Upu o le Poto

Vaaiga Aoao

Na faaalia mai e le Atua le Upu o le Poto o se poloaiga mo le manuia faaletino ma faaleagaga o Ana fanau.

Na maua e le Perofeta o Iosefa Samita lenei faaaliga i le aso 27 o Fepuari, 1833, ma ua faamaumau nei i le vaega 89 o le Mataupu Faavae ma Feagaiga. I le faaaliga, ua aoao mai ai le Alii ia agafaalesoifua maloloina. Ua Ia faasaina nisi o mea e le lelei mo le tino o le tagata.

I le Upu o le Poto, ua tautino mai ai e le Alii o meaai nei e lelei:

O fualaau aina ma laau afu, e aofia ai fualaau fai sua, ia e tatau ona faaaoga “ma le faautauta ma le faafetai” (tagai Mataupu Faavae ma Feagaiga 89:10-11).
O aano “o manu foi ma manu felelei i le ea,” e tatau “ia itiiti ona faaaoga” (tagai Mataupu Faavae ma Feagaiga 89:12–13).
O kuranuma e pei o le saito, araisa, ma polesi, e fai ma “mataiai o le ola” (tagai Mataupu Faavae ma Feagaiga 89:14–17).

Na faaali mai e le Alii i le Upu o le Poto faapea o mea nei e leaga:

Meainu malolosi (tagai Mataupu Faavae ma Feagaiga 89:5-7.)
Tapaa (tagai Mataupu Faavae ma Feagaiga 89:8).
Lauti ma le kofe (tagai Mataupu Faavae ma Feagaiga 89:9; ua aoao mai e perofeta o aso e gata ai faapea o le faaupuga “meainu vevela” e pei ona tusia i lenei fuaiupu, e faatatau i le lauti ma le kofe).

Ua folafola mai le Alii e faateleina le soifua maloloina, poto, malamalama, ma le puipuiga ia i latou e usiusitai i le Upu o le Poto (tagai Mataupu Faavae ma Feagaiga 89:18–21).

Talu mai lona folasaga, ua aoao mai perofeta e uiga i le taua o le mulimuli i le Upu o le Poto. Ma le isi, ua latou aoaoina tagata o le Ekalesia ia aloese mai mea e faaleagaina le faautautaga poto pe faataumaoia pe matuai avea ai ma mausa, pe faataga pe le faatagaina foi. Mo se faataitaiga, ulaina o tapaa uila, faaaogaina sese o fualaau mai fomai, ma le faaaogaina eseese o le maruana e solia ai aoaoga a le Ekalesia (tagai Tusitaulima Aoao: Auaunaga i le Ekalesia a Iesu Keriso o le Au Paia o Aso e Gata Ai [2020], 38.7.8; “Faamatalaga i le Upu o le Poto.,” Aug. 15, 2019, newsroom.ChurchofJesusChrist.org). Na aoao mai perofeta e tatau foi ona tatou mulimuli i aga faalesoifua maloloina e pei o le taumafa paleni, faamalositino soo, tumama talafeagai, ma le lava o le malolo.

Tusifaamaumau Ou Lagona Uunai