Lesona 137
Mataupu Faavae ma Feagaiga 130:12–21
Folasaga
O lenei lesona o loo aofia ai aoaoga faavae na aoao mai e Iosefa Samita i se sauniga a le Ekalesia i Ramese, Ilinoi, i le aso 2 o Aperila, 1843. O nei aoaoga ua faamaumauina i le Mataupu Faavae ma Feagaiga 130. Na aoao mai le Perofeta e uiga i mea e tutupu i le lumanai, e aofia ai le Afio Mai Faalua o Iesu Keriso. Sa ia aoao mai foi e uiga i lo tatou gafatia e faatumau le malamalama ma le atamai pe a uma ona tatou oti, ma faamalamalama mai le ala e mafai ona tatou maua ai faamanuiaga a le Atua.
Fautuaga mo le Aoaoina Atu
Mataupu Faavae ma Feagaiga 130:12-17
Ua aoao mai Iosefa Samita e uiga i le Afio Mai Faalua
A o lei amataina le vasega, tusi le faamatalaga lenei i luga o le laupapa: E toatele na mafaufau i le aso tonu o le Afio Mai Faalua.
-
Pe sa i ai se taimi sa e fia iloa tonu ai le aso o le a tupu ai le Afio Mai Faalua o Iesu Keriso?
Faamalamalama atu e faapea, i aso o Iosefa Samita, sa folafola ai e se faifeau Kerisiano lauiloa na igoa ia William Miller e faapea, o le Afio Mai Faalua o le Faaola o le a tupu i le aso 3 o Aperila, 1843. I se tasi aso a o lumanai le aso na valoia e Miller o le Afio Mai Faalua, sa saunoa atu ai le Perofeta o Iosefa Samita i le Au Paia i Ramese, Ilinoi, ma ta’ua ai e faapea, sa ia tatalo ina ia iloa le taimi o le Afio Mai Faalua.
Valaaulia se tagata aoga e faitau leotele le Mataupu Faavae ma Feagaiga 130:14–17. Fai atu i le vasega e mulimuli i le faitauga, ma vaavaai mo le mea na aoaoina e Iosefa Samita ina ua ia tatalo e uiga i le taimi o le Afio Mai Faalua o Iesu Keriso.
-
Pe na faaali e le Alii ia Iosefa Samita le aso tonu o le Afio Mai Faalua?
-
O le a le mea na ta’u mai e le Alii i a Iosefa Samita e fai? (A uma ona tali mai tagata aoga, atonu e te manao e fautua atu latou te faailoga le fuaitau “aua le toe faalavelave mai ia te aʼu i lenei mataupu” i a latou tusitusiga paia. Mafaufau e faasino atu tagata aoga i le Mataupu Faavae ma Feagaiga, 130:15, vaefaamatalaga a, e toe faamamafa atu ai e leai se tasi e iloa lelei le taimi o le a toe foi mai ai le Faaola.)
Fai i se tagata aoga e faitau leotele le saunoaga lenei a Elder M. Russell Ballard o le Korama a Aposetolo e Toasefululua:
“Ua tofia a’u o se tasi o le au Aposetolo ina ia avea ma se molimau faapitoa o Keriso, … ma ou te le iloa le taimi o le a toe afio mai ai o Ia. E tusa ai ma le mea ua ou iloa, e leai se tasi o o’u uso o le Korama a le Toasefululua pe oo lava foi i le Au Peresitene Sili e silafia. Ma ou te fia fautuaina atu ma le lotomaualalo afai matou te le iloa, o lona uiga e leai lava se tasi na te iloa. … Na fetalai mai le Faaola e faapea, ‘e uiga i lena aso, ma le itula, e leai se tasi na te iloaina; e leai, e le iloa e agelu a le Atua i le lagi, ae na o lo’u Tamā lava’ [Iosefa Samita—Mataio 1:40
“Ou te talitonu ina ua fetalai le Alii ‘e leai se tasi’ na te iloa, o le uiga moni lava lena o Lana fetalaiga, e leai se tasi na te iloa” (“When Shall These Things Be?” Ensign, Tes. 1996, 56).
-
O le a se mea ua tatou aoao mai le Mataupu Faavae ma Feagaiga 130:14–17 ma le saunoaga a Elder Ballard? (E mafai ona faailoa mai e tagata aoga ni upumoni eseese, ae e tatau ona latou faailoa mai le faamatalaga lenei: Ua na o le Atua e silafia le taimi tonu o le a tupu ai le Afio Mai Faalua.)
Faailoa atu e faapea, i o tatou aso, na taumafai nisi o tagata e valoia le taimi tonu o le Afio Mai Faalua po o le iuga o le lalolagi.
-
E mafai faapefea e le manatuaina o lenei mataupu faavae ona fesoasoani ia te oe, ina ia le taitaiseseina e talitonuga sese?
Mataupu Faavae ma Feagaiga 130:18-19
Ua aoao mai Iosefa Samita e uiga i le taua o le mauaina o le poto ma le malamalama i lenei olaga
Afai e mafai, faaali atu se atopau po o se ato. Valaaulia tagata aoga e vaai faalemafaufau e faapea, o le a latou tuua le fale ma o atu i se mea latou te le’i oo muamua i ai. Ua faatagaina i latou e ave na o mea o le a ofi i totonu o le atopau (po o se ato).
-
O a ni mea o le a e teuina i le atopau? (Valaaulia se tagata aoga e lisi ia tali i luga o le laupapa.)
Fai atu i tagata aoga e vaai faalemafaufau e faapea, o lo latou taunuuga o le lalolagi o agaga, lea o le a tatou ulufale atu i ai pe a tatou oti.
-
O le fea o aitema o loo i luga o le laupapa o le a mafai ona e alu ma ave pe a e oti?
Valaaulia se tagata aoga e faitau leotele le Mataupu Faavae ma Feagaiga 130:18-19. Fai atu i le vasega e mulimuli i le faitauga, ma vaavaai mo mea e mafai ona tatou o ma ave mai i lenei olaga pe a tatou oti.
-
E tusa ai ma fuaiupu 18–19, o le a le mea o le a ia i tatou pe a tatou oti? (E mafai ona faaaoga e tagata aoga ni upu eseese, ae e tatau ona latou faailoa mai le upumoni lenei: O le malamalama ma le atamai tatou te maua i lenei olaga o le a tutu faatasi ma i tatou i le toetu.
Ina ia fesoasoani i tagata aoga ia malamalama i le uiga o upu malamalama ma le atamai, valaaulia se tagata aoga e faitau leotele le saunoaga lenei a Elder Neal A. Maxwell o le Korama a Aposetolo e Toasefululua:
“Afai tatou te mafaufau loloto i le mea tonu o le a tutu faatasi ma i tatou i le toetu, e foliga manino mai o lo tatou atamai o le a tutu faatasi ma i tatou, o lona uiga e le na o le tulaga o lo tatou atamai, ae faapea foi i lo tatou gafatia ona maua ma faaaoga ia upumoni. O a tatou taleni, uiga, ma tomai o le a tutu faatasi ma i tatou; e mautinoa foi i o tatou gafatia e aoao ai, o le tulaga o le loto pulea, ma lo tatou gafatia ona galulue“ (We Will Prove Them Herewith [1982], 12).
-
E tusa ai ma le saunoaga a Elder Maxwell, o le a le uiga o le upu atamai o loo i le fuaiupu 18–19?
-
E tusa ai ma le fuaiupu e 19, e mafai faapefea ona tatou maua le malamalama ma le atamai sili atu? (Atonu e te manao e faailoa atu e faapea, o nisi malamalama ma atamai e na o “le … filiga ma le usiusitai” e mafai ona maua ai.)
-
O le a se taimi na e mauaina ai ia se malamalama po o se atamai e ala i lou filiga ma le usiusitai? (Atonu e te manao foi e faasoa atu se aafiaga.)
Faailoa atu e faapea, e tusa ai ma le fuaiupu e 19, o i latou o e e mauaina le malamalama ma le atamai e tele atu i lenei olaga, o le a i ai se tulaga e lelei ai i le lalolagi a sau.
-
O a auala e te manatu o le mauaina o le malamalama ma le atamai i lenei olaga, e mafai ona tatou maua ai se tulaga e lelei ai i le lalolagi a sau?
Faamalamalama atu o mea tatou te aoaoina i lenei olaga, i le faaletino ma faaleagaga, o le a aoga ia i tatou i le faavavau atoa. O le a mafai ona tatou atina’e i luga o le malamalama tatou te maua i lenei olaga ina ia avea atili ai e faapei o le Tama Faalelagi.
Ina ia mafai ona fesoasoani i tagata aoga ia faaauau pea ona maua le malamalama ma le atamai, uunai i latou e faaauau pea ona auai i le seminare i le taimi nei, ma ia fuafua e auai i le inisitituti pe a uma ona latou faauu mai le semianre. Valaaulia tagata aoga e tusi se sini e mafai ona fesoasoani ia i latou e maua ai le malamalama ma le atamai sili atu.
Mataupu Faavae ma Feagaiga 130:20-21
Ua faamalamalama mai e Iosefa Samita le auala tatou te maua ai faamanuiaga
Valaaulia tagata aoga e vaai faalemafaufau e faapea, ua latou mananao e faaleleia atili a latou tusitusi, o lea ua latou filifili ai e tamomoe i maila e tolu, i aso e lima o le vaiaso, mo se masina se tasi.
-
O le a le taunuuga o le a i ai? Aisea?
-
O le a se mea e te faia e faaleleia ai lau tusitusi?
Faailoa atu e faapea, e pei lava ona tatau ona tatou malamalama i le auala e maua ai taunuuga tatou te mananao i ai, e tatau foi ona tatou malamalama i le auala e maua ai faamanuiaga e finagalo le Tama Faalelagi e tuuina mai ia i tatou.
Valaaulia se tagata aoga e faitau leotele le Mataupu Faavae ma Feagaiga 130:20-21. Fai atu i le vasega e mulimuli i le faitauga, ma vaavaai mo auala e mafai ona tatou maua ai faamanuiaga e finagalo le Tama Faalelagi e tuuina mai ia i tatou. (Atonu e te manao e faamalamalama atu e faapea, o le upu “faavae” o lona uiga “e tusa ai” ma o se tulafono e “folafola le maaveesea” ua tamau ma e le toe suia.)
-
E tusa ai ma fuaiupu 20–21, e faapefea ona tatou maua se faamanuiaga mai le Atua?
Valaaulia tagata aoga e tusi se mataupu faavae “afai-ona” e faavae i fuaiupu 20–21. A maea se taimi, fai atu i ni nai tagata aoga e faitau leotele a latou faamatalaga. E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Afai tatou te mananao e maua se faamanuiaga mai le Atua, ona tatau lea ona tatou usitai i le tulafono ua faavae ai.
Ina ia fesoasoani i tagata aoga ia loloto lo latou malamalamaaga e uiga i lenei upumoni, kopi le siata lenei i luga o le laupapa (atonu e te manao e fai a’o lei amataina le vasega). Valaaulia tagata aoga e kopi le siata i a latou api o le vasega po o api talaaga mo le suesueina o tusitusiga paia. Valaaulia se tagata aoga e faitau leotele le mau muamua o loo lisi atu. Fai atu i le vasega e mulimuli i le faitauga, ma vaavaai mo se tulafono ma se faamanuiaga e fesootai i ai. A o latou lipoti mai a latou tali, faatumu le avanoa talafeagai i luga o le siata. Valaaulia tagata aoga e faatumu a latou lava siata.
Afai tatou te mananao ia maua se faamanuiaga mai le Atua, ona tatau lea ona tatou usitai i le tulafono ua faavae ai.
|
Fuaitau o mau |
Tulafono |
Faamanuiaga |
|---|---|---|
A uma ona fai e tagata aoga lenei gaoioiga, fai atu ia te i latou e mafaufau i faamanuiaga ua latou maua ona ua latou usitaia se tulafono. Valaaulia i latou e faasoa mai o latou aafiaga.
Valaaulia tagata aoga e tusi i lalo ni faamanuiaga latou te mananao e maua. Ona valaaulia lea o i latou e tusi po o le a le tulafono po o tulafono e manaomia ona latou usitaia ina ia mafai ona maua ai na faamanuiaga.
Faailoa atu e faapea, o nisi o tulafono ma faamanuiaga e matua patino lava a o isi e sili atu ona faalauaitele. Ia faailoa atu foi o nisi o faamanuiaga folafolaina e mafai ona oo mai i le olaga a sau.
Ina ia faaiu le lesona o le aso, valaaulia tagata aoga e toe faamanatu nisi o upumoni na latou aoaoina mai aoaoga a Iosefa Samita ua faamaumauina i le Mataupu Faavae ma Feagaiga 130.
-
E faapefea ona fesoasoani upumoni o loo i le Mataupu Faavae ma Feagaiga 130 e te talisapaia ai Iosefa Samita?
Faaiu i le valaaulia o se tagata aoga e faitau le saunoaga lenei a Peresitene Polika Iaga e uiga i le tomai o Iosefa Samita e faamatala mai mea a le Atua.
“O le maualuga o le mamalu o uiga o Uso Iosefa Samita sa ia mafai ai ona faafaigofieina mea faalelagi ina ia malamalama ai i latou e le lava lo latou malamalama. Ina ua ia talai atu i tagata—ma faaali atu i ai mea a le Atua, o le finagalo o le Atua, o le ata o le faaolataga, o faamoemoega o Ieova, o lo tatou sootaga ma ia ma le aiga Atua uma, na ia faaitiitia aoaoga ina ia fetaui i tulaga o tane, fafine, ma tamaiti, ma faafaigofie e pei o se auala teuteuina lelei. Ua tatau ai ona faatalitonuina soo se tagata e faalogo ia te ia i lona mana ma le pule paia, aua e leai se isi tagata e mafai ona aoao atu e pei ona ia faia, ma e leai se tagata e mafai ona ia faaalia mai mea a le Atua, ae ala mai i faaaliga a Iesu Keriso” (Aoaoga a Peresitene o le Ekalesia: Polika Iaga [1997], 354).
Faaiu i le faasoa atu o lau molimau e uiga i le valaauga o Iosefa Samita o se perofeta, tagatavaai, ma talifaaaliga. Valaaulia tagata aoga e galulue i aoaoga faavae ma mataupu faavae ua aoaoina a o latou suesueina aoaoga a le Perofeta i le Mataupu Faavae ma Feagaiga 130.
Tala ma Faamatalaga o Talaaga
Mataupu Faavae ma Feagaiga 130:18–19. Mauaina o le malamalama ma le atamai
Na aoao mai Peresitene Boyd K. Packer o le Korama a Aposetolo e Toasefululua e faapea:
“E le tatau ona outou faitio e uiga i le aoga. Aua tou te matele i le aoaoina o matata po o galuega faapitoa ae galo ai ona aoao i mea e aoga. O mea uma e mafai ona e aoaoina e aoga—i totonu o le fale, i le umukuka i le faiga o le kuka, i le fanua—o le a aoga ia te oe. Aua lava ne’i faitio i aoga. Ia suesue lelei, ma ia e aoga e le aunoa. …
“E mafai ona e aoao e uiga i le faiga o mea ma le valiina o mea e oo foi i le suiina o mea ma soo se mea e aoga. O mea na e aoga ona fai. Afai e leai se aoga faapitoa ia te oe, o le a fesoasoani ia te oe a o e tautuaina isi tagata” (“Fautuaga i Alii Talavou,” Ensign po o le Liahona, Me 2009, 51).