Tuua o Navu

Folasaga

Ina ua mavae le maliu faamaturo o le Perofeta o Iosefa Samita, sa taitai ai e le Korama a Aposetolo e Toasefululua, i lalo o le taitaiga a Polika Iaga, o le Peresitene o le Korama a le Toasefululua, le Ekalesia ma faaauau pea le galuega a le Alii. Sa latou uunaia le Au Paia e faauma le Malumalu o Navu. Ona o sauaga faifai pea, sa latou fautuaina foi le Au Paia e sauni e siitia atu i sisifo.

Fautuaga mo le Aoaoina Atu

Sa galulue ma le filiga le Au Paia ina ia maua faamanuiaga o le malumalu

Fai atu i tagata aoga e mafaufau i se taimi sa latou faia ai se mea faigata ona sa latou iloa o le taunuuga o le a aoga ai le taumafaiga. Mafaufau e faasoa atu se aafiaga patino i le vasega. Ona valaaulia lea o ni nai tagata aoga e faasoa mai o latou aafiaga.

Faamalamalama atu faapea, ina ua mavae le maliu o le Perofeta o Iosefa Samita, sa i ai i le Au Paia le galuega faigata o le faamaeaina o le Malumalu o Navu.

Aisea e te manatu ai sa faigata mo le Au Paia ona faataunuu lenei poloaiga na tuuina mai e ala mai ia Iosefa Samita?

Faaali atu se ata o le Malumalu o Navu Ilinoi i aso nei (tagai i le Tusi Ata o le Talalelei [2009], nu. 118; tagai foi i le LDS.org). Faamalamalama atu sa manaomia ai se osigataulaga tele a le Au Paia e fausia ai le Malumalu o Navu. Valaaulia se tagata aoga e faitau leotele le palakalafa lenei. Fai atu i le vasega e faalogologo mo osigataulaga na faia e le Au Paia e fausia ai le uluai malumalu i Navu.

I le konafesi aoao ia Oketopa 1844, na talosaga atu ai Peresitene Polika Iaga i le Au Paia e tuuina atu a latou sefuluai ma taulaga e fausia ai le malumalu. I le tali atu, na foai atu e uso taitoatasi o le Aualofa se pene i le vaiaso mo sapalai o mea faufale. E toatele alii sa faasefulua’iina o latou taimi e ala i le galulue i le malumalu i se aso e tasi mai aso uma e sefulu. O isi na tuuina atu le silia ma le tasi-vaesefulu o mea na latou maua. Sa tuuina atu e Toronto Joseph ia Polika Iaga le $2,500 i auro ma fai atu, na manao e tuuina atu mea uma sa ia te ia e fausia ai le malo o le Atua. (Tagai i le Church History in the Fulness of Times Student Manual, 2nd ed. [Church Educational System manual, 2003], 302; Our Heritage [1996], 59–60.)

Aisea e te manatu na naunau ai le Au Paia e ositaulaga le tele o mea e fausia ai le malumalu?

A uma ona talanoaina e tagata aoga lenei fesili, faamalamalama atu, o sauaga na faigata ai ona faamaeaina le Malumalu o Navu. Sa manatu le toatele o fili o le Ekalesia o le taimi lava na fasiotia ai le Perofeta o Iosefa Samita, o le a solofa ai foi ma le Ekalesia. Ae ui i lea, ina ua faaauau pea le tuputupu a’e ma le faatoateleina o le Ekalesia, sa faapea ona faateteleina e fili o le Ekalesia a latou taumafaiga e tutuli ese le Au Paia mai Ilinoi.

Valaaulia se tagata aoga e faitau leotele le palakalafa lenei. Fai atu i le vasega e faalogologo mo mea na faia e fili o le Ekalesia e taumafai ai e faaumatia le Ekalesia.

Ia Setema 1844, sa faatulaga ai e Colonel Levi Williams, o le na tuuaia mulimuli ane mo le tagatavaleina o Iosefa ma Ailama Samita, se faatosinaga tele faamiliteli e tutuliese faamalosi ai le Au Paia o Aso e Gata Ai mai Ilinoi. Sa faasalalauina o le “suega o se luko tele i le Itumalo o Hancock” (David E. Miller and Della S. Miller, Nauvoo: The City of Joseph [1974], 186). Ina ua faalogo i lenei mea, sa auina atu e Kovana Thomas Ford o Ilinoi ia General John Hardin o le militeli o le setete i le itumalo e tausi le filemu. O le tausaga mulimuli ane, ia Setema 1845, na taitai atu ai e Colonel Williams se vaega e 300 o alii faatupu faalavelave ma osofaia nuu o le Au Paia o Aso e Gata Ai i eria taulalata ane, na susunu le tele o fale sa le’i i ai se puipuiga, fale i faatoaga, fale vili falaoamata, ma faaputuga saito. I le ogatotonu o Setema, na talosagaina ai e Peresitene Polika Iaga ni volenitia e o e laveai na tagata o le Au Paia. Sa saunia e le Au Paia i Navu ni taavaletoso se 134 e aumai ai ma le saogalemu aiga mai nuu taulalata ane agai i Navu. (Tagai i le History of the Church, 7:45–46; Church History in the Fulness of Times Student Manual, 301; David E. Miller and Della S. Miller, Nauvoo: The City of Joseph, 185–86.)

E faapefea ona faafaigata e nei osofaiga le faaauauina o le galuega o le malumalu?

Faamalamalama atu, o le toatele o tagata na nonofo i Ilinoi, sa popole i le i ai o le Au Paia o Aso e Gata Ai ne’i avea ma mea e ono taitai atu ai i se taua faalemalo. Sa latou fai atu i le Au Paia e o ese ma le setete. I le aso 24 o Setema, 1845, na lomia ai e le Korama a Aposetolo e Toasefululua se tusi na folafola atu ai o le a o ese le Ekalesia i le tautotogo na sosoo ai.

Aisea atonu na faigata ai ona faia le faaiuga e o ese ma Ilinoi.
O a ni auala e te manatu o le faaiuga e tuua Navu, atonu na aafia ai taumafaiga a le Au Paia e faamaea le malumalu?

A uma ona talanoaina e tagata aoga lenei fesili, faamalamalama atu faapea, e ui lava ina sa iloa e le Au Paia e tatau ona latou tuua Ilinoi, ae sa faaauau pea ona galulue i le malumalu.

Aisea e te manatu ai sa faaauau pea ona galulue le Au Paia i le malumalu, e ui lava ina sa latou iloa o le a latou o ese?

Faamanatu atu i tagata aoga e faapea, i le taimi lena sa le’i maua e tagata lautele o le Ekalesia ia sauniga o le malumalu na tatau mo le faaeaga. I se faaaliga i le 1841, na folafola mai ai e le Alii i le Au Paia, afai latou te fausia le Malumalu o Navu, o le a mafai ona latou maua na sauniga (tagai i le MF&F 124:27–44).

O a ni mea e mafai ona aoao mai e tala e uiga i osigataulaga ma faigata a le Au Paia i le fausiaina o se malumalu ia i tatou? (E mafai ona faailoa mai e tagata o le vasega ni matapu faavae eseese, e pei o nei: O le mauaina o sauniga o le malumalu e matuai aoga ai uma a tatou taumafaiga ma osigataulaga amiotonu. Tusi i luga o le laupapa le mataupu faavae lenei ma isi lava mataupu faavae e faailoa mai e tagata aoga.)

Valaaulia se tagata aoga e faitau leotele le saunoaga lenei a Peresitene Thomas S. Monson. Fai atu i le vasega e faalogologo mo osigataulaga na faia e nisi o le Au Paia i ona po nei ina ia maua ai sauniga o le malumalu.

“I le tele o tausaga ua mavae, sa ou faitau ai e uiga i se vaega e silia ma le toaselau tagata o le ekalesia na tuua Manaus [Pasila,] lea e i le totonugalemu o le vaomatua o Amasone, ae malaga atu i le malumalu e sili ona latalata ane, e tu i Sao Paulo, Pasila—e toeitiiti 2,500 maila (4,000 km) mai Manaus. Na malaga na Au Paia faatuatua i se vaa mo aso e fa i le Vaitafe o le Amasone ma ona magavai. Ina ua mae’a lenei malaga i le vai, sa faaee i pasi mo isi aso e tolu e malaga ai i auala gaoa, ma nai meaai laiti ma sa leai se mea e momoe lelei ai. Ina ua mavae ao e fitu ma po e fitu, sa latou taunuu i le malumalu i Sao Paulo, lea na faatino ai sauniga o le faavavau. O le mea moni, na tutusa lava le faigata o la latou malaga toe foi. Peitai, sa latou mauaina sauniga ma faamanuiaga o le malumalu, ma e ui lava ina sa leai ni a latou tupe na totoe, ae sa faatumulia i latou lava i le agaga o le malumalu ma le loto faafetai mo faamanuiaga sa latou mauaina” (“O Le Malumalu Paia—O Se Sulu Ta’iala i le Lalolagi,” Ensign po o le Liahona, Me 2011, 91).

O a ni osigataulaga na faia e le Au Paia mai Manaus mo le mauaina o sauniga o le malumalu?

Valaaulia ni tagata aoga se toatolu e o mai i le pito i luma o le vasega e faitau leotele ia tala nei. Fai atu i le vasega e faalogologo mo taumafaiga amiotonu a le Au Paia i Navu ina ia maua sauniga o le malumalu.

Sa faapaia e taitai o le Ekalesia potu o le Malumalu o Navu ina ua maea fausia na potu, ina ia mafai ona amata ai sauniga i se vave e mafai ai. Na faapaiaina le potu e i le taualuga o le malumalu mo sauniga i le aso 30 o Novema, 1845. Na amata ona maua e le Au Paia o latou faaeega paia i le afiafi o le aso 10 o Tesema, ma o sauniga o le faaeega paia sa faaauau lava seia oo i le 3:00 i le vaveao o le aso 11 o Tesema. (Tagai i le Church History in the Fulness of Times Student Manual, 303.)
E oo ane i le faaiuga o le 1845, e silia ma le 1,000 tagata o le ekalesia na maua sauniga o le malumalu. Ia Ianuari 1846, sa faamaumauina ai e Peresitene Polika Iaga e faapea, “O lena le naunautaiga e pei ona molimauina e le Au Paia ina ia maua sauniga [o le Malumalu], ma o lo matou naunautaiga foi lena ia i matou ina ia faataunuuina ia sauniga mo i latou, o lea sa ou tuuina atu ai au atoa i le galuega a le Alii i le Malumalu i le po ma le ao, e le sili atu i le fa itula e moe ai i lona averesi, i le aso, ma alu i le fale taitasi i le vaiaso” (i le History of the Church, 7:567). O le toatele o alii ma tamaitai sa saofaga e ala i le tataina o lavalava o le malumalu i po taitasi, ina ia mafai ona faaauau le galuega i le taeao e sosoo ai e aunoa ma le faatuai. (Tagai i le Church History in the Fulness of Times Student Manual, 303.)
I le aso 3 o Fepuari, 1846, na tuua ai e Peresitene Iaga le malumalu ina ia faia sauniuniga faaiu e tuua Navu i le aso e sosoo ai. Ae peitai, a’o savali atu o ia i fafo, sa ia vaaia se faapotopotoga toatele o tagata o e sa faatalitali pea ina ia maua o latou faaeega paia. O le lagonaina o le agaalofa mo ona uso a Au Paia, sa toe foi atu ai o ia i le malumalu e auauna atu ia i latou. Sa le’i mafai ona ia tuua Navu seia oo i le lua vaiaso mulimuli ane. Ua faaalia i faamaumauga o le malumalu e 5,615 le Au Paia na maua faaeega paia a o lei o atu i sisifo. (Tagai i le Church History in the Fulness of Times Student Manual, 303–4.)

O le a se vaega ua faagaeetia ai oe e uiga i taumafaiga a le Au Paia ina ia maua sauniga o le malumalu?

Ina ia fesoasoani i tagata aoga ia lagonaina le moni ma le taua o mataupu faavae ua e tusia i luga o le laupapa, ma fesoasoani ia i latou e faaaoga nei mataupu faavae i o latou olaga, valaaulia i latou e tali i fesili nei i a latou api o le vasega po o api talaaga mo le suesueina o tusitusiga paia. (Tusi fesili i luga o le laupapa.)

O a ni taumafaiga ma ni osigataulaga e tatau ona tatou faia ina ia maua ai sauniga o le malumalu?

Aisea e te manatu ai o le mauaina o sauniga o le malumalu e matuai aoga ai le galue malosi ma le faia o osigataulaga?

O a ni mea e tatau ona e faia ina ia mafai ona outou maua ai sauniga o le malumalu? (O a ni mea e tatau ona e tuua pe amata ona fai?)

A ua lava loa le taimi, fai atu i ni volenitia e faasoa mai a latou tali i le fesili lona lua.

Ua tuua e le Au Paia ia Navu

Faamalamalama atu, ina ua uma ona maua sauniga o le malumalu, na amata loa ona tuua e le Au Paia ia Navu ia Fepuari 1846. I nai masina na sosoo ai, sa faaauau pea ona latou tuua Navu, ma sa faamautu vaega eseese mo se taimi le tumau i le setete o Aioua. E oo ane i le faaiuga o Aperila, o le toatele lava o le Au Paia ua o ese ma Navu. Ae peitai, sa le o tagata uma o le Ekalesia na mafai ona o ese. Sa i ai se vaega toaitiiti sa nonofo pea i Navu i le taimi o le taumafanafana o le 1846, ona sa mama’i tele, matitiva tele, po o le vaivai tele foi e malaga. Sa filifili lava nisi e toalaiti e nonofo.

Valaaulia se tagata aoga e faitau leotele le palakalafa lenei, e toe faamatalaina ai le mea na tupu i le toatele o i latou o e na nonofo.

Ia Setema 1846, e tusa ma le 800 tagata, na faaauupegaina i ni fana tetele se ono, na sauni e osofai Navu. Sa sauniuni le Au Paia na totoe ma nisi o tagata fou o le nuu lea sa pe a na o le 150 o alii e mafai ona tau, e puipui le aai. Ina ua mavae ni nai aso o tau, sa faamalosia le Au Paia e siilima ma sa faatonuina i latou e o ese vave mai le aai. Ona ulu atu lea o le au faatupu vevesi i le aai, gaoi fale, ma faaleaga le malumalu. O nisi o le Au Paia o e sa le mafai ona sosola ese vave, sa sasaina pe tauai i totonu o le Vaitafe o Misisipi. Ina ua mavae ona tutuliese faamalosi nei tagata o le Au Paia na totoe mai Navu, sa latou faatulaga ni tolauapiga sulufai i le itu o Aioua o le vaitafe. Sa le’i lava ni a latou meaai, sapalai, po o le malosi faaletino e tausia ai i latou. (Tagai i le Church History in the Fulness of Times Student Manual, 318.)

Faamalamalama atu, sa auina mai e taitai o le Ekalesia ni au laveai e toe foi mai i Aioua e fesoasoani i le Au Paia mafatia.

O le a sou manatu, o a ni ou lagona e i ai pe ana faapea e toe valaauina oe e toe foi atu i Navu?

Valaaulia se tagata aoga e faitau leotele le savali na auina atu e Polika Iaga i alii o e na tofia e saili mai tagata o le au laveai:

“Ia tuu atu i le afi o le feagaiga lea sa outou osia i le Maota o le Alii, e mumu i o outou loto, e pei o le afi lē matineia, seia outou … saili atu i tagata uma … o e [e mafai ona o], ma tuu atu le afi i lona agaga, seia oo ina tulai o ia … ma alu atu loa, ma aumai se uta o tagata matitiva mai Navu. …

“… O le aso lenei o le faatinoga” (Journal History of The Church of Jesus Christ of Latter-day Saints, Sept. 28, 1846, 5–6, Church History Library, Salt Lake City).

O le a le mea ua aoao mai e le saunoaga a Polika Iaga ia i tatou e uiga i feagaiga tatou te faia? (Ia mautinoa ua malamalama tagata aoga, e le lava le na o le osia o feagaiga—e tatau ona tatou tausia. Tusi le upumoni lenei i luga o le laupapa: E finagalo le Alii ina ia tatou ola i feagaiga tatou te osia.)

Tusi fesili nei i luga o le laupapa:

O a ni osigataulaga ua e faia e tausia ai feagaiga?

O a ni faamanuiaga ua e mauaina ona ua e ola e tusa ai ma feagaiga ua e osia?

Vaevae tagata aoga i ni paga, ma valaaulia i latou e filifili se tasi o fesili ma talanoaina a latou tali ma a latou paga. Atonu foi e te manao e valaaulia ni nai tagata aoga e faasoa mai a latou tali i le vasega.

Faaiu i le fai atu i tagata aoga e mafaufau i mea e tatau ona latou faia e ola ai i feagaiga na latou faia. Molimau atu i faamanuiaga o le tausia o a tatou feagaiga.