I le aso 26 o Aperila, 1838, na maua ai e le Perofeta o Iosefa Samita le faaaliga o loo i ai i le Mataupu Faavae ma Feagaiga 115. I lea [faaaliga] na faaali mai ai e le Alii le igoa o le Ekalesia, ma poloaiina le Au Paia e “tutulai ia ma susulu atu” (MF&F 115:5), ma faaali mai Lona finagalo e faatatau i le malumalu i Sisifo Mamao. I le aso 19 o Me, 1838, na maua ai e le Perofeta o Iosefa Samita le faaaliga o loo maua i le Mataupu Faavae ma Feagaiga 116, lea na faailoa mai ai o Spring Hill [Maupuʼepuʼe Totogo], Misuri, o Atamu-onai-Amani.
Ua poloai mai le Alii i tagata o Lana Ekalesia e “tutulai ia ma susulu atu”
A o le’i amata le vasega, tusi fesili nei i luga o le laupapa:
O a ni mea e ta’u mai e le igoa o le faalapotopotoga?
O ai e taitaia le faalapotopotoga?
O a mea e fai e le faalapotopotoga?
Faaali atu ni igoa po o ni tagavai o ni kamupani po o ni faalapotopotoga talafeagai ia atonu e iloa e tagata aoga. Taofi pe a uma ona e faaali atu ia igoa taitasi, ma fai atu i tagata aoga e tali ia fesili ua tusia i le laupapa.
Faaali atu le igoa ma le tagavai o le Ekalesia. Valaaulia tagata aoga e vaavaai mo ni tali i fesili o loo i luga o le laupapa e faatatau i le igoa o le Ekalesia a o latou suesue i le Mataupu Faavae ma Feagaiga 115.
Aotele le Mataupu Faavae ma Feagaiga 115:1–3 i le faamalamalama atu e faapea, o lenei faaaliga sa tuuina mai e ala i le Perofeta o Iosefa Samita i alii ua ta’ua igoa i le fuaiupu 1-2 ma i tagata uma o le Ekalesia. Valaaulia tagata aoga e faitau filemu le Mataupu Faavae ma Feagaiga 115:4, ma vaavaai mo le igoa na atofaina e le Alii mo Lana Ekalesia. A o lipoti mai e tagata aoga mea ua latou maua, tusi le igoa o le Ekalesia i luga o le laupapa faapenei:
O Le
Ekalesia a Iesu Keriso
o le Au Paia
o Aso e Gata Ai
Ina ia fesoasoani i tagata aoga ia malamalama i le taua o le igoa o le Ekalesia, valaaulia tagata aoga e talanoa ma se paga po o le a so latou manatu i uiga o upu taitasi po o fuaitau ua lisiina i luga o le laupapa. A uma se taimi, fai atu i ni nai tagata aoga e faasoa mai o latou manatu e faatatau i le uiga o upu po o fuaitau taitasi. Afai e manaomia e tagata aoga se fesoasoani, atonu e te manao e faitau atu i ai le faamatalaga lenei mai ia Elder M. Russell Ballard o le Korama a Aposetolo e Toasefululua:
Ata
Elder M. Russell Ballard
“O le upu O Lee faailoa mai ai le tulaga ese o le Ekalesia toefuataiina mai isi ekalesia i le lalolagi.
“O upu Ekalesia a Iesu Keriso o loo tautino mai ai o Lana Ekalesia lea. …
“o Aso e Gata Ai o loo faamalamalama mai ai e tutusa lava lenei Ekalesia ma le Ekalesia lea na faatuina e Iesu Keriso i le taimi o Lana galuega talai faaletino ae ua toefuatai mai i nei aso e gata ai. …
“o le Au Paia … o loo faasino lea ia i latou o e saili e faapaiaina o latou olaga e ala i le osi feagaiga e mulimuli ia Keriso” (“O Le Taua o se Igoa,” Ensign po o le Liahona, Nov. 2011, 80).
O a nisi o upumoni taua na faailoa mai i le igoa o le Ekalesia?
Valaaulia se tagata aoga e faitau leotele le Mataupu Faavae ma Feagaiga 115:5. Fai atu i le vasega e mulimuli i le faitauga, ma vaavaai mo mea ua faamoemoe mai le Alii ia i latou o e auai i Lana Ekalesia.
O le a ni mea ua faamoemoe mai e le Alii ia i tatou i le avea ai ma tagata o Lana Ekalesia?
O le a sou manatu i le uiga o le “tutulai ia ma susulu atu” i le avea ai ma tagata o Le Ekalesia a Iesu Keriso o le Au Paia o Aso e Gata Ai?
E tusa ai ma le fuaiupu e 5, o le a le faamanuiaga o le a oo mai a o mulimuli tagata o le Ekalesia i le fautuaga a le Alii e tutulai ia ma susulu atu? (E tatau ona faailoa mai e tagata aoga le mataupu faavae lenei: Afai tatou te tutulai ma susulu atu, o le a avea lo tatou malamalama ma se tagavai mo atunuu. Atonu e te manao e fautua atu ia faailoga e tagata aoga lenei mataupu faavae i le fuaiupu e 5.)
Ina ia fesoasoani i tagata aoga ia malamalama lelei i lenei mataupu faavae, fai atu i ai fesili nei:
O le a sou manatu i le uiga o le, o lo tatou malamalama, po o faataitaiga, e mafai ona avea ma se “tagavai mo atunuu”? (O se tagavai o se fu‘a po o se faailo e avea o se tulaga e faapotopoto ai po o se faatusa musuia. O la tatou faataitaiga i le avea ai ma tagata o le Ekalesia e mafai ona musuia ai isi ma aumai ai i latou i le Alii.)
E mafai faapefea e le mulimuli i le poloaiga a le Faaola ia tutulai ia ma susulu atu ona tosina mai ai isi i Le Ekalesia a Iesu Keriso o le Au Paia o Aso e Gata Ai?
Ina ia fesoasoani i tagata o le vasega ia malamalama i le auala e mafai ai e lo tatou malamalama ona fesoasoani i isi, valaaulia se tagata o le vasega e faitau le tala lenei na faasoa mai e Peresitene James E. Faust o le Au Peresitene Sili:
Ata
Peresitene James E. Faust
“I nai tausaga ua mavae, sa tofi atu ai ia Constance, o se tamaitai aoga faatausimai, e taumafai ma fesoasoani i se tamaitai sa manua lona vae i se faalavelave. Sa tetee e le tamaitai se fesoasoaniga faafomai ona sa i ai se taimi sa oo ai i se aafiaga le lelei i le falemai. Sa fefe o ia ma oo ai lava i se tulaga ua tuua na o ia. O le taimi muamua na afe atu ai ia Constance, na faatonuina o ia e le tamaitai o loo manu’a e alu i fafo. I le taumafaiga lona lua, sa ia faatagaina ia Constance i totonu. O le taimi lea ua matuai lilofia le vae o le tamaitai i pou lapopoa, ma ua i ai nisi vaega o le aano ua pala. Ae sa le manao lava e togafitia o ia.
“Sa avea lea ma se tatalo ia Constance, ma pe tusa ma se aso pe lua ae oo mai le tali. Sa ia aveina se vai fufulu manu’a i le isi ana asiasiga. Talu ai ona e le tiga tele, sa faataga ai e le tamaitai matua lenei, e faaaoga i lona vae. Ona la talatalanoa lea i nisi togafitiga e sili atu ona taua i le falemai. Sa faamautinoa atu i ai e Constance o le a avea lona nofo i le falemai ma se mea sili ona manaia. Pe tusa ma le tasi pe lua aso ae maua e le tamaitai le lototele e alu atu ai i le falemai. Ina ua asiasi atu i ai ia Constance ia te ia, sa ataata le tamaitai ma faapea atu, ‘Ua e faatalitonuina au.’ Ona, faafuasei lea, ona ia fesili atu ia Constance, ‘O le a le lotu e te auai i ai?’ Sa tau atu e Constance ia te ia o ia o se tagata O Le Ekalesia a Iesu Keriso o le Au Paia o Aso e Gata Ai. Sa faapea atu le tamaitai: ‘Na ou iloaina lava. Na ou iloaina na auina mai oe ia te au i le aso muamua lava na ou vaai ai ia te oe. Sa i ai se malamalama i ou foliga lea sa ou matauina foi i isi o la outou ekalesia. Sa ou talitonuina oe.’
“Sa matuai pe lelei lena vae na papala ina ua mavae le tolu masina. Na toe faaleleia le fale o le tamaitai matua lenei e tagata o le uarota lea sa nofo ai ma toe teuteu lona fanua. Sa feiloai o ia ma faifeautalai, ma e lei umi ae papatisoina o ia [tagai Constance Polve, “A Battle Won,” New Era, Ape. 1980, 44-45]. Na mafua uma nei mea ona sa ia iloaina le malamalama i foliga o lena tamaitai faatausimai” (“O Le Malamalama i o Latou Mata,” Ensign po o le Liahona, Nov. 2005, 22).
O le a le mea sa faia e Constance e “tutulai ai ma susulu atu”?
Na faapefea ona avea le malamalama i foliga o Constance o se tagavai mo le tamaitai na manua?
Ina ia fesoasoani i tagata aoga ia lagona le moni ma le taua o lenei mataupu faavae, valaaulia i latou e mafaufau i se tagata latou te iloa, o se faataitaiga lelei o le tutulai ma susulu atu. Valaaulia ni nai tagata aoga e faasoa mai o latou manatu e uiga ma le auala ua avea ai le faataitaiga a lena tagata ma se faamanuiaga ia i latou. A o e faalogologo i a latou tali, fai atu ni fesili tulitatao o le a faaosofia ai tagata aoga e faasoa atili mai e uiga i mea o loo latou mafaufau i ai ma lagonaina.
Valaaulia tagata aoga e tusi i a latou api o le vasega po o api talaaga mo le suesueina o tusitusiga paia, ni mea o le a latou faia ina ia avea atili ai ma se tagavai ia i latou o siomia i latou.
Valaaulia se tagata aoga e faitau leotele le Mataupu Faavae ma Feagaiga 115:6. Fai atu i le vasega e vaavaai mo faamanuiaga ua folafolaina mai ia i latou e faapotopoto faatasi ma le Ekalesia i siteki o Siona.
O a faamanuiaga ua folafola mai ia i latou e faapotopoto i siteki o Siona? (A uma ona tali mai tagata o le vasega, tusi le upumoni lenei i luga o le laupapa: Tatou potopoto i siteki o Siona mo le puipuiga ma le sulufaiga.)
O a ni mea e manaomia ona puipuia mai ai i tatou? O a ni mea e manaomia ona tatou sulufai mai ai? O a ni auala ua e vaaia ua fesoasoani ai ia i tatou le faapotopoto faatasi o se Au Paia i le puipuia o i tatou lava ma maua le sulufaiga?
Valaaulia tagata aoga e mafaufau i se tasi latou te iloa e ono faamanuiaina i le faapotopoto faatasi ma le Au Paia. Uunaia tagata aoga ia faasusulu atu o latou malamalama ina ia mafai ona taitai mai ai isi i le filemu, saogalemu, ma le sulufaiga o loo tuuina mai e Le Ekalesia a Iesu Keriso o le Au Paia o Aso e Gata Ai.
Ua poloaiina e le Alii le Au Paia e faavae i le aai o Sisifo Mamao ma ia fausia se malumalu
Faamalamalama atu o se tasi o auala e mafai ona tatou maua ai le puipuiga ma le saogalemu a le Alii, e ala lea i le auauna atu ma tapuai ia te Ia i le malumalu. Ina ua amata ona siitia atu le Au Paia i Sisifo Mamao, Misuri, i le 1836, sa faia e taitai o le Ekalesia ni fuafuaga e fausia se malumalu e talitutusa ma le malumalu i Katelani, Ohaio. E ui lava sa faia ni muai eliga, ae sa taofia le fauga seia oo ina mafai ona maua e Iosefa Samita se faatonuga faaopoopo mai le Alii. Na faaali mai e le Alii Lona finagalo e faatatau i le malumalu o se vaega o le faaaliga i le Mataupu Faavae ma Feagaiga 115.
Aotele le Mataupu Faavae ma Feagaiga 115:7–16 i le faamatala atu e faapea, na faaali mai e le Alii e tatau ona fausia se malumalu i Sisifo Mamao e tusa ma le mamanu o le a Ia tuu mai i le Au Peresitene Sili. Na fautuaina foi e le Alii ia taitai o le Ekalesia ia aua ne’i oo i le aitalafu ina ia fausia ai le malumalu.
Valaaulia se tagata aoga e faitau leotele le Mataupu Faavae ma Feagaiga 115:17–19. Fai atu i le vasega e mulimuli i le faitauga, ma vaavaai mo le mea na finagalo i ai le Alii e fai i lalo o le taitaiga a Iosefa Samita i Sisifo Mamao, ma i nuu tuaoi.
O le a le mea na finagalo le Alii i le Au Paia e fai i Sisifo Mamao? O le a le mea na tatau ona latou faia i lalo o le taitaiga a Iosefa Samita i pitonuu na siomia ai Sisifo Mamao?
E tusa ai ma le fuaiupu e 19, o le a le mea e agavaa ai le Peresitene o le Ekalesia i le taimi nei e taitai ai le galuega a le Alii i le lalolagi? (E tatau ona faailoa mai e tagata aoga le aoaoga faavae lenei: O le Peresitene o le Ekalesia e umia ki e taitai ai le galuega a le Alii i luga o le fogaeleele. Atonu e te manao e fautua atu i tagata aoga e faailoga upu o loo aoao mai ai lenei aoaoga faavae i le fuaiupu e 19.)
Faasino atu tagata aoga i fesili o loo i luga o le laupapa, ma fai atu ia i latou e faamalamalama mai le auala o le a latou taliina ai e faavae i mea ua latou aoaoina i le Mataupu Faavae ma Feagaiga 115.
Ua faailoa mai e le Alii ia Atamu-onai-Amani e avea ma nofoaga o se fonotaga i le lumanai i le va o le Alii ma Lona nuu
Faamalamalama atu, sa mulimuli Iosefa Samita i le fautuaga a le Alii i le Mataupu Faavae ma Feagaiga 115:18 ma sailiili i eria o loo siomia ai Sisifo Mamao. Valaaulia se tagata aoga e faitau leotele le folasaga o le vaega mo le Mataupu Faavae ma Feagaiga 116, ma fai atu i tagata aoga e vaavaai mo le igoa o le nofoaga sa sailiiliina e Iosefa.
Valaaulia se tagata aoga e faitau leotele le Mataupu Faavae ma Feagaiga 116:1, ma fai atu i le vasega e vaavaai mo mea na faaalia mai e le Alii e uiga ia Spring Hill, Misuri. Atonu e te manao e faatonu tagata aoga e sue i le faafanua ma le ata o Atamu-onai-Amani i tua o a latou tusitusiga paia (tagai i Faafanua o le Talafaasolopito o le Ekalesia, Faafanua 5, “O Eria o Misuri, Ilinoi, ma Aioua o le ISA” ma Atapu‘e o Talafaasolopito o le Ekalesia, Ata 10, “Atamu-onai-Amani”).
Faamalamalama atu, o lenei faaaliga ua faailoa mai le nofoaga o le faataunuuina i le lumanai o se valoaga na faia i aso anamua e le perofeta o Tanielu (tagai i le Tanielu 7:9–10, 13–14). O le valoaga o loo faamatala ai se mea e tupu i aso e gata ai, lea o le a asiasi mai ai le Faaola ma Atamu i le lalolagi ma pulefaamalumalu i se fonotaga a’o lumanai le Afio Mai Faalua o Iesu Keriso i le lalolagi atoa (tagai i le MF&F 27:5–14). Mafaufau e faaiu le lesona i le valaaulia o tagata aoga e usu le viiga “Adam-ondi-Ahman” (Viiga, nu. 49).
E ui lava ina sa naunau le Au Paia e fausia le malumalu i Sisifo Mamao, ae sa le mafai ona latou faia lena mea. E tusa ai ma poloaiga a le Alii, sa latou faataatiaina maatulimanu i le aso 4 o Iulai, 1838. Ae sa le mafai ona latou faamaea le fausiaina o le malumalu na amata mai i le aso 26 o Aperila, 1839, e pei ona sa faatonuina ai e le Alii (tagai i le MF&F 115:11), ona sa faamalosia i latou e sosola ese mai le setete o Misuri ia Fepuari o le tausaga lena. Ae ui i lea, na toe foi nisi o aposetolo i le tulaga o le malumalu i le aso 26 o Aperila, 1839, i le usiusitai i le faaaliga o loo maua i le Mataupu Faavae ma Feagaiga 118:5, ao latou malaga ese atu mo a latou misiona i Egelani.
Na faamalamalama mai e Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
“OAmani o se tasi o suafa o le Atua na iloa ai e Atamu. OAtamu-onai-Amani, o se igoa na tauave mai i le gagana moni faa Atamu i le gagana Peretania, o se tasi lea o upu e le’i tuuina mai ia i tatou se faaaliga i lona faaliliuga moni. I le latalata i le mea e mafai ona tatou faamasinoina ai—ma o lenei manatu ua tuufaasolo mai i le usoga anamua o e sa fegalegalea’i ma le Perofeta o Iosefa Samita, o le tagata muamua lea na faaaogaina le igoa i lenei tisipenisione—O Atamu-onai-Amani o lona uiga o le nofoaga po o le laueleele o le Atua lea sa nofo ai Atamu“ (Mormon Doctrine, 2nd ed. [1966], 19–20).
Na aoao mai Peresitene Iosefa Filitia Samita e uiga i le taimi o le a oo mai ai Atamu e asiasi i lona nuu:
Ata
Peresitene Iosefa Filitia Samita
“O lenei faapotopotoina o le fanau a Atamu, lea o le a faapotopoto ai le faitau afe, ma le fia sefulu o afe i le faamasinoga, o le a avea ma se tasi o mea maoae e tupu, o le a vaaia e lenei lalolagi faigata. I lenei konafesi, po o le fonotaga, o i latou uma na umia ki o tisipenisione o le a tuuina atu se lipoti o lo latou tulaga faatausimea. O le a faapena foi ona fai e Atamu, ona ia tuuina atu ai lea o le pule uma ia Keriso. Ona faamauina ai lea o Atamu i lona valaauga o le aloalii i ana fanau ma o le a faatula’i aloaia ma faapaleina e faavavau i lenei valaauga pulefaamalumalu. Ona taliaina ai lea o Keriso o le Tupu o tupu, ma Alii o alii. Tatou te le iloa po o le a le umi o se taimi umi o le a tauaofia ai lenei sauniga, pe fia foi ni sauniga e ono faia i lenei fono tele. Ua lava ona iloa o se faapotopotoina o le Perisitua o le Atua mai le amataga o lenei lalolagi e tau mai i le taimi lenei, lea o le a faia ai lipoti ma o i latou uma o e na tuuina i ai ni tisipenisione (taleni) o le a tautino atu a latou ki ma galuega ma faia se lipoti o a latou tulaga faatausimea e tusa ai ma le faataoto. O le a faia le faamasinoga ia i latou aua o se faatasiga lenei o e amiotonu, o e sa umiaina ma o loo umia ki o le pule i le Malo o le Atua i luga o lenei lalolagi. E le o le faamasinoga o e amioleaga. Pe a saunia loa mea uma ma faatulaga uma ia ki ma mana uma, faatasi ai ma se lipoti ma’ea’ea ma atoatoa o le tulaga faatausimea a tagata taitoatasi, ona tauaaoina lea e Keriso ia nei lipoti ma faauuina o le Pule moni o lenei lalolagi. I lenei fono tele o le a ia nofoia ai lona nofoaga e ala i le leo autasi o le faitau afe o e ona o le aia tatau o le Perisitua ua faapotopoto ai iina. O lenei [fono tele] o le a muamua atu i le aso tele o le faatafunaga o e amioleaga, ma o le a avea ma tapenaga mo le Nofotupu i le Meleniuma” (The Progress of Man [1952], 481–82).
Na aoao mai foi Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
“O le a afio faalilolilo mai [Keriso] i lana perofeta ma i aposetolo o e o le a soifua pea i lena taimi. O i latou o e na umia ki ma mana ma pule i augatupulaga uma mai ia Atamu e oo mai i le taimi nei, o le a i ai foi iina. Ma le isi, o tagata faamaoni uma o le Ekalesia o le a ola pea i lena taimi, ma le au paia faamaoni uma o augatupulaga ua mavae o le a i ai iina. O le a avea o se faapotopotoga aupito maoae o le au paia faamaoni na faapotopoto i le lalolagi. O le a avea o se sauniga faamanatuga. O le a avea o se aso o le faamasinoga mo le au faamaoni i augatupulaga uma. Ma o le a faia i le Itumalo o Daviess, Misuri, i se nofoaga e ta’ua o Atamu-onai-Amani” (The Millennial Messiah: The Second Coming of the Son of Man [1982], 578–79).