Mataupu Faavae ma Feagaiga 108

Folasaga

I le aso 26 o Tesema, 1835, na galulue ai Laimani Sherman, o se tagata faamaoni o le Tolauapiga a Siona, ma o se tasi o Peresitene e toafitu o le Korama a le au Fitugafulu, i se uunaiga faaleagaga e fesili atu i le Perofeta o Iosefa Samita mo le taitaiga e faatatau i lona tiute. O leMataupu Faavae ma Feagaiga 108 o loo i ai le faaaliga na tuuina mai mo Laimani e ala mai i le Perofeta.

Fautuaga mo le Aoaoina Atu

Mataupu Faavae ma Feagaiga 108:1–3

Ua faamagalo e le Alii ia Laimani Sherman i ana agasala

Amata le vasega i le fai atu o fesili nei:

Pe sa i ai se taimi na uunaia ai oe e le Agaga e fai se mea? O a ni faamanuiaga na e maua ina ua e usitai i uunaiga a le Agaga?

Valaaulia tagata aoga e faitau filemu le folasaga o le vaega o le Mataupu Faavae ma Feagaiga 108, ma vaai po o ai na sau i le Perofeta e talosaga mo se faaaliga.

Valaaulia se tagata aoga e faitau leotele le faamatalaga lenei e uiga ia Laimani Sherman:

O Laimani Sherman o se tagata faamaoni o le Ekalesia o le sa auauna i le Tolauapiga a Siona, ma na valaauina e avea ma se tasi o Peresitene e toafitu o le Korama a Fitugafulu: Sa tusia e le Perofeta o Iosefa Samita i lana api o talaaga e faapea, i lena aso 26 o Tesema, 1835, “Na sau ai Uso Laimani Sherman i totonu, ma talosagaina ina ia maua mai se afioga a le Alii e ala mai ia te a’u; ‘ona,’ na ia fai mai ai, ‘na galueaina a’u e faailoa atu ia te oe o’u lagona ma manaoga, ma sa folafola mai e tatau ona ou maua se faaaliga lea e tatau ona faailoa mai ai lo’u tiute’” (i le History of the Church 2:345; tagai foi i le Journals, Volume 1: 1832–1839, vol. 1 of the Journals series of The Joseph Smith Papers [2008], 137).

O le a sou manatu i le uiga o le faamatalaga a Laimani e faapea, sa “galueaina” o ia e talanoa atu ia Iosefa Samita?

Valaaulia se tagata aoga e faitau leotele le Mataupu Faavae ma Feagaiga 108:1. Fai atu i le vasega e mulimuli i le faitauga, ma vaavaai mo le faamanuiaga na tuuina mai e le Alii ia Laimani Sherman ona sa usitai o ia i le uunaiga e talanoa i le Perofeta. Fai atu i tamaiti aoga e lipoti mai mea latou te maua.

E faavae i luga o mea na faaali mai e le Alii ia Laimani Sherman, o a ni faamanuiaga tatou te valaaulia i o tatou olaga pe a tatou usiusitai ma le loto i ai i le siufofoga o le Alii? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: A o tatou usiusitai i le siufofoga o le Alii, tatou te valaaulia Lana faamagaloga. Atonu e te manao e tusi lenei mataupu faavae i luga o le laupapa.)
Aisea e te manatu ai o le usitaia o uunaiga mai le Alii e valaaulia ai le faamagaloga?

Ina ia fesoasoani i tagata aoga ia malamalama i lenei mataupu faavae, faamalamalama atu, e mafai ona faalogoina le siufofoga o le Alii e ala mai i tusitusiga paia, i saunoaga a Ana perofeta o aso e gata ai, ma uunaiga a le Agaga Paia. O le usitai i le Atua e aofia ai le faatumuina o o tatou olaga i le gaoioiga amiotonu e aumaia ai le mana faaleagaga. Valaaulia se tagata aoga e faitau leotele le faamalamalamaga lenei mai le Faamaoni i le Faatuatua: “O le usiusitai atoatoa e aumaia ai le mana atoatoa o le talalelei i lou olaga, e aofia ai le malosi faateleina e faatoilalo ai ou vaivaiga. O lenei usiusitai e aofia ai gaoioiga atonu e te le i manatu i ai muamua o ni elemene o le salamo, e pei o le auai i sauniga, totogiina o le sefuluai, tuuina atu o auaunaga, ma le faamagalo atu i isi. Ua folafola mai e le Alii, ‘O ia o lē e salamo ma faia poloaiga a le Alii o le a faamagaloina’ (MF&F 1:32)” (Faamaoni i le Faatuatua: O Se Tusitaiala o le Talalelei [2004], 149-50).

Valaaulia tagata aoga e faitau filemu le Mataupu Faavae ma Feagaiga 108:2 ma vaavaai mo le fautuaga a le Alii ia Laimani Sherman ina ua uma ona ta’u atu ia te ia ua faamagaloina ana agasala. Valaaulia tamaiti e lipoti mai mea latou te mauaina.

O le a sou manatu i le uiga o le “ia tuu atu i lou agaga ia mapu e faatatau i lou tulaga faaleagaga”?
O le a sou manatu, e mafai faapefea e le fautuaga ia “aua le toe tetee i [le leo o le Alii]” ona fesoasoani i se tagata e tuu lona agaga ia mapu?

Fai atu i tagata aoga e faailoa mai se mataupu faavae mai le Mataupu Faavae ma Feagaiga 108:1–2 e uiga i le mea e aumaia e le faamagaloga a le Alii. (E mafai ona faailoa mai e tagata aoga ni mataupu faavae eseese, ae ia mautinoa e faamamafa atu le faamatalaga lenei: O le faamagaloga a le Alii e mapu ai o tatou agaga.)

Ia faailoa atu e faapea, o nisi taimi e tuufesili ai tagata ua salamo pe mata ua faamagaloina i latou i a latou agasala pe a latou lagonaina pea le mamafatu ona o ia [agasala]. Valaaulia se tagata aoga e faitau ia faamatalaga nei. Fai atu i le vasega e faalogologo mo se fautuaga mo i latou o e atonu o loo tauivi ina ia mapu o latou agaga.

Na saunoa mai Peresitene Boyd K. Packer o le Korama a Aposetolo e Toasefululua:

“[O Le] taeao sili o le faamagaloga atonu e le oo mai i le taimi muamua. Aua le faavaivai ai ona ua e toilalo i le taimi muamua. E masani lava o le vaega sili ona faigata o le salamo o le faamagaloina lea o oe lava. O le lotovaivai o se vaega lea o le suega. Aua le faavaivai. O le a oo mai lena taeao matagofie.

“Ona oo mai ai lea ‘o le manuia [filemu] mai le Atua, e silisili i mea uma e manatu i ai’ e toe oo mai ai i lou olaga. [Filipi 4:7.] Ona avea ai lea o oe e pei o Ia, e le toe manatuaina au agasala. E faapefea ona e iloa? O le a e iloa lava! [Tagai i le Mosaea 4:1–3.]” (“O Le Taeao Pupula o le Faamagaloga,” Liahona, Ian. 1996, 24).

E faapefea ona e faamatalaina lagona o le tuu atu o lou agaga ia mapu?

Valaaulia tagata aoga e faitau filemu le Mataupu Faavae ma Feagaiga 108:3 ma vaavaai mo nisi fautuaga na tuuina mai e le Alii ia Laimani Sherman.

O le a le fautuaga na tuuina mai e le Alii ia Uso Sherman? (Ina ia “ Ma ia tulai i luga ma faaeteete atili atu mai lenei taimi i le tausiga o [ana] tautoga.” O le upu tausiga o lona uiga ii, o le ola e tusa ai ma, po o le ia usitai. O se tautoga o se folafolaga po o se feagaiga.)
O a nisi o tautoga tatou te faia?

Valaaulia tagata aoga e mafaufau po o a ni auala e mafai ona latou “faaeteete atili atu mai lenei taimi” i le tausiga o a latou tautoga. Afai e lava le taimi, valaaulia i latou e tusi po o a ni auala e mafai ona latou atili faaeteete ai i le tausiga o a latou tautoga.

Fai atu i ni nai tagata aoga e faamalamalama mai pe faapefea ona uunaia i latou po o se uo po o se tagata o le aiga, e upumoni ua latou faailoaina mai i le Mataupu Faavae ma Feagaiga 108:1–3 ina ia usitai i le siufofoga o le Alii ma maua le faamagaloga.

Valaaulia tagata aoga e mafaufau loloto i auala e mafai ona latou faaaoga ai nei mataupu faavae, ma lagona le mapu e uiga i o latou tulaga faaleagaga i luma o le Alii.

Mataupu Faavae ma Feagaiga 108:4-8

Ua tuuina mai e le Alii ia Laimani Sherman ni fautuaga faaopoopo ma folafolaga

Fesili atu i tagata aoga pe na latou faalogo i se faapotopotoga paia. Afai na i ai, fai atu ia i latou e faamatala mai lo latou malamalamaaga e uiga i ai. Afai latou te manaomia le fesoasoani, faamalamalama atu o se faapotopotoga paia o se tauaofiaga faapitoa mo “le faapaiaga o malumalu, o faatonuga faapitoa i taitai perisitua, ma le lagolagoina o se Peresitene fou o le Ekalesia” (David B. Haight, “O Faapotopotoga Paia,” Liahona, Ian. 1994, 15). Ia Tesema 1832, na folafola mai ai e le Alii i le Au Paia e faapea, afai o le a latou fausia se malumalu ma faia ai se faapotopotoga Paia, o le a Ia faaee mai ni faamanuiaga silisili i luga o le Au Paia (tagai i le MF&F 88:70–75, 117–119). Ia Tesema 1835, ina ua tuuina mai le faaaliga ua faamaumauina i le Mataupu Faavae ma Feagaiga 108 ia Laimani Sherman, sa toe tolu masina ona faapaiaina lea o le Malumalu o Katelani. I le va o Ianuari ma Me 1836, sa tauaofia ai nisi o fonotaga i Katelani, o nisi o na tauaofiaga sa ta’ua o ni faapotopotoga Paia. I le aluga o le vaiaso o le aso 27 o Mati, 1836, sa tauaofia ai ni faapotopotoga paia o se vaega o le faapaiaga o le Malumalu o Katelani, e aofia ai se faapotopotoga paia e tuuina atu ai ni aoaoga faapitoa i taitai perisitua sa faia i le aso 30 o Mati, 1836.

Valaaulia se tagata aoga e faitau leotele le Mataupu Faavae ma Feagaiga 108:4–6. Fai atu i le vasega e mulimuli i le faitauga, ma vaavaai mo mea na folafola mai e le Alii ia Laimani o le a ia maua i le faapotopotoga paia.

O le a le mea na ta’u mai e le Alii ia Laimani Sherman o le a ia maua?

Valaaulia se tagata aoga e faitau leotele le Mataupu Faavae ma Feagaiga 108:7-8. Fai atu i le vasega e mulimuli i le faitauga, ma vaavaai mo faatonuga na tuuina mai e le Alii ia Uso Sherman. Fai atu i tagata aoga e lipoti mai mea ua latou mauaina. Atonu e manaomia ona e faamalamalama atu, o apoapoaiga o upu o fautuaga po o faamalosiauga.

O a ni auala na finagalo le Alii e faamalosi ai e Laimani Sherman le usoga?

Fai atu i tagata aoga e faailoa mai upumoni o loo i le Mataupu Faavae ma Feagaiga 108:7–8. E mafai ona latou faailoa mai ni upumoni eseese, e aofia ai lenei: E tatau ona tatou faamalolosia isi i a tatou talanoaga ma amioga uma. Atonu e te manao e fautuaina tagata aoga e faailoga lenei upumoni i totonu o a latou tusitusiga paia.

E mafai faapefea ona e faamalosia i latou o loo siomia oe i lau talanoaga? E mafai faapefea ona e faamalosia i latou o loo siomia oe i au amioga?

Fai atu i tagata aoga e faamatala mai se aafiaga i se taimi na faamalosia ai e se tasi i latou i se auala na fautuaina ai e le Alii ia Laimani Sherman i le fuaiupu e 7.

Valaaulia tagata aoga e mafaufau i se tagata se toatasi e mafai ona latou faamalosia i le aso, ma se faatinoga patino o le a latou faaaogaina e fai ai lena mea.

Faailoa atu i tagata aoga sa tumau faamaoni Laimani Sherman seia oo ina maliu o ia. Na valaauina e le Perofeta o Iosefa Samita, o le sa i le Falepuipui o Liperate, ia Laimani e avea ma se tasi o le Korama a Aposetolo e Toasefululua i le aso 16 o Ianuari, 1839, ae peitai, na maliu Laimani a o le‘i mauaina le tusi mai le Perofeta e uiga i lona valaauga fou.

Faaiu i le faasoaina atu o se aafiaga i se taimi na faamalosia ai e se tasi oe po o se taimi na e faamalosia ai se isi tagata.

Tala ma Faamatalaga o Talaaga

Mataupu Faavae ma Feagaiga 108:1–2. “Ua faamagaloina oe i au agasala … ia tuu atu i lou agaga ia mapu”

Na aoao mai Peresitene Harold B. Lee:

“Afai e oo mai le taimi ma ua e faia mea uma e te mafaia e salamo ai i a outou agasala, po o ai lava oe, po o fea lava e te i ai, ma ua faia faasa’oga ma faaleleiga i le mea sili e te mafaia … , o le a faapea ona e manao i lena tali faamautuina pe mata ua taliaina oe pe leai e le Alii. I lau sailiga loloto, afai e te sailia ma e maua lena toafilemu o le mafaufau, o lena faailoga e mafai ona e iloa ai, ua taliaina e le Alii lou salamo” (Stand Ye in Holy Places [1974], 185).

Mataupu Faavae ma Feagaiga 108:3. “[Ia] faaeteete atili atu mai lenei taimi i le tausiga o au tautoga”

Sa molimau mai Elder Richard G. Scott o le Korama a Aposetolo e Toasefululua, e uiga i faamanuiaga e oo mai i le tausiga o poloaiga:

“A o e faalagolago [i le Alii], ma saili Lona finagalo ma e mulimuli i ai, o le a e mauaina faamanuiaga e le taea e lou mafaufau faatapulaaina iinei i le lalolagi. Ua sili atu ona silafia lelei e lou Tama o i le Lagi ma Lona Alo Paia le mea e maua ai le fiafia, nai lo oe. Ua La tuuina mai ia te oe le fuafuaga o le fiafia. A e malamalama i ai ma mulimuli ai, o le a avea le fiafia ma ou faamanuiaga. A e usiusitai ma le loto i ai, maua ma faamamalu sauniga ma feagaiga o lena fuafuaga paia, o le a mafai ona e maua le fiafiaga tele i le olaga lenei. Ioe, e oo lava i taimi o le fiafia tele taumasuasua. O le a e saunia mo se olaga mamalu e faavavau faatasi ma e ua pele ia te oe ua agavaa mo lena malo” (“Faalagolago i le Alii,” Liahona, Ian. 1996, 21)

Mataupu Faavae ma Feagaiga 108:6. “O le a e maua ai le aiā e talai atu ai laʼu talalelei i soo se mea o le a Ou auina atu i ai oe”

Sa avea Laimani Sherman o se tasi o Peresitene e toafitu o le Korama a Fitugafulu. A o aoaoina sui o le au Fitugafulu i le aso 30 o Mati, 1836, e faatatau i lo latou valaauga e talai atu le talalelei, sa saunoa atu ai le Perofeta o Iosefa Samita:

“O Fitugafulu ua saoloto e o atu i Siona pe a latou mananao i ai pe o atu i soo se mea lava o le a o atu i ai ma talai atu le talalelei. Ia avea le laveaiina o Siona e fai ma o tatou faamoemoega, ma taumafai ina ia aoga e ala i le auina atu o le malosi uma o le maota o le Alii i soo se mea lava tatou te maua i ai i latou” (Journals, Volume 1: 1832–1839, vol. 1 of the Journals series of The Joseph Smith Papers [2008], 215; ua faalaugatasia le sipelaga, faailoga ma mataitusi tetele ua faalaugatasia; tagai foi i le History of the Church, 2:432).