Potutusi
Uluai Faaaliga

“Uluai Faaaliga,” Autu ma Fesili (2023)

uluai faaaliga

Taiala mo le Suesueina o le Talalelei

Uluai Faaaliga

Na vaai Iosefa Samita i le Atua le Tama ma Iesu Keriso.

Ua faasoa mai e tusitusiga paia le tele o tala e uiga i perofeta o e na fesootai ma le Atua (tagai Amosa 3:7). Ua aoao mai e le Tusi Paia e faapea na talanoa le Atua ma Mose “faafesagai lava” (Esoto 33:11). Sa talanoa pe na i ai ni asiasiga paitno foi aperofeta o le Tusi a Mamona mai ia Iesu Keriso ma maua mai ai le taitaiga mai ia te Ia mo o latou aso (tagai, mo se faataitaiga, 3 Nifae 11).

Ina ua mavae le maliu o Iesu ma le Toetu ma le maliliu o Ana Aposetolo, sa faaleagaina le Ekalesia a Keriso e ala i suiga i Ana aoaoga faavae ma sauniga. Mo le tele o seneturi sa i ai le lalolagi i se tulaga o le pogisa faaleagaga e aunoa ma le i ai o le Ekalesia a Keriso. I le tautotogo o le 1820, sa popole ai Iosefa Samita talavou mo le manuia o lona agaga ma saili ia iloa po o le fea ekalesia e tatau ona ia auai. Sa alu o ia i le togavao e lata ane i lona fale ma tatalo e ole atu i le Atua mo se taitaiga. I le tali i lana tatalo, na faaali mai ai le Atua le Tama ma Iesu Keriso ia Iosefa. E pei o Mose, sa talanoa faafesagai lava Iosefa ma le Atua. O lenei mea na tupu, ua lauiloa o le Uluai Faaaliga, na amata ai le Toefuataiga o le talalelei a Iesu Keriso i o tatou aso (tagai Iosefa Samita—Talafaasolopito 1:7–20).

O Le A le Uluai Faaaliga?

I le tautotogo o le 1820, sa tatalo ai se alii talavou e igoa ia Iosefa Samita i le togavao e lata ane i lona fale i le setete o Niu Ioka, ISA. I le tali i lana tatalo, na faaali mai ai le Atua le Tama ma Iesu Keriso ia te ia. Ina ua mavae lenei faaaliga, sa valaauina Iosefa Samita e avea o se perofeta a le Alii, ma sa amata ai le Toefuataiga o le talalelei a Iesu Keriso.

Vaaiga Aoao i Autu: Uluai Faaaliga

Taiala fesootai mo le suesueina o le talalelei: Perofeta, Toefuataiga o le Talalelei, Faaaliga Faaletagata Lava Ia

Vaega 1

E Mafai Ona E Aoao mo Oe Lava Na Tupu Moni Lava le Uluai Faaaliga

Iosefa Samita i le togavao

O le moni o le faaali mai o le Atua le Tama ma Lona Alo o Iesu Keriso ia Iosefa Samita talavou o se vaega taua o le Toefuataiga o le Ekalesia a Keriso. Ua faatuina e le Uluai Faaaliga le mea moni e faapea, o loo matala le lagi ma ua toe fetalai mai le Atua i le tagata.

E mafai ona tatou suesue i le tala a Iosefa Samita i le Uluai Faaaliga. E mafai foi ona tatou ole atu i le Atua pe na tupu moni lava le Uluai Faaaliga (Moronae 10:4–6). A tatou faia nei mea, o le a aoaoina i tatou e le Agaga Paia i le moni o le Uluai Faaaliga (tagai Alema 5:45–46).”

Mea e mafaufau i ai

  • Na aoao mai Peresitene Gordon B. Hinckley: “O lo tatou malosi atoa e faalagolago lea i le aoga o lena faaaliga vaaia. A le na tupu pe le i tupu lava. Afai e leai, o lona uiga o se taufaasese lenei galuega. Afai na tupu, o lona uiga o le galuega aupito taua ma le ofoofogia lenei i lalo o le lagi.”1 O faapefea ona aafia lou olaga i le moni o le Uluai Faaaliga? Afai e te lei mauaina lava se molimau o lona aoga, o le a faapefea ona e taumafai e fai?

  • A o e aoao e uiga i le Uluai Faaaliga, atonu e aoga le faitau i tala eseese sa tuuina mai e Iosefa Samita e uiga i le mea na tupu. O loo maua i le “Accounts of Joseph Smith’s First Vision” i luga o pepa i le uepisaite a Iosefa Samita. Aisea e te manatu ai na filifili Iosefa Samita e faamamafa faamatalaga eseese i ni tala patino? O a ni malamalamaaga fou e uiga i le Uluai Faaaliga ua e maua e ala i le suesueina o tala eseese?

Gaoioiga mo le aoao faatasi ma isi

  • Matamata faatasi i le vitio “Ask of God: Joseph Smith’s First Vision” (6:35). Faasoa atu i tagata o le vaega o lenei vitio na fatuina e faaaoga ai faamatalaga mai tala taitasi a Iosefa Samita o le faaaliga vaaia. O le a sou lagona a o e matamata i lenei ata? O le a se mea na e aoaoina e te lei mafaufau i ai muamua? Valaaulia tagata o le vaega e faasoa mai o latou lagona ma manatu.

Aoao atili

Vaega 2

O le Malamalama i le Uluai Faaaliga e Mafai ona Faamalosia ai Lau Molimau i le Talalelei Toefuataiina a Iesu Keriso

o se alii o loo faitauina ia tusitusiga paia

E faaopoopo atu i le matafaioi taua na faia e le Uluai Faaaliga i le Toefuataiga o le talalelei a Iesu Keriso, e mafai foi ona tatou aoaoina upumoni taua o le talalelei e ala i le suesueina o le faaaliga vaaia a Iosefa Samita. O le natura o le Atua, o le manaomia o se toefuataiga o le Ekalesia a Keriso, o le faamoemoega o le talalelei, ma isi upumoni taua sa faaalia uma mai i lena taimi.

O le faaali mai o le Atua le Tama ma Iesu Keriso na faamanino mai ai upumoni e uiga i le natura o le Atua lea na leiloloa i le tele o seneturi. O se tasi o mea e sili ona taua o nei mea, o le Tama Faalelagi ma Iesu Keriso o ni tagata mavaevae se toalua e i ai tino e foliga e pei o tatou (tagai Iosefa Samita—Talafaasolopito 1:17; tagai foi i le Mataupu Faavae ma Feagaiga 130:1, 22). Sa tali e Iesu Keriso fesili a Iosefa Samita e uiga i le siosiomaga faalelotu o le aso ma ta’u atu ia Iosefa o le Ekalesia moni a Iesu Keriso e le o i ai i le lalolagi (tagai Iosefa Samita—Talafaasolopito 1:19–20). Ma i ni upu faigofie se lua, na aoao atu ai e le Atua le Tama ia Iosefa se tomai taua mo soo se tasi o loo sailia le upumoni: Sa Ia faasino atu ia Iesu Keriso ma poloaiina, “Faalogo ia te Ia!” (Iosefa Samita—Talafaasolopito 1:17).

Mea e mafaufau i ai

  • Faitau le saunoaga a Elder Dieter F. Uchtdorf “O Fua o le Uluai Faaaliga,”2 gauai atu i “fua” o loo ia talanoaina ma pe faapefea ona fesootai i lou olaga. O faapefea ona faatosina oe e le Uluai Faaaliga? O le a lona uiga ia te oe? E mafai ona e faamaumauina ou manatu i lau api talaaga.

  • Faitau le “O Se Sailiga Faamaoni ua Tauia,”3 na saunia e Elder Patricio M. Giuffra. I lenei saunoaga i le konafesi aoao, o loo lisi mai ai e Elder Giuffra ni upumoni taua se lima sa ia aoaoina i le taimi o le lesona a faifeautalai lea na ia uluai faalogo ai i le tala o le Uluai Faaaliga. O fea o nei upumoni e taua patino ia te oe? Ua faapefea ona faamalosia e nei upumoni lau molimau ma faamanuiaina ai lou olaga?

Gaoioiga mo le aoao faatasi ma isi

  • E ui o le Uluai Faaaliga o se mea ofoofogia na tupu, ae sa na o le amataga lea o le Toefuataiga o le talalelei. E tele le faaleagaga sasaa mai na mulimuli mai. Mafaufau i le mea moni lenei a o outou faitau faatasi mai le “The Restoration of the Fulness of the Gospel of Jesus Christ: A Bicentennial Proclamation to the World.” A o e faitau, taofi mai lea taimi i lea taimi e talanoaina asiasiga a agelu ia na oo mai ina ua mavae le Uluai Faaaliga. Aisea e te manatu ai na amata le Toefuataiga i se faaaliga vaaia o le Tama Faalelagi ma Iesu Keriso? Na faapefea ona faataatia e le Uluai Faaaliga le faavae mo le mea o le a oo mai?

  • Na faatasi ai ma upumoni ua tatou aoao mai le Uluai Faaaliga ia le [upumoni] e faapea, e tali mai le Atua i Ana fanau pe a latou mafatia. Matamata i le faaemoga mo le The First Vision: A Joseph Smith Papers Podcast, lea o loo talanoaina ai e le tusitalafaasolopito o le Ekalesia o Spencer W. McBride lenei upumoni. Ona valaaulia lea o tagata o le vaega e faasoa mai o latou manatu ma malamalamaaga.

Aoao atili

Vaega 3

O Le Uluai Faaaliga e Mafai Ona Aoao ai Oe i le Auala e Iloa ai le Upumoni

talavou o loo faitauina tusitusiga paia

E mafai ona e aoao mai i le faataitaiga a Iosefa Samita i le auala e saili ai le upumoni. O loo faamauina e le talafaasolopito o Iosefa Samita e faapea sa ia fia iloa po o le fea ekalesia e auai. Sa i ai lenei fesili i lona mafaufau a o ia faitau mai le Tusi Paia, o lea ina ua ia faitauina le Iakopo 1:5–6, sa faapitoa le anoa o lenei fuaitau ia te ia: “Afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua; ona foaiina mai ai lea ia te ia. A ia ole atu ma le faatuatua, ‘aua lava ne‘i masalosalo.”

Na aoao mai Peresitene Russell M. Nelson, “Afai o le aafiaga paia o Iosefa Samita i le Vao Paia ua aoao mai ai se mea ia i tatou, o le, o loo matala le lagi ma e fetalai mai le Atua i Ana fanau.”4 E ui o tali i au fesili atonu e le oo mai e ala i se faaaliga vaaia, ae e mafai lava ona e mautinoa e faafofoga ma tali mai le Atua i au tatalo. A o e tuuina atu taumafaiga filiga ma tuu atu lou faatuatua i le Atua, e mafai ona e mautinoa—e pei o Iosefa Samita—o le a tausia e le Atua Ana folafolaga.

Mea e mafaufau i ai

  • A o tatou aoao e uiga i le talalelei a Iesu Keriso, e tofu uma i tatou ma ni fesili. O nisi e faigofie ona taliina, ae o isi atonu e manaomia ai se taumafaiga tele. O a ni au fesili o i ai e uiga i le talalelei, tusitusiga paia, po o upu a perofeta soifua? Faatasi ai ma au fesili i le mafaufau, faitau le 1 Nifae 15:6-11. O a ni mea ua e aoaoina mai nei fuaiupu e uiga i auala e maua ai faaaliga? E mafai faapefea ona e faatinoina le faatuatua ia Iesu Keriso a o e faatalitali mo tali o loo e sailia?

  • Faitau le tusiga “O Le Uluai Faaaliga: O Se Mamanu mo Faaaliga,”5 na saunia e Peresitene Henry B. Eyring. O le a se mea ua e aoaoina mai lenei tusiga e uiga i le saunia e maua faaaliga faaletagata lava ia? O a ni suiga laiti e mafai ona e faia i lou olaga e fesoasoani ai ia te oe ia sili atu le taliaina o uunaiga a le Agaga Paia?

Gaoioiga mo le aoao faatasi ma isi

  • Faitau le 1 Nifae 10:17–19 o se vaega. O le a se mea ua e aoaoina mai i nei fuaiupu e uiga i le naunau o le Atua e tali i au tatalo? O a ni aafiaga patino na oo ia te oe i le mauaina o faaaliga faaletagata lava ia? Valaaulia tagata o le vaega e faasoa mai o latou manatu ma aafiaga pe a talafeagai ai.

  • Valaaulia tagata o le vaega e faitau pe faalogologo e i latou lava i le saunoaga a Peresitene Nelson “Faaaliga mo le Ekalesia, Faaaliga mo o Tatou Olaga.”6 Fai atu ia i latou e gauai faapitoa atu i ana aoaoga e uiga i le mauaina o faaaliga faaletagata lava ia. Ona faapotopoto lea o se vaega, ma valaaulia tagata taitoatasi e faasoa mai mea sa ia aoaoina. Pe o e matauina ni mamanu i mea na maua e tagata o lau vaega e aoga? O le a se mea na e aoao mai ia Peresitene Nelson ma mai lau vaega e uiga i le auala e mafai ai ona e maua atili faaaliga faaletagata lava ia?

Aoao atili