Lesona mo Suesuega i le Fale

Mataupu Faavae ma Feagaiga 3–7; 10; Iosefa Samita—Talafaasolopito 1:66–67 (Iunite 3)

Anomea o Sauniuniga mo le Faiaoga mo Suesuega i le Fale

Aotelega o Lesona mo Suesuega i le Fale i Aso Taitasi

O le aotelega lenei o mea na tutupu, aoaoga faavae, ma mataupu faavae na aoaoina e tagata aoga a’o latou suesueina le Mataupu Faavae ma Feagaiga 3–7; 10; Iosefa Samita—Talafaasolopito 1:66–67 (iunite 3) e le o faamoemoe e aoao atu o se vaega o lau lesona. O le lesona e te aoaoina atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.

Aso 1 (Mataupu Faavae ma Feagaiga 3; 10)

A o aoaoina e tagata aoga tulaga o mea na tutupu na siomia ai le leiloloa o itulau e 116 o tusiga o le Tusi a Mamona, sa latou iloa ai, e le mafai ona taofia faamoemoega a le Atua. O le aoaiga e le Alii o Iosefa Samita ona o le talosaga faafia atu e tuu atu tusiga ia Matini Harisi, na aoaoina ai tagata aoga e tatau ona sili atu lo latou matatau i le Atua nai lo o faatauanauga a le tagata, ma afai tatou te faamaoni i poloaiga a le Alii, o le a Ia lagolagoina i tatou i taimi o faigata. Ina ua toe faafoi mai papatusi ia Iosefa Samita, na aoaoina o ia e le Alii e faapea, o loo manao Satani e faaumatia le galuega a le Alii ma o tatou agaga, ae o lo tatou tatalo e le aunoa, o le a tatou maua ai le mana e faatoilalo ai Satani ma i latou o e auauna ia te ia.

Aso 2 (Mataupu Faavae ma Feagaiga 4)

Mai le tali a le Alii i le manao o Iosefa Samita le Matua e fia iloa le mea e finagalo le Alii na te faia, na aoaoina e tagata aoga afai latou te auauna atu i le Atua ma o latou loto, manatu, mafaufau, ma le malosi atoa, o le a latou tutu ma le le pona i Ona luma i le aso gataaga. Na latou aoaoina foi a o latou galulue ma le filiga e aumai isi ia Iesu Keriso, e mafai foi ona latou maua le faaolataga mo i latou lava. O le mea mulimuli, na faailoa mai e tagata aoga uiga faaleatua e faapea ona agavaa ai se tagata e fesoasoani i le galuega a le Alii.

Aso 3 (Mataupu Faavae ma Feagaiga 5)

Ina ua saili e Matini Harisi se molimau faaopoopo e uiga i le i ai o papatusi, sa aoaoina e le Alii ia Matini Harisi e faapea, na Ia valaauina Iosefa Samita e avatu Lana afioga i le lalolagi, ae o le a avea foi le molimau a Molimau e Toatolu o se faamaoniga o le moni o le Tusi a Mamona. Na aoaoina e tagata aoga afai o le a latou talitonu i afioga a le Alii, o le a faamaonia e le Agaga lo latou moni. Na fesoasoani foi le vaega lenei i tagata aoga ia malamalama, afai tatou te tatalo faamaoni i le lotomaualalo ma le faatuatua, o le a faapea ona tatou maua tali e tusa ai ma o tatou manaoga amiotonu.

Aso 4 (Iosefa Samita—Talafaasolopito 1:66–67; Mataupu Faavae ma Feagaiga 6–7)

Na aoaoina e le Alii ia Oliva Kaotui i upumoni taua e uiga i le mauaina ma le iloaina o faaaliga. Na manatunatu tagata aoga i auala e faatatau ai nei upumoni ia i latou. E le gata i lea, sa latou aoaoina foi e fetalai mai e le Alii le filemu i o tatou mafaufau o se molimau o le upumoni. Sa aoaoina foi e tagata aoga, a o tatou vaai atu ma le faatuatua ia Iesu Keriso, e mafai ona tatou faatoilaloina lo tatou masalosalo ma le mata’u.

Folasaga

I le taimi o lenei lesona o le a matele lava ina suesue tagata aoga mai le Mataupu Faavae ma Feagaiga 10, lea na faaali mai i le Perofeta o Iosefa Samita ina ua uma ona leiloloa itulau e 116 o tusiga o le Tusi a Mamona. A o lei oo mai le faaaliga lenei, na aveese e Moronae ia papatusi ma le Urima ma le Tumema mai ia Iosefa Samita, ma sa le’i toe i ai mo se vaitaimi i le Perofeta le mana e faaliliu ai. Ina ua uma ona toe faafoi mai papatusi, sa poloaiina e le Alii ia Iosefa e aua le toe faaliliuina le vaega o papatusi e tutusa ma itulau o tusiga ua leiloloa. Na faaali mai foi e le Alii le taupulepulega a Satani e faaumatia le galuega, ma aoao mai le ala e mafai ona tatou faatoilaloina ai Satani.

Fautuaga mo le Aoaoina Atu

Mataupu Faavae ma Feagaiga 3; 10

Ua saili Satani e faaumatia Iosefa Samita ma le galuega a le Atua

Valaaulia se tagata aoga e faamalamalama mai tulaga na i ai i le leiloloa o itulau e 116 o tusiga. Ona talanoaina lea o fesili nei:

• Mai mea ua e aoaoina i le suesueina o le Mataupu Faavae ma Feagaiga 3, aisea e te manatu na finafinau ai lava Iosefa Samita e fesili atu i le Atua le fesili lava lea e tasi e ui lava ina uma ona maua mai se tali manino?

• O le a sou manatu i le mea na aoaoina e Iosefa Samita mai lenei aafiaga?

• O a ni upumoni na e aoaoina mai le aafiaga o Iosefa, lea e mafai ona fesoasoani ia te oe pe a oo ina uunaia oe e isi e fai se mea e le sa’o?

Faaali atu se maunu po o se mailei (po o le tusi o se ata o se maunu po o se mailei i luga o le laupapa). Fai atu i ni nai tagata aoga e aotele mai mea na latou aoaoina mai ia latou suesuega o le Mataupu Faavae ma Feagaiga 10 e uiga i le auala sa fuafuaina e Satani e maileia ai Iosefa Samita i itulau e 116 o tusiga na leiloloa.

Faamalamalama atu e faapea i le Mataupu Faavae ma Feagaiga 10:20–29 na faamatalaina e le Alii i latou o e gauai atu i faatosinaga a Satani e ave itulau e 116 o tusiga, ma le auala na mafai ai e Satani ona maileia i latou.

Vaevae tagata aoga i ni paga. Fai atu i se tagata aoga se toatasi i paga taitasi e faitau filemu le Mataupu Faavae ma Feagaiga 10:20–29, ma vaavaai mo mea o loo aoao mai e nei fuaiupu e uiga i faamoemoega a Satani. Fai atu i le isi tagata aoga e faitau fuaiupu lava ia e tasi, ma vaavaai mo auala e saili ai Satani ina ia ausia ona faamoemoega. A uma, valaaulia tagata aoga i paga taitasi e lipoti atu i le tasi ma le isi. A lava loa le taimi, fesili atu i le vasega ia fesili nei:

• O le a se mea e mafai ona tatou aoao mai i le Mataupu Faavae ma Feagaiga 10:20–29 e uiga i faamoemoega a Satani? (E mafai ona faailoa mai e tagata aoga ni mataupu faavae eseese, ae ia mautinoa ua latou malamalama e manao Satani e faaumatia le galuega a le Alii ma o tatou agaga. Atonu e te manao e tusi lenei upumoni i le laupapa. Atonu foi e te manao e fautua atu i tagata aoga e faailoga upu ma fasifuaitau o loo aoao mai ai lenei upumoni i fuaiupu 22-23 ma le 27.)

• Mai mea na e faitauina i nei fuaiupu, e faapefea ona saili Satani e faaumatia le galuega a le Alii ma o tatou agaga? (Na te faaaogaina meafaigaluega e pei o le taufaasese, ita, taufaasee, ma le pepelo. Atonu e te manao e fautua atu i tagata aoga e faailoga nei meafaigaluega a le fili i a latou tusitusiga paia.)

Ina ia fesoasoani i tagata aoga ia malamalama ma lagonaina le taua o lenei upumoni, valaaulia i latou e talanoaina fesili nei ma a latou paga (atonu e te manao e tusi fesili nei i luga o le laupapa pe saunia ni pepa e tufa atu a’o lei amataina le vasega):

• O a ni faamaoniga ua e vaaia o loo faaaoga ai pea e Satani le taufaasese, ita, taufaasee, ma le pepelo e faaumatia ai le galuega a le Alii ma agaga o tagata?

• E mafai faapefea e le nofouta i faamoemoega ma metotia a Satani ona fesoasoani ia i tatou e aloese ma sosola ese ai mai ana mailei?

Valaaulia tagata aoga e mafaufau loloto po o le fea o metotia a le fili o loo lisiina i le Mataupu Faavae ma Feagaiga 10:20–29 na latou lagonaina pe vaaia, faapea ai foi ma se mea e mafai ona latou faia e aloese pe sosola ese ai mai mailei a Satani.

Faamalamalama atu e faapea i lenei faaaliga, na tuuina mai e le Alii se poloaiga ma se folafolaga e faatatau i a tatou taumafaiga e aloese mai faatosinaga a Satani. Valaaulia se tagata aoga e faitau leotele le Mataupu Faavae ma Feagaiga 10:5, ma fai atu i le vasega e vaavaai mo le poloaiga a le Alii ma Lana folafolaga.

Tusi le faamatalaga lenei i luga o le laupapa: A o tatou , o le a tatou maua le mana e .

Fesili atu i tagata aoga: E faapefea ona e faaumaina lenei mataupu faavae e tusa ai ma le fuaiupu e 5? (E mafai ona faailoa mai e tagata aoga ni mataupu faavae eseese, ae ia mautinoa e faamamafa atu a o tatou tatalo e le aunoa, o le a tatou maua le mana e faatoilalo ai Satani ma i latou o e auauna ia te ia.)

Fai atu i tagata aoga e toe faamanatu le Mataupu Faavae ma Feagaiga 10:38–45. Ona valaaulia lea o se tagata aoga e faamalamalama mai pe na faapefea ona toe faatumu e le Alii le leiloloa o itulau e 116 o tusiga.

Valaaulia tagata aoga e faitau filemu le Mataupu Faavae ma Feagaiga 10:43, ma vaavaai mo se upumoni taua na finagalo le Alii ia malamalama i ai Iosefa Samita. (A o faasoa mai e tagata aoga o latou manatu, tusi le aoaoga faavae lenei i luga o le laupapa: O le atamai o le Atua e sili atu nai lo le faitogafiti a le tiapolo. Atonu e tatau ona e faamalamalama atu o le faitogafiti e faatatau i le faaaogaina o togafiti e faasese ai tagata.)

Fai atu fesili nei:

• E faapefea ona faaalia lenei upumoni i le fuafuaga a le Alii e toe suia ia tusiga na leiloloa?

• E faapefea ona fesoasoani e te iloa ai o le atamai o le Atua e sili atu nai lo o le faitogafiti a Satani?

Valaaulia tagata aoga e faitau le Mataupu Faavae ma Feagaiga 10:44-45, ma vaavaai mo nisi faamaoniga o le upumoni o loo tusia i luga o le laupapa.

• E tusa ai ma le Mataupu Faavae ma Feagaiga 10:44-45, aisea na sili atu ai le taua o papatusi laiti nai lo o le faapuupuuga a Mamona o papatusi lapopoa, ia sa i ai i itulau e 116 na leiloloa? (O papatusi laiti sa i ai se tala na faamatala e le tagata lava ia e uiga i mea faaleagaga. O itulau e 116 sa i ai se faapuupuuga o tala i mea taua na tutupu.)

• E faapefea e le iloa sa saunia e le Atua se ala e toe faatumu ai itulau e 116 o tusiga na leiloloa, ona fesoasoani e te atili faatuatuaina ai o Ia?

Mataupu Faavae ma Feagaiga 4–7

Ua fautua mai le Alii ia Iosefa Samita ma Oliva Kaotui e aua le masalosalo pe matatau

Valaaulia tagata aoga e lipoti faapuupuu mai e uiga i nisi o upumoni e uiga i faaaliga faaletagata lava ia na latou aoaoina a o suesue i le Mataupu Faavae ma Feagaiga 6. Valaaulia i latou e mafaufau loloto i ni aafiaga i se taimi na latou lagonaina ai le faamalamalamaina o o latou mafaufau ma lagona le toafilemu e uiga i se mea sa latou tatalo e uiga i ai. Valaaulia ni nai tagata aoga e faasoa mai a latou aafiaga i le vasega.

Faamanatu atu i tagata aoga, o se vaega o le latou suesuega o le fuaitau o le mau tauloto i le Mataupu Faavae ma Feagaiga 6:36, sa latou tusia ai se lauga puupuu e faamatala ai auala e ola ai i le fautuaga na tuuina mai e le Alii i lena fuaiupu. Valaaulia i latou e faitau leotele faatasi le Mataupu Faavae ma Feagaiga 6:36. E mafai ona toe faia lenei mea e fesoasoani ai ina ia latou taulotoina. Ona fai atu lea i ni nai tagata aoga o e lagona le to’alelei e faasoa mai a latou lauga e faia lea mea. Atonu e te manao e faasoa atu lau molimau e uiga i se auala na fesoasoani ai le Alii ia te oe e faatoilalo le masalosalo po o le fefe i se taimi ua tuanai.

Iunite e Sosoo Ai (Mataupu Faavae ma Feagaiga 8-9; 11–16)

O le a le agaga o faaaliga? E faapefea ona e iloa le taimi e te maua ai se faaaliga mai le Atua? Faamalamalama atu i le iunite e sosoo ai, o le a aoao ai tagata aoga e uiga i mataupu faavae o faaaliga, o le a faapea ona faamanuiaina ai i latou a o latou sailia le taitaiga mai le Atua i o latou olaga.