai le Atua mo le faaolataga o Isaraelu o ona po nei i lenei vaitaimi sili ona faigata” “Teach the Scriptures” [lauga i faiaoga faalelotu a le OAE, 14 Oke., 1977], 3, LDS.org).

O faapefea ona fesoasoani le seminare ia te oe e saunia ai mo nisi o luitau o le olaga?

Faamalamalama atu faapea, ua musuia le Alii i le tele o polokalama ma faalapotopotoga i le Ekalesia e saunia ai i tatou mo luitau o le olaga, ma fesoasoani ia tatou alualu i luma i le ola e faavavau. Ina ia fesoasoani i tagata aoga e talanoaina le fesoasoani latou te maua mai i nisi o faalapotopotoga ma polokalama a le Ekalesia, vaevae le vasega i ni vaega se ono. Tuuina atu i vaega taitasi se kopi o fesili nei (po o le tusi i luga o le laupapa) ma se tasi o aotelega lenei o le talafaasolopito. Fai atu i tagata aoga e suesue i aotelega i a latou vaega ma saunia e tali i fesili.

Na faapefea ona amata le faalapotopotoga po o le polokalama lenei?

O le a sou manatu, e faapefea ona saunia ai i tatou e fetaiai ma tofotofoga ma luitau o o tatou aso?

O le a sou manatu, e faapefea ona fesoasoani ina ia tatou alualu i luma i le ola e faavavau?

Aoga Sa

I le 1849 na manatu ai se tagata o le Ekalesia na igoa ia Richard Ballantyne e manaomia e fanau se nofoaga e aoao ai le talalelei i le aso Sapati. Na uma lava ona faia e le Au Paia i Peretania Tele ni vasega o le Aoga Sa, ma sa amatalia e Uso Ballantyne le uluai vasega o le Aoga Sa i Iuta i lana uarota i le Aai o Sate Leki ia Tesema 1849. E le’i leva lava lena mea, ae amata ona fai e isi uarota lea lava faiga e tasi, ae faaaoga e uarota taitasi ana lava mataupu aoaoina. I le 1867, sa faatuina ai e taitai o le Ekalesia le Deseret Sunday School Union [Iuni o le Aoga Sa a le Deseret], lea sa uunaia ai le laugatasia o mataupu aoaoina. E oo ane i le 1870, ua silia ma le 200 ni vasega o le Aoga Sa ua faia. I le taimi nei, ua tele vasega o le Aoga Sa a uarota ma paranesi.

Tamaitai Talavou

Sa fono Peresitene Polika Iaga ma ona afafine i lona maota i le aso 28 o Novema, 1869, ma fai atu ia i latou ia avea ma ni taitai e fesoasoani i tamaiti o la latou tupulaga ia maua ni molimau e uiga i le talalelei, ia tauagafau i o latou lavalava ma a latou amioga, ma ia aloese mai taiga ma amioga o le lalolagi. I le 1870 na faatulagaina ai se faalapotopotoga aloaia a tamaitai talavou e faalauiloa atu ai nei faamoemoega. O lenei faalapotopotoga na iu lava ina ta’ua o le Young Women Mutual Improvement Association (YWMIA), lea na suia mulimuli ane i Tamaitai Talavou. I le amataga o le vaitau o le 1970, na faalauiloa mai ai e taitai le polokalama o le Alualu i Luma o le Tagata Lava Ia. I le 1985 sa latou faalauiloa mai ai tulaga faatauaina ma le autu a Tamaitai Talavou.

Alii Talavou

Na faatulagaina le Young Men’s Mutual Improvement Association (YMMIA) i le aso 10 o Iuni, 1875, i lalo o le taitaiga a Peresitene Polika Iaga. O lenei faalapotopotoga sa faamoemoe e fesoasoani i alii talavou e atinae [o latou] faaleagaga ma faaleatamai ma faapea foi ona tuuina atu ia i latou ni gaoioiga faafiafia. I le 1913, sa fai paaga faatasi ai le Ekalesia ma Tama Sikauti a Amerika i le Iunaite Setete. I le faavaomalo, na faatuina ai le faiga faapaaga ma isi polokalama a le Sikauti i vaega na mafai ai. Sa faapea foi ona sui ai ma le igoa o le faalapotopotoga, sa muamua sui i le Perisitua Arona-MIA, sosoo ai ma le Perisitua Arona, faapea ai ma Alii Talavou. I le 2001, sa faalauiloa mai ai e taitai o le Ekalesia le polokalama o le Tiute i le Atua.

Peraimeri

I le 1877, sa oo ai ia Aurelia Spencer Rogers “se lagona malosi e tatau ona faia se mea e uiga i amioga a tama o le pitonuu o e sa taufetuli sa’oloto i le taulaga i le ao atoa ma le po. Sa ia lagonaina o le toatele o nei fanau sa le’i aoaoina i mataupu faavae autu ma tulaga faatauaina [e saunia ai i latou] a le i le malamalama po o amioga e avatu ai i luma le talalelei, po o le avea ma ni matua po o ni tagatanuu lelei” (“History of Primary,” lds.org/callings/primary/getting-started/history-of-primary). Sa feiloai atu o ia i a Eliza R. Snow, o le i lena taimi sa avea ma peresitene aoao o le Aualofa, ma sa laua maua le faatagaga mai ia Peresitene Ioane Teila e faatulaga ai se Peraimeri i Farmington, Iuta, i lalo o le taitaiga a Epikopo John Hess. O le fonotaga muamua a le Peraimeri, sa faia i le aso 25 o Aokuso, 1878, sa aofia ai le 224 o tamaiti ma teineiti. I le 1880, sa valaauina ai se peresitene aoao o le Peraimeri, ma sa amata ona faatulaga ia vasega i totonu o le tele o uarota.

Seminare ma Inisitituti o Mataupu Faalelotu

I le 1888 sa faatuina ai e le Ekalesia se Faatonu aoao o Aoaoga ma aoga o le Ekalesia ma faia ni vasega faalelotu e tuuina atu ai se faavae faaleagaga mo aoaoga o le poto salalau mo i latou o e sa le’i auai i aoga a le Ekalesia. I le 1912, sa tuuina atu ai e Joseph F. Merrill, o se polofesa ma se tagata o le Ekalesia, se fuafuaga e mafai ai e tagata aoga i a‘oga a le malo ona auai i vasega faalelotu o se vaega o a latou aso aoga. Sa ta‘ua o le seminare, ma o vasega muamua sa faia e latalata i le Aoga Maualuga a Granite i le Aai o Sate Leki, Iuta, ma e 70 tagata aoga sa lesitala ai. A o salalau atu le polokalama o le seminare, sa faapea ona faavaeina foi se polokalama tai faapena mo le autalavou o le vaitausaga o tagata aooga i le kolisi. Sa ta’ua o le Inisitituti o Mataupu Faalelotu a le Au Paia o Aso e Gata Ai, ma sa amatalia vasega inisitituti i le 1926 i Moscow, Idaho. I le amataga o le vaitau o le 1950, na amata ai se polokalama o le seminare i taeao i Kalefonia, sa amata le polokalama o le seminare e suesue i le fale i le vaitaimi o le 1960, ma o loo faaauau pea ona salalau atu seminare ma inisitituti o aoaoga faalelotu i le lalolagi atoa.

Afiafi Faaleaiga

Na aoao mai Peresitene Iosefa F. Samita, o polokalama a le Ekalesia e tatau ona avea “ma ni faaopoopoga i a tatou aoaoga ma aoaoga faamasani i le aiga. E leai se tamaitiiti e toatasi i le selau e se ese, pe afai e o faatasi le siosiomaga i le aiga, faataitaiga ma aoaoga faamasani, ma upumoni i le Talalelei a Keriso” (“Worship in the Home,” Improvement Era, Tes. 1903, 138). I le 1909 sa amata ai e le Siteki a Granite i le Aai o Sate Leki, Iuta, se polokalama o le afiafi i vaiaso taitasi, lea na saunoa mai Peresitene Samita sa musuiaina. I le 1915, sa fautuaina mai ai e le Au Peresitene Sili, ia faia afiafi faaleaiga faalemasina i le Ekalesia atoa. Na folafola mai e le Au Peresitene Sili: “Afai e usiusitai le Au Paia i lenei fautuaga, [ia faia afiafi faaleaiga], matou te folafola atu o le a maua ai faamanuiaga silisili. O le a faateleina le alofa i le aiga ma le usiusitai i matua. O le a atiina ae le faatuatua i loto o le autalavou o Isaraelu, ma o le a latou maua le malosi e teena ai uunaiga a le tiapolo ma faaosoosoga e oo mai ia i latou” (i le James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 4:339) O le limasefulu tausaga mulimuli ane, na lomia ai e le Ekalesia tusi lesona mo aiga e faaaoga i aoaoga faalevaiaso o le talalelei. I le 1970, sa atofaina ai e taitai o le Ekalesia afiafi o Aso Gafua mo afiafi faaleaiga ma faasilasila mai ai, e leai nisi lava gaoioiga a le Ekalesia e tatau ona faia i lena po.

A ua lava loa le taimi, fai atu i tagata aoga i vaega taitasi e fai se aotelega o le talafaasolopito o le latou faalapotopotoga po o le polokalama na atofaina atu, ma faamalamalama mai a latou tali i fesili sa latou talanoaina.

Faamalamalama atu o faalapotopotoga ma polokalama taitasi a le Ekalesia sa muai faagaoioia taitasi. A o faateteleina le faalauteleina o le Ekalesia i le vaitaimi o le 1950, sa vaaia e taitai o le Ekalesia se manaomia ona toe iloilo pe na faapefea ona ausia e faalapotopotoga a le Ekalesia ia faamoemoega o le Ekalesia. Sa latou filifili ai e tuufaatasia ma faamaopoopo uma faalapotopotoga ma polokalama a le Ekalesia i le taitaiga ma i le filifilia o mataupu aoaoina. Sa fesoasoani nei suiga i faalapotopotoga ma polokalama ina ia faafetaiaia lelei ai manaoga faigata o le Ekalesia ua faatupulaia ma ia faamalosia ai le aiga. I lalo o lenei taumafaiga o le faamaopoopoga, e galulue ai faalapotopotoga uma o le Ekalesia i lalo o le taitaiga a taitai perisitua, o e o loo umia ki e pulefaamalumalu ai.

Valaaulia se tamaitiiti aoga e faitau leotele le saunoaga lenei a Elder Bruce R. McConkie o le Korama a Aposetolo e Toasefululua:

Ata
Elder Bruce R. McConkie

“O le faamaopoopoga o le faiga lena o le taitaiga o le ekalesia lea tatou te aumaia ai polokalama uma a le Ekalesia, ma aumai i se manatu autu e tasi, afifi i latou i se taaiga e tasi, faagaoioi i latou o se polokalama e tasi, e aafia ai tagata uma o le Ekalesia i le faagaoioiga—ma faia mea uma i lalo o le taitaiga a le perisitua” (Let Every Man Learn His Duty [tamaitusi, 1976], 2).

Tusi le mataupu faavae lenei i luga o le laupapa: A o tatou auai i faalapotopotoga ma polokalama a le Ekalesia, tatou te maua faamanuiaga o loo avanoa e ala mai ia i latou. Ona tusi lea o fesili nei i luga o le laupapa, ma valaaulia tagata aoga e tali i ai, i a latou api o le vasega po o api talaaga mo le suesueina o tusitusiga paia.

Ua faapefea ona faamanuiaina lou olaga i faalapotopotoga ma polokalama a le Ekalesia? Ua faapefea ona faamanuiaina lou olaga i le Tiute i le Atua po o le Alualu i Luma o le Tagata Lava Ia?

O a ni auala o le a e auai atoatoa ai i [polokalama] a Alii Talavou po o Tamaitai Talavou? I le Aoga Sa? I le afiafi faaleaiga? I le seminare?

A ua lava loa le taimi, valaaulia ni nai tagata aoga e faasoa mai ni mea ua latou tusia. E mafai foi ona faasoa atu ou manatu e uiga i auala ua faamanuia ai e faalapotopotoga a le Ekalesia lou olaga, ma fesoasoani ia te oe ma lou aiga ia alualu i luma i le ola e faavavau.

Tala ma Faamatalaga o Talaaga

O le taua o le seminare

Na faamatalaina e Peresitene Thomas S. Monson le taua o le seminare:

Ata
Peresitene Thomas S. Monson

“E le gata i le auai i au sauniga lotu i Aso Sa ma au gaoioiga i po o le vaiaso, a e maua le avanoa e te alu ai i le seminare, pe fai i le taeao po o vasega i le taimi o a’oga, ia faaaoga lena avanoa. O le toatele o outou o loo auai nei i le seminare. Pei lava o soo se mea i le olaga, o le tele o mea e te maua mai i aafiaga o le seminare e faalagolago i ou uiga faaalia ma lou naunau ia aoaoina oe. Talosia o ou uiga faaalia o le lotomaulalo ma se naunautai e aoao. E maeu lo’u loto faafetai mo le avanoa sa ou maua ao ou talavou ou te aoga ai i le seminare i le vaveao, aua e taua tele na matafaioi i lo’u atinaega ma le atinaega o la’u molimau. O le seminare e mafai ona suia ai olaga” (“Talitonu, Usitai, ma Tumau,” Ensign po o le Liahona, Me 2012, 127-28).