Lesona 135
Mataupu Faavae ma Feagaiga 128:12–25
Folasaga
O lesona lenei o loo aofia ai le vaega na totoe o se tusi na tusia e Iosefa Samita i le Au Paia i le amataga o Setema 1842. I le vaega lenei o le tusi, na aoao mai ai le Perofeta e uiga i le faaolataga o e ola ma e oti. Sa ia uunaia le Au Paia ina ia faamaoni i a latou galuega mo e ua maliliu, ma faailoa mai lona olioli i le Toefuataiga o le talalelei.
Fautuaga mo le Aoaoina Atu
Mataupu Faavae ma Feagaiga 128:12-18
Ua aoao mai Iosefa Samita e uiga i le faaolataga o e ola ma e oti
Faaali atu se ata o le faatanoa o le vai papatisoga i totonu o se malumalu (mo se faataitaiga, “Faatanoa o le Vai Papatisoga o le Malumalu,” Tusi Ata o le Talalelei [2009], nu. 121; tagai foi i le LDS.org). Fai atu i tagata aoga e vaai faalemafaufau e faapea, o loo latou o atu ma se uo e le auai i le Ekalesia i se fale tatala o le malumalu. Ina ua uma ona savali solo i le potu mo papatisoga, ua fesili atu la latou uo, “Aisea e faatofu atoa ai outou i lalo o le vai pe a papatisoina outou?” Ua toe fesili atu foi la latou uo, “Aisea tou te papatiso ai mo tagata ua maliliu?”
Faamanatu atu i tagata aoga, a o lafilafi solo Iosefa Samita mai tagata o e sa su’eina faasolitulafono o ia e taofia, sa ia tusia atu se tusi i le Au Paia. I lenei tusi sa ia aoaoina ai i latou e uiga i le papatisoga mo e ua maliliu. Valaaulia se tagata aoga e faitau leotele le Mataupu Faavae ma Feagaiga 128:12–13. Fai atu i le vasega e mulimuli i le faitauga, ma vaavaai mo le aoaoga a Iosefa Samita e uiga i le faatusa o le papatisoga.
-
E mafai faapefea ona e faaaogaina aoaoga o loo i fuaiupu 12-13 e fesoasoani ai i se tasi ia malamalama i le mafuaaga e faia ai le papatisoga e ala i le faatofu?
Valaaulia se tagata aoga e faitau leotele le Mataupu Faavae ma Feagaiga 128:15. Valaaulia le vasega e mulimuli i le faitauga, ma vaavaai mo mafuaaga tatou te faia ai papatisoga mo e ua maliliu.
-
E tusa ai ma lenei fuaiupu, aisea e manaomia ai e o tatou tuaa i tatou ina ia faataunuu papatisoga mo e ua maliliu? (Pe a manaomia, tata’i atu mafaufau o tagata aoga i upu “e lē mafai ona faaatoatoaina o i latou e aunoa ma i tatou.” Fesoasoani i tagata aoga e faailoa mai le aoaoga faavae lenei: O o tatou tuaa ua maliliu e aunoa ma le talalelei e le mafai ona alualu i luma i le atoatoa seiiloga e faataunuuina sauniga faaola o le talalelei mo i latou.)
Afai e manaomia e tagata aoga le fesoasoani i le taliina o lenei fesili, valaaulia se tagata aoga e faitau leotele le faamatalaga lenei:
“O ou tuaa ua maliliu o loo nonofo i se nofoaga e ta’ua o le lalolagi o agaga. O iina o loo latou maua ai le avanoa e faalogo ma talia ai le talalelei a Iesu Keriso. Ae peitai, e le mafai ona latou maua sauniga o le talalelei mo i latou lava, ma e le mafai ona latou alualu i luma seiiloga e faia e isi nei sauniga mo i latou.
“O lou avanoa ma le tiutetauave o le tuuina atu i ou tuaa o lenei meaalofa e ala i le sueina o i latou ma faamautinoa ua faia sauniga mo i latou i le malumalu. Ona mafai lea ona latou filifili pe talia le galuega ua faia” (Member’s Guide to Temple and Family History Work [2009], 2).
-
O le a sou manatu, o a ni lagona atonu e oo i ou tuaa pe a e faia lenei galuega mo i latou?
-
E tusa ai ma le fuaiupu e 15, o le a se isi mafuaaga tatou te faia ai papatisoga mo e ua maliliu? (A uma ona tali mai tagata aoga, tusi le mataupu faavae lenei i luga o le laupapa: O le faaolataga o o tatou tuaa ua maliliu e tatau ma taua i lo tatou faaolataga.)
-
Aisea e te manatu ai “o lo latou faaolataga e tatau ma taua i lo tatou faaolataga”? (A uma ona maua e tagata aoga se taimi e talanoa ai i lenei fesili, ta‘u atu ia te i latou o le a latou aoao atili e uiga i lenei aoaoga faavae a o faaauau ona latou suesue i le Mataupu Faavae ma Feagaiga 128.)
Valaaulia se tagata aoga e faitau leotele le Mataupu Faavae ma Feagaiga 128:16-17. Fai atu i le vasega e mulimuli i le faitauga, ma vaavaai mo perofeta i le Tusi Paia o e na tusitusi e uiga i le papatisoga mo e ua maliliu. Valaaulia i latou e lipoti mai mea latou te maua.
-
E mafai faapefea ona fesoasoani nei fuaitau o le Tusi Paia i se uo e le o se tagata o le Ekalesia?
Faaali atu se filifili ma ni ona sooga, pe tusi se ata i luga o le laupapa.
Valaaulia se tagata aoga e faitau leotele le Mataupu Faavae ma Feagaiga 128:18. Fai atu i le vasega e mulimuli i le faitauga, ma vaavaai pe faapefea ona fesootai ia sooga o se filifili i aoaoga a Iosefa Samita e uiga i le papatisoga mo e ua maliliu. (Atonu e te manao e faamanatu i tagata aoga o se tisipenisione o se periota o taimi e faaali mai ai e le Alii ia Ana aoaoga faavae, mataupu faavae, sauniga, ma le perisitua. Atonu foi e te manao e faamalamalama atu i lenei fuaiupu, o le upu fanau e faatatau ia i tatou ae o le upu tamā e faatatau i o tatou tuaa.)
-
E faapefea ona fesootai sooga o se filifili i aoaoga a Iosefa Samita e uiga i le papatisoga mo e ua maliliu? (E tatau ona faailoa mai e tagata aoga le upumoni lenei: O le papatisoga mo e ua maliliu e fesoasoani e fesootai atu ai i tatou e faavavau i o tatou tuaa. Faamalamalama atu e faapea, e faaopoopo atu i le papatisoga, o isi sauniga faaola—o le faamauga, faauuina i le perisitua Mekisateko (mo alii), o le faaeega paia i le malumalu ma le sauniga o le faamauga—e taua foi e faamau lelei ai le sosooga o le sooga i le va o o tatou tuaa ma i tatou lava.)
Ina ia fesoasoani i tagata aoga ia faateleina lo latou malamalama i aoaoga faavae ma mataupu faavae ua latou tau i ai i le Mataupu Faavae ma Feagaiga 128:12–18, valaaulia se tagata aoga e faitau leotele le saunoaga lenei a Peresitene Iosefa Filitia Samita:
“E ao lava ona i ai se faalapotopotoga o le aiga, se iunite o le aiga, ma e ao lava ona sosooina tupulaga taitasi i le filifili na i ai muamua ina ia mafai ona aumaia le atoatoa i le faalapotopotoga o le aiga. O le iuga la, o le a avea i tatou o se aiga tele e tasi faatasi ma Atamu i le ulu, ma Mekaeli, le agelu sili e pulefaamalumalu i lana fanau” (Doctrines of Salvation, tuufaatasia e Bruce R. McConkie, 3 vols. [1954–56], 2:175).
Faamanino atu e faapea, e tusa ai ma le fuaiupu e 18, o le a taia le lalolagi i se fetuu vagana ua sosoo faatasi ia augatupulaga o tama ma fanau Ina ia fesoasoani i tagata aoga ia malamalama i lenei aoaoga faavae, faitau le faamalamalamaga lenei mai ia Peresitene Iosefa Filitia Samita:
“Afai e leai se sootaga mau i le va o tama ma le fanau—lea o le galuega mo e ua maliliu—ia o lona uiga o le a teenaina i tatou uma; o le a toilalo le galuega atoa a le Atua ma matuai maimau lava” (Doctrines of Salvation, 2:122).
Mataupu Faavae ma Feagaiga 128:19-25
Ua faailoa atu e Iosefa Samita le olioli i le Toefuataiga o le talalelei ma uunaia le Au Paia ina ia faamaoni, a o latou galulue mo le faaolataga o e ua maliliu
Valaaulia tagata aoga e mafaufau i se taimi sa latou fiafia ai i le faalogoina o se tala fou e sili ona manaia. Valaaulia ni nai tagata aoga e faasoa mai o latou aafiaga. A uma ona latou faia o lea, fesili atu ia i latou pe mananao e faasoa atu le tala fou i isi, ma pe aisea.
Faamalamalama atu o le isi upu mo le tala fou o le tala fiafia. Valaaulia se tagata aoga e faitau leotele le Mataupu Faavae ma Feagaiga 128:19. Fai atu i le vasega e vaavaai mo le tala fiafia na saunoa mai Iosefa Samita ua tatou mauaina.
-
O a ni “tala fiafia” ua tatou maua? (O le talalelei a Iesu Keriso.)
-
E faapefea ona avea le talalelei a Iesu Keriso o se leo o le fiafia mo e ola ma e ua oti?
Faamalamalama atu e faapea, sa lisiina e Iosefa Samita nisi o aafiaga na ia oo i ai faatasi ma avefeau faalelagi, a o ala mai ia te ia le toefuataiina mai o le talalelei. Valaaulia tagata aoga e tagai vave i le Mataupu Faavae ma Feagaiga 128:20–21 ma faailoa mai aafiaga ma avefeau. Atonu e te manao e fautua atu e faailoga mea ua latou maua. Fai atu i tagata aoga e lipoti mai mea ua latou aoaoina. A uma ona faasoa mai mea ua latou mauaina, aotele a latou faamatalaga i le tusia o le aoaoga faavae lenei i luga o le laupapa: O ki, mana, ma le pule o tisipenisione ua mavae ua toefuatai mai i le tisipenisione o le atoaga o taimi.
Valaaulia se tagata aoga e faitau leotele le saunoaga lenei mai ia Peresitene Ioane Teila:
“O mataupu faavae sa i ai ia [Iosefa Samita] na mafai ai ona ia fesootai patino atu i le Alii, ma e le na o le Alii, ae faapea foi i aposetolo ma perofeta anamua; e pei o alii, mo se faataitaiga, o Aperaamo, Isaako, Iakopo, Noa, Atamu, Setu, Enoka, ma o Iesu, ma le Tama, ma le aposetolo sa soifua i lenei konetineta, faapea foi ma i latou o e sa ola i le konetineta o Asia. Na foliga mai sa masani lelei o ia i nei tagata e pei o i tatou i le tasi ma le isi. Aisea? Ona sa tatau ona ia faailoa mai se tisipenisione lea sa ta’ua o le tisipenisione o le atoatoaga o taimi, ma sa silafia i lena lava igoa e auauna anamua a le Atua” (The Gospel Kingdom [1987], 353.)
-
O le a se eseesega e faia i lou olaga i le iloa na toefuatai mai le talalelei i le lalolagi e ala i avefeau faalelagi?
Faamalamalama atu e faapea, o le Mataupu Faavae ma Feagaiga 128:22-23 o loo i ai faailoaga o le olioli na lagonaina e Iosefa Samita, ona ua toefuatai mai ki o le perisitua, ma ona e mafai e le Au Paia ona fesoasoani e togiola e ua maliliu. Valaaulia se tagata aoga e faitau leotele ia fuaiupu. Valaaulia le vasega e mulimuli i le faitauga, ma vaavaai mo fuaitau e sili ona anoa ia te i latou. (Atonu e te manao e fautua atu e faailoga na fuaitau.) Ona fai atu lea i tagata aoga e faitau na fuaitau ma faamalamalama mai pe aisea e anoa ai na fuaitau ia i latou.
Fai atu i se tagata aoga e faitau leotele le Mataupu Faavae ma Feagaiga 128:24 ma valaaulia le vasega e vaavaai mo le mea na faatoniuina e le Perofeta le Au Paia e fai. Valaaulia i latou e lipoti mai mea latou te maua.
-
E tusa ai ma lenei fuaiupu, o a taulaga amiotonu e tatau ona tatou faia i le Alii? (O se tusi ua i ai talafaamaumau o o tatou tagata maliliu.)
-
O le a se mea tatou te faia e saofaga ai i lenei “tusi”? O le a se mea ua aoao mai e le fuaiupu e 24 e uiga i lo tatou auai i le galuega o malumalu ma talafaasolopito o aiga? (E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: A tatou faia galuega o talafaasolopito o aiga ma maua sauniga o le malumalu mo o tatou tuaa, ua tatou osia se taulaga amiotonu i le Alii. Tusi lenei mataupu faavae i luga o le laupapa.)
Valaaulia se tagata aoga e faitau leotele le saunoaga lenei a Elder David A. Bednar o le Korama a Aposetolo e Toasefululua. Fai atu i le vasega e faalogologo mo le faamatalaga a Elder Bednar o lo latou matafaioi i le faaolataga o e ua oti:
“O le toatele o outou atonu e manatu o le galuega o talafaasolopito o aiga e tatau lava ona faatinoina e tagata matutua. Ae ou te iloa e le o faatapulaaina mai se matua i tusitusiga paia po o taiala o loo fofogaina mai e taitai o le Ekalesia e faatapulaaina ai lenei auaunaga taua. …
“E le o se mea na faafuaveta ona oo mai … o meafaigaluega i se taimi ua matua masani lelei ai tupulaga talavou ma se vaega tele o faamatalaga ma fesootaiga tau tekinolosi. … O tomai ma taleni ua molimauina i le toatele o tupulaga talavou i ona po nei, o se tapenapenaga e saofagā ai i le galuega o le faaolataga.
“… Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo outou aiga ua maliliu. … Ma ou te uunaia outou ia fesoasoani atu i isi tagata ia iloa o latou talafaasolopito o aiga” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 26).
-
O a ni auala e mafai ona e auai ai i le galuega o malumalu ma talafaasolopito o aiga?
-
O anafea na e osia ai ni taulaga e ala i le galuega o malumalu ma talafaasolopito o aiga? O a ni auala na faamanuiaina ai oe a o e faia nei taulaga?
Faasoa atu lau molimau e uiga i faamanuiaga o le a maua e tagata aoga a o latou auai i le galuega o talafaasolopito o aiga ma galuega o le malumalu. Valaaulia tagata aoga e faatutu ni sini o le a fesoasoani ia i latou e fai ai galuega o malumalu ma talafaasolopito o aiga.
Tala ma Faamatalaga o Talaaga
Mataupu Faavae ma Feagaiga 128:15. “E lē mafai ona faaatoatoaina i latou e aunoa ma i tatou—pe mafai foi ona faaatoatoaina i tatou e aunoa ma o tatou tagata maliliu”
Na lapatai mai le Perofeta o Iosefa Samita:
“O latou na o le Au Paia o e o loo faatalale [i le aoaoga faavae o le faaolataga mo e ua maliliu] mo o latou aiga ua oti, ua latou faafaigataina lo latou lava faaolataga” (Aoaoga a Peresitene o le Ekalesia: Iosefa Samita [2007], 503).
Mataupu Faavae ma Feagaiga 128:15. O faamanuiaga e o mai faatasi ma le faia o galuega o malumalu ma talafaasolopito o aiga
Na saunoa mai Elder Richard G. Scott o le Korama a Aposetolo e Toasefululua:
“Outou tupulaga talavou, pe tou te mananao i se auala mautinoa e tuuitiitia ai faatosinaga a le fili i lou olaga? Ia faatofu oe lava i le sailia o ou tuaa, saunia igoa mo sauniga sui paia o loo maua i le malumalu, ona e alu atu lea i le malumalu e fai ma sui mo i latou ia maua sauniga o le papatisoga ma le meaalofa o le Agaga Paia. A o e faasolosolo matua, o le a mafai foi ona e auai i le mauaina o isi sauniga. E leai se isi puipuiga sili atu mai faatosinaga a le fili i lou olaga e mafai ona ou mafaufau i ai” (“O Le Olioli i le Faaolaina o E Ua Maliliu,” Ensign po o le Liahona, Nov. 2012, 94).
Mataupu Faavae ma Feagaiga 128:24. “Talafaamaumau o o tatou tagata maliliu”
O le fuaitau “o o tatou tagata maliliu,” i le Mataupu Faavae ma Feagaiga 128:24 ua faailoa mai ai le tiutetauave e tatau ona tatou faia le sailiiliga o talafaasolopito o aiga ma faatino sauniga o le malumalu mo o tatou lava tuaa. Sa faamalamalama mai e Elder Richard G. Scott:
“O galuega o le malumalu ma talafaasolopito o aiga o le galuega e tasi e vaevaeina i ni vaega se lua. …
Sa aoao mai Peresitene Howard W. Hunter:
“’E tatau ona tatou maua sauniga faaleperisitua o le malumalu mo o tatou lava faaeaga; ona tatou faia ai lea o galuega talafeagai mo i latou e le i maua le avanoa e talia ai le talalelei i le olaga nei. O le faia o galuega mo isi e mafai ona ausia i ni laasaga se lua: muamua, e ala i le sailia o talafaasolopito o aiga e iloa ai o tatou tuaa; ma lona lua, o le faia lea o sauniga o le malumalu e tuu atu ai ia i latou ia lava avanoa e maua e tagata o soifua pea. …
“’Ua ou iloa o i latou o loo gauai atu i le sailiga o talafaasolopito o aiga ona fai ai lea o galuega o sauniga faalemalumalu mo i latou ua latou maua igoa, o le a latou iloa le olioli faaopoopo o ‘afa uma e lua o faamanuiaga’ [“O Tagata Naunau i le Malumalu,” Liahona, Me 1995, 5–6].
“E finagalo le Tama oi le Lagi ia maua uma e i tatou taitoatasi ia vaega uma e lua o faamanuiaga o lenei galuega taua e fai ai ma sui [o e ua maliliu]. …
“Soo se galuega e te faia i le malumalu o le taimi faaaluina tatau lea, ae o le mauaina o sauniga sui mo ou lava tuaa o le a sili atu ai ona paia le taimi i le malumalu ma o le a faapea ona [e] maua ai faamanuiaga sili atu. Ua folafola mai e le Au Peresitene Sili e faapea, “O lo tatou tiutetauave tupito o le sailia lea ma faailoa o o tatou lava tuaa [Tusi a le Au Peresitene Sili, 29 Fep., 2012; faaopoopo le faamamafa] “(”O Le Olioli i le Faaolaina o E Ua Maliliu ,“ Ensign po o le Liahona, Nov. 2012, 93–94).