Vaai i Luma Atu
O le taulai i mea e sili ona taua—aemaise ai o mea i luma atu,” o mea na o le faavavau—o se ki lea e feasioa’i ai i lenei olaga.
Ina ua atoa lo’u 15 tausaga, sa maua se pemita, e faataga ai ona ou avetaavale pe afai ma te o ma se tasi o o’u matua. Ina ua fesili mai lo’u tama pe ou te manao ma te o e tietie, sa faagaeetia au.
Sa ia aveina le taavale mo ni nai maila i tua atu o le taulaga i se auala umi, ma le sa’onoa e alalua e toalaiti tagata sa faaaogaina—e tatau ona ou matauina, peiseai e na o le pau lea o le nofoaga sa ia lagonaina e saogalemu. Sa faatafa i le pioga, ona fesuia’i lea o ma nofoa. Sa ia tuu mai ia te a’u ni nai faatonutonuga ona fai mai lea, “Faifai malie i luga o le auala ona na o le ave lava lea o le taavale seia ou fai atu e tu.”
Sa ou mulimulita’ia lelei lava ana faatonuga. Ae pe tusa ma le 60 sekone, sa ia fai mai, “Atalii, faatafa i tua le taavale. Ou te ma’i ai. O loo e fesua’ia solo le taavale i le alatele.” Sa ia fesili mai, “O le a lau mea lena e vaavaai?”
Ma sina le fiafia, sa ou fai atu, “O lea ou te tilotilo i le auala.”
Ona fai mai lea o lana tala lea: “O lea ou te mata’ia ou mata, ma o lena na o lou tilotilo lava i le mea o loo i luma tonu o le afi o le taavale. Afai na o lou tilotilo i le mea o i ou luma tonu, o le a le mafai lava ona sa’o lau avetaavale.” Ona ia faamamafa mai lea, “Vaai i luma atu. O le a fesoasoani lena ia te oe e ave sa’o ai.”
I le 15 o o’u tausaga, sa ou mafaufau o se lesona avetaavale lelei lena. Mai lava iina sa ou iloa ai o se lesona lelei tele foi lea mo le olaga. O le taulai i mea e sili ona taua—aemaise ai o mea i luma atu,” o mea na o le faavavau—o se ki lea e feasioa’i ai i lenei olaga.
I se tasi taimi i le soifuaga o le Faaola, sa finagalo o Ia ia tuua na o ia, o lea “sa maliu a’e ai i se mauga e tatalo ai.”1 Sa Ia auina ese atu Ona soo ma le faatonuga e ui atu i le sami. I le pogisa o le po, sa fetaiai le vaa na malaga ai le au soo ma se afa matautia. Sa maliu atu Iesu e lavea’i i latou ae i se ala uiga ese. Fai mai le mau, “Ua maliu atu Iesu ia te i latou i le leoleoga e fa o le po, ua savali i luga o le vai.”2 Ina ua latou vaai atu ia te Ia, sa amata ona latou fefefe, aua sa latou manatu o se tasi o loo agai mai ia i latou o se aitu po o se agaga. I le lagonaina ai e Iesu o lo latou atuatuvale ma le manao e faatoafilemu o latou mafaufau ma loto, sa valaau atu ai ia te i latou,”Ia outou loto tetele; o a’u lava, aua tou te matatau.”3
Sa le gata ina sa faamafanafanaina Peteru, ae sa faalototeleina foi. Ua se afā le lototele ma e tele foi ina osovale, na valaau atu ai Peteru ia Iesu, “Le Alii e, afai o oe, ia e fetalai mai ia te au, ou te alu atu ia te oe i luga o le vai.”4 Sa tali atu Iesu i Lana valaaulia masani ma le faavavau: “Sau.”5
Na faagaeetia Peteru i le vaaiga, ma oso ese ai mai le vaa i luga o le vai ae le o totonu o le vai. A o ia taulai atu i le Faaola, sa mafai ona ia faia le mea faigata, o le savali lea i luga o le vai. I le amataga, sa le’i faalavelaveina e le matagi. Ae na iu ina tosina ese e le matagi “ua tetele”6 sa iu ai ina tata’ieseina o ia, ma galoma atu ai lana taulaiga. Sa toe foi mai le popole. O le mea lea, na faaitiitia lona faatuatua, ma amata ai ona ia magoto. “Sa ia alaga ma faapea atu, Le Alii e, ia e faaola mai ia te au.”7 Sa aapa atu le Faaola, o le e naunau i taimi uma e laveai, ma sisi a’e o ia i luga i le saogalemu.
O loo i ai ni lesona eseese e aoao mai lenei tala ofoofogia, ae o le a ou ta’ua le tolu.
Taulai ia Keriso
O le lesona muamua: taulai ia Iesu Keriso. A o taulai atu e Peteru ona mata ia Iesu, sa mafai ona savali i luga o le vai. Sa le mafai e le afa, o galu, ma le matagi ona taofia o ia pau lava le mea o le faatotonugalemu o lana taulai i le Faaola.
O le malamalama i lo tatou faamoemoega taualuga e fesoasoani tatou te filima’oti ai po o le a le mea e tatau ona taulai i ai. E le mafai ona manuia sa tatou taaloga e aunoa ma le iloa o le sini, e le mafai foi ona tatou ola i se olaga ‘anoa e aunoa ma le iloga o le faamoemoega. O se tasi o faamanuiaga sili o le talalelei toefuataiina a Iesu Keriso o le, na te taliina le fesili, “O le a le faamoemoega o le olaga?” faatasi ai ma isi mea. “O lo tatou faamoemoega i lenei olaga o le maua lea o le olioli ma saunia e toe foi atu i le afioaga o le Atua.”8 O le manatuaina o lo tatou i ai iinei i le lalolagi e sauniuni ai e toe foi atu e nonofo faatasi ma le Atua, e fesoasoani lea tatou te taulai ai i mea e taitai atu ai i tatou ia Keriso.
O le taulai atu ia Keriso e manaomia ai le amio pulea, aemaise o nai mausa laiti ma le faigofie e fesoasoani ai ia tatou avea o ni soo e sili atu. E leai se tulaga o le avea ma soo e aunoa ma le amio pulea.
E atili ona manino la tatou taulai ia Keriso pe a tatou vaavaai i luma atu i le mea tatou te mananao e oo i ai, ma pe o ai tatou te mananao ia avea ai ona faaavanoa lea o se taimi i aso uma e fai ai na mea o le a fesoasoani e avatu tatou iina. O le taulai atu ia Keriso e mafai ona faafaigofie ai a tatou faaiuga ma saunia se taiala mo le ala e mafai ona sili lo tatou faaalu ai o lo tatou taimi ma punaoa.
E ui ina tele mea e taua i la tatou taulaiga, a ua tatou aoao mai le faataitaiga a Peteru le taua o le faatumau o Iesu Keriso i le totonugalemu o la tatou taulaiga. Ua na o Keriso lava e mafai ona tatou toe foi atu ai e mau ma le Atua. Tatou te faalagolago i le alofa tunoa o Keriso a o tatou tauivi malosi e avea e faapei o Ia ma saili atu i Lana faamagaloga ma le mana faamalosiau pe a tatou sasi.
Ia Faaeteete i Mea Faalavefau
O le lesona lona lua: ia faaeteete i mea faalavefau. Ina ua liliu ese e Peteru lana taulai mai ia Iesu ma agai i le matagi ma galu na fesasaa’i ai ona vae, na amata ona magoto ifo i lalo.
E tele mea “i luma o le afi o le taavale” e mafai ona tata’iese ai i tatou mai le taulai atu ia Keriso ma mea e faavavau o loo i “luma atu.” O le tiapolo o le faalavefau tele lea. Ua tatou aoao mai le miti a Liae e i ai leo mai le fale tele ateatea o loo saili e tosina atu i tatou i mea o le a tatou se ese ai mai le ala o le sauniuni e toefoi atu e mau faatasi ma le Atua.
Ae o loo i ai isi faalavefau e tau-le iloa ia e mafai ona matautia faapena. E pei o le faaupuga, “E na o le pau le mea e moomia e le tiapolo ina ia manumalo ai o le leai lea o se mea e faia e tagata lelei.” E foliga naunau le fili ia aua nei faia e tagata lelei se mea, pe faaalu foi o latou taimi i mea o le a faalavefauina ai i latou mai o latou faamoemoega ma sini maualuluga. Mo se faataitaiga, o nisi mea o suiga maloloina faaleogalua e mafai ona avea ma faalavefau lē maloloina e aunoa ma le amio pulea. E malamalama le fili e le tuli ina ia leaga pe lē mama ni faalavefau ina ia tino mai ai.
E Mafai Ona Laveaiina i Tatou
O le lesona lona tolu: e mafai ona laveaiina i tatou. Ina ua amata ona magoto ia Peteru, sa ia alaga atu, “Le Alii e, ia e faaola mai ia te au. “Ona aapa atu loa lea e Iesu o lona aao, ua tago ia te ia.”10 A oo ina tatou iloa ua tatou magoto ifo, pe a tatou feagai ma puapuaga, pe ua tatou tautevateva foi, e mafai foi ona laveaiina i tatou e Ia.
I le feagai ai ma puapuaga po o tofotofoga, atonu tou te pei o a’u ma faamoemoe o le a vave mai le lavea’i. Ae ia manatua na maliu mai le Faaola e fesoasoani i Aposetolo i le leoleoga lona fa o le po—ina ua mavae lo latou feagai ai ma le felafoaiina i le tele o le po e le afa.11 Atonu tatou te tatalo afai o le a le vave oo mai le fesoasoani, ae tau ina sau i le leoleoga lona lua pe o le leoleoga lona tolu foi o le po umi ma le pogisa. Pe a tatau ai ona tatou faatalitali, ia mautinoa e leoleo mai pea le Faaola, ia mautinoa tatou te le tau onosa’ia e sili atu nai lo le mea e mafai ona tatou gafatia.12 Ia i latou o e o faatalitali i le leoleoga lona fa o le po, atonu pe o i le lotolotoi o mafatiaga, ‘aua nei uma le faamoemoe. E oo mai i taimi uma le laveai i ē faamaoni, pe i le olaga nei po o le faavavau.
O nisi taimi tatou te magoto ifo ona o a tatou mea sese ma soligatulafono. Afai ua e iloa o loo e magoto ifo ona o na mafuaaga, ia e faia se filifiliga fiafia e salamo.13 Ou te talitonu e itiiti ni mea e sili ona maua ai e le Faaola le olioli, nai lo le faaolaina o i latou o e liliu, pe toe foi mai ia te Ia.14 Ua tumu tusitusiga paia i tala o tagata o e na pa’ū’ū ma sese ae na salamo ma mausali i le faatuatua ia Keriso. Ou te manatu ua i ai na tala i tusitusiga paia e faamanatu mai ai ia i tatou e alofa le Faaola ia i tatou ma e le i’u Lona mana e togiola ai i tatou. E le gata ina olioli le Faaola pe a tatou salamo, ae tatou te maua foi le olioli tele.
Faaiuga
Ou te valaaulia oe ia fuafua ma le loto i ai le “vaai atu i luma” ma faateleina lou taulai atu i mea e taua moni. Ia tatou tuuina Keriso i le totonugalemu o a tatou taulaiga. I le totonugalemu o faalavefau, o mea o “i luma o le afi,” ma asiosio e siomia ai i tatou, ou te molimau atu o Iesu o lo tatou Faaola ma lo tatou Togiola ma lo tatou Laveai. I le suafa, o Iesu Keriso, amene.