Lesona mo Suesuega i le Fale

O Faalapotopotoga ma Polokalama a le Ekalesia, Folafolaga Aloaia 2, Faanatinatiina o le Galuega o le Faaolataga, o le Folafolaga i le Aiga, ma le Perofeta Soifua (Iunite 32)

Sauniuniga o Anomea mo le Faiaoga o Suesuega e Fai i le Fale

Aotelega o Lesona o Suesuega e Fai i le Fale i Aso Taitasi

O le aotelega lenei o aoaoga faavae ma mataupu faavae na aoaoina e tagata aoga a’o latou suesueina le iunite 32. E le o faamoemoe e aoao atu lenei aotelega o se vaega o lau lesona. O le lesona e te aoaoina atu mo le iunite 32, e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoga.

Aso 1 (O Faalapotopotoga ma Polokalama a le Ekalesia)

I lenei lesona, sa aoaoina ai e tagata aoga, O Le Ekalesia a Iesu Keriso o le Au Paia o Aso e Gata Ai e fesoasoani i le Tama Faalelagi i le aumaia o le ola e faavavau o Lana fanau. Na latou aoaoina foi o faalapotopotoga ma polokalama uma a le Ekalesia e faagaoioia i lalo o le taitaiga a taitai perisitua, o e o loo umia ki e pulefaamalumalu ai. Na iloa ai e tagata aoga a o tatou auai i faalapotopotoga ma polokalama a le Ekalesia, tatou te maua faamanuiaga o loo avanoa e ala mai i [faalapotopotoga ma polokalama a le Ekalesia]. Ona latou faatutuina lea o ni sini e faaleleia atili ai lo latou auai i ausilali ma polokalama a le Ekalesia.

Aso 2 (Folafolaga Aloaia 2)

A o aoao tagata aoga e uiga i le faaaliga i le 1978, lea na faasafua atu ai le perisitua ma faamanuiaga o le malumalu i tagata agavaa uma o le Ekalesia, na latou aoaoina ai, e saili e perofeta le taitaiga a le Alii i le taitaia o le Ekalesia, ma e taitai e le Alii Lana Ekalesia e ala i faaaliga i Ana perofeta i Lana lava taimi e tatau ai.

Aso 3 (Faanatinatiina o le Galuega o le Faaolataga)

Mai lenei lesona, sa aoaoina ai e tagata aoga ua faanatinatiina e le Alii ia Lana galuega o le faaolataga. Na latou aoaoina foi e mafai ona latou auai i le faanatinatiina o le galuega a le Alii e ala i le faasoaina atu o le talalelei, suesueina o tusitusiga paia, ma le faia o galuega faalemalumalu ma talafaasolopito o aiga.

Aso 4 (O Le Aiga: O Se Folafolaga i le Lalolagi)

I lenei lesona, sa faailoa mai ai e tagata aoga ia aoaoga ma mataupu faavae e faatatau i le aiga e pei o nei: o le faaipoipoga i le va o se alii ma se tamaitai ua faauuina e le Atua; o le foafoaga o le olaga faaletino o se vaega paia ma le taua o le fuafuaga a le Tama Faalelagi; ma o tama ma tina e tatau ona fesoasoani le tasi i le isi o se paaga tutusa i o latou tiutetauave faaleaiga. Na aoaoina foi e tagata aoga o le a faamasino i tatou e le Alii pe afai tatou te le faia o tatou tiutetauave i o tatou aiga.

Folasaga

O lenei lesona e mafai ona fesoasoani i tagata aoga ia malamalama i le faamanuiaga o le taitaia e se perofeta soifua, tagatavaai, ma talifaaaliga. O le a suesue e tagata aoga ia fautuaga lata mai nei mai le Peresitene o le Ekalesia, o le perofeta filifilia a le Alii.

Fautuaga mo le Aoaoina Atu

O faaaliga faifai pea e ala i se perofeta soifua

Tusi le fesili lenei i luga o le laupapa: O ai le perofeta e sili ona taua mo oe?

Valaaulia le vasega e mafaufau loloto i lenei fesili ma faalogologo mo le tali a o e faitauina atu le saunoaga lenei mai ia Peresitene Ezra Taft Benson:

“O le perofeta e sili ona taua, e tusa ai ma lo tatou manatu, o le o loo soifua i o tatou aso ma vaitaimi” (“Jesus Christ—Gifts and Expectations,” New Era, Me 1975, 17).

• Aisea e te manatu ai o le perofeta soifua o le perofeta sili lea ona taua mo i tatou?

A uma ona tali mai tagata aoga, toe faaauau le faitauga o le saunoaga a Peresitene Benson:

“O le perofeta lenei o loo i ai faatonuga o aso nei mai le Atua ia i tatou. … E manaomia e augatupulaga uma ia tusitusiga paia anamua, faapea ma tusitusiga paia o loo i ai nei mai le perofeta soifua. O le mea lea, o faitauga ma mafaufauga loloto e aupito sili ona taua e tatau ona e faia, o afioga musuia aupito lata mai ia mai le fofoga taumomoli o le Alii. O le pogai lena e taua ai lou maua o, ma faitau ma le totoa ana afioga i lomiga a le Ekalesia” (“Jesus Christ—Gifts and Expectations,” 17).

Faamatala atu, tatou te lagolagoina uso uma o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga. Ae peitai, o le Peresitene o le Ekalesia e na o le pau lea o le tagata ua faatagaina e faaaogaina ki uma o le perisitua i luga o le lalolagi, ma e na o le tagata foi lea ua faatagaina e maua ma folafola atu faaaliga mo le Ekalesia atoa.

• E tusa ai ma mea ua e aoaoina i ni lesona talu ai nei, o anafea na folafola mai ai e le Peresitene o le Ekalesia ni faaaliga mo le Ekalesia aoao pe fofogaina mai ai ni suiga taua i le ala e faagaoioia ai le Ekalesia? (O tali e mafai ona aofia ai le taimi na tuuina mai ai e Peresitene Wilford Woodruff le Manefeso e faatatau i faaipoipoga autaunonofo [tagai Folafolaga Aloaia 1], ina ua folafola mai e Peresitene Iosefa F. Samita ia upumoni sa le’i iloa muamua e uiga i le lalolagi o agaga pe a mavae le olaga nei [tagai MF&F 138], ma le taimi na folafola mai ai e Peresitene Spencer W. Kimball e faapea, o faamanuiaga o le perisitua na tatau ona avanoa mo tagata agavaa uma o le Ekalesia [tagai i le Folafolaga Aloaia 2].)

Valaaulia se tagata aoga e faitau leotele le saunoaga lenei mai ia Peresitene Dieter F. Uchtdorf. Valaaulia le vasega e faalogologo mo se upumoni e uiga i faaaliga i o tatou aso.

“O se tasi o savali mamana o le Toefuataiga o le Ekalesia a Iesu Keriso e faapea, o loo faaauau pea ona fetalai mai le Atua i Lana fanau! E le o natia o Ia i le lagi ae o loo fetalai mai i le asō e pei ona sa Ia faia i aso anamua. …

“O loo maua i le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele ia aoaoga e leai se tau a le Atua i tagata uma. E faaopoopo atu i ai, o loo fetalai mai le Alii ia i tatou e ala mai i Ana auauna, ma o le a Ia toe fetalai mai foi i le konafesi aoao” (“Aisea Tatou te Manaomia ai Perofeta?” Liahona, Mati 2012, 4).

• O le a le aoaoga faavae e faatatau i faaaliga na aoao mai e Peresitene Uchtdorf? (Atonu e faaaoga mai e tagata aoga ni upu eseese, ae e tatau ona latou faailoa mai le aoaoga faavae lenei: O loo faaauau pea ona fetalai mai le Alii ia i tatou i aso nei e ala i Lana perofeta soifua. Atonu e te manao e tusi lenei upumoni i luga o le laupapa.)

• O fea e mafai ona tatou maua ai saunoaga a perofeta soifua? (O tali atonu e aofia ai le konafesi aoao, mekasini a le Ekalesia, LDS.org, ma le mormonchannel.org.)

Ina ia fesoasoani i tagata aoga ia malamalama i le taua o le faaauau pea ona fetalai mai o le Alii e ala i Lana perofeta soifua, valaaulia se tagata aoga e faitau leotele le saunoaga lenei mai ia Peresitene Ioane Teila. Fai atu i le vasega e faalogologo mo mafuaaga e taua ai faaaliga faifai pea e ala mai i perofeta.

“Tatou te manaomia se laau ola—se punavai ola—atamai ola, e amata mai i le perisitua ola i le lagi, e oo mai i le perisitua ola i le lalolagi. Ma mai lava i le taimi na maua muamua ai e Atamu se fesootaiga mai le Atua, … na manaomia ai lava i taimi uma ni faaaliga fou, ua fetuunaiina i tulaga uiga ese ia na tuuina i ai ekalesia po o tagata taitoatasi. O le faaaliga a Atamu sa le’i faatonuina ai Noa e fau lana vaa; pe na ta’u atu foi e le faaaliga a Noa ia Lota e lafoai Sotoma; pe na talanoa foi se tasi o nei faaaliga e uiga i le o ese mai o le fanauga a Isaraelu mai Aikupito” (i le The Gospel Kingdom, sel. G. Homer Durham [1987], 34; tagai foi i le MF&F 1:30).

• E tusa ai ma le saunoaga a Peresitene Teila, aisea tatou te manaomia ai se perofeta soifua? (E ala mai i le perofeta soifua, e tuu mai ai e le Atua le taitaiga e fitoitonu i manaoga ma tulaga o le taimi.)

• E mafai faapefea e le malamalama i le manaomia o faaaliga faifaipea ona aafia ai le ala e te faalogo atu ai, pe faitau ai i saunoaga a perofeta soifua?

O le mulimuli i fautuaga a le perofeta soifua

Ina ia fesoasoani i tagata aoga i le talanoaina o le fautuaga a le perofeta soifua, filifili se lauga se tasi pe sili atu o le konafesi aoao na tuuina mai e le Peresitene o le Ekalesia i le tausaga ua mavae. Tuuina atu se kopi o se lauga mo tagata aoga taitasi o le vasega. Tuu atu i tagata aoga se taimi e vaavaai ai mo aoaoga ma mataupu faavae o loo aoao mai i le taimi nei e le perofeta soifua.

Ina ua lava se taimi mo tagata aoga e faitau ai, fai atu ia i latou e lisi ia aoaoga ma mataupu faavae o loo aoao mai e le Peresitene o le Ekalesia. Mafaufau e valaaulia se tagata aoga e tusi a latou tali i luga o le laupapa.

Ina ia fesoasoani i tagata aoga ia malamalama ma lagona le taua o aoaoga faavae ma mataupu faavae ua latou faailoaina mai, fai atu nisi o, po o fesili uma nei:

• O le fea o nei mataupu faavae po o aoaoga faavae e te manatu e faapitoa le talafeagai ia te oe? Aisea?

• O a ni auala o loo outou taumafai ai ma lou aiga e mulimuli i le fautuaga a le perofeta?

• Aisea e te manatu e taua ai lo tatou suesue ma faaaoga mea o loo aoao mai e le Peresitene o le Ekalesia o loo i ai nei?

Tusi fesili nei i luga o le laupapa, ma valaaulia tagata aoga e tali i ai i totonu o a latou api o le vasega, po o api talaaga mo le suesueina o tusitusiga paia:

Mai saunoaga a le perofeta soifua ia na faatoa uma atu ona e suesueina, o a ni savali e te manatu o loo finagalo le Alii e te mauaina?

O le a se mea o le a e faia ona o le fautuaga lata mai nei a le perofeta?

Valaaulia tagata aoga e faatino ia mea ua latou tusiaina. Molimau atu a o latou faia ia mea, e mafai ona latou maua le talitonuga o le a faamanuia i latou e le Tama Faalelagi. Uunaia tagata aoga ia suesue ma faaaoga pea lava pea ia aoaoga a perofeta soifua.

Valaaulia tagata aoga e faasoa mai a latou molimau e uiga i perofeta soifua.

O se faaiuga i lenei tausaga o le seminare, uunaia tagata aoga ia faaauau pea ona suesue i tusitusiga paia i aso uma. Afai o le a latou auai i le kosi o le seminare o le a sosoo ai, atonu e te fautua atu ina ia amata ona latou suesue i le Feagaiga Tuai. Atonu e te manao e valaaulia se tagata aoga e molimau atu e uiga i faamanuiaga ua ia mauaina e ala i le faaauau pea ona faitau i tusitusiga paia i aso taitasi, e tusa lava pe sa le’i faia le seminare.