Lesona 13
Mataupu Faavae ma Feagaiga 4
Folasaga
O lenei faaaliga, na tuuina mai ia Fepuari 1829 ia Iosefa Samita le Matua, o le tama o le Perofeta, o le faaaliga muamua o ni nai uluai faaaliga na tuuina mai i tagata taitoatasi o e sa mananao e fesoasoani i le Alii i Lana galuega (tagai foi i le MF&F 11–12; 14–16; 25). I lea faaaliga, sa valaauina ai Iosefa Samita le Matua, e galue i le galuega a le Atua. E le gata i lea, na faataoto mai e le Alii agavaa ma uiga faaalia autu mo i latou o e auauna ia te Ia.
Fautuaga mo le Aoaoina Atu
Mataupu Faavae ma Feagaiga 4:1–3
Ua valaauina Iosefa Samita le Matua e galue i le galuega a le Atua
Amata i le fai atu i tagata o le vasega e mafaufau loloto i le fesili lenei:
-
Pe sa i ai se taimi na e lagonaina ai le manao e auauna atu i le Alii ma fia iloa Lona finagalo e uiga i le auala e sili ona lelei e te fesoasoani atu ai i le faiga o Lana galuega?
Faamatala atu sa lagona e le tama o Iosefa Samita se manao faapena, ae sa ia le iloa le mea na finagalo le Alii na te faia. Ia Fepuari 1829, na asiasi atu ai Iosefa Samita le Matua ma lona faletua o Lusi, i lo la atalii o Iosefa Samita le Itiiti i Haramoni, Penisilevania. I le taimi o lena asiasiga, na maua ai e Iosefa Samita le Itiiti se faaaliga o le tali i le fesili a lona tama…O le Mataupu Faavae ma Feagaiga 4 o le tali lea a le Alii, lea na Ia faataoto mai ai uiga ua Ia faamoemoeina mai ia i latou o e e fesoasoani i Lana galuega.
Faamanatu atu i tagata o le vasega, i le taimi o lenei faaaliga, o le taimi lea sa le’i faatulagaina ai le Ekalesia ma sa le’i toefuataiina mai le perisitua. Valaaulia tagata o le vasega e faitau filemu le Mataupu Faavae ma Feagaiga 4:1 , ma vaavaai mo le ala na faamatalaina ai e le Alii le Toefuataiga lea faatoa tau amata ona faaali mai.
-
O a upu na faaaoga e le Alii e faamatala ai le Toefuataiga o le talalelei i aso e gata ai?
-
O a ni auala e “ofoofogia” ai le Toefuataiga o le talalelei?
Valaaulia se tagata o le vasega e faitau leotele le Mataupu Faavae ma Feagaiga 4:2 . Fai atu i le vasega e mulimuli i le faitauga, ma vaavaai mo mea ua talosagaina e le Alii mai ia i latou o e o atu i Lana galuega. (Atonu e te manao e faamalamalama atu o le upu o atu o lona uiga o le amata.)
-
I le fuaiupu lenei, o le a le mea o loo faamoemoe mai e le Alii ia i latou o e auauna atu ia te Ia?
-
O le a le uiga o le faia o se mea “ma lou loto atoa, mafaufau atoa, manatu atoa, ma le malosi atoa”?
Ina ia fesoasoani i tagata o le vasega ia malamalama lelei i lenei fuaitau, fai atu ia te i latou e faamatala mai amioga ma uiga latou te ono faamoemoe e vaaia i se tagata o loo taumafai e auauna i le Atua ma lona loto atoa, mafaufau atoa, manatu atoa, ma le malosi atoa. Atonu foi e te manao e valaaulia i latou e tuuina mai ni faataitaiga o tagata latou te iloa o loo auauna atu i le Alii i le auala lenei.
Tusi le faamatalaga le uma lenei i luga o le laupapa: Afai tatou te auauna atu i le Atua ma o tatou loto atoa, mafaufau atoa, manatu, ma le malosi atoa, .
Ina ia fesoasoani i tagata o le vasega ia iloa se mataupu faavae na aoao mai i le Mataupu Faavae ma Feagaiga 4:2, fai atu fesili nei:
-
I le Mataupu Faavae ma Feagaiga 4:2, o a faamanuiaga e oo mai i le auauna atu i le Atua “ma o [tatou] loto atoa, mafaufau atoa, manatu atoa, ma le malosi atoa”? (A o tali mai tagata o le vasega, fai atu i se tasi o i latou e faauma le faamatalaga o loo i luga o le laupapa. E tatau ona faitauina i se mea e tutusa ma lenei: Afai tatou te auauna atu i le Atua ma o tatou loto atoa, mafaufau atoa, manatu atoa, ma le malosi atoa, e mafai ona tatou tutu ma le le pona i Ona luma i le aso gataaga. (Atonu e te manao e fautua atu i tagata o le vasega e faailoga lenei fuaitau i a latou tusitusiga paia.)
-
Aisea e te manatu ai, o le auauna atu i le Alii ma o tatou loto atoa, mafaufau atoa, manatu atoa, ma le malosi atoa, o le a mafai ai ona tatou tutu ma le le pona i luma o le Atua?
Uunai tagata o le vasega e mafaufau loloto po o le a se lagona o le a i ai i le tu i le afioaga o le Atua ma le “le pona.” Atonu e te manao e valaaulia ni tagata o le vasega se toatasi pe toalua e faasoa mai o laua manatu.
Valaaulia se tagata o le vasega e faitau leotele le Mataupu Faavae ma Feagaiga 4:3. Fai atu i tagata o le vasega e mulimuli i le faitauga, ma vaavaai mo se uiga e tatau ona i ai i tagata ina ia mafai ona fesoasoani ai i le Alii i Lana galuega.
-
O a uiga e tatau ona i ai i se tagata ina ia mafai ona fesoasoani ai i le Alii i Lana galuega? (O se manao e auauna atu i le Atua.)
Atonu e te manao e faamalamalama atu, ua manatu nisi o le Mataupu Faavae ma Feagaiga 4 lava ia o se valaau i le galuega faifeautalai faamisiona. Ae ui i lea, o le tama o Iosefa Samita, o le sa tuuina mai i ai lenei faaaliga, sa le’i valaauina e avea o se faifeautalai faamisiona. Ae peitai, sa mulimuli o ia i le fautuaga i le Mataupu Faavae ma Feagaiga 4:2-3 i le taimi atoa na totoe o lona soifuaga, na auauna atu ma le tuuto i le po o fea lava ma po o le a foi le mea na valaauina i ai o ia. Sa avea o ia ma se tasi o Molimau e Toavalu o le Tusi a Mamona ma se tasi o tagata muamua na papatisoina ina ua faavaeina aloaia le Ekalesia i le aso 6 o Aperila, 1830. Sa auauna foi o ia o se uluai Peteriaka o le Ekalesia ma o se Fesoasoani Lagolago i le Au Peresitene Sili.
O le fautuaga ua tuuina mai i le vaega lenei, e mafai ona faatatau ia i latou uma o e mananao e auauna atu i le Alii ma, i le tele o auala e mafai ai ona tatou fausia le malo o le Atua.
-
E faaopoopo atu i le galuega faifeautalai faamisiona, o a nisi o auala e mafai ai ona tatou fesoasoani i le Alii i Lana galuega?
Tuu atu i tagata o le vasega ni manatu o ni auala e mafai ona latou faatinoina ai o latou manao e fesoasoani i le galuega a le Alii i le taimi nei, fai atu i se tagata o le vasega e faitau leotele le faamatalaga lenei mai le Mo le Malosi o le Autalavou:
“O nisi auaunaga sili ona taua e mafai ona e tuuina atu, o totonu lea o lou lava aiga. E mafai foi ona e auauna atu i ou tofiga faale-Ekalesia, aoga, ma le nuu. E mafai ona e auauna atu i le faia o galuega o le malumalu ma talafaasolopito o aiga. E mafai ona e auauna atu i le taimi nei e ala i le faasoa atu o le talalelei i isi ma pe a avea ma se faifeautalai faamisiona i le lumanai. E masani lava o auaunaga anoa e faaalia i galuega agalelei faigofie o aso uma. Saili atu i aso taitasi mo le taitaiga a le Agaga Paia ia iloa ai po o ai e auauna atu i ai ma pe faapefea foi ona faafetaiaia o latou manaoga. Mulimuli i faataitaiga a le Faaola a o e auauna atu i isi” (Mo le Malosi o le Autalavou [tamaitusi, 2001], 32).
Valaaulia tagata o le vasega e tusi i a latou api o le vasega po o api talaaga mo le suesueina o tusitusiga paia, se auala patino latou te mananao e fesoasoani ai i le Alii i Lana galuega i le taimi lenei o o latou olaga.
Mataupu Faavae ma Feagaiga 4:4
Ua saunia le faatoaga mo le seleselega
Afai e mafai, aumai sina faataitaiga laitiiti o se fatu sana i le vasega. Afai e leai se mea e maua, faaali atu i tagata o le vasega se ata o se faatoaga saga, pe tusi se ata faigofie o se ʼtagutugutu saito i luga o le laupapa. Faamalamalama atu o fatu ninii e pei o le saito po o le karite e sui o latou lanu a’o tutupu a’e. A o laitiiti le saito e lanu meamata, ae a faasolo ina matua e lanu sesega. Pe a e saunia le saito mo le seleselega, e masani ona faamatalaina ua “papae.”
Tusi upu nei i luga o le laupapa: faatoaga, selesele, selesaito. Valaaulia se tagata o le vasega e faitau leotele le Mataupu Faavae ma Feagaiga 4:4. A o lei ona faitauina, faamatala atu o le fuaiupu lenei o loo faatusaina ai e le Alii ia tagata o le lalolagi i se faatoaga saito. Fai atu i le vasega e mulimuli i le faitauga, ma vaavaai mo auala o loo faamatala ai e le Alii le faatoaga (po o tagata o le lalolagi).
-
O le a le fetalaiga a le Alii e uiga i Lana faatoaga (po o tagata o le lalolagi)?
-
O le a lou manatu o le uiga o le fuaitau “ua sinasina le fanua ua saunia e selesele”? (Ua saunia tagata o le lalolagi, ina ia faapotopoto mai i le Alii ma Lana Ekalesia.)
Fesili atu pe mafai e se tasi ona faamatala mai le mea e ta’u o le selesaito ae o le a foi le mea e faaaoga i ai. (O se selesaito o se naifi pi’o lea e faaaoga mo le seleseleina o le saito. Atonu e te manao e tusi se ata faigofie o se selesaito i luga o le laupapa.)
-
O le a sou manatu i le uiga o le e sasau atu lau selesaito ma lou malosi atoa? (O le galue ma le filiga e aumai isi ia Iesu Keriso.)
-
E tusa ai ma le Mataupu Faavae ma Feagaiga 4:4, o a faamanuiaga e oo mai ia i latou o e e galulue ma le filiga e aumai isi ia Iesu Keriso? (Atonu e faaaoga e tagata o le vasega ni upu eseese, ae ia mautinoa ua latou faailoa mai le upumoni lenei: A o tatou galulue ma le filiga e aumai isi ia Iesu Keriso, e mafai foi ona tatou maua le faaolataga mo i tatou lava. (Atonu e te manao e tusi lenei mataupu faavae i luga o le laupapa.)
-
E faapefea e le fesoasoani atu i isi ia o mai ia Iesu Keriso ona fesoasoani ia i tatou foi e o mai ia te Ia?
Ina ia fesoasoani i tagata o le vasega e faamalosia a latou molimau e uiga i lenei mataupu faavae, valaaulia nisi o i latou e tuuina mai ni faataitaiga o auala na latou lagona ai le latalata atili atu i le Tama Faalelagi ma Iesu Keriso a o latou fesoasoani i isi e o mai ia i Laua. Atonu foi e te manao e faasoa atu ou lava aafiaga po o se molimau e uiga i lenei mataupu faavae.
Mataupu Faavae ma Feagaiga 4:5-7
Ua faataoto mai e le Alii ia agavaa ma uiga faaalia autu mo le auauna atu ia te Ia
Fai atu i tagata o le vasega e faalau atu ni nai galuega. Filifili se galuega se tasi pe lua o galuega ua latou ta‘ua, ma fai atu ia te i latou e faailoa mai tulaga e agavaa ai ma uiga o le a manaomia e se tagata ina ia mafai ona faamanuiaina i lena galuega. Valaaulia tagata o le vasega e faitau lemu le Mataupu Faavae ma Feagaiga 4:5, ma vaavaai mo uiga e agavaa ai se tagata e fesoasoani i le galuega a le Alii. (Atonu e te manao e valaaulia se tagata o le vasega e lisi nei uiga i luga o le laupapa a o faailoa mai e le vasega. Atonu foi e te manao e fautua atu i tagata o le vasega e faailoga ia mea i a latou tusitusiga paia.)
Valaaulia se tagata o le vasega e faitau leotele le Mataupu Faavae ma Feagaiga 4:6. Fai atu i le vasega e mulimuli i le faitauga, ma matau le uiga faaopoopo ua fautuaina e le Alii ia Ana auauna e “manatua.” (Atonu e te manao e fai atu i se tagata o le vasega e tusi nei uiga i luga o le laupapa i autafa o uiga mai le fuaiupu e 5.)
Fai atu i tagata o le vasega e faailoa mai se upumoni mai fuaiupu 5–6 e faatatau i mea e mafai ona tatou faia ona o le atinaeina o uiga faaalia paia. E mafai ona faaaoga e tagata o le vasega ia upu eseese, ae e tatau ona latou faailoa mai le upumoni lenei: O a tatou taumafaiga e atinae uiga faaalia paia o le a fesoasoani tatou te agavaa ai e fesoasoani i le galuega a le Alii. Atonu e te manao e tusi lenei mataupu faavae i luga o le laupapa. Atonu foi e te manao e fautuaina tagata o le vasega e tusi ia latou tusitusiga paia i autafa o le Mataupu Faavae ma Feagaiga 4:5-6.)
-
E faapefea e le atinaeina o uiga auaumama taitasi o loo i fuaiupu 5-6 ona fesoasoani ia sili atu ona tatou mataalia i le fesoasoani atu i le galuega a le Alii?
-
O le fea o uiga ua lisiina i nei fuaiupu o le a e manao e atiina ae atili? Aisea?
Fai atu i se tagata o le vasega e faitau leotele le Mataupu Faavae ma Feagaiga 4:7 ao su’e e le vasega pe faapefea ona tatou sailia ma atiina ae nei uiga.
-
O le a le uiga o le “ole atu” ma le “tu‘itu’i atu”?
-
O le a sou manatu, e mafai faapefea e le tatalo ona fesoasoani ina ia tatou atiina ae ni uiga faaleatua?
Ina ia faaiu le lesona, atonu e te manao e valaaulia tagata o le vasega e molimau atu i faamanuiaga ua latou maua a o latou fesoasoani i le galuega a le Alii.
Tala ma Faamatalaga o Talaaga
Mataupu Faavae ma Feagaiga 4. Faatonuga mo i latou o e mananao e auauna atu i le Ekalesia
Na folafola mai e Peresitene Iosefa Filitia Samita o le Au Peresitene Sili e faapea:
“[O leMataupu Faavae ma Feagaiga 4] e matua puupuu lava, e na o le 7 fuaiupu, ae ua lava ma totoe fautuaga ma faatonuga o loo i ai mo se olaga atoa o suesuega. E leai se tasi ua malamalama lelei i ai. Sa lei fuafuaina o se faaaliga patino ia Iosefa Samita, ae o se faamanuiaga ia i latou uma o e ua mananao e o atu i le galuega a le Atua. O se faaaliga i tagata taitoatasi o le Ekalesia, ae maise lava ia i latou uma o e umia le Perisitua. Atonu e leai se isi faaaliga i a tatou tusitusiga paia uma ua i ai faatonuga sili atu e faatatau i ituaiga agavaa o tagata o le Ekalesia mo le galuega a le Atua, ma i se faiga faapuupuuina nai lo lenei faaaliga. E pei lava lona lautele, lona maualuga, ma lona loloto o le faavavau. E leai se toeaina o le Ekalesia ua agavaa e aoao atu i le Ekalesia, pe aveina atu le savali o le Faaolataga i le lalolagi, seiiloga ua ia malamalama atoatoa, ia le itiiti ifo o se vaega, i lenei aoaoga na auina mai le lagi” (Church History and Modern Revelation, 2 vols. [1953], 1:35).