Upumoni Mamā, Mataupu Faavae Mamā, ma Faaaliga Mamā
Faamolemole ia faia lenei konafesi o se taimi o le taumamafa i sāvali mai le Alii e ala mai i Ana auauna.
O’u uso e ma tuafafine pele, susū maia i le konafesi aoao! E ma’eu le olioli i le faatasi ai ma outou! E toetoe lava o taimi uma ou te mafaufau ai ia te outou i le ono masina ua tuanai. Na ou tatalo e uiga ia te outou ma mo outou. I nai vaiaso talu ai nei na ou tatalo ai ma le loto ina ia avea lenei konafesi ma se taimi o faaaliga ma manatunatuga mo tagata uma o ē o loo sailia na faamanuiaga.
Ua matou fiafia lava e toe lauga atu ia te outou mai le Maota Autu o Konafesi. O loo avanoa pea le tele o nofoa, ae o le auai mai o nisi o tagata o le Aufaipese a le Tapeneko o se laasaga matagofie lea i le agai i luma. Matou te faafeiloai atu ia te outou uma i lenei konafesi tele faatekinolosi, po o fea lava o outou i ai.
O loo tatou feagai pea ma aafiaga faatauma’oi o le KOVITI-19 ma ona vae eseese. Matou te faafetai atu mo le mulimulita’ia o a matou apoapoa’iga ma fautuaga a tagata tomai faapitoa faafomai ma taitai o malo i o outou lava atunuu.
Matou te taloina konafesi aoao taitasi e pei ona faatonuina ai e le Alii.1 Ua fesuisuia’i lava le faatulagaga i le aluga o tausaga. A o o’u laitiiti lava, sa tolu i le fa aso le umi o konafesi. Mulimuli ane, sa faaitiitia konafesi i aso e lua. O sāvali uma—i lena taimi ma le taimi nei—o le taunuuga lea o tatalo faatauanau ma sauniuniga tele faaleagaga.
O le Au Pulega Aoao ma Taitai Aoao o le Ekalesia o le a saunoa e taulai atu a latou sāvali i lo tatou Faaola, o Iesu Keriso, o Lona alofa mutimutivale, ma Lona mana togiola le i’u. E le’i i ai lava se taimi i le talafaasolopito o le lalolagi [i lo le taimi nei] ua sili atu ona taua patino le iloa e uiga i lo tatou Faaola ma le fitoitonu i le agaga o tagata soifua uma. Mafaufau i le vave tele o le a fo’ia ai fetaua’iga faatauma’oi i le lalolagi atoa—ma feteenaiga i o tatou olaga patino—pe afai tatou te filifili uma e mulimuli ia Iesu Keriso ma gaua’i atu i Ana a’oa’oga.
I lena lava agaga, ou te valaaulia ai outou ia faalogo mo ni mea se tolu i lenei konafesi: upumoni mamā, mataupu faavae mamā a Keriso, ma faaaliga mamā. E feteenai i masalosaloga o nisi, ae o loo i ai moni lava se mea e ta’ua o le sa’o ma le sese. O loo i ai moni lava upumoni a’ia’i—upumoni e faavavau. O se tasi o mala o o tatou aso o le toalaiti lea o tagata e iloa le mea e liliu i ai mo le upumoni.2 E mafai ona ou faamautinoa atu ia te outou o mea o le a outou faafofoga i ai i le asō ma taeao o loo i ai le upumoni mamā.
O le mataupu faavae mamā a Keriso e mamana tele. E suia ai le olaga o tagata uma e malamalama i ai ma saili e faatino i lona olaga. E fesoasoani le mataupu faavae a Keriso ia i tatou e saili atu ma tumau i luga o le ala o feagaiga. O le tumau i luga o lena ala vaāpiapi ua faamatalaina lelei o le a faaagavaaina ai i tatou i le taimi mulimuli e maua mea uma ua i ai i le Atua.3 E leai se mea e sili atu ona taua i lo mea uma ua i ai i lo tatou Tama!
Ma le mea mulimuli, o faaaliga mamā mo fesili i lou loto o le a avea ai lenei konafesi ma konafesi tauia ma lēmafaagaloina. Afai e te le’i saili atu lava i le auaunaga a le Agaga Paia e fesoasoani ia te oe ia lagona mea ua finagalo le Alii ia e lagonaina i nei aso e lua, ou te valaaulia oe ia faia nei loa. Faamolemole ia faia lenei konafesi o se taimi o le taumamafa i sāvali mai le Alii e ala mai i Ana auauna. Ia a’oa’o le auala e faaaoga ai i lou olaga.
O Le Ekalesia lenei a Iesu Keriso o le Au Paia o Aso e Gata Ai. O i tatou o Lona nuu o le feagaiga. Na tautino mai e le Alii o le a Ia faanatinatiina Lana galuega i lona taimi,4 ma o loo Ia faia lea i se saoasaoa matuā faateleina lava. Ua faamanuiaina i tatou e auai i le faatinoga o Lana galuega paia.
Ou te tuu atu se faamanuiaga i o outou luga o ē o loo sailia le malamalama, iloa, ma le upumoni sili atu. Ou te faailoa atu lo’u alofa mo outou taitoatasi, i le suafa paia o Iesu Keriso, amene.