I lalo o le taitaiga a le Perofeta o Iosefa Samita, sa faatulagaina aloaia ai Le Ekalesia a Iesu Keriso o le Au Paia o Aso e Gata Ai, i le aso 6 o Aperila, 1830, i le fale o Pita Uitimera le Matua i Faiete, Niu Ioka. Na toeitiiti atoa le 60 o tagata sa auai i le fonotaga, lea sa aofia ai le tatalo, lagolagoina, faauuga, o le taulimaina o le faamanatuga, ma faamauga. I lenei fonotaga, sa maua ai e Iosefa Samita le faaaliga ua faamaumauina nei i le Mataupu Faavae ma Feagaiga 21. I le faaaliga lenei na folafola mai ai e le Alii le valaauga ma le tiutetauave o Iosefa Samita ma faatonuina tagata o le Ekalesia e usitai i ana upu.
O Iosefa Samita ua atofaina o se perofeta ma le tagatavaai o le Ekalesia
Mafaufau e fai atu i le vasega e usu le pese “Ia Viia Oe, Le Atua, mo se Perofeta” (Viiga, nu. 10) o se vaega o le faigalotu o aso taitasi. A o e amataina le lesona, ia ta‘ua lenei viiga ma fai atu le fesili lenei:
O a ni isi o mafuaaga e te lagona ai le faafetai mo se perofeta?
Faamalamalama atu i tagata o le vasega e faapea, i la latou suesuega o le Mataupu Faavae ma Feagaiga 21, o le a latou aoao ai i upumoni e mafai ona faateleina ai lo latou malamalama i le matafaioi a perofeta. Ina ia tuu atu i tagata o le vasega ni talaaga faasolopito mo le faaaliga lenei, fai se aotelega o le faamatalaga o loo tuuina atu i le folasaga o le lesona lenei.
Valaaulia se tagata o le vasega e faitau leotele le Mataupu Faavae ma Feagaiga 21:1. Fai atu i tagata o le vasega e mulimuli i le faitauga, ma vaavaai mo faalagiga o le a iloa ai Iosefa Samita. Ona fai atu lea i tagata o le vasega e lipoti mai mea na latou mauaina.
O le a le uiga o le, na valaauina e le Alii ia Iosefa Samita e avea ma se tagatavaai?
O le a le uiga o le, na valaauina e le Alii ia Iosefa Samita e avea ma se perofeta?
Ina ia fesoasoani i tagata o le vasega ia malamalama i nei faalagiga ma tiutetauave e fesootai ma i latou, valaaulia ni tagata se toalua o le vasega e faitau leotele le faamatalaga lenei o se tagatavaai ma se perofeta. Fai atu ia te i latou e faitau lemu ia faamatalaga taitasi, ia malolo laitiiti i le faaiuga o fuaiupu taitasi. Fai atu i le isi vaega atoa o le vasega e faalogologo mo fuaiupu e anoa ia i latou ma ia saunia e faamatala mai pe aisea.
Ata
Elder John A. Widtsoe
“O se tagatavaai o se tasi e vaai i mata faaleagaga. Na te silafia le uiga o mea e foliga nenefu i [le manino i, po o natia mai] isi; o le mea lea, o ia o se faaliliu upu ma le faamanino o upumoni e faavavau. Na te muai vaai i le lumanai mai le taimi tuanai ma le taimi nei. Na te faia lena mea e ala i le mana o le Alii e galue tuusao e ala mai ia te ia, pe lē tuusao mai foi e ala mai i meafaigaluega faalelagi e pei o le Urima ma le Tumema. O le faapuupuuga, o ia o le tagata vaai, e savali i le malamalama o le Alii ma ni mata e vaai” (John A. Widtsoe, Evidences and Reconciliations, arr. G. Homer Durham, 3 vols. i le 1 [1960], 258).
O se perofeta o “se tagata ua valaauina e le Atua ma e tautala foi mo le Atua. I le avea ai o se avefeau a le Atua, o se perofeta e maua poloaiga, valoaga, ma faaaliga mai le Atua. O lona tiutetauave o le faailoa atu o le finagalo o le Atua ma lona uiga moni i tagata, ma faailoa atu le uiga o ana fesootaiga ma i latou. O se perofeta e ta’usalaina le agasala ma valoia atu lona taunuuga. O ia o se folafola o le amiotonu. I nisi taimi, e mafai ona musuia perofeta e valoia le lumanai mo le manuia o tagata. E ui i lea, o lona tiute muamua lava, o le molimau atu lea e uiga ia Keriso” (Taiala i Tusitusiga Paia, “Perofeta,” scriptures.lds.org).
A uma ona faitauina faauigaga taitasi, valaaulia ni nai tagata o le vasega e faamatala mai po o le fea o fuaiupu na tulaga ese ia i latou.
A o lei faaauauina, atonu e aoga le talanoa puupuu ma tagata o le vasega i faauigaga nei o isi faalagiga o loo tuuina mai i le fuaiupu muamua o le Mataupu Faavae ma Feagaiga 21:
Faaliliutusi: o se tasi e (1) faaliliuina upu tusitusia po o tautalaga i se isi gagana po o le (2) tuuina atu le uiga manino atu i se faaliliuga o loo i ai e ala i le faaleleia atili po o le faasa’oina pe e ala i le toefuataiina mai o mea na leiloloa (tagai i le Taiala i Tusitusiga Paia, “Faaliliu,” scriptures.lds.org).
Aposetolo: o se molimau faapitoa a Iesu Keriso i le lalolagi (tagai i le Bible Dictionary, “Apostle”).
Toeaina: “o le faalagiga talafeagai e tuuina atu i e uma e umia le Perisitua Mekisateko” ma i se tasi ua tofia e avea ma se faifeau faamisiona mo Iesu Keriso (tagai i le Bible Dictionary, “Elders”).
E faapefea ona fesoasoani nei faalagiga na tuuina atu ia Iosefa Samita e te malamalama ai i lana matafaioi taua i le Toefuataiga?
Valaaulia tagata o le vasega e faitau filemu le Mataupu Faavae ma Feagaiga 21:2-3 ma vaavaai mo mea na musuia e le Atua ia Iosefa Samita e fai. Fai atu i tagata o le vasega e lipoti mai mea ua latou aoaoina. (E tatau ona faamatala mai e tagata o le vasega le mea moni e faapea, Na faatonuina e le Atua ia Iosefa Samita e toefuatai mai le Ekalesia a Iesu Keriso.)
Aisea e taua ai mo i tatou le iloa, na valaauina Iosefa Samita e le Atua e toefuatai ma taitaia le Ekalesia a Iesu Keriso?
Ata
Perofeta o Iosefa Samita
Faaali atu i tagata o le vasega le ata Uso Iosefa (Tusi Ata o le Talalelei [2009], nu. 87; tagai foi i le LDS.org) ma molimau atu e uiga i le upu moni na outou talanoaina i luga.
E tatau i tagata o le Ekalesia ona ua’i atu i upu a Iosefa Samita
Faamanatu atu i tagata o le vasega, na tuuina mai e le Alii le faaaliga lenei i le aso sa faatulagaina ai le Ekalesia. O le tuuina mai o lenei faaaliga i lenei aso faapitoa, ua faapitoa ai ona taua.
Tusi upu ma fasifuaitau nei mai le Mataupu Faavae ma Feagaiga 21:4–5 i luga o le laupapa (aua nei aofia ai faauigaga o loo i totonu o puipui):
o le ekalesia (o tagata o Le Ekalesia a Iesu Keriso o le Au Paia o Aso e Gata Ai i le taimi o Iosefa Samita faapea foi ma o tatou lava taimi)
lana (aemaise lava o Iosefa Samita, ae e mafai foi ona faasino i le Peresitene o le Ekalesia i le taimi nei)
upu ma poloaiga (e mafai ona faatatau i aoaoga ma fautuaga uma a se perofeta, e aofia ai ni faatonuga patino ua tuuina mai e le Alii e ala mai i le perofeta)
i le onosai ma le faatuatua atoa (e mafai ona faauigaina, e mafai ona tatou tuu atu atoa le faatuatuaga i aoaoga a le perofeta, e le tatau ona tatou faitioina o ia, e tatau ona tatou mulimuli i ana fautuaga e tusa lava po o a ni ona vaivaiga patino o i ai, ma e tatau ona tatou faatalitali ma le onosai i faamanuiaga folafolaina)
Valaaulia tagata o le vasega e faitau filemu le Mataupu Faavae ma Feagaiga 21:4–5 ma mafaufau loloto i le uiga o upu ma fuaitau o loo i luga o le laupapa. A maea le taimi, fai atu i tagata o le vasega pe faapefea ona latou faauigaina ia upu ma fasifuaitau nei. Atonu e te manao e faaaoga faauigaga o loo i totonu o puipui e taiala ai le talanoaga. Ona fai atu lea o fesili nei:
E tusa ai ma le Mataupu Faavae ma Feagaiga 21:4–5, o le fea o aoaoga a le perofeta e tatau ona tatou ua’i atu i ai? (E tatau ona tatou ua’i atu i “ana upu uma ma poloaiga.”)
Aisea atonu o nisi taimi e manaomia ai le onosai ma le faatuatua e ua’i atu ai i upu a se perofeta?
E faapefea e le iloaina e maua mai e le perofeta ia fautuaga ma le poloaiga mai le Alii, ona fesoasoani ia te oe ia maua ai ana upu “i le onosai ma le faatuatua atoa”? (MF&F 21:5).
Valaaulia tagata taitasi o le vasega e faitau filemu le Mataupu Faavae ma Feagaiga 21:6, ma vaavaai mo faamanuiaga e tolu ua faasafua mai ia i latou o e talia upu a perofeta i le onosai ma le faatuatua. (Atonu e te faamatala atu o le tasi o uiga o le luluina o le ia faate‘a ese po o le faamatuu mai se mea mai se lagolago po o se koneteina. O lea la, o le tasi faaliliuga o lenei fuaiupu e mafai ona faapea, pe a luluina le lagi “mo lo [tatou] lelei,” e “faamatuu” mai faaaliga ma faamanuiaga ma liligi mai i luga o i latou o e mulimuli i perofeta soifua.)
E faapefea ona e aotelea folafolaga ua tuuina mai ia i latou o e ua’i atu i upu a le perofeta? (E mafai ona faaaoga e tagata o le vasega ni upu eseese, ae e tatau ona latou faamatala mai le mataupu faavae lenei: Afai tatou te ua’i atu i upu a le perofeta, o le a puipuia i tatou mai le fili. Atonu e te manao e tusi le mataupu faavae lenei i luga o le laupapa.)
E faapefea e le ua’i atu i upu a le perofeta ona “faamataa ese ai mana o le pouliuli”?
Ina ia fesoasoani i tagata o le vasega ia malamalama i le mataupu faavae na latou mauaina nei, valaaulia se tasi o i latou e faitau leotele le fuaitau lenei e uiga i tafaoga faamasani (po o se isi fuaitau e te filifilia) mai le Mo le Malosi o le Autalavou. Fai atu i isi tagata uma o le vasega e faalogo ma le totoa ma faailoa mai le fautuaga faaperofeta ma faamanuiaga folafolaina. A uma ona faitau le tagata o le vasega, valaaulia tagata o le vasega e lipoti mai mea na latou mauaina.
“O se tafaoga faamasani, o se gaoioiga fuafuaina e faatagaina ai se alii ma se tamaitai talavou e faamasani lelei ai le tasi i le isi. O aganuu e talia ai tafaoga faamasani, e mafai ona fesoasoani ia te oe e aoao ma faataitai ni tomai faaagafesootai, atiae ai faigauo, maua ai le fiafia lelei ma mama, ma iu ai ina maua se soa e faavavau.
E le tatau ona e tafao faamasani seiloga ua 16 tausaga lou matua. A amata loa ona e tafao faamasani, ia o ma se isi paga po o nisi paga se toatele. Ia aloese mai le tafafao soo ma le tagata lava e tasi. O le atiina ae vave o mafutaga tumau a o laiti e mafai ona faatapulaa ai le toatele o isi talavou e te feiloai i ai ma atonu e mafai ona taitai atu ai i le ola le mama. Valaaulia ou matua e faamasani atu ia i latou e te tafao faamasani i ai.
“Filifili na o i latou e maualuluga o latou tulaga faatonuina e tafafao faamasani i ai ma i le mafuta ma i latou e mafai ai ona e faatumauina ou tulaga faatonuina. Ia manatua o se alii talavou ma se tamaitai talavou e tafafao faamasani, ua ia te i laua le matafaioi e puipuia le mamalu ma le mama o le tasi ma le isi” (Mo le Malosi o le Autalavou [tamaitusi, 2011], 4; tagai foi LDS.org).
O anafea na faamanuiaina ai oe po o se tasi e te iloa ona o le ua’i atu i upu ma poloaiga a le perofeta soifua?
Uunaia tagata o le vasega e mafaufau loloto i mea e tatau ona latou faia e maua ai faamanuiaga ua folafolaina mai i le Mataupu Faavae ma Feagaiga 21:6. Faamautinoa atu ia te i latou, a o latou ua’i atu ma le naunautai i upu a le perofeta, o le a latou maua faamanuiaga silisili i le taimi nei, ma i le faavavau.
Valaaulia se tagata o le vasega e faitau leotele le Mataupu Faavae ma Feagaiga 21:7–9. Fai atu i le vasega e mulimuli i le faitauga, ma vaavaai mo manaoga ma amioga amiotonu a le Perofeta o Iosefa Samita.
O a ni mea ua tatou iloa e uiga i le Perofeta o Iosefa Samita mai nei fuaiupu?
O le a sou manatu, e faapefea ona faatatau foi nei fuaiupu i le Peresitene o loo i ai nei O Le Ekalesia a Iesu Keriso o Aso e Gata Ai?
Ua faailoa mai le avea o Oliva Kaotui ma se toeaina ma se failauga
Tau atu i tagata o le vasega, i le fonotaga muamua o le Ekalesia, sa faauuina ai Oliva Kaotui o se toeaina e le Perofeta o Iosefa Samita, ae sa faauuina le Perofeta o se toeaina e Oliva Kaotui. Valaaulia ni nai tagata o le vasega e auauai e faitau leotele mai i le Mataupu Faavae ma Feagaiga 21:10–12.
Atonu e te manao e faailoa atu, i le fuaiupu e 10, na faatatau ai le Alii ia Oliva Kaotui o “laʼu aposetolo” (tagai foi i le MF&F 20:2-3). Faamalamalama atu e faapea, i le gagana Eleni, o le aposetolo o lona uiga “o se tasi ua auina atu” (Taiala i Tusitusiga Paia, “Aposetolo,” scriptures.lds.org). O Oliva Kaotui na auina atu e Iesu Keriso ma poloaiina e molimau atu e uiga i le Faaola. E ui lava sa tuuina mai ia Oliva ni tiutetauave faa-aposetolo, ae sa le o ia o se tasi o le Korama a Aposetolo e Toasefululua. Ae peitai, sa fesoasoani o ia i le sailia mai o alii o e na valaauina o ni sui o lena korama ina ua faatulagaina i le 1835.
O le a le uiga ia te oe o le tauave o le suafa o le Alii?
Faaiu le lesona o le aso i le uunaia o tagata o le vasega e galulue i uunaiga latou te maua, e uiga i auala e mafai ona latou tauave ai le suafa o le Alii ma fai ma sui o le Ekalesia i o latou aiga, o latou nuu, ma le lalolagi.
E tusa ai ma mea na tutupu i le aso 6 o Aperila, 1830, ina ua faavaeina aloaia le Ekalesia, sa saunoa mai ai le Perofeta o Iosefa Samita:
Ata
Perofeta o Iosefa Samita
“Sa matuai liligi ifo i o matou luga le Agaga Paia—sa perofeta ane ai nisi, a o matou taufai viia uma le Alii, ma matuai olioli tele ai” (Aoaoga a Peresitene o le Ekalesia: Iosefa Samita [2007], 146).
Na tusia e Joseph Knight le Matua, le olioli na lagonaina e le Perofeta o Iosefa Samita i lenei aso faagalo gata, ina ua papatisoina lona tama, o Iosefa Samita le Matua:
“Sa i ai se mea se tasi o le a ou ta‘ua [e uiga] i lena afiafi [ina ua] papatisoina ai Uso Samita toeaina ma Matini Harisi. Na faatumulia Iosefa i le Agaga i se tulaga maoae lava i le vaaia o lona tama ma le susuga ia Harisi sa … ia alaga [oso?] atu ma le … olioli ma sa foliga mai e pei e le mafai e le lalolagi ona taofiofi o ia. Na alu atu i le fasi fanua ma sa foliga mai sa manao e alu ese atu mai le vaaiga a tagata uma e tagi lotulotu ma masusu ai, ma sa pei na faatumulia o ia e le mafai ai ona ola. … O ia o le tagata sa sili ona aafia na ou vaai i ai i lo soo se tagata lava. Ae sa foliga mai na atoatoa lona olioli. Ou te manatu sa ia vaaia le galuega tele sa ia amataina ma sa naunau ai lava e faataunuuina” (e pei ona sii mai i le Dean Jessee, “Joseph Knight’s Recollection of Early Mormon History,” BYU Studies, vol. 17, nu. 1 [1976], 37; ua faalaugatasia le sipelaga ma mataitusi tetele).
Sa faamamafa mai e Peresitene Ezra Taft Benson le taua o le perofeta soifua ma le Peresitene o le Ekalesia:
Ata
Peresitene Ezra Taft Benson
Ina ia fesoasoani ia outou pasia tofotofoga taua o loo i le lumanai, o le a ou tuuina atu ia te outou i le aso ni nai vaega o se ki tulaga ese lea, afai o le a outou faamamaluina, o le a faapaleina ai outou i le mamalu o le Atua ma aumai ai outou i fafo ma le manumalo e ui lava i le matamataita o Satani.
“… Ia o le ki maoae lenei—mulimuli i le perofeta—ma o vaega autu nei e sefulufa e mulimuli ai i le perofeta, le Peresitene o Le Ekalesia a Iesu Keriso o le Au Paia o Aso e Gata Ai. …
“Muamua: Ua na o le perofeta lava le tagata e saunoa mo le Alii i soo se mea.
“Lua: O le perofeta soifua e sili atu le taua ia i tatou nai lo tusitusiga faavae.
“Tolu: E sili atu le taua o le perofeta soifua ia i tatou nai lo se perofeta ua maliu.
“Fa: O le a le taitaieseina lava le Ekalesia e le perofeta.
“Lima: E le manaomia e le perofeta soo se aoaoga faapitoa faalelalolagi po o ni faailoga e saunoa atu ai i soo se mataupu pe faatino ai soo se mea i soo se taimi.
“Ono: E le tau faapea mai le perofeta, ‘Ua faapea ona fetalai mai o le Alii’ ina ia tuuina mai ai ia i tatou ni tusitusiga paia.
“Fitu: E ta’u mai e le perofeta mea e tatau ona tatou iloa, ae le faapea o taimi uma e ta’u mai ai mea tatou te mananao e iloa.
“Valu: E le faapea e vaivai le perofeta ona o manatu o tagata.
“Iva: E mafai e le perofeta ona maua faaaliga i soo se mataupu lava, faaletino pe faaleagaga.
“Sefulu: E mafai ona aofia ai le perofeta i mataupu faalemalo.
“Sefulutasi: O vaega e lua e sili ona faigata ona mulimuli i le perofeta, o e faamaualuluga ona ua atamamai, ma e faamaualuluga ona o le tamaoaiga.
“Sefululua: O le a le lauiloa tele le perofeta i le lalolagi po o mea faalelalolagi.
“Sefulutolu: O le perofeta ma ona fesoasoani o le Au Peresitene Sili lea—o le korama aupito maualuga i le Ekalesia.
“Sefulufa: O le perofeta ma le au peresitene—o le perofeta soifua ma le Au Peresitene Sili—mulimuli i ai ma faamanuiaina; teena i latou ma puapuagatia ai” (“Fourteen Fundamentals in Following the Prophet” [Brigham Young University fireside address, Feb. 26, 1980], 1, 6, speeches.byu.edu).
Na faamalamalama mai e Peresitene Harold B. Lee le taua o le ua’i atu i fautuaga a le perofeta, e tusa lava pe ese mai o tatou lava manatu mai lena fautuaga:
Ata
Peresitene Harold B. Lee
“Na pau lava le saogalemu o loo i ai ia i tatou i le avea ai ma tagata o le ekalesia, o le faia lea o le mea tonu sa fetalai mai ai le Alii i le Ekalesia i lena aso ina ua faatuina le Ekalesia. E ao ona tatou aoao e ua’i atu i upu ma poloaiga o le a tuuina mai e le Alii e ala mai i Lana perofeta, ‘e pei ona maua e ia, ma savavali i le paia atoa i o’u luma; … e pei lava ua mai i lo’u lava gutu, i le onosai ma le faatuatua atoa’ (MF&F 21:4–5). E i ai mea o le a manaomia ai le onosai ma le faatuatua. Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faaleagafesootai. E ono faalavelave i le ituaiga olaga o loo e ola ai. Ae afai e te faalogo i nei mea, e pei o loo sau mai i le fofoga o le Alii Lava Ia, faatasi ma le onosai ma le faatuatua, o le folafolaga e faapea, ‘o le a lē manumalo ai faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa’ (MF&F 21:6)” (Aoaoga a Peresitene o le Ekalesia: Harold B. Lee [2000], 92; tagai foi i le Mataupu Faavae ma Feagaiga Tusi Lesona a le Tagata o le Vasega, 2nd ed. [Church Educational System manual, 2001], 45).
Na aoao mai Elder M. Russell Ballard o le Korama a Aposetolo e Toasefululua:
Ata
Elder M. Russell Ballard
“E le o se mea itiiti, ou uso e ma tuafafine, le i ai o se perofeta a le Atua ma i tatou. E ofoofogia ma maoae faamanuiaga e oo mai i o tatou olaga a o tatou faalogo atu i afioga a le Alii ua tuuina mai e ala mai ia te ia. O le taimi foi lea, e iloa ai [o le Peresitene o loo i ai nei o le Ekalesia] o le perofeta a le Atua, ua faaee mai ai foi ia i tatou se tiutetauave. Afai tatou te faalogo i le fautuaga a le Alii ua faailoa mai e ala i saunoaga a le Peresitene o le Ekalesia, e tatau ona sao ma vave la tatou tali. Ua faaalia mai i le talafaasolopito, e i ai le saogalemu, filemu, manuia, ma le fiafia, i le tali atu i fautuaga faaperofeta e pei ona sa faia e Nifae o anamua: ‘O le a ou alu ma fai mea ua poloaiina e le Alii’” (“O Lana Upu o le a Outou Talia,” Liahona, Me 2001, 80).