Seminare ma Inisitituti
Lesona 133: Mataupu Faavae ma Feagaiga 124:84–145; 125–26

Lesona 133

Mataupu Faavae ma Feagaiga 124:84–145; 125–126

Folasaga

O le lesona mulimuli lenei o lesona e tolu e talanoaina ai le Mataupu Faavae ma Feagaiga 124. E talanoaina ai foi le Mataupu Faavae ma Feagaiga 125 ma le 126. I le Mataupu Faavae ma Feagaiga 124:84–145, na tuuina mai e le Alii ni fautuaga i tagata taitoatasi o le Ekalesia ma faailoa mai igoa o i latou na tatau ona auauna atu i ni tofiga eseese faaleautaitai perisitua. Ia Mati 1841, na maua ai e le Perofeta o Iosefa Samita le faaaliga o loo i ai i le Mataupu Faavae ma Feagaiga 125, lea na faaali mai ai e le Alii Lona finagalo e faatatau i le faapotopotoina o le Au Paia i le Teritori o Aioua. I le aso 9 o Iulai, 1841, na maua ai e le Perofeta le faaaliga o loo i ai i le Mataupu Faavae ma Feagaiga 126, lea na fetalai mai ai le Alii ia Polika Iaga o le a le toe manaomia ona tuua e ia lona aiga ina ia auauna atu i ni misiona.

Fautuaga mo le Aoaoina Atu

Mataupu Faavae ma Feagaiga 124:84–122

Na tuuina mai e le Alii fautuaga i tagata taitoatasi patino

A o lei amata le vasega, tusi le mataupu faavae lenei i luga o se fasi pepa: Afai tatou te faalogo i fautuaga a perofeta, o le a lelei ia i tatou. Tuu le pepa i totonu o se teutusi, ma i fafo o le teutusi tusi ai O auala e mafai ona tatou faamanuiaina ai aso nei ma aso uma lava.

Amata le lesona i le faaali atu o le teutusi i tagata aoga. Ta‘u atu ia te i latou o loo i ai faatonuga mo auala e mafai ona latou fiafia ai i le taimi nei, aloese ai ma luitau e le manaomia i o latou olaga, ma maua isi faamanuiaga. Faamalamalama atu o faatonuga e faatatau ia i latou taitoatasi, e ui lava i o latou tulaga tulaga ese. Valaaulia tagata aoga e mafaufau i fesili nei:

  • O le a le taua ia te oe o le maua o faatonuga o loo i totonu o le teutusi?

  • Afai e mafai ona maua ia faatonuga, o le a le lelei o le a e mulimuli ai pe a e mauaina i latou?

Kopi le siata o loo [i le lesona] i luga o le laupapa a o lei amataina le vasega. Tagai i le siata, ma faamalamalama atu e faapea, i le Mataupu Faavae ma Feagaiga 124:84–118 na tuuina mai e le Alii ni faatonuga patino i ni tagata faapitoa o le Ekalesia, o lea, afai e mulimuli ai, ua folafola mai ai faamanuiaga silisili. Valaaulia tagata aoga taitasi e faitau filemu ni mau se lua pe tolu o loo i luga o le laupapa. Fai atu ia i latou e vaavaai mo se tulaga e talitutusa ai faatonuga na tuuina atu i tagata taitoatasi na latou faitau i ai.

William Law (MF&F 89–90)

Ailama Samita (MF&F 94–96)

Amosa Davies (MF&F 111–114)

Robert Foster (MF&F 115–118)

A ua lava loa le taimi na faitau ai tagata aoga, fai atu le fesili lenei:

  • O a ni tulaga talitutusa sa e matauina i le faatonuga na tuuina atu i nei alii? (O fuaitau taitasi o loo i ai faatonuga e mulimuli i fautuaga a le Perofeta o Iosefa Samita.)

Valaaulia tagata aoga e toe faamanatu fuaiupu na latou faitauina ma vaavaai mo faamanuiaga na folafola mai e le Alii pe afai e mulimuli nei alii i le fautuaga na tuuina mai ia i latou. Fai atu i tagata aoga e lipoti mai mea ua latou maua. Tusi a latou tali i luga o le laupapa.

  • E faapefea ona e aotelea folafolaga na faia e le Alii i nei alii pe afai latou te faalogo i le Perofeta?

Valaaulia se tagata aoga e tatala le teutusi ma faitau leotele le mataupu faavae o loo tusia i le pepa.

  • E faapefea ona fesootai ia faamanuiaga folafolaina taitasi o loo lisiina i luga o le laupapa i le fuaitau “o le a lelei ia i tatou”?

Fai atu i tagata aoga e lisi mai ni fautuaga faapitoa ua tuuina mai e le Peresitene o le Ekalesia i tausaga talu ai nei, ma valaaulia se tagata aoga e tusi a latou tali i luga o le laupapa.

  • O le a se taimi na faamanuiaina ai oe ona o le faalogo i le fautuaga a perofeta? (Atonu foi e te mafaufau e faasoa atu se aafiaga.)

Valaaulia se tagata aoga e faitau leotele le Mataupu Faavae ma Feagaiga 124:84. Fai atu i le vasega e mulimuli i le faitauga, ma vaavaai mo le mea na fetalai mai le Alii sa faia e se tagata o le Ekalesia na igoa ia Almon Babbit nai lo le mulimuli i fautuaga a le Au Peresitene Sili.

  • E tusa ai ma le fuaiupu e 84, o le a le mea na fai e Almon Babbit nai lo le mulimuli i le fautuaga a le Au Peresitene Sili? (Sa saili o ia e faatu lana lava fautuaga. Atonu e te manao e faamalamalama atu e faapea, o le mea moni sa taumafai o ia e tauanau nisi o tagata “e aua” le malaga atu i Navu, nai lo lena, ia faamautu i Katelani [tagai History of the Church, 4:476].)

  • O a nisi o faataitaiga o auala e ono faatu ai e tagata a latou lava fautuaga i o tatou aso?

Valaaulia tagata aoga e mafaufau i a latou tali i fesili sa latou mafaufau loloto i ai i le amataga o le lesona e uiga i lo latou manao e maua ma mulimuli i faatonuga o loo i totonu o le teutusi. Fai atu ia te i latou e tusi se sini faapitoa mo le faaleleia o a latou taumafaiga e faalogo i le fautuaga a perofeta soifua ina ia mafai ona latou maua faamanuiaga folafolaina.

Aotele le Mataupu Faavae ma Feagaiga 124:119–122 i le faamalamalama atu, na tuuina mai e le Alii ni faatonuga faaopoopo i le Ekalesia e faatatau i le fausiaina o le Maota i Navu, lea o le a avea o se faletalimalo a le Ekalesia.

Mataupu Faavae ma Feagaiga 124:123-145

Na fofoga mai e le Alii suafa o i latou o e e tatau ona auauna i tofiga eseese faaletaitai perisitua

Fai i tagata aoga e lisi i luga o le laupapa nisi o tofiga faaletaitai perisitua i le Ekalesia.

Faamalamalama atu e faapea, i le Mataupu Faavae ma Feagaiga 124:123–145, na fofoga mai ai e le Alii suafa o tagata taitasi e auauna i tofiga eseese faaletaitai perisitua. Fai i le afa o le vasega e sue i fuaiupu e 123–132 ae o le isi afa e sue i fuaiupu 133–142, e vaai ai mo tofiga faaletaitai perisitua sa ta’ua e le Alii. Fai atu i tagata aoga e lipoti mai mea latou te maua, ma lisi soo se tofiga faaletaitai perisitua i luga o le laupapa sa le’i lisiina muamua.

Valaaulia se tagata aoga e faitau leotele le Mataupu Faavae ma Feagaiga 124:143. Fai atu i le vasega e mulimuli i le faitauga, ma vaavaai mo le mafuaaga na valaau ai e le Alii taitai perisitua ma tuu i ai ki o le perisitua.

  • Aisea e valaau ai e le Alii ia taitai perisitua ma tuu atu i ai ki o le perisitua? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Ua valaauina e le Alii ia taitai perisitua e taitaia le galuega o le auaunaga ma fesoasoani e faaatoatoa le Au Paia.)

Valaaulia tagata aoga e mafaufau i ni auala ua fesoasoani ai o latou taitai perisitua ia i latou i a latou taumafaiga e mulimuli lelei ia Iesu Keriso ma avea atili e faapei o Ia. Atonu e te manao e valaaulia ni nai tagata aoga e faasoa mai o latou aafiaga.

Mataupu Faavae ma Feagaiga 125

Ua faatonu e le Alii le Au Paia e faapotopoto i nofoaga Na te tofia

Faamalamalama atu e faapea, ina ua mavae le tutuliesea o le Au Paia mai Misuri i le taumalulu o le 1838–39, sa latou agai atu i Ilinoi ma Aioua, lea sa latou faamautu ai i itu uma e lua o le Vaitafe o Misisipi. Aotele le faaaliga na faamaumauina i le Mataupu Faavae ma Feagaiga 125 i le faamatala atu, sa mauaina ia Mati 1841, ma sa faaali mai ai le finagalo o le Alii e uiga i le Au Paia sa nonofo i le Teritori o Aioua ma i latou o e na fuafua e o i ai iina. I le faaaliga lenei na faatonuina ai e le Alii le Au Paia e faapotopoto ma fausia nofoaga o le a atofaina e le Alii e ala i le Perofeta o Iosefa Samita, e aofia ai se aai i Aioua ina ia faaigoaina ia Saraemila. Sa faatauina mai e le Ekalesia ni fanua se tele i Aioua nai lo o Ilinoi, e ta’u mai ai sa le’i fuafua taitai o le Ekalesia e faamautu uma le Au Paia i Navu.

Mataupu Faavae ma Feagaiga 126

Ua le toe manaomia ona tuua e Polika Iaga lona aiga ina ia auauna atu i ni misiona faaopoopo

Valaaulia tagata aoga e vaai faalemafaufau pe faapei le tuua o o latou aiga ina ia auauna atu i ni misiona mo le Alii, i taumafanafana e lima o le a sosoo ai, ona toe valaauina lea e auauna atu i se misiona ise atunuu mamao mo le toeitiiti lua o tausaga.

  • O a ni ou lagona e uiga i le tuua faafia o lou aiga?

  • O a ni ou lagona i ai, pe afai sa e nafa ma le tuuina atu o mea e manaomia e lou aiga?

Faailoa atu i tagata aoga, ina ua auai Polika Iaga i le Ekalesia i le 1832 o Aperila, sa ia faia ni misiona i le iva o tausaga na sosoo ai. O lana misiona muamua sa faia i le taimi o le taumalulu ina ua uma ona papatisoina o ia. O le isi lima, e aofia ai lona auai i le Tolauapiga a Siona, na faia i taumafanafana uma mai le 1833 i le 1837. O nei misiona sa mai le tolu i le lima masina le umi. I le aso 8 o Iulai, 1838, sa valaauina ai Polika Iaga, faatasi ai ma isi Aposetolo, e auauna atu i se misiona i Peretania Tele. Sa latou mulimuli i faatonuga a le Alii e tuuvaa atu mo lenei misiona mai Sisifo Mamao, Misuri, i le aso 26 o Aperila, 1839 (tagai i le MF&F 118). Sa faaaluina e Polika Iaga ma isi Aposetolo nai masina na sosoo ai i Aioua ma Ilinoi, i le faia o nisi o sauniuniga e malaga atu ai i Peretania Tele. Sa taia e se faamai pipisi o le malaria le eria i le taumafanafana o le 1839, ma, sa faapea foi ona gasegase ai i latou.

Faitau leotele le saunoaga lenei a Polika Iaga. Fai atu i le vasega e faalogologo mo lona uiga faaalia agai i le auauna atu i le Alii, e ui lava i le ma‘i tigaina o lea sa le mafai ai ona alu i totonu o le taavale solofanua e aunoa ma le fesoasoani i le taimi na latou malaga ese ai.

Peresitene Polika Iaga

“Sa ou naunau e alu i Egelani po o le oti a o taumafai pea. O lau tautinoga maumaututu o le faia o mea e manaomia ai au i le Talalelei o le ola ma le faaolataga, po o lou oti o taumafai pea e faia” (Aoaoga a Peresitene o le Ekalesia: Polika Iaga [1997], 6).

Faamalamalama atu o le auaunaga faamisiona a Polika Iaga na manaomia ai foi le ositaulaga i le vaega a lona aiga. Valaaulia se tagata aoga e faitau le aotelega o tulaga o le aiga o Polika Iaga i le taimi na ia tuua ai mo lana misiona i Peretania Tele:

Sa tuua e Polika Iaga ia Montrose, Aioua, mo Peretania Tele i le aso 14 o Setema, 1839, i le na o le 10 o aso talu ona fanauina e lona faletua o Mele Ane, le la tama lona fa. Sa mafatia foi Mele Ane i le [faama’i o le] malaria. O le taimi lona lima lenei talu ona la faaipoipo na ia auina atu ai Polika e alu i se misiona. O le tutuliesea mai lo latou fale ma le leiloloa o le tele o a latou meatotino i Misuri i le tausaga na mavae atu, sa faapea ona latou i ai i le loloto o le mativa. Sa na o le $2.72 na mafai e Polika ona tuua ia Mele Ane ma lo latou aiga. Sa faatuatua Polika ma Mele Ane o le a tausia i latou e le Alii, ma faalagolago i se folafolaga mai le Perofeta o Iosefa Samita e faapea, o aiga o le au Aposetolo o le a faapea ona taulimaina o latou manaoga a’o toesea ai le au Aposetolo i a latou misiona. (Tagai i le Leonard J. Arrington, Brigham Young: American Moses [1985], 74–75, 413, 420.)

Faamalamalama atu, ina ua uma ona taitaia le galuega faafaifeautalai a le Ekalesia i Peretania Tele, sa faapea ona taunuu atu Polika Iaga i Navu, Ilinoi i le aso 1 o Iulai, 1841. Na maua e le Perofeta o Iosefa Samita le faaaliga o loo maua i le Mataupu Faavae ma Feagaiga 126 i le valu o aso mulimuli ane.

Valaaulia se tagata aoga e faitau leotele le Mataupu Faavae ma Feagaiga 126:1–3. Fai atu i le vasega e mulimuli i le faitauga, ma vaavaai mo le mea na ta’u mai e le Alii ia Polika e uiga i lana auaunaga. Fai atu i tagata aoga e lipoti mai mea na latou mauaina. (Atonu e te manao e faamalamalama atu, o le upu galuega e faatatau i le galuega filiga sa faia i se vaitaimi umi.)

Faamalamalama atu, e ui lava ina sa le toe manaomia e le Alii le toe tuua e Polika Iaga o lona aiga, ae sa ia faataunuuina mulimuli ane nisi o misiona pupuu. Valaaulia tagata aoga e faailoa mai se mataupu faavae mai fuaiupu 1-2 o loo aoao mai ai mea o le a tutupu pe a tatou galulue ma le filiga mo le Alii. (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Afai tatou te galulue ma le filiga mo le Alii, o le a faapea ona Ia talia a tatou taulaga amiotonu. Atonu e te manao e fautua atu i tagata aoga e tusi lenei mataupu faavae i le laina i autafa o a latou tusitusiga paia.)

  • O le a se taimi na e lagonaina ai sa fiafia le Alii i lau auaunaga?

Valaaulia tagata aoga e mafaufau e uiga i avanoa latou te maua e auauna atu ai i le Alii. Uunaia i latou e mulimuli i faataitaiga a taitai e pei o Polika Iaga ina ia galulue ma le filiga i nei avanoa. Faasoa atu lau molimau o le a talia e le Alii taulaga amiotonu o a latou taumafaiga filiga i Lana galuega.

Tala ma Faamatalaga o Talaaga

Mataupu Faavae ma Feagaiga 124:84–86. Almon Babbit

O Almon Babbit sa avea ma se tagata o le Tolauapiga a Siona, ma sa tofia o se sui o le Korama Muamua a Fitugafulu i le aso 28 o Fepuari, 1835. Sa i ai se talaaga o Almon o le le amanaiaina o le fautuaga a taitai o le Ekalesia ma le taitaiina o isi ia mulimuli i ana lava filifiliga.

I le Mataupu Faavae ma Feagaiga 124:84, na faaaogaina ai e le Alii le talafaatusa o le tamai povi auro (tagai i le Esoto 32) e faamatala ai amioga a Almon Babbit. Sa faatu e Almon ana lava fautuaga o le mea e tatau ona mulimuli ai le Au Paia nai lo le fautuaga e tuuina mai e ala i le Au Peresitene Sili.

Mataupu Faavae ma Feagaiga 126:1. O le misiona a le Korama a Aposetolo e Toasefululua i Peretania Tele

“Ia Aperila 1840, ina ua taunuu atu isi Aposetolo i Motu o Peretania, o Polika Iaga, o le na faaauauina tulaga faaletaitai o le Ekalesia i le Misiona a Peretania, na taloina le usoga i Preston mo se konafesi aoao a le Ekalesia. … O le mataupu muamua faapisinisi o le faauuga o Willard Richards, [o le sa auauna i le au peresitene o le misiona] i le au aposetolo e tusa ai ma le faaaliga i le 1838 [tagai MF&F 118:6]. … Sa i ai nei sui e toavalu o le Toasefululua i Motu o Peretania, o i latou ia o Polika Iaga, Heber C. Kimball, Pale P. Palate, Orson Pratt, Ioane Teila, Uilifoti Uitilafi, Siaosi A. Samita, ma Willard Richards. O le isi toalua, o Viliamu Samita ma John E. Page, na le’i faia ni misiona i Peretania. O Osona Haite sa taunuu atu i se taimi mulimuli ane, sa galulue faatasi ma ona uso mo ni nai masina i Egelani, ona faaauau ai lea i Palesitina e faapaia lena laueleele mo le toe foi mai i ai o tagata Iutaia. E tasi le avanoa i le Toasefululua sa avanoa pea i lena taimi” (Church History in the Fulness of Times Student Manual, 2nd ed. [Church Educational System manual, 2003], 231).

A o taitaia e Polika Iaga le faalauteleina o le galuega faafaifeautalai i Motu o Peretania, sa ia faaalia le tomai maoae faaleagaga ma faaletaitai. I lalo o le taitaiga a Polika Iaga ma isi Aposetolo, na oo ai le Ekalesia i se tuputupu ae tulaga ese i Peretania Tele. E oo ane i le taimi na tuua ai e le toatele o Aposetolo ia Egelani i le faaiuga o Aperila 1841, na oo i le va o le 7,000 ma le 8,000 tagata sa auai i le Ekalesia, ma e tusa ma le 1,000 o i latou ua malaga atu i Navu i ni nai masina na muamua atu.

“O lenei misiona, sa o se taimi taua o aoaoga faamasani ma le faatagata matua mo le Korama a Aposetolo e Toasefululua. Sa mafai e Polika Iaga ona faamalosia tomai faaletaitai, ia o le a le umi ae valaau i ai o ia e faaaoga i Navu. … E ala i tofotofoga ma osigataulaga i Peretania, faapea foi ma le galulue ai mo se sini e tasi, sa tutu faatasi ai le Toasefululua i se auala na faamautinoa ai le malosi o le tulaga faaleautaitai o le Ekalesia i tausaga a sau” (Church History in the Fulness of Times,234).

Mataupu Faavae ma Feagaiga 126:3. Ua tausi e Polika Iaga lona aiga

Ina ua foi mai i le aiga mai Peretania Tele, sa faapea ona mulimuli Polika Iaga i le poloaiga a le Alii e “tausi faapitoa lelei [lona] aiga” (MF&F 126:3). Sa ia faaaluina le taimi i aso taitasi e aoao ai ma tatalo faatasi ma lana fanau, o e na manatuaina o ia o se tama agamalu ma agaalofa.

O le 40 o tausaga o le soifua o Polika Iaga na maua ai le faaaliga o loo i le Mataupu Faavae ma Feagaiga 126, ae o le tala lenei ua faapupula mai ai le umi o lona tuuto i lona aiga:

“Ina ua atoa lona 23, sa ia faaipoipo atu ia Miriama Angeline Works. Na la fanauina ni tama teine se toalua. Sa tausia e Polika lona aiga i le faia ma le lipeaina o nofoa, laulau, ma kapoti ma le faapipiiina o faamalama, faitotoa, fasitepu, ma tulaga o magalafu. …

“Ina ua faataotolia Miriama i le gasegase o le fatafata vaivai, sa tauaveina e Polika le tele o galuega a lona toalua e faaopoopo i ana lava foi galuega. Ina ua faateteleina lona gasegase ma ua le mafai ai ona tula’i, e saunia e le aunoa e [Polika] meaai i le taeao mo le aiga, fai lavalava o ona afafine, faamama le fale, ma ‘sii lona toalua i lona nofoa faalue i tafatafa o le magalafu, ma tuu ai iina seia oo ina toe foi ane i le afiafi,’ ona ia kukaina lea o le meaai o le afiafi, faamomoe lona aiga, ma faauma feau i totonu o le fale [Susa Young Gates and Leah D. Widtsoe, The Life Story of Brigham Young (1930), 5]. O ona aafiaga i lona talavou ma popofou o le la ulugalii i le tausiga o fanau ma taulimaina se aiga na aoaoina ai o ia i mea e tele e uiga i le fegalegaleiga faaleaiga ma le teuina o le fale. I tausaga mulimuli ane, na ia fautuaina ai le Au Paia e uiga i nei mataupu ma sa ia talasua ai e sili atu o ia ‘nai lo le tele o fafine o le [nuu] i le teuina o fale’ [Deseret News, 12 Aok., 1857, 4]“ (Aoaoga a Peresitene o le Ekalesia: Polika Iaga [1997], 2).

“E faaopoopo atu i le mafai ona faaalu se taimi tele ma lona aiga ina ua mavae le faaaliga lenei [MF&F 126] nai lo le mea sa mafai ona i ai i nai tausaga na muamua atu, sa faapea foi ona latalata atu Polika Iaga i le Perofeta o Iosefa Samita i le tele o taimi (e luasefulu-valu masina mai masina mulimuli e tolusefulu ono o le soifua o Iosefa).

“E foliga manino mai na silafia e le Alii, le lumanai o Polika Iaga ma le lumanai o le Ekalesia, ma tuu ai Polika i tafatafa o Iosefa ina ia mafai ona ia aoaoina mea na manaomia ona ia iloa e taitai ai le Ekalesia i le mavae ai o le maliu o Iosefa” (Mataupu Faavae ma Feagaiga Tusi Lesona a le Tagata Aoga, 2nd ed. [Church Educational System manual, 2001], 313).

E ui ina sa le toe manaomia ona tuua e Polika Iaga lona aiga ina ia auauna atu i ni misiona faaopoopo, ae o le a ia auauna atu i ni nai misiona pupuu a’o le’i maliu le Perofeta.