Lesona 3
O Le Liliuese Tele
Folasaga
Na faatuina e Iesu Keriso Lana Ekalesia i le taimi o Lana galuega i le lalolagi. “Sa faaauau pea ona faaaogaina e Aposetolo ia ki na Ia tuuina atu ia i latou ina ua mavae le Afio Ae o Keriso. Ae ona o le le usiusitai ma le leai o se faatuatua i tagata, o lea na maliliu ai Aposetolo e aunoa ma le tuufaasoloina atu o ki i nisi e suitulaga i ai. Tatou te taua lena vaitau matautia ‘o le Liliuese’” (Henry B. Eyring, ”O Le Ekalesia Moni ma le Ola,“ Ensign po o le Liahona, Me 2008, 21). Ona o lenei faateleina o le liliuese, na aveese ai e le Alii le pule o le perisitua mai le tagata. O le malamalama i le Liliuese Tele e fesoasoani tatou te malamalama lelei ai i le manaomia o le Toefuataiga o le talalelei a Iesu Keriso i aso e gata ai.
Fautuaga mo le Aoaoina Atu
Manatua: Ona o loo fautuaina mai i lenei lesona le faaaogaina o se mea faitino ma ni ata e avea ma ni fesoasoani vaaia e aoao atu ai, atonu e te manao e faaputu mai ni nai aitema a’o le’i oo i le taimi e faaaoga ai. O nei mea e aofia ai se vaega o se masini ma ata nei: Keriso o loo Faauuina le Au Aposetolo (Tusi Ata o le Talalelei [2009], nu. 38; tagai foi i le LDS.org), Alii Talavou o loo Papatisoina (nu. 103), O Le Meaalofa o le Agaga Paia (nu. 105), Faamanuiaina o le Faamanatuga (nu. 107), ma Ulugalii Talavou o loo Malaga Atu i le Malumalu (nu. 120).
Sa faatuina e Iesu Keriso Lana Ekalesia a’o i ai o Ia i le lalolagi
Aumai i le vasega se vaega o se masini lea e manaomia mo se masini po o se vaega o se masini e faaola [ai se masini] (e pei o se uaea e sulu i le paoa mo se masini po o se komepiuta, o se filifili po o se uili mai se uila, po o ni sipaka mai se taavale). Faaali atu i tagata o le vasega le vaega o le masini ma fesili i ai po o le a le mea e anaina lea vaega ae o le a foi le mea na te faia. (Afai e te le mauaina se vaega o se masini, tusi se ata i luga o le laupapa.)
-
O le a le mea e tupu pe a le i ai lenei vaega mai le masini e anaina?
-
E ono mafai faapefea ona faatusa lenei faataitaiga i le Ekalesia a Iesu Keriso? (O Le Ekalesia a Iesu Keriso e i ai ni vaega taua; a aunoa ma nei vaega e le mafai ona e faagaoioia pe i ai foi.)
Fai atu i tagata o le vasega e amata ona mafaufau po o a vaega o le Ekalesia e taua i lona faagaoioiga i le ofoina atu o le faaolataga i le lalolagi. Tusi le ulutala Elemene Taua o le Ekalesia a Iesu Keriso i luga o le laupapa.
Valaaulia se tagata o le vasega e faitau leotele le Efeso 2:19–22 . Fai atu i le vasega e mulimuli i le faitauga ma faailoa mai le faavae lea na fausia ai e Iesu Keriso Lana Ekalesia i le taimi o Lana auaunaga faaletino. (Atonu e te manao e tuu atu i tagata o le vasega numera o itulau, e fesoasoani latou te sueina ai mau o le Feagaiga Fou o le a latou faitauina i le taimi o le lesona lenei.) A o latou lipoti mai mea na latou maua, tusi le upumoni lenei i lalo o ulutala o loo i luga o le laupapa: O Aposetolo ma perofeta e fausia ai le faavae o le Ekalesia a Iesu Keriso. Atonu e te manao e fautua atu i tagata o le vasega e faailoga le fuaitau i le Efeso 2:20 lea o loo aoao mai ai lenei upumoni.
-
Aisea e te manatu ai o aposetolo ma perofeta ua ta’ua o le “faavae” o le Ekalesia?
Ina ia fesoasoani i tagata o le vasega e faailoa mai le isi elemene taua o le Ekalesia a Iesu Keriso, faaali atu le ata O Keriso o loo Faauuina Aposetolo (Tusi Ata o le Talalelei, nu. 38). Fai atu i se tagata o le vasega e faamatala mai le mea o loo tupu i le ata. Ona valaaulia lea o se tagata o le vasega e faitau leotele le Mareko 3:13–14. Fai atu i le vasega e mulimuli i le faitauga ma faailoa mai se isi elemene o le Ekalesia e taua mo le faaolataga o fanau a le Atua. A uma ona lipoti mai e tagata o le vasega mea na latou maua, tusi le upumoni lenei i luga o le laupapa: O le pule o le Perisitua e manaomia mo le mauaina o sauniga ma feagaiga o le faaolataga.
Ia faamalamalama atu, a o lei tuua e le Faaola le lalolagi, sa Ia tuuina atu i Ana Aposetolo le pule e taitai ai le Ekalesia ma galue i le suafa o le Atua mo le faaolataga o Lana fanau.
Valaaulia se tagata o le vasega e faitau le saunoaga a Elder D. Todd Christofferson o le Korama a Aposetolo e Toasefululua. Fai atu i le vasega e faailoa mai se isi elemene taua o le Ekalesia moni:
“O upumoni ma mataupu faavae ua tatou mauaina sa oo mai ma o le a faaauau pea ona oo mai e ala i faaaliga faalelagi. O nisi o faatuatuaga ua leva … e ono feteenai ai manatu i mataupu faaleaoaoga faavae. … Ae i le Ekalesia i aso nei, e pei lava o aso anamua, o loo faamautuina le mataupu faavae a Keriso po o le faasa’oina o mea sese faalemataupu faavae, o se mataupu lea o faaaliga faalelagi ia i latou ua faaee i ai e le Alii le pule faa-Aposetolo” (“O Le Mataupu Faavae a Keriso,” Ensign po o le Liahona, Me 2012, 86-87).
-
E tusa ai ma le saunoaga a Elder Christofferson, o le a se tasi o matafaioi taua a perofeta ma aposetolo? (E ono faaaoga e tagata o le vasega ni upu eseese, ae ia mautinoa ua latou faailoa mai le upumoni lenei: O aposetolo ma perofeta e faatuina aoaoga faavae sao e ala i faaaliga faalelagi. Atonu e te manao e faamanatu atu i tagata o le vasega o aoaoga faavae e faatatau i upumoni taua ma faavavau o le talalelei a Iesu Keriso. Faaopoopo le upumoni lenei i le lisi o loo i luga o le laupapa.)
Faaali atu i tagata o le vasega le lisi o Aoaoga Faavae Autu o loo maua i le faaopoopoga o le tusi lesona lenei po o i api talaaga a tagata o le vasega mo le suesueina o tusitusiga paia. Faamalamalama atu ua uunaia tagata o le vasega seminare ina ia maua se malamalamaaga loloto atu o Aoaoga Faavae Autu i o latou taimi i le seminare. O le faia o lena mea, o le a fesoasoani ai ia i latou e faamalolosia a latou molimau ma saunia i latou e aoao atu le talalelei i isi. Valaaulia tagata o le vasega e vaavaai mo nei aoaoga faavae i le taimi o la latou suesuega o le Mataupu Faavae ma Feagaiga i le tausaga lenei.
Valaaulia tagata o le vasega e filifili se tasi o Aoaoga Faavae Autu e taua ia i latou, ma fai atu i nisi o i latou e faamatala faapuupuu mai pe aisea ua latou filifilia ai lena aoaoga faavae autu.
-
Aisea e taua ai le aoaoina ma malamalama lelei i aoaoga faavae sa’o i le Ekalesia a le Alii? (A o tali mai tagata o le vasega, atonu e te manao e faasoa atu le saunoaga lenei a Peresitene Boyd K. Packer o le Korama a Aposetolo e Toasefululua: “O aoaoga faavae moni, pe a malamalama i ai, e suia ai uiga faaalia ma amioga” [“Little Children,” Ensign, Nov. 1986, 17].)
Ina ia fesoasoani i tagata o le vasega e mafaufau e uiga i le isi elemene taua o le Ekalesia a le Alii, faaali atu ata Alii Talavou o loo Papatisoina (Tusi Ata o le Talalelei, nu. 103), O Le Meaalofa o le Agaga Paia (nu. 105), Faamanuiaina o le Faamanatuga (nu. 107), ma Ulugalii Talavou o loo Malaga Atu i le Malumalu (nu. 120). Fesili atu i tagata o le vasega po o le a le mea e tutusa ai le papatisoga, faamauga [o le papatisoga], o le faamanatuga, ma le faamauga [i le malumalu]. (O sauniga ia mea uma.)
-
O le a se sauniga? (O se faatinoga paia, ma aloaia e faia e ala i le pule o le perisitua.)
-
Aisea e te manatu ai, o sauniga o se vaega taua o le Ekalesia a Iesu Keriso? (Ina ia fesoasoani i tagata o le vasega e tali lenei fesili, atonu e te manao e valaaulia i latou e faitau le Ioane 3:5 ona fai atu lea ia te i latou, pe faamata o le a se mea semanu e tupu pe ana faapea e leai se avanoa mo i latou e papatisoina ai. Ia faamamafa atu o sauniga faaola ma o le perisitua e o faatasi ma feagaiga, o ni maliega paia lea faatasi ma le Atua.)
Molimau atu e faapea, i le Ekalesia a Iesu Keriso e mafai ona tatou maua ai sauniga e manaomia mo lo tatou faaolataga. Faaopoopo atu le upumoni lenei i le lisi o loo i luga o le laupapa.
Faamalamalama atu, ina ua mavae le maliu o Iesu Keriso, sa toetu mai o Ia, ma sa Afio A‘e o Ia i le lagi. Ua le o toe i ai nei o Ia i le tino e taitai le Ekalesia i le lalolagi. E ui lava e le o i ai o Ia i le tino i le lalolagi, ae o loo taitai ma taiala e Iesu Keriso ia Ana Aposetolo e ala i faaaliga. I lalo o le taitaiga a Ana Aposetolo, sa vave lava ona salalau atu le Ekalesia anamua ma e faitau afe sa papatisoina. Sa faavaeina ni faapotopotoga o Au Paia i le tele o vaega o le Malo o Roma. Sa valaauina toeaina, epikopo, tiakono, ositaulaga, aoao, ma fai evagelia (peteriaka), ma tuuina atu i ai le pule o le perisitua e le au Aposetolo.
O le Liliuese Tele na tupu i le vaitaimi o seneturi na sosoo ma le galuega faaletino a le Alii
Tusi le upumoni lenei i luga o le laupapa: E tupu le liliuese pe a fulitua tagata mai le aoaoga faavae moni o le talalelei ma teena auauna faamaonia a le Alii.
Faamalamalama atu, na tutupu ni periota o le liliuese aoao i le talafaasolopito o le lalolagi. O se tasi o faataitaiga o le Liliuese Tele lea na tupu ina ua mavae ona faatuina e le Faaola Lana Ekalesia (tagai 2 Tesalonia 2:1–3). I le mavae ai o le maliliu o Aposetolo o le Faaola, sa faapea ona faaleagaina mataupu faavae o le talalelei ma faia ai ni suiga e le’i faatagaina i le faatulagaga o le Ekalesia ma i sauniga o le perisitua. (Tagai i le Faamaoni i le Faatuatua: O Se Tusitaiala o le Talalelei [2004], 92–93.)
Tusi mau faasino nei i luga o le laupapa: Galuega 12:1-3; 2 Timoteo 4:3-4; 2 Peteru 2:1-2.
Faamalamalama atu e ui lava i taumafaiga a le au Aposetolo, sa fetaiai lava le Ekalesia anamua ma faamata’uga. Vaevae le vasega i ni vaega se tolu. Valaaulia vaega taitasi e suesue se tasi o fuaitau o mau o loo i luga o le laupapa, ma vaavaai mo se mea na faamata‘uina le Ekalesia. (Mo i latou o loo faitauina le Galuega 12:1-3, atonu e te manao e faamanino atu o Iakopo ma Peteru o ni Aposetolo.) A maea le taimi, valaaulia se tagata se toatasi o le vasega mai vaega taitasi e lipoti mai mea na maua e le vaega.
-
Aisea e te manatu ai sa matuai lamatia lava nei faamatauga i le Ekalesia?
Valaaulia se tagata o le vasega e faitau le saunoaga lenei a Peresitene Boyd K. Packer o le Korama a Aposetolo e Toasefululua, o le sa saunoa e uiga i le tele o mea na ma’uma’u na oo i le Ekalesia i le Feagaiga Fou i lea vaitaimi:
“Na fasiotia e Herota ia Iakopo i Ierusalema. O Peteru ma Paulo na maliliu i Roma. Fai mai le talitonuga e faapea o Filipo na malaga i Sasae. E sili atu ona tele isi mea nai lo nei mea tatou te le iloa.
“Sa latou taapeape solo; sa latou aoao atu, molimau atu, ma faatuina le Ekalesia. Ma na maliliu i latou mo o latou talitonuga, ma o le maliliu ai o i latou, na oo mai ai seneturi pogisa o le liliuese” (“O Le Toasefululua,” Ensign po o le Liahona, Me 2008, 84).
Valaaulia se isi tagata o le vasega e faaauau le faitauina o le faamalamalamaga a Peresitene Packer e uiga i mea e sili ona taua na leiloloa na mafua mai i le Liliuese Tele:
“O le mea aupito sili ona taua na leiloa i le Liliuese o le pule na umia e le Toasefululua—o ki o le perisitua. Mo le Ekalesia ina ia avea ma Ana Ekalesia, e tatau ona i ai se Korama a le Toasefululua o e umia ki ma faaee atu ia ki i isi“ (“The Twelve,” 84).
-
O le a faapefea ona aafia isi elemene taua o le Ekalesia i le leai o se pule o le perisitua?
-
Pe sa i ai se auala e mafai e tagata ona toe faaleleia ai le Ekalesia e aunoa ma aposetolo ma perofeta, pule o le perisitua, po o le malamalama sa’o e uiga i aoaoga faavae a Iesu Keriso? Aisea e ioe pe aisea e leai ai?
Valaaulia se tagata o le vasega e faitau le faamatalaga lea a Peresitene Packer:
“A o mavae atu le tele o seneturi, sa emoemo le afi ma mumu itiiti lava. Sa suia pe na tuulafoaia foi sauniga. Sa motusia le laina, ma na leai se pule e faaee atu ai le meaalofa o le Agaga Paia. Sa nofoia e Tausaga Pogisa o le liliuese le lalolagi” (“The Cloven Tongues of Fire,” Ensign, Me 2000, 8).
-
Aisea e te manatu ai e taua le malamalama i le Liliuese Tele ma ona aafiaga? (E ui e ono faailoa mai e tagata o le vasega ni mafuaaga eseese, ia faamamafa atu o le malamalama i lenei liliu ese tele e fesoasoani tatou te iloa ai sa manaomia lava se toefuataiga o le aoaoga faavae ma le pule a Iesu Keriso ina ia faatoilalo ai aafiaga o le Liliuese Tele.)
Faamalamalama atu e faapea, e ui lava o le a le toe i ai se isi liliuese aoao mai le upumoni, e tatau ona taitasi i tatou ona leoleo mai le liliuese faaletagata lava ia e ala i le tausia o feagaiga, usiusitai i poloaiga, mulimuli i taitai o le Ekalesia, aai ma feinu i le faamanatuga, ma faamalosia i taimi uma a tatou molimau e ala i le suesueina o tusitusiga paia, tatalo, ma auauna atu i aso uma (tagai i le Faamaoni i le Faatuatua, 92–93). Faaiu i le molimau atu e uiga i le alofa o le Tama Faalelagi mo Ana fanau, o le moni o le Liliuese Tele, ma o le meaalofa maoae o le Toefuataiga o le talalelei.
Tala ma Faamatalaga o Talaaga
Na tupu le liliuese ona o le le usiusitai ma le leai o se faatuatua
Na faamatala mai e Peresitene Henry B. Eyring o le Au Peresitene Sili, o se tasi o mafuaaga na tupu ai le Liliuese o le leai o se faatuatua i totonu o tagata o le Ekalesia:
“Sa lei agavaa pea tagata o le Atua e mauaina le aafiaga ofoofogia lea sa tatou faasoaina i lenei aso. Sa faaauau pea ona faaaogaina e Aposetolo ia ki na Ia tuuina atu ia i latou ina ua mavae le Afio Ae o Keriso. Ae ona o le le usiusitai ma le leai o se faatuatua i tagata, o lea na maliliu ai Aposetolo e aunoa ma le tuufaasoloina atu o ki i nisi e suitulaga i ai. Tatou te taua lena vaitau matautia ‘o le Liliuese.’ Ana fai e maua e tagata o le Ekalesia i na aso le avanoa ma le naunautaiga e faaaoga ai le faatuatua e pei ona outou maua i nei aso, semanu e le aveeseina e le Alii ia ki o le perisitua mai le lalolagi. O se aso la lenei e tulagaese ma faavavau lona taua i le talafaasolopito o le lalolagi ma le fanau a lo tatou Tama Faalelagi.
“O lenei, o la tatou matafaioi o le tumau lea i le agavaa mo le faatuatua e moomia mo i tatou ina ia faataunuuina ai la tatou folafolaga e lagolagoina i latou o e ua valaauina. Sa matuai fiafia le Alii i le Ekalesia i le amataga o le Toefuataiga, e pei foi ona i ai o Ia i aso nei. Ae sa Ia lapataia tagata i na taimi, e pei ona Ia faia nei, e le mafai ona Ia vaai atu i le agasala ma faatagaina ai sina mea itiiti lava. Mo i tatou e lagolagoina i latou o e ua valaauina i le asō e tatau ona tatou iloiloina o tatou olaga, salamo pe a talafeagai ai, ia folafola atu e tausia poloaiga a le Alii, ma mulimuli i Ana auauna. Ua lapatai mai le Alii e faapea afai tatou te le faia na mea, o le a alu ese le Agaga Paia, tatou te le toe maua le malamalama lea sa tatou mauaina, ma o le a le mafai ona tatou tausia le folafolaga ua tatou faia i lenei aso e lagolagoina ia auauna a le Alii i Lana Ekalesia moni” (“O Le Ekalesia Moni ma le Ola,” Ensign po o le Liahona, Me 2008, 21).
Sa le’i fulitua le Atua i Lana fanau i le taimi o le Liliuese
Na aoao mai Elder M. Russell Ballard o le Korama a Aposetolo e Toasefululua e faapea, e oo lava i taimi pogisa ma le liliuese, e le fulitua lava le Tama Faalelagi i Ana fanau:
“I se taimi puupuu o tausaga na aofia i le Feagaiga Fou … sa fulitua ai tagata ia Keriso ma Ana Aposetolo. Sa matua tele lava le faaletonu lea ua tatou taua o le Liliuese Tele, lea na taitai atu ai i le tele o seneturi o le paie ma le valelea faaleagaga e taua o le Vaitau o le Pogisa.
“Ia, e tatau ona ou matua faamaninoina nei vaitaimi ua mavae o le tupu pea o le liliuese ma le pogisa faaleagaga. E tutusa le alofa o lo tatou Tama Faalelagi i Ana fanau uma lava, ma e finagalo o Ia ia latou maua uma faamanuiaga o le talalelei i o latou olaga. E le o aveesea le malamalama faaleagaga ona ua tuulafoai e le Atua ia Lana fanau. Ae e tupu le pogisa faaleagaga pe a tuulafoai e Lana fanau uma o Ia. O se taunuuga masani o filifiliga leaga na faia e tagata taitoatasi, nuu, atunuu, ma tagata uma lava. Ua faafia ona faamaonia lenei mea i le aluga o le olaga. O se tasi o lesona maoae o lenei mamanu iloga o le, o a tatou filifiliga, o se tagata toatasi pe o tagata uma foi, e iu ai i taunuuga faaleagaga mo i tatou lava ma a tatou fanau” (“Aoaoina o Lesona o Aso ua Mavae,” Ensign po o le Liahona, Me 2009, 32).