E Tauia se Sailiga ma le Faatuatua
Ou te valaaulia i tatou uma ina ia faaauau pea ona faateleina lo tatou faatuatua ia Keriso, o lē o loo faaauau pea ona suia olaga o i latou uma o ē sailia o Ia.
Na amata i le 1846, e faitau afe alii, tamaitai, ma tamaiti paionia na agai atu i le itu i sisifo i Siona. O lo latou faatuatua maoae na faaosofia ai lo latou lototele e lē faatuaoia. Mo nisi, sa le’i tini lava lena malaga aua sa latou maliliu i le aluga o le ala. O isi, sa fetaia’i ma faigata maoae, sa fetaomi atu i luma i le faatuatua.
Ona o i latou, o augatupulaga mulimuli ane, sa olioli ai lo’u aiga i faamanuiaga o le talalelei moni a Iesu Keriso.
E pei lava o se isi alii talavou, lea o le a ou ta’ua mulimuli ane, sa 14 o’u tausaga ina ua amata ona ou fesiligia tapuaiga ma lo’u faatuatuaga. Sa ou auai i le lotu a se isi aulotu e latalata i lo matou fale, ae sa ou lagonaina le manao e asiasi i le tele o lotu eseese.
I se tasi aoauli, sa ou matauina ai ni alii talavou se toalua i ni suti pa’auli ma ni ofutino papa’e o ulufale atu i le fale o lo’u tuaoi. O nei alii talavou sa foliga—faapitoa.
O le aso na sosoo ai sa ou feiloai ai i lo’u tuaoi, o Leonor Lopez, ma fesili atu ia te ia e uiga i na alii e toalua. Na faamatala mai e Leonor o i la’ua o ni faifeautalai mo Le Ekalesia a Iesu Keriso o le Au Paia o Aso e Gata Ai. Sa ia ta’u mai ma le fiafia ia te a’u sa papatisoina lona aiga i totonu o le Ekalesia i le tausaga na muamua atu. O le vaaia o lo’u naunau, na valaaulia ai a’u e Leonor e feiloai i faifeautalai ma a’oa’o e uiga i le Ekalesia.
E lua aso mulimuli ane, sa ou auai ai i le aiga o Lopez e feiloai i faifeautalai. Sa la faailoa mai i la’ua o Elder John Messerly mai Ogden, Iuta, ma Elder Christopher Osorio mai Walnut Creek, Kalefonia. O le a ou le faagaloina lava i la’ua.
Talu ai sa na o le 14 o‘u tausaga, sa tauanau mai lava Elder Messerly matou te o i lo’u fale ina ia mafai ona iloa e lo‘u tina mea sa la a’oa’oina ai a’u. O iina, sa ia faamalamalama atu ai ma le agalelei faapea na la o atu e faasoa atu se sāvali e uiga ia Iesu Keriso ma talosagaina ai lana faatagaga e a’oa’o a’u. Sa ioe i ai tinā ma auai faatasi ai foi ma i matou a o la a’oa’oina a’u.
Sa muamua ona talosagaina e faifeautalai Leonor e faia se tatalo. O lenei mea na matuā ootia ai lava a’u ona o lana tatalo sa le’i ta’u faafia ai ni upu ua taulotoina ae o ni upu mai lona loto. Sa ou lagonaina sa ia talanoa moni lava i lona Tama Faalelagi.
Ona a’oa’oina lea o i ma’ua e faifeautalai e uiga ia Iesu Keriso. Sa la faaali mai se ata o Ia lea na faagaeetia ai a’u ona o se ata o le Keriso soifua ua toetu.
Sa la faaauau pea, ma a’oa’o i ma’ua i le ala na faatuina ai e Iesu Lana Ekalesia i aso anamua, faatasi ai ma Ia i le ulu ma na auai faatasi atu i ai ma Aposetolo e toasefululua. Sa la a’oa’oina i ma’ua e uiga i le Liliuese—le ala na aveesea ai le upumoni ma le pule a Keriso mai le lalolagi ina ua maliliu Ana Aposetolo.
Sa la ta’u maia ia i ma’ua e uiga i se taule’ale’a e 14 tausaga le matua e igoa ia Iosefa Samita o lē, i le amataga o le vaitau o le 1800, sa asiasi atu i lotu eseese e saili mo le upumoni. A o faagasolo pea le taimi, sa atili ai ona lē mautonu Iosefa. Ina ua uma ona faitau i le Tusi Paia faapea e mafai ona tatou “ōle atu i le Atua”1 mo le poto, sa faatino ai e Iosefa le faatuatua ma alu atu ai i se togavao e tatalo ma fesili po o le fea o lotu e tatau ona ia auai.
Sa faitau e se tasi o faifeautalai le tala a Iosefa i le mea na tupu a o ia tatalo:
“Na ou vaaia ai se malamalama faaniutu i luga a’e tonu lava o lo’u ulu, ua sili atu le pupula i le la, ua alu ifo malie lava se’ia oo mai i o’u luga.
“… Ina ua oo mai le malamalama i oʼu luga, sa ou vaaia ni Tagata e toalua, o lo la’ua pupula ma le mamalu e lē mafaamatalaina, o tutu mai i oʼu luga aʼe i le ea. Sa fetalai mai le tasi o i la’ua ia te a’u, ma ta’u mai ia te a’u lo’u igoa, ma fetalai mai, a o tusi ane i le tasi—O Lo’u Atalii Pele lenei. Faalogo ia te Ia!”2
I le taimi o lena lesona, sa faamautu mai ai e le Agaga ia te a’u le tele o upumoni.
Muamua, e faafofoga le Atua i tatalo faamaoni uma a Ana fanau, ma o loo matala le lagi i tagata uma—e lē na o ni nai tagata toalaiti.
Lua, o le Atua le Tama, Iesu Keriso, ma le Agaga Paia o ni tagata mavaevae e toatolu, ua autasi i lo Latou faamoemoega “ia aumaia le tino ola pea ma le ola faavavau o le tagata.”3
Tolu, ua foafoaina i tatou i le faatusa o le Atua. O lo tatou Tama Faalelagi ma Lona Alo, o Iesu Keriso, e i ai tino o aano ma ivi e pei o i tatou, ae ua faamamaluina ma faaatoatoaina i La’ua, ma o le Agaga Paia o se peresona o agaga.4
Fa, e ala mai ia Iosefa Samita, na toefuatai mai ai e Iesu Keriso Lana talalelei ma le Ekalesia moni i le lalolagi. O le pule o le perisitua na faaee atu i luga o Aposetolo a Keriso i le 2,000 tausaga ua mavae, o le perisitua lava lea e tasi na faaee atu i luga o Iosefa Samita ma Oliva Kaotui e Peteru, Iakopo, ma Ioane.5
Ma le mea mulimuli, ua tatou a’oa’o e uiga i se isi molimau ia Iesu Keriso: o le Tusi a Mamona. Na tusia e perofeta anamua, o loo ta’u mai ai ni tagata sa nonofo i Amerika, i le taimi anamua, i lena taimi, ma ina ua mavae le soifua mai o Iesu. Mai lena mea ua tatou a’oa’o ai i le ala na latou iloa ai, alofa ai, ma tapuai ai ia Keriso, o lē na faaali atu ia i latou o le Faaola toetu.
Sa matua uunaia a’u e le Agaga a o ou a’oa’o i le tautinoga a le Faaola ia i latou: “Faauta, o A’u o Iesu Keriso, o le na molimau i ai perofeta o le a sau i le lalolagi.”6
Sa tuuina mai e faifeautalai ia i ma’ua ā ma’ua lava kopi o le Tusi a Mamona. Sa ma faitau ma taliaina le valaaulia o loo maua i le faai’uga o le Tusi a Mamona, lea e faitauina:
“Pe a maua e outou nei mea, ou te apoapoai atu ia te outou, ia outou ōle atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu ia te outou i le mana o le Agaga Paia.
“Ma o le mana o le Agaga Paia e mafai ona outou iloa ai le moni o mea uma lava.”7
Ua toeitiiti atoa le 45 tausaga talu ona ma muai iloaina ma lo’u tina le olioli ma le mana o le mauaina o le faatuatua ia Keriso. Ona o lo latou faatuatua ia Keriso na faasoa mai ai e le aiga o Lopez lo latou faatuatuaga fou ia te a’u. Ona o lo la faatuatua ia Keriso na tuua ai e nei faifeautalai e toalua o la‘ua aiga i le Iunaite Setete ina ia maua ai a’u ma lo’u tina. Ona o le faatuatua o nei uo pele uma na totoina ai se fatu sinapi o le faatuatua i totonu o i matou lea na tupu talu mai lena taimi ma avea ma se laau tele o faamanuiaga e faavavau.
I nei tausaga faamanuiaina, ua tatou iloaina, e pei ona folafola mai e Peresitene Russell M. Nelson: “O mea lelei uma i le olaga—o faamanuiaga faamoemoeina uma e i ai le taua e faavavau—e amata i le faatuatua. O le faatagaina o le Atua ia faamuamua i o tatou olaga e amata i le faatuatua o loo Ia finagalo e taiala i tatou. O le salamo moni e amata i le faatuatua o loo ia Iesu Keriso le mana e faamamā, faamalolo, ma faamalosia ai i tatou.”8
Ou te valaaulia i tatou uma ina ia faaauau pea ona faateleina lo tatou faatuatua ia Keriso, o lē na suia le olaga o lo’u tina pele ma a’u ma faaauau pea ona suia ai olaga o i latou uma o ē sailia o Ia. Ou te iloa o Iosefa Samita o le Perofeta o le Toefuataiga, o Peresitene Nelson o lo tatou perofeta i aso nei, o Iesu o le Keriso soifua ma lo tatou Togiola, ma o loo soifua le Tama Faalelagi ma e tali mai i tatalo uma a Ana fanau. Ou te molimau atu ai i nei upumoni i le suafa paia o Iesu Keriso, amene.