Ia Setema 1830, ina ua faatoa mavae se konafesi a le Ekalesia i Feiete, Niu Ioka, sa maua ai e Iosefa Samita ni faaaliga mo Tavita Uitimera, Pita Uitimera le Itiiti, ma Ioane Uitimera. O nei faaaliga na muai lolomi eseese, ae sa tuufaatasia e Iosefa Samita i se vaega e tasi i le lomiga i le 1835 o le Mataupu Faavae ma Feagaiga.
Ua aoai e le Alii ia Tavita Uitimera mo le le ua’i atu i le Agaga ma auauna faauuina a le Alii
Fai atu i tagata o le vasega e mafaufau le leoa i tulaga nei:
Na faalogologo se alii talavou i musika e le fetaui ma tulaga faatauaina o loo otootoina mai i le Mo le Malosi o le Autalavou. E ui lava na ia fiafia e faalogologo i lenei musika, ua amata ona ia iloa o ona savali ua mafua ai ona ia le maua le Agaga ma tafea ese mai i lona aiga, ana uo, ma le Ekalesia.
Ina ua mavae ni nai tafaoga faamasani ma se tasi o alii talavou, na amata ona iloa e se tamaitai talavou, e ala i uunaiga a le Agaga Paia, na taumafai malie lava le alii talavou e tauanau o ia e soli le tulafono o le legavia.
Faailoa atu o le a lapataia i tatou e le Agaga Paia pe a tatou i ai i se tulaga matautia faaleagaga. Ae ui i lea, afai tatou te le faalogo i Ana lapataiga, o le a aluese le Agaga o le Alii mai ia i tatou. O le Mataupu Faavae ma Feagaiga 30 o loo i ai aoaoga ma mataupu faavae e mafai ona fesoasoani ia i tatou e saunia e talia ma mulimuli i lapataiga mai le Agaga.
Faamalamalama atu, o le vaega muamua o le Mataupu Faavae ma Feagaiga 30 o se faaaliga na maua e le Perofeta o Iosefa Samita mo Tavita Uitimera.
O le a se mea e te iloa e uiga ia Tavita Uitimera? (O tali e mafai ona aofia ai, o ia ma ona matua na tuuina atu se nofoaga mo Iosefa Samita e faaliliu ai le Tusi a Mamona, o ia o se tasi o Molimau e Toatolu o le Tusi a Mamona, ma o ia o se tasi o uluai tagata e toaono o le Ekalesia.)
Faamalamalama atu e faapea, e ui lava ina sa faamaoni Tavita Uitimera i le tele o itu, ae na aoaiina o ia e le Alii i lona faatamala i ona tiutetauave i le Ekalesia. Valaaulia se tagata o le vasega e faitau le Mataupu Faavae ma Feagaiga 30:1–2. Fai atu i le vasega e mulimuli i le faitauga, ma vaavaai mo upu aoai a le Alii.
Aisea na aoai ai e le Alii ia Tavita Uitimera? (Atonu e te manao e lisi tali a tagata o le vasega i luga o le laupapa. O tali e mafai ona aofia ai, na fefe Tavita i tagata, sa le faalagolago i le Alii mo le malosi, sa sili atu ona tuu lona mafaufau i mea o le lalolagi nai lo o mea a le Alii, sa le’i mulimuli i le taitaiga a le Agaga ma taitai o le Ekalesia, ma sa faatosinaina e i latou sa le’i valaauina e le Alii.)
Valaaulia tagata o le vasega e fautua mai ni mataupu faavae e mafai ona tatou aoaoina mai i le Mataupu Faavae ma Feagaiga 30:1–2. Atonu latou te fautua mai nisi po o mataupu faavae uma nei:
Nai lo le fefe i tagata, e tatau ona tatou faalagolago i le Alii mo le malosi.
E tatau ona sili atu ona tuu o tatou mafaufau i mea a le Atua nai lo le mea o le lalolagi.
E tatau ona tatou mulimuli i le Agaga ma le fautuaga a taitai o le Ekalesia nai lo le faatosinaina e i latou e le’i valaauina e le Alii.
Ina ia fesoasoani i tagata o le vasega ia malamalama ma lagona le taua o nei mataupu faavae, fai atu i ai se vaega po o fesili uma nei:
O le a lou manatu i le uiga o le fefe i tagata? (O tali e mafai ona aofia ai, o lona uiga o le faataga o aoaoga a isi tagata e taitaiese i tatou mai aoaoga a le Atua)
O a ni nisi o mea e mafai ona tatou faia e faalagolago atu ai i le Alii mo le malosi? O le a se taimi na e lagonaina ai na faamalosia oe e le Alii?
O le a sou manatu i le uiga o le, ua sili atu ona tuu o tatou mafaufau i mea o le lalolagi nai lo o mea a le Alii? O a ni nisi o tulaga matautia o le tausalaina i lenei mea?
Na faapefea ona faamanuiaina oe a o e mulimuli i le Agaga ma le fautuaga a taitai o le Ekalesia?
Valaaulia se tagata o le vasega e faitau leotele le Mataupu Faavae ma Feagaiga 30:3–4. Uunai le vasega e vaavaai mo le fautuaga a le Alii ia Tavita Uitimera.
Ina ua uma ona aoaiina Tavita, o le a le mea na poloaiina e le Alii ia Tavita e fai? (E mafaufau loloto i mea na ia mauaina ma faasaga atu i ona tiute o le Ekalesia.)
E mafai faapefea e le mafaufau loloto i mea ua tatou maua mai le Atua, ona fesoasoani ia i tatou e tumau i le faatuatua?
E faapefea ona faatosinaina i tatou mo le lelei pe a tuuto atu i tatou lava i valaauga ua tatou maua?
Uunaia tagata o le vasega e iloilo filemu le Mataupu Faavae ma Feagaiga 30:1–4, ma vaavaai mo fautuaga e faatatau lelei i o latou olaga. Fai atu ia te i latou e mafaufau loloto i mea e mafai ona latou faia e mulimuli ai i lena fautuaga. Valaaulia i latou e tusi o latou manatu i a latou api o le vasega po o api talaaga mo le suesueina o tusitusiga paia.
Ua valaauina Pita Uitimera le Itiiti e o ma Oliva Kaotui i se misiona i sa Lamana
Aumai i le vasega se mea faitino mamafa po o se ato e tumu i mea mamafa, e pei o tusi po o ni maa. Valaaulia se tagata o le vasega e uu le mea faitino i ona luma. A o uu e le tagata o le vasega le mea faitino, faamatala atu, e faaopoopo atu i le faaaliga ia Tavita Uitimera, o le Mataupu Faavae ma Feagaiga 30 o loo i ai ni faaaliga faaopoopo se lua, sa talanoa mai i uso o Tavita o Pita ma Ioane. Valaaulia tagata o le vasega e faitau e le tagata lava ia le Mataupu Faavae ma Feagaiga 30:5 ma vaavaai mo le mea na valaauina e le Alii ia Pitia Uitimera le Itiiti e fai.
O le a le mea na valaau le Alii ia Pita Uitimera le Itiiti e fai? (Talai atu le talalelei.) O ai o le a avea ma taitai ia Pita i lenei taumafaiga? (Oliva Kaotui.)
Valaaulia se tagata lona lua o le vasega e fesoasoani i le tagata o le vasega o loo uuina le mea faitino mamafa. Fai atu i le tagata muamua o le vasega e faamatala mai le eseesega ua ia lagonaina i le i ai o le lagolago mai se isi tagata. Faamalamalama atu, na tuuina mai e le Alii le fautuaga ia Pita, ma faamalamalama mai le auala e fesoasoani ai ia Oliva Kaotui. Valaaulia tagata o le vasega e sailiili le Mataupu Faavae ma Feagaiga 30:5–8, ma vaavaai mo fasifuaitau o loo faamatalaina ai le auala na tatau ia Pita ona lagolago ai Oliva. Atonu e te manao e fautuaina tagata o le vasega e faailoga nei fuaitau.
O a fuaitau na e mauaina? (Atonu e te manao e valaaulia se tagata o le vasega e tusi tali a tagata o le vasega i luga o le laupapa.)
O le a sou manatu i le uiga mo Pita ina ia “puapuaga i puapuaga uma [o Oliva]”? (Na tatau ia Pita ona tu i tafatafa o Oliva, e oo lava i taimi faigata.)
E tusa ai ma le fuaiupu e 6, o le a le matafaioi a le tatalo i le lagolagoina o o tatou taitai o le Ekalesia?
Ua valaauina Ioane Uitimera e talai atu le talalelei
Faamalamalama atu e faapea, o le Mataupu Faavae ma Feagaiga 30:9–11 o loo i ai se faaaliga mo Ioane Uitimera. Valaaulia se tagata o le vasega e faitau leotele le Mataupu Faavae ma Feagaiga 30:9-10. Fai atu i le vasega e mulimuli i le faitauga, ma vaavaai mo mea na valaauina e le Alii ia Ioane Uitimera e fai. (Atonu e fesoasoani le faamalamalama atu o le ava a Philip Burroughs sa avea o se tagata o le Ekalesia. Sa nonofo le aiga o Burroughs pe a ma le fitu maila i matu o le au Uitimera, i Seneca Falls, i Niu Ioka. E ui o Philip Burroughs sa faatatau i ai o se “uso” i le fuaiupu e 10, ae e leai se faamaumauga sa auai o ia i le Ekalesia.)
A uma ona lipoti mai e tagata o le vasega mea na latou maua, fai atu ia i latou e sue le Mataupu Faavae ma Feagaiga 30:11, ma vaavaai mo se mataupu faavae e faatatau i le auala e tatau ona tatou auauna atu ai i le Alii. Uunaia i latou e faailoa mai mea ua latou aoaoina i se fuaiupu o le “afai-ona”.
O le a le mataupu faavae ua e vaaia i le fuaiupu e 11? (E mafai ona faaaoga e tagata o le vasega ni upu eseese, ae e tatau ona latou faamatalaina le mataupu faavae lenei: Afai tatou te auauna i le Alii ma o tatou loto atoa, o le a faatasi o Ia ma i tatou.)
Valaaulia tagata o le vasega e faasoa mai se aafiaga na latou maua, lea na latou lagona ai le faatasi mai o le Alii ia i latou a o latou auauna atu ia te Ia. (Atonu foi e te manao e faasoa atu lau molimau e uiga i lenei mataupu faavae.) Uunaia tagata o le vasega e vaavaai mo avanoa e faalatalata atili atu ai i le Alii e ala i le auauna atu ia te Ia.
“Sa logoina Pita [Uitimera le Itiiti], sa leai se tasi na tofia e avea ma fesoasoani ia Oliva, vagana ai Iosefa Samita. O lea na malamalama ai Pita, o lona tiute o le talia, ae le o le tuuina atu, o fautuaga a’o i ai o ia i lana malaga. O le mea moni e faapea, sa soosootauau faatasi Oliva Kaotui ma Iosefa Samita i le faaeeina atu o le Perisitua ma le pule i taimi uma, na tuu atu ai ia te ia le pule e tulai e lona lua atu ia Iosefa Samita i le taitaiga o le Ekalesia” (Church History and Modern Revelation, 2 vols. [1953], 1:146–47).