Lesona mo Suesuega i le Fale

Mataupu Faavae ma Feagaiga 29:31–50; 30–35 (Iunite 8)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 29:31–50; 30–35 (iunite 8) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 29:31–50)

Sa aoao tagata aoga e uiga i le ata o le faaolataga i le Mataupu Faavae ma Feagaiga 29, na latou iloa ai, o poloaiga uma a le Atua e faaleagaga ma, ua tuuina mai e le Atua ia i tatou le meaalofa o le faitalia e fai ai filifiliga ma oo ai i taunuuga o na filifiliga. A o mafaufau tagata aoga i le auala na aumaia ai e le Pau o Atamu le oti faaleagaga, na latou aoao ai e faapea, o le Togiola, ua ofo mai ai e Iesu Keriso le faamagaloga ma le ola e faavavau ia i latou uma o e faaali atu le faatuatua ia te Ia ma salamo ia latou agasala.

Aso 2 (Mataupu Faavae ma Feagaiga 30–32)

I le lesona lenei, sa faitau ai tagata aoga i le fautuaga ma folafolaga na tuuina mai e le Alii i ni tamalii se toaono sa Ia valaauina e talai atu le talalelei. Sa faamamafaina i le lesona e tatau ona tatou auauna atu i le Alii ma o tatou loto atoa, ma o le a faatasi o Ia ma i tatou. Na aoaoina foi e tagata aoga e faapea, e mafai ona faamanuiaina tagata o o tatou aiga ia talitonu ma iloa le upumoni e ala i lo tatou faamaoni.

Aso 3 (Mataupu Faavae ma Feagaiga 33-34)

Sa suesueina e tagata aoga fetalaiga a le Alii i faifeautalai e toalua o Ezra Thayre ma Northrop Sweet. Na iloa ai e tagata aoga, afai e tatala o tatou gutu e folafola atu le talalelei, o le a musuia i tatou e le Alii i upu e fai atu. E ala i le afioga a le Alii ia Orson Pratt, na aoao ai e tagata aoga, o i latou o e aoaoina atu ma le tatau ma le filiga le talalelei, o le a faia lea i le mana o le Agaga Paia.

Aso 4 (Mataupu Faavae ma Feagaiga 35)

Sa faitau tagata aoga e uiga i le liua o Sini Rikitone ma suesue i fetalaiga a le Alii ia te ia. Sa latou aoaoina ai, e silafia i tatou e le Alii ma o loo i ai se galuega mo i tatou taitoatasi e fai, ma e valaau le Atua ia i latou o e vaivai e faataunuu ai Lana galuega e ala i le mana o Lona agaga. Na iloa ai foi e tagata aoga, a tatou tausia poloaiga ma faamamalu a tatou feagaiga, o le a fesoasoani mai le Alii ia i tatou e faataunuu Lana galuega.

Folasaga

O lenei lesona e taulai faapitoa atu i le fautuaga a le Alii ia Tavita ma Pita Uitimera ina ua maea se konafesi a le Ekalesia ia Setema 1830. I le taimi o le konafesi sa faailoa mai e le Alii o faaaliga mai ia Ailama Page e sese. I le Mataupu Faavae ma Feagaiga 30, na aoai ai e le Alii ia Tavita Uitimera ona o lona talitonu i le maa, ma valaauina Pita Uitimera e o faatasi ma Oliva Kaotui i lana misiona.

Fautuaga mo le Aoaoina Atu

Mataupu Faavae ma Feagaiga 30:1–4

Ua aoaiina Tavita Uitimera ona o le faalogo i faatauanauga a tagata

Fai atu i tagata aoga e mafaufau filemu i tulaga nei:

1. Na faalogologo se alii talavou i musika e le fetaui ma tulaga faatauaina o loo otootoina mai i le Mo le Malosi o le Autalavou. E ui lava na ia fiafia e faalogologo i lenei musika, ua amata ona ia iloa o ona savali ua mafua ai ona ia le maua le Agaga ma tafea ese mai i lona aiga, ana uo, ma le Ekalesia.

2. Ina ua uma ni tafaoga faamasani ma se tasi o alii talavou, sa amata ona iloa e se tamaitai talavou, e ala i uunaiga a le Agaga Paia, e faapea, sa taumafai malie lava le alii talavou e tauanau o ia e soli le tulafono o le ola mama.

Ona fai atu lea i tagata aoga o le fesili lenei:

• E mafai faapefea ona tatou iloa o loo faaseseina i tatou, e pei o tagata taitasi i nei tulaga?

Faamalamalama atu o le Mataupu Faavae ma Feagaiga 30 o loo i ai upumoni e mafai ona fesoasoani tatou te saunia ai e maua ma mulimuli i lapataiga mai le Agaga, ma fesoasoani ia i tatou e aloese ai mai le faaseseina. Valaaulia tagata aoga e vaavaai mo nei upumoni, a o latou suesue i lenei vaega i le aso.

Ina ia fesoasoani i tagata aoga ia malamalama i le talaaga o le Mataupu Faavae ma Feagaiga 30, fai atu ia te i latou e mafaufau i mea na latou aoaoina e uiga ia Tavita Uitimera e tau mai i le taimi lenei o la latou suesuega o le Mataupu Faavae ma Feagaiga ma le talafaasolopito o le Ekalesia. (Sa avea o ia ma se tasi o Molimau e Toatolu o le Tusi a Mamona, ma na fesoasoani i le tuuina atu o sapalai i le taimi o le faaliliuga o le Tusi a Mamona.)

Tau atu i tagata aoga o Tavita Uitimera o lona uso faaletulafono ia Ailama Page. Atonu e te manao e fesili atu i tagata aoga po o le a se mea latou te manatua e uiga ia Ailama Page mai la latou suesuega o le Mataupu Faavae ma Feagaiga 28. (O ia o se tasi o Molimau e Toavalu o le Tusi a Mamona, ma sa ia mauaina se maa lea sa ia tautino mai e mafai ona ia maua ai faaaliga.) Faamatala atu, ina ua faalauiloa mai e Ailama Page lana maa vaai sese ma faaaliga faafoliga ia na oo mai ai, sa amata ona talitonu ai Oliva Kaotui, o le au Uitimera, ma isi i le eria o Feiete i faamatalaga a Ailama.

• Aisea atonu na faigofie ai ia Tavita Uitimera ona faatosinaina e Ailama Page?

Fai atu i tagata aoga e sailiili i le Mataupu Faavae ma Feagaiga 30:1–2 ma tali i fesili nei:

• O le a le mea na fetalai mai le Alii na fai e Tavita Uitimera lea atonu na lamatia ai o ia i le faaseseina?

• O le a le mea na fetalai mai le Alii sa le’i faia e Tavita?

Valaaulia tagata aoga e fautua mai ni mataupu faavae e mafai ona tatou aoaoina mai i le Mataupu Faavae ma Feagaiga 30:1–2. Atonu latou te fautua mai nisi po o mea uma nei:

Nai lo le fefe i tagata, e tatau ona tatou faalagolago i le Alii mo le malosi.

E tatau ona sili atu ona tuu o tatou mafaufau i mea a le Atua nai lo le mea o le lalolagi.

E tatau ona tatou mulimuli i le Agaga ma le fautuaga a taitai o le Ekalesia, nai lo le faatosinaina e i latou e le’i valaauina e le Alii.

Fai atu fesili nei:

• O le a sou manatu i le uiga o le matele e tuu o o tatou mafaufau i mea o le lalolagi nai lo o mea a le Alii? O a nisi o auala atonu e faaosoosoina ai i tatou e fai lenei mea?

• E mafai faapefea e le taulai tele atu i mea o le lalolagi nai lo o mea a le Alii, ona mafua ai ona tatou atili tosina atu i taufaasese?

Valaaulia se tagata aoga e faitau leotele le saunoaga lenei mai ia Peresitene Iosefa Filitia Samita:

“E fai si ese laitiiti ona e le’i leva ona mavae le faaaliga matagofie lea na maua ma molimauina ai e [Tavita Uitimera] le sasaa mai o le Agaga i isi taimi, ae ua galo ia te ia, peitai o le natura o le tagata e faapena, lea tatou te manaomia uma ai le faamanatu faifai pea o o tatou tiutetauave a le o lena, e masalo o le a tatou oo atu i nisi o mea e leai se taua. O le manaomia o le tatalo e le aunoa ma le taulai atu o o tatou mafaufau i mea o le malo, ma le gauai faamaoni i le tiute, ua manino i le toatele o i tatou, ina ne’i o tatou sasi. Ua faafia ona lapataia e le Alii lona nuu e faasaga i vaivaiga o le tino!” (Church History and Modern Revelation, 2 vols. [1953], 1:146).

• E tusa ai ma le saunoaga a Peresitene Samita, o a mea e tatau ona tatou faia e mautinoa ai ia le galo ia i tatou o tatou tiutetauave faaleagaga e pei ona sa oo ia Tavita Uitimera?

Atonu e te faaaogaina lenei avanoa e toe faamanatu ai i tagata aoga le manaomia o le suesue i a latou tusitusiga paia i aso taitasi—e le na ona ia faatumu ai a latou galuega faatino, ae ia fesoasoani latou te aoao ai i le talalelei, atiina ae se molimau e uiga i le talalelei, ma faalogo i le siufofoga o le Alii. Atonu foi e te manao e fai i tagata aoga e faasoa mai se mea na fesoasoani ia i latou e suesue ai tusitusiga paia i se ala anoa.

Valaaulia se tagata aoga e faitau leotele le Mataupu Faavae ma Feagaiga 30:3–4. Fai atu i le vasega e mulimuli i le faitauga, ma faailoa mai faatonuga a le Alii ia Tavita Uitimera.

• Ina ua uma ona faaseseina e Ailama Page, na faapefea ona fesoasoani lea tulaga ia Tavita Uitimera e mafaufau loloto ai i mea na faaali mai e le Alii ia te ia?

Uunai tagata aoga e mafaufau pe i ai ni tulaga i o latou olaga atonu o loo latou faalagolago ai pe matele ina taulai atu ai i “mea o le lalolagi” nai lo o mea a le Atua, ma pe mafai faapefea e le faia o ia mea ona lamatia ai i latou i taufaasese. Valaaulia i latou e filifili po o le a se mea o le a latou faia e faalagolago atili atu ai i le Alii i na tulaga.

Mataupu Faavae ma Feagaiga 30:5-8

Ua valaauina Pita Uitimera e o ma Oliva Kaotui i se misiona i le au sa Lamana

Faaali atu se mea faitino mamafa po o se ato ua tumu i aitema mamafa. Valaaulia se tagata aoga e sau i le pito i luma o le vasega ma uu le mea faitino i ona luma. A o uu e le tagata aoga le mea faitino, valaaulia isi tagata aoga e faitau filemu le Mataupu Faavae ma Feagaiga 30:5 ma vaavaai mo le mea na valaauina e le Alii ia Pita Uitimera e fai. Fai atu i le vasega e lipoti mai mea na latou aoaoina.

• O ai sa tatau ona avea ma taitai pulefaamalumalu i le misiona a Pita Uitimera i sa Lamana?

Valaaulia se tagata aoga lona lua e fesoasoani i le tagata aoga o loo uuina le mea faitino po o le ato mamafa. Fai atu i le tagata aoga muamua e faamatala le eseesega ua ia lagonaina ona o le i ai o le lagolago a se isi tagata. Faamatala atu e faapea, o le Mataupu Faavae ma Feagaiga 30:5–7 ua faamaumauina ai le fautuaga a le Alii ia Pita Uitimera e uiga i le auala sa tatau ona fesoasoani ma lagolago ai Pita ia Oliva Kaotui i lona tulaga faaleautaitai. Fai atu i tagata aoga e suesue i nei fuaiupu ma faailoa mai fuaitau faapitoa o loo faamatala mai ai le auala sa tatau ona lagolago ai e Pita ia Oliva.

• O a fuaitau sa faaaoga e le Alii e aoao ai Pita i le auala e tatau ona ia fesoasoani ma lagolago ai ia Oliva? (Tagai i le fuaiupu e 6; Sa tatau ia Pita ona puapuagatia i puapuaga uma o Oliva, ia tatalo mo Oliva, ma ia iloa le pule a Oliva.)

• O le a sou manatu i le uiga o le “ia … puapuaga i ona puapuagatia uma” (MF&F 30:6)?

• O le a se lesona e mafai ona tatou aoaoina mai i le fautuaga a le Alii ia Pita, e faatatau foi ia i tatou?

O le tasi o upumoni e mafai ona faailoa mai e tagata aoga o le, e tatau ona tatou lagolago ma fesoasoani ia i latou o e ua valaauina e le Alii e taitaia Lana galuega. Valaaulia se tagata aoga e tusi le mataupu faavae lenei i luga o le laupapa.

Fai i tagata aoga e faamatala mai pe mafai faapefea ona latou faaaogaina lenei mataupu faavae i o latou olaga, atonu i le lagolagoina o o latou taitai o le uarota po o le paranesi. Valaaulia i latou e faasoa mai a latou molimau e uiga i faamanuiaga e oo mai i le lagolagoina o i latou o e ua valaauina e le Alii. Uunai i latou ia faaauau pea ona ola ai i lenei mataupu faavae.

Iunite e Sosoo Ai (Mataupu Faavae ma Feagaiga 36–40)

Fesili atu i tagata aoga pe na i ai se taimi na talosagaina ai i latou e usitai i se poloaiga, ae sa latou le malamalama atoatoa pe aisea. Ae faapefea pe afai ua folafola atu ia te oe ni faamanuiaga e faavae i luga o lou usiusitai, ae peitai ua le mafai ona e ola i poloaiga? I le iunite e sosoo ai, o le a aoao ai tagata aoga e uiga i tagata o le Ekalesia o e sa oo i lenei tulaga ma mea na aoaoina ai i latou e le Alii.