Mataupu Faavae ma Feagaiga 66

Folasaga

Ina ua uma ona papatisoina William E. McLellin i le taumafanafana o le 1831, sa ia taliaina se valaauga e talai atu le talalelei. Ia Oketopa, sa malaga atu ai o ia i Ohaio e auai i se konafesi a le Ekalesia. O iina sa ia feiloai ai i le Perofeta o Iosefa Samita, ma i le aso 29 o Oketopa, 1831, sa talosaga atu ai o ia ia Iosefa Samita e fesili i le Alii mo ia. O le tali mai i lenei talosaga, na tuuina mai ai e le Alii ia Iosefa Samita le faaaliga ua faamaumauina i le Mataupu Faavae ma Feagaiga 66. O lenei faaaliga o loo i ai ni fautuaga patino e faatatau i le tulaga faaleagaga o Uso McLellin, lona valaauga e talai atu le talalelei, ma lona gafatia ona maua ni faamanuiaga maoae.

Fautuaga mo le Aoaoina Atu

Mataupu Faavae ma Feagaiga 66:1–3

Na tautino mai e le Alii ua faamanuiaina William E. McLellin ona ua ia mauaina le talalelei

Ao lei amataina le vasega, kopi le ata lenei i luga o le laupapa.

A o amataina le vasega, valaaulia tagata o le vasega e iloilo le ata o loo i luga o le laupapa. Fai atu ia i latou e mafaufau loloto ma le filemu po o fea o le a latou tuuina i ai i latou lava i luga o le ata. Ia fautua atu foi e mafaufau po o le fea o itu o loo latou agai i ai—latalata atili atu i le Atua po o le mamao ese mai ia te Ia. Ona valaaulia lea o se tagata aoga e faitau leotele le saunoaga lenei mai ia Peresitene Henry B. Eyring o le Au Peresitene Sili. Fai atu i le vasega e faalogologo mo auala e mafai ona tatou faalatalata atili atu ai i le Atua.

“Afai e te fia faalatalata pea i se tasi e pele ia te oe, ae o loo mamao ese mai ia te oe, e te iloa lava le ala e fai ai. O le a e sailia se ala e te talanoa atu ai ia te i latou, o le a e faalogo atu ia te i latou, ma o le a e iloa foi ni ala e faia ai ni mea mo i latou taitoatasi. O le faateleina o le tupu soo o lena mea, o le umi atu foi lena e faaauau ai, o le loloto atili foi lena o le sootaga o le alofa [i le va ma i latou]. Afai e tele se taimi e alu e aunoa ma se toe talanoa atu i ai, faalogo atu i ai, ma faia se mea mo i latou, o le a faavaivaia lea sootaga.

“E atoatoa ma mamana le Atua, a o oe ma a’u o ni tagata faaletino. Peitai o Ia o lo tatou Tama, e alofa o ia ia i tatou, ma ua ia ofoina mai lea lava avanoa e faalatalata atu ai ia te ia e pei ona faia i se uo pele. Ma o le a e faia foi i lea lava ala e tasi: talanoa, faalogo, ma faia” (“Ia Faalatalata i le Atua,” Liahona, Iulai 1991, 72).

E tusa ai ma le saunoaga a Peresitene Eyring, e faapefea ona tatou faalatalata atili atu i le Atua? O le a sou manatu i le uiga o le talanoa, faalogo, ma faia?

Faamalamalama atu faapea, i aso popofou o le Ekalesia, sa faalatalata atu ai se tagata e igoa ia William E. McLellin i le Atua ina ua ia iloa e uiga i le talalelei toefuataiina. Na papatisoina o ia i le aso 20 o Aokuso, 1831. E le’i leva lena, ae faauuina o ia o se toeaina, ma sa la o atu ma Ailama Samita mo ni nai vaiaso o se faifeautalai. Ia Oketopa 1831, sa ia malaga atu ai i Ohaio mo se konafesi a le Ekalesia. A o i ai iina, sa ia feiloai ai i le Perofeta o Iosefa Samita. I le aso 29 o Oketopa, sa tatalo faalilolilo ai Uso McLellin, ma ole atu i le Alii e faaali mai tali i ni fesili faapitoa se lima e ala mai ia Iosefa Samita. E aunoa ma le tauina atu ia Iosefa Samita o fesili, na talosagaina ai e Uso McLellin se faaaliga. A o faalau mai e le Perofeta le faaaliga o loo maua i le Mataupu Faavae ma Feagaiga 66, na iloa ai e Uso McLellin ua taliina mai ai ana fesili taitasi. Na tuuina mai e le Alii ia te ia ni faatonuga ma ni lapataiga e fesoasoani ia te ia e tumau faamaoni ai ma iu ai ina maua le ola e faavavau.

Valaaulia se tagata o le vasega e faitau leotele le Mataupu Faavae ma Feagaiga 66:1–2. Fai atu i le vasega e mulimuli i le faitauga, ma vaavaai mo mafuaaga na faamanuiaina e le Alii ia Uso McLellin i le taimi o le faaaliga lenei.

Aisea na mafai ai e Uso McLellin ona maua faamanuiaga mai le Alii? (Ona sa liliuese o ia mai ana agasala, maua upumoni a le Alii, ma maua le atoatoa o le talalelei.)

Valaaulia tagata o le vasega e faitau filemu le Mataupu Faavae ma Feagaiga 66:3 ma vaavaai mo le mea na fetalai mai le Alii sa manaomia pea ona fai e Uso McLellin. Fai atu i tagata aoga e lipoti mai mea na latou aoaoina.

O le a sou manatu i le uiga o le “mamā, ae ua lē mamā atoa”? (Atonu e manaomia ona e fesoasoani atu i tagata aoga ia malamalama, e ui lava sa tele se alualu i luma o Uso McLellin ma na faamanuiaina i ana taumafaiga, ae sa manaomia lava ona salamo i nisi o agasala.)
O le a se mea e mafai ona tatou aoao mai i le fautuaga a le Alii i le fuaiupu e 3? (E tatau ona faailoa mai e tagata o le vasega le aoaoga faavae lenei: Ua poloaiina i tatou e salamo i a tatou agasala uma. Tusi lenei aoaoga faavae i le laupapa.)
Aisea e taua ai le salamo i a tatou agasala uma, ae le na o nisi o agasala?

Valaaulia tagata o le vasega e toe faitau filemu le fuaiupu e 3, ma vaavaai mo le mea o le a fai e le Alii e fesoasoani ai ia William E. McLellin ia salamo i ana agasala uma.

O le a se mea e mafai ona tatou aoao mai i lenei fuaiupu e uiga i le auala o le a fesoasoani mai ai le Alii i lo tatou salamo? (E tatau ona faamatala mai e tagata o le vasega le mataupu faavae lenei: O le a faaali mai e le Alii ia i tatou mea e tatau ona tatou salamo ai. Tusi le upumoni lenei i luga o le laupapa.)
O a nisi o auala e ono faaali mai ai e le Alii ia i tatou mea e tatau ona tatou salamo ai?

Valaaulia se tagata o le vasega e faitau leotele le saunoaga lenei mai ia Peresitene Henry B. Eyring. Fai atu i le vasega e faalogologo mo se tasi o auala e mafai ona tatou ole atu ai i le Alii e fesoasoani mai ia tatou salamo.

“O se tasi o fesili e tatau ona tatou ole atu ai i lo tatou Tama Faalelagi i na tatalo faalilo o le: ‘O le a se mea ua ou faia i lenei aso, pe le’i faia, ua faatiga ai i Lau Afio? Afai e mafai ona ou iloa, o le a ou salamo mai ai ma lo‘u loto atoa e aunoa ma le faatuai.’ O lena tatalo faamaualalo o le a taliina mai” (“Aua Le Faatuai,” Liahona, Ian. 1999, 40).

Uunaia tagata aoga e mafaufau i faamanuiaga ua latou maua ina ua latou liliuese mai agasala ma maua le talalelei. Valaaulia i latou e saili ina ia iloa mea e tatau ona latou salamo ai, ina ia mafai ona latou maua faamanuiaga sili atu.

Mataupu Faavae ma Feagaiga 66:4-13

Ua poloai le Alii ia William E. McLellin e folafola atu le talalelei, lafoai ese le amioletonu uma, ma faaauau faamaoni pea seia oo i le iuga

Toe faasino atu i le folafolaga a le Alii e faaali mai ia William E. McLellin ia agasala sa tatau ona ia salamo ai. Valaaulia se tagata o le vasega e faitau leotele le Mataupu Faavae ma Feagaiga 66:4 . Fai atu i le vasega e mulimuli i le faitauga, ma vaavaai po o le a le isi mea na folafola mai e le Alii e faaali mai ia Uso McLellin. Fai atu i tamaiti aoga e lipoti mai mea latou te maua.

Aisea e avea ai o se faamanuiaga le iloa o le finagalo o le Atua mo i tatou?

Vaevae le vasega i ni paga. Fai atu i paga e faitau faatasi le Mataupu Faavae ma Feagaiga 66:5–9 ma vaavaai mo mea na finagalo le Alii e fai e Uso McLellin. Fai atu i tamaiti aoga e lipoti mai mea latou te maua.

E tusa ai ma fuaiupu e 8-9, o a faamanuiaga o le a maua e Uso McLellin pe afai o le a ia faia ma le faamaoni le finagalo o le Alii? (O le a faatasi le Alii ma ia ma o le a faamanuia o ia ina ia mafai ona faamalolosia i latou e faatuatua ma faamalolo i e mamai.)
O le a se mea e mafai ona tatou aoaoina mai i nei fuaiupu e uiga i faamanuiaga e mafai ona tatou maua pe a tatou mulimuli i le finagalo o le Alii mo i tatou? (E tatau ona faailoa mai e tagata aoga le mataupu faavae lenei: Afai tatou te faamaoni i le faia o le finagalo o le Alii, o le a faatasi o Ia ma i tatou ma o le a faamanuia i tatou ina ia mafai ona tatou ausia mea ua Ia manaomia mai ia i tatou. Tusi lenei mataupu faavae i le laupapa.)

Faamalamalama atu e faapea, e le gata i le tuuina mai ia Uso McLellin o faatonuga i le mea e fai, sa tuuina mai foi e le Alii ia te ia se lapataiga. Fai atu i se tagata o le vasega e faitau leotele fuaiupu muamua e lua o le Mataupu Faavae ma Feagaiga 66:10. A o lei ona faitauina, faailoa atu o le fuaiupu muamua o loo aofia ai le upu faalavelavea. Faamalamalama e faalavelavea se mea ia i tatou pe a ona polokaina lo tatou ala, po o le matuai faafaigataina o le faamaeaina o se galuega.

Na poloaiina e le Alii ia Uso McLellin e “lafoaʼi i amioletonu uma.” E faapefea ona faalavelave le amioletonu po o agasala, i le galuega faafaifeautalai a Uso McLellin? E faapefea ona faalavelave le amioletonu ia i tatou faaleagaga?

A ua uma ona tali mai tagata o le vasega, tusi le mataupu faavae lenei i luga o le laupapa: E finagalo le Alii ia tatou lafoai ese mea uma e faalavelave i lo tatou alualu i luma faaleagaga.

Uunaia tagata o le vasega e mafaufau filemu i ni mea i o latou olaga o ono faalavelave ia i latou.

Faitau leotele le fuaiupu lona tolu o le Mataupu Faavae ma Feagaiga 66:10, ma valaaulia le vasega e vaavaai mo se lapataiga patino na tuuina mai e le Alii ia Uso McLellin.

E tusa ai ma le fuaiupu e 10, o le a le tofotofoga na tauivi ma Uso McLellin?
Mai le fuaiupu e 10, o le a se mea e mafai ona tatou iloa e uiga i le malamalama o le Alii ia i tatou taitoatasi? (Fesoasoani i tagata aoga ia iloa e silafia e le Alii o tatou luitau patino ma faaosoosoga, e pei ona sa Ia silafia ai Uso McLellin. Mafaufau e valaaulia tagata o le vasega e tusi le upumoni lenei i talane o le fuaiupu e 10.)
Aisea e te manatu e taua ai le malamalama, e silafia e le Alii o tatou luitau patino ma faaosoosoga?

Faailoa atu e le gata i le iloaina o o tatou luitau ma faaosoosoga, e silafia foi e le Alii o tatou malosiaga ma gafatia. Na te silafia mea uma e uiga ia i tatou taitoatasi. Faatasi ai ma se malamalamaaga e alofa o Ia ia i tatou ma silafia lelei i tatou, e mafai ona tatou saili ma mulimuli i Lona finagalo ma le mautinoa ma faalagolago ia te Ia.

Valaaulia se tagata o le vasega e faitau leotele le Mataupu Faavae ma Feagaiga 66:11-13. Fai atu i le vasega e mulimuli i le faitauga, ma vaavaai mo se fautuaga faaopoopo na tuuina mai e le Alii ia William McLellin. Fai atu foi i le vasega e vaavaai mo faamanuiaga na folafola mai e le Alii, pe afai o le a mulimuli Uso McLellin i lena fautuaga. Fai atu i tamaiti aoga e lipoti mai mea latou te maua.

E tusa ai ma le fuaiupu e 12, o le a le mea e tatau ona faia e maua ai le ola e faavavau? (Fesoasoani i tagata aoga ia iloa, afai tatou te faaauau pea ma le faamaoni e oo i le iuga, o le a tatou maua le ola e faavavau. Tusi le mataupu faavae lenei i le laupapa.)
O le a le uiga ia te oe o le tumau pea ma le faamaoni i le iuga?

Faamalamalama atu faapea, ina ua tuuina mai lenei faaaliga, ua maua e Uso McLellin se molimau e uiga i le talalelei toefuataiina. Ina ua mavae ona tuuina mai le faaaliga, sa ia molimau atu i le valaauga faaperofeta o Iosefa Samita. Sa ia fai mai, “O Iosefa Samita o se Perofeta moni … a le Alii ma … ua i ai le mana ma maua faaaliga mai le Atua” (Tusi mai ia William E. McLellin i tagata o le aiga, 4 Aok., 1832, RLDS Archives, 4; sii mai i le M. Russell Ballard, “What Came from Kirtland” [Church Educational System fireside for young adults, Nov. 6, 1994], 8, speeches.byu.edu). Sa auauna faamaoni Uso McLellin mo ni nai tausaga ma sa valaauina e avea ma se tasi o uluai sui o le Korama a Aposetolo e Toasefululua i lenei tisipenisione. Ae peitai, sa le’i faaauau ai pea ma le faamaoni o ia e oo i le iuga. O le mea moni, sa tetee o ia faasaga i le Perofeta o Iosefa Samita, ma sa tape ai lona igoa i le 1838. Atonu e te manao e faitau leotele le palakalafa lenei:

“A o i ai Iosefa i le falepuipui i Richmond, Mo., o McLellin, o se tagata tino tele ma aumalosi, sa alu atu i le leoleo ma fai atu i ai mo le avanoa na te sasaina ai le Perofeta. Sa tuuina atu i ai le faatagaga ma le tuutuuga e fusu mai i ai Iosefa. Sa faailoa atu e le leoleo … le fanoga faatauanau o McLellin, o lea sa malie i ai Iosefa, pe afai e aveese ana uamea. Sa musu McLellin e fusu seiiloga e i ai sana pate, lea sa malie atoatoa i ai Iosefa; ae sa le faatagaina e le leoleo i laua e fusu i ni tuutuuga le tutusa faapea “(”History of Brigham Young,“ Millennial Star, 17 Tes., 1864, 808).

Tatai atu mafaufau o tagata o le vasega i le ata o loo i luga o le laupapa, ma fautua atu e toe mafaufau po o fea latou te tuuina ai i latou i luga o lea ata. Fai atu ia i latou e mafaufau loloto i le fesili lenei:

O le a se mea e te faia e te faalatalata atu ai i le Atua ma ia tumau faamaoni ai pea seia oo i le iuga?

Molimau atu e uiga i aoaoga faavae ma mataupu faavae na outou talanoaina, ma faamalosiau atu i tagata o le vasega e faatino i latou.

Tala ma Faamatalaga o Talaaga

Mataupu Faavae ma Feagaiga 66. O fesili e lima a William E. McLellin

E sefulu tausaga talu ona tape le igoa o William E. McLellin mai le Ekalesia, sa ia tusia ai e uiga i le faaaliga na maua e Iosefa Samita lea ua faamaumauina nei i le Mataupu Faavae ma Feagaiga 66:

“Sa ou maua e ala mai ia te ia, ma tusi mai lona fofoga se faaaliga e faatatau ia te au lava. Sa ou faamoemoeina ma talitonu a ou vaai ia Uso Iosefa, e tatau ona ou maua [se faaaliga]; ma sa ou alu faalilolilo i luma o le Alii, ma i o’u tulivae, ma ole atu ia te ia e faaali mai le tali i fesili e lima e ala mai i lana Perofeta, ma o lena mea foi, e aunoa ma lona iloa o se mea e uiga i lo’u faia o se talosaga faapena. O lenei ou te molimau atu ai i le mata’u i le Atua, o fesili uma sa ou tuuina atu i fofoga o le Alii o Sapaota, sa taliina mai ma faamalieina atoatoa ai a’u. Sa ou manao i ai mo se molimau e uiga i musumusuga a Iosefa. Ma e oo mai i le aso, ou te mafaufau i ai o se faamaoniga lea e le mafai ona ou faamaonia [e sese]” (i le Ensign of Liberty, of the Church of Christ, Jan. 1848, 61).

Tatou te le iloa po o a fesili e lima a Uso McLellin. Ae ui i lea, e faavae i luga o lana faamatalaga e faapea, o le faaaliga na taliina ai ana fesili, e mafai ona tatou faapea, sa popole o ia e uiga i lona tulaga i luma o le Alii, ma sa ia fia iloa le mea na finagalo le Alii na te faia.