Lesona 86
Mataupu Faavae ma Feagaiga 84:1–44
Folasaga
Ia Setema 1832, na toe foi atu ai faifeautalai i Katelani, Ohaio, ina ua uma ona talai atu le talalelei i le itu i sasae o le Iunaite Setete. I le taimi o le latou feiloaiga fiafia, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 84. Sa ia mauaina le faaaliga i le gasologa o aso e lua: 22 ma le 23, o Setema 1832. I lenei tusi lesona, ua vaevaeina le vaega e 84 i lesona e tolu. O le lesona muamua lenei e taulai atu i faatonuga a le Alii e uiga i le perisitua ma auala e mafai e le perisitua ona saunia i tatou e maua mea uma o loo i ai i le Tama Faalelagi.
Fautuaga mo le Aoaoina Atu
Mataupu Faavae ma Feagaiga 84:1-30
Ua tautino mai e le Alii, o le a fausia se malumalu ma faamatala mai faamoemoega o le perisitua
Afai e mafai, aumai i le vasega se kopi o le laina o le pule o le perisitua a se tasi (o lau laina po o se tasi o le aiga). (Atonu e te manao e kopi le faasologa o le laina o le pule o le perisitua i luga o le laupapa.) Fesoasoani i tagata o le vasega ia malamalama o se laina o le pule o le perisitua e faaali ai le ala na faaee mai ai le pule o le perisitua mai le tasi tagata e umia le perisitua i le isi, mai ia Iesu Keriso e oo mai i se tasi o loo umia i le taimi nei.
Faamalamalama atu e faapea, o le Mataupu Faavae ma Feagaiga 84 o loo i ai se faaaliga e uiga i le perisitua ma le ala na te faamanuiaina ai fanau a le Tama Faalelagi. O le vaega muamua o le faaaliga ua faaalia ai le tupuaga o le perisitua o Mose. Valaaulia tagata aoga e sue vave ma filemu le Mataupu Faavae ma Feagaiga 84:6–19 ma vaai pe mafai faapefea e Mose ona faafetaui atu lana pule o le perisitua i le Atua.
-
Aisea e te manatu e taua ai le faasolosolo o le pule o le perisitua i se laina e tau tonu atu i le Atua? (Tagai i le Eperu 5:4.)
Valaaulia se tagata o le vasega e faitau leotele le Mataupu Faavae ma Feagaiga 84:17. Fai atu i le vasega e mulimuli i le faitauga, ma vaavaai mo le fuaitau o loo faamatala ai le natura e faavavau o le perisitua (“ua aunoa ma se amataga o aso po o se iuga o tausaga”). Atonu e te manao e molimau atu o le perisitua o le mana e faavavau ma le pule a le Atua, ma faasoa atu lou loto faafetai ona ua faaee mai e le Atua lenei mana i luga o le tagata mo le manuia o Ana fanau.
Valaaulia se tagata o le vasega e faitau leotele le Mataupu Faavae ma Feagaiga 84:19–22. Fai atu i le vasega e mulimuli i le faitauga, ma vaavaai mo faamanuiaga e mafai ona tatou maua e ala i le Perisitua Mekisateko.
-
E tusa ai ma fuaiupu e 19–22, o a faamanuiaga e mafai ona tatou maua e ala mai i le Perisitua Mekisateko? (E mafai ona faasoa mai e tagata o le vasega ni tali. Ia mautinoa latou te faailoa mai le aoaoga faavae lenei: I sauniga o le Perisitua Mekisateko, e faaali mai ai mana o le faaleatua. Tusi lenei aoaoga faavae i le laupapa.)
-
O le fea o sauniga faaola e tatau ona faia e ala i le pule o le Perisitua Mekisateko? (O le faamauga, faaeeina atu o le Perisitua Mekisateko, faaeega paia i le malumalu, ma le faamauga i le malumalu. Lisi nei sauniga i luga o le laupapa.) Na faapefea ona e vaaia le faaalia o le mana o le faaleatua i nei sauniga?
-
E tusa ai ma le fuaiupu e 22, aisea e taua ai lo tatou mauaina o sauniga o le Perisitua Mekisateko? (O le faaalia o le “mana o le faaleatua” i nei sauniga o le a mafai ai ona tatou vaai i foliga o le Atua ma ola ai.)
Tusi le upumoni lenei i luga o le laupapa: Ina ia avea e faapei o le Atua ma nonofo i Lona afioaga, e tatau ona tatou maua sauniga o le Perisitua Mekisateko.
Tagai i le lisi o sauniga o le Perisitua Mekisateko o loo i luga o le laupapa.
-
O le fea o nei sauniga e na o totonu lava o le malumalu e mafai ona maua ai?
Valaaulia se tagata o le vasega e faitau le saunoaga lenei a Elder Russell M. Nelson o le Korama a Aposetolo e Toasefululua:
“O le malumalu o se faamoemoega lea o gaoioiga uma, lesona uma, ma laasaga uma e agai ai i luma i le Ekalesia. … O sauniga o le malumalu e matuai taua lava. E le mafai ona tatou toe foi atu i le mamalu o le Atua e aunoa ma na sauniga” (“Ia Saunia mo Faamanuiaga o le Malumalu,” Liahona, Oke. 2010, 41).
Valaaulia se tagata o le vasega e faitau leotele le Mataupu Faavae ma Feagaiga 84:23. Fai atu i le vasega e mulimuli i le faitauga ma faailoa mai mea na faia e Mose e saunia ai lona nuu ina ia vaai i fofoga o le Atua. Fai atu i tagata aoga e lipoti mai mea latou te maua. Atonu e te manao e faamalamalama atu o le upu faapaia o lona uiga o le faamama ma faia ia paia. E faapaiaina i tatou e ala i le Togiola a Iesu Keriso.
Otooto le Mataupu Faavae ma Feagaiga 84:24–30 i le faamatala atu e faapea, ona sa faamaaa e le fanauga a Isaraelu o latou loto, sa aveese ai le avanoa latou te maua ai le Perisitua Mekisateko ma sauniga e o faatasi ai i lenei olaga. Ae peitai, sa faaauau pea ona fesoasoani le Alii ia latou alualu i luma. Sa Ia faatagaina le perisitua maualalo, po o le Perisitua Arona, ia faaauau pea ma i latou (tagai i le MF&F 84:26–27).
Mataupu Faavae ma Feagaiga 84:31-44
Ua aoao mai e le Alii le tautoga ma le feagaiga o le perisitua
Fai atu i se tagata o le vasega o loo umia le perisitua e tali atu i fesili nei:
-
O faapefea ona faamanuiaina oe ona o lou umia o le perisitua? O faapefea ona faamanuiaina oe ona o le umia e isi tagata o le perisitua?
Valaaulia se tagata o le vasega e faitau leotele le Mataupu Faavae ma Feagaiga 84:31-32. Fai atu i le vasega e mulimuli i le faitauga, ma vaavaai mo le faaupuga na faaaogaina e le Alii e faatatau ia i latou o e umia le perisitua.
-
Na faapefea ona faatatau atu le Alii ia i latou o e umia le perisitua? (Fesoasoani i tagata o le vasega ia malamalama e faapea, o le fuaitau “atalii o Mose” e faasino ia i latou o e umia le Perisitua Mekisateko ae o le fuaitau “atalii o Arona” e faatatau ia i latou e umia le Perisitua Arona.)
Tusi le fuaitau lenei i luga o le laupapa: Tautoga ma le Feagaiga o le Perisitua.
Faamalamalama atu e faapea, o le Mataupu Faavae ma Feagaiga 84:33–44 ua ta’ua o le tautoga ma le feagaiga o le perisitua. O nei fuaiupu o loo otooto mai ai (1) feagaiga e faia e se tagata pe a ia maua le perisitua ma (2) folafolaga ua faia e le Alii i e umia ma le faamaoni le perisitua.
Tusi le faamatalaga le uma lenei i luga o le laupapa: Afai o i latou o e maua le perisitua o le a , o le Atua o le a .
Valaaulia tagata o le vasega e suesue filemu pe taitoalua ia le Mataupu Faavae ma Feagaiga 84:33–44. Fai atu ia te i latou e faauma le faamatalaga o i luga o le laupapa e faavae i nei fuaiupu.
-
Na faapefea ona e faaumaina le faamatalaga? (E tatau ona iloa e tagata o le vasega le mataupu faavae lenei: Afai o i latou o e maua le perisitua o le a faalauteleina o latou valaauga, mulimuli i le Alii ma Ana auauna, ma uai atu i upu o le ola e faavavau, o le Atua o le a faapaiaina i latou ma tuu atu ia i latou mea uma o loo ia te Ia.)
Valaaulia se tamaitiiti e faitau leotele le saunoaga lenei mai ia Peresitene Gordon B. Hinckley:
“Tatou te faalautele lo tatou perisitua ma lo tatou valaauga pe a tatou auauna atu ma le filiga ma le naunautai i tiute ua valaauina ai i tatou e ala i le pule tatau. … Tatou te faalautele lo tatou valaauga, tatou te faalautele le malosi o lo tatou perisitua pe a tatou aapa atu i e ua puapuagatia ma faamalosi atu i e ua vaivai. … Tatou te faalautele lo tatou valaauga pe a tatou savavali ma le faamaoni ma le amiotonu” (“Ia Faalauteleina o Tatou Valaauga,” Liahona, Iul1989, 63).
Faamalamalama atu a tatou maua valaauga i le Ekalesia, tatou te maua le avanoa e saunia ai i tatou lava ma isi e maua sauniga faaola o le perisitua. Fai atu i se tamaitiiti aoga e faitau leotele le faamatalaga lenei mai ia Peresitene Thomas S. Monson:
“E faapefea la ona faalauteleina e se tasi se valaauga? E na o le faatinoina lava o le auaunaga e faatatau i ai. … Ou te faamoemoe ma lo’u loto ma lo’u agaga atoa, o alii talavou uma o e ua mauaina le perisitua o le a latou faamamaluina lena perisitua ma ia faamaoni i le faatuatuaga lea e faailoa atu pe a tuuina atu” (“Mana o le Perisitua,” Liahona, Ian. 2000, 58, 60).
-
O a nisi o auala e faalautele ai e e umia le Perisitua Arona o latou valaauga i le perisitua?
-
O le a se taimi na faamanuiaina ai oe ona sa faalautele e se tasi lona valaauga?
Fesoasoani i tagata o le vasega ia iloa o faamanuiaga o le tautoga ma feagaiga o le perisitua e le mo na o e umia le perisitua. E oo mai faamanuiaga silisili i alii ma tamaitai o e ua faamauina i le tasi ma le isi i le malumalu. Faitau le faamatalaga lenei mai ia Elder Russell M. Nelson:
“E i ai se aso o le a ma nonofo faatasi ai ma Sister Nelson i i le mafutaga faatasi ma lo matou aiga ma le Alii e faavavau. O le a tatou faamaoni i feagaiga na osia i le malumalu ma le tautoga ma feagaiga o le perisitua, lea na faamautinoa mai ia i tatou, i afioga a le Alii, o ‘mea uma ua i ai i loʼu Tamā o le a tuu atu ia te [outou]‘ (MF&F 84:38).
“E maua foi e tamaitai faamaoni faamanuiaga o le perisitua. Mafaufau i na upu ‘mea uma ua i ai i lo’u Tamā.’ … O lona uiga e leai se taui faalelalolagi—leai se isi manuia—e mafai ona sui i manuia o le a tuuina mai e le Alii i luga o i latou o e alolofa ia te Ia, tausi Ana poloaiga (tagai i le Moronae 4:3), ma tumau e oo i le iuga (tagai i le MF&F 14:7)” (“Identity, Priority, and Blessings,” Ensign, Aug. 2001, 10).
Ina ia fesoasoani i tagata o le vasega ia malamalama i folafolaga faapitoa e osia e le Alii o se vaega o le tautoga ma feagaiga o le perisitua, tusi le faamatalaga le uma lenei i luga o le laupapa: Ua folafola mai e le Alii e …
Valaaulia tagata o le vasega e toe faitau filemu le Mataupu Faavae ma Feagaiga 84:33–34, 38, 42. Fai atu ia i latou e faailoa mai faamanuiaga ua folafola mai e le Alii o se vaega o le tautoga ma feagaiga o le perisitua. Atonu e te manao e tusi a latou tali i luga o le laupapa. Atonu latou te ta‘ua o le Alii o le a: (1) faapaiaina i tatou e ala i le Agaga (tagai i le fuaiupu e 33); (2) faafou o tatou tino (tagai i le fuaiupu e 33); (3) faitau i tatou faatasi ma fanau a Aperaamo—i se isi faaupuga, tuu mai ia i tatou faamanuiaga na folafolaina ia Aperaamo ma ana fanau (tagai i le fuaiupu e 34); (4) fai i tatou ma Lana ʼau filifilia, po o le filifilia (tagai i le fuaiupu e 34); (5) tuu mai ia i tatou mea uma o loo i le Tama (tagai i le fuaiupu e 38); ma le (6) tuu atu i Ana agelu le tiute e faatatau ia i tatou (tagai i le fuaiupu e 42). (A o ta‘ua e tagata o le vasega le folafolaga i le fuaiupu e 38, atonu e te manao e uunaia i latou e mafaufau i uiga o le Atua ma le mamalu, ae le o ni mea o le olaga nei. Mo se faataitaiga, e mafai ona tatou maua Lana upumoni, Lona alofa, Lona olioli, ma Lona filemu. E mafai ona faamanuiaina i tatou i se atoatoaga o Lona mana.)
Valaaulia tagata o le vasega e faasoa mai pe aisea e anoa ai ia i latou le perisitua. Mafaufau e faasoa atu lau molimau e uiga i faamanuiaga o le perisitua.
Tala ma Faamatalaga o Talaaga
Mataupu Faavae ma Feagaiga 84:3–5. “I le tupulaga lenei”
I le Mataupu Faavae ma Feagaiga 84:3–5 tatou te faitau ai i le faaaliga a le Alii e faapea, o le a fausia se malumalu i le aai o Ierusalema Fou i le setete o Misuri. I lenei faaaliga, na tuuina mai i le 1832, na fetalai mai ai le Alii o le malumalu o le a fausia “i le tupulaga lenei” (MF&F 84:4–5). O lena malumalu e lei fausia, ae ua poloaiina e le Alii Lana Au Paia e fausia isi malumalu e tele. Ua tuusaunoa e le Alii Lona nuu mo se taimi le tumau mai le fausiaina o le malumalu i le aai o Ierusalema Fou (tagai i le MF&F 124:49–51).
E tusa ai ma le fuaitau “i le tupulaga lenei,” na tusia ai e Peresitene Iosefa Filitia Samita:
“O le faamatalaga na avea ma se maagao i nisi ma ua i ai faauigaga eseese o le uiga o se tupulaga. Ua taofi nisi o se tupulaga e tasi le selau tausaga; o isi e tasi le selau lua sefulu tausaga; ae o isi o se tupulaga e pei ona faaalia i lenei ma isi mau, ua faatatau i se vaitaimi e le gata. Na fetalai le Faaola: ‘O se tupulaga amioleaga ma le mulilulua e sailia se faailoga.’ O lenei mea sa le’i faatatau i se vaitaimi o ni tausaga, ae o se vaitaimi o le amioleaga. O se tupulaga e ono faauiga o le vaitaimi o le tisipenisione i le taimi nei. E le gata i lea, o le faamatalaga e agavaa i lenei faaaliga i le upusii o loo i luga. ‘Aua e moni e le mavae le tupulaga lenei,’ ma isi mea faapena. Tatou te le o faamoemoe e tuu se faauigaga i lenei faamatalaga, ae ia faapea atu, o nei tulaga o loo i aao o le Alii ma o le a Ia faataunuuina ana faamoemoega pe a ia silafia ua oo i le taimi” (Church History and Modern Revelation, 2 vols. [1953], 1:337).
Mataupu Faavae ma Feagaiga 84:24-25. “Na ave ai e ia … ma le Perisitua Paia”
I le Mataupu Faavae ma Feagaiga 84:25, tatou te faitau ai na ave e le Alii le perisitua paia mai le taulotoaiga o le fanauga a Isaraelu o e sa faatasi ma Mose i le vao. Na faamalamalama mai e Elder Bruce R. McConkie o le Korama a Aposetolo e Toasefululua e faapea, “na ave e le [Alii] le Perisitua Mekisateko, lea e faagaoioia ai le talalelei, mai lo latou lotolotoi i le uiga e faapea, sa le’i faaauauina ma tuufaasolo mai i le tasi tagata e umia le perisitua i le isi, i le faiga masani ma le uiga masani o le upu. O ki o le perisitua na aveesea faatasi ma Mose, ma o soo se faauuga lava o le perisitua i le lumanai na manaomia ai se faatagaga faapitoa faalelagi”(The Mortal Messiah, 4 vols. [1979–81], 1:60).
Na faamalamalama atili mai e Peresitene Ezra Taft Benson:
‘Ua tatou iloa e ala i le Faaliliuga a Iosefa Samita e faapea, o le Alii … na faatonuina Mose: ‘O le a ou aveesea le perisitua mai lo latou lotolotoi; e faapena foi i la’u faatulagaga paia, ma ona sauniga.’ (FIS Esoto 34:1; ua faaopoopo le faatusilima.)
“O lenei perisitua maualuga, faapea ma ona sauniga e o mai faatasi ai, sa aveesea mai ia Isaraelu seia oo i le taimi o Iesu Keriso. …
“I le va o Mose ma Keriso sa na o nisi o perofeta sa i ai le aia tatau i le perisitua maualuga ma faamanuiaga ia e mafai ona aumai ai tagata i totonu o le afioaga o le Atua” (“What I Hope You Will Teach Your Children about the Temple,” Ensign, Aok. 1985, 9).
Mataupu Faavae ma Feagaiga 84:28. Faauuina e le agelu
I le faamatalaga lenei, na faatatau ai Elder Bruce R. McConkie o le Korama a Aposetolo e Toasefululua, i le Mataupu Faavae ma Feagaiga 84:28 ma faamalamalama mai e faapea, ina ua valu aso o le matua o Ioane le Papatiso, sa faauuina ai o ia, pe filifilia, e faataunuuina se misiona—sa lei faauuina o ia i le perisitua i lena taimi. Sa faauuina Ioane e faatoilalo le malo o tagata Iutaia, ma ia saunia le ala o le Alii. Na folafolaina e se agelu o le a ia faia.
“Fai mai Luka: ‘Na oo mai le afioga a le Atua ia Ioane le atalii o Sakaria i le vao.’ Mulimuli ane, ua fai mai Ioane: ‘O Ia o lē na auina mai au e papatiso i le vai, o ia lava lea na fai mai ia te au,’ ia mea e faapea ma faapea. (Ioane 1:33.) Po o ai na auina mai o ia tatou te le iloa. Tatou te iloa ‘sa papatisoina o ia a’o i ai lava o ia i lona tamaitiiti [o lona uiga, ina ua valu aso o lona matua], ma sa faauuina e le agelu a le Atua i lenei mana i le taimi na valu ai aso o lona matua [ia matau lelei, e le i le Perisitua Arona, ae] ia faatoilalo le malo o Iutaia, ma faasa’osa’o le ala o le Alii i luma o mata o lona nuu, e saunia ai i latou mo le afio mai o le Alii, o lē ua tuu atu i ona lima le mana uma.’ (MF&F 84:24.) Tatou te le iloa pe o anafea na ia mauaina ai le Perisitua Arona, ae e mautinoa lava na oo mai ia te ia ina ua mavae lona papatisoga, i le po o le a lava le matua sa tatau ai, ma a’o le’i auina atu e le tagata o le na te le’i iloa le igoa e talai atu ma papatiso i le vai” (The Mortal Messiah, 4 vols. [1979–81], 1:384–85).
Mataupu Faavae ma Feagaiga 84:33-44. Faatuatua e ala i le tautoga ma le feagaiga o le perisitua
Na saunoa Peresitene Henry B. Eyring e uiga i le faatuatua e tatau ona i ai i e e umia le perisitua, pe a ulufale atu i le tautinoga ma le feagaiga o le perisitua:
“O le ola agavaa mo folafolaga o le tautoga ma le feagaiga e aumaia ai le meaalofa sili o meaalofa uma a le Atua: ola faavavau. O se faamoemoega lena o le Perisitua Mekisateko. O le tausia o feagaiga pe a tatou mauaina le perisitua ma le faafouina i sauniga o le malumalu, ua folafola mai ai ia i tatou i se tautoga na osia e lo tatou Tama Faalelagi, o Elohima, e faapea o le a tatou maua le atoatoaga o Lona mamalu ma ola ai e pei ona soifua ai o Ia. O le a tatou maua le faamanuiaga o le faamauina i se aiga e faavavau faatasi ai ma le folafolaga o le uluola e faavavau. …
“… E le itiiti ifo ma le lua mafuaaga e tatau ai ona e mautinoa nai lo le lotovaivai i faasalaga o le a mulimuli mai i le toilalo e tausia le tautoga ma le feagaiga po o le filifili e le taliaina. E tusa lava pe e te taliaina le tautoga ma le feagaiga ma iloa ai ua faigata tele, pe e te toilalo foi e taliaina, e tutusa lava le faasalaga. O lea la, e le tau fesiligia, o lou auala sili ona lelei e faapea ia te au o le taliaina lea o le perisitua paia ma taumafai ma o tatou loto atoa e tausia ona feagaiga. Afai tatou te filifili e aua ne’i taliaina, e mautinoa lava lo tatou le mauaina o le avanoa mo le ola faavavau. Afai tatou te taliaina, o le a faamanuiaina i tatou i le fesoasoani mai o le Atua, ma o le a tatou maua le ola faavavau.
“Ae e i ai se isi mafuaaga ia filifili ai nei o le a e taumafai ma lou loto atoa ina ia agavaa mo lena tautoga ma le feagaiga, ma ia maua le faatuatua o le a e manuia. Ua folafola atu e le Atua ia te oe le fesoasoani ma le mana, ma afai e faaaoga lou faatuatua, o le a e manuia ai.
Sei ou faamatalaina atu nisi o faamanuiaga o le a e mauaina a o e agai i luma i le faatuatua.
“Muamua, o le mea moni lava faapea ua ofoina atu ia te oe le tautoga ma le feagaiga o se faamaoniga lea ua filifilia oe e le Atua i le iloaina lea o lou mana ma le malosi. Na Ia silafiaina oe talu ona oulua mafuta ma Ia i le lalolagi o agaga. O Lona muai silafiaina o lou malosi ua Ia faatagaina ai oe ina ia e sailia le Ekalesia moni a Iesu Keriso ma ofoina atu i ai le perisitua. E mafai ona e lagonaina le mautinoa aua ua ia te oe le faamaoniga o Lona mautinoaina o oe.
“Lona lua, a o e taumafai e tausia au feagaiga ua folafola mai e le Faaola Lana lava fesoasoani. Ua Ia fetalai mai faapea a o e agai i luma i le faamamaluina o le perisitua, “Ou te i ai foi, aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou’ [MF&F 84:88] “(”Faatuatua ma le Tautoga ma le Feagaiga o le Perisitua,“ Ensign po o le Liahona, Me 2008, 61–62).