O Le Alofa o le Atua: E Silisili Ona Olioli i le Agaga

Saunia e Susan H. Porter

Fesoasoani Muamua i le Au Peresitene Aoao o le Peraimeri

E lē maua le alofa o le Atua i tulaga o ō tatou olaga, ae i Lona i ai i o tatou olaga.

Uso e ma tuagane, tou te iloa ea le alofa atoatoa o le Atua, lo tatou Tama Faalelagi ia te outou? Pe ua e lagonaina ea le alofa o le Atua i le ta’ele o lou agaga?

A e iloa ma malamalama i le atoatoa o le alofagia o oe o se atalii/afafine a le Atua, e suia ai mea uma. E suia ai ou lagona e uiga ia te oe lava pe a e faia ni mea sese. E suia ai ou lagona pe a tutupu mea faigata. E suia ai lau vaai i poloaiga a le Atua. E suia ai lau vaaiga i isi ma lou gafatia e faia ai se eseesega.

Na a’oa’o mai Elder Jeffrey R. Holland: “O le poloaiga muamua ma le sili o le faavavau atoa o le alofa atu lea i le Atua ma o tatou loto atoa, manatu, mafaufau, ma le malosi atoa—o le poloaiga muamua ma le sili lena. Ae o le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau, ma le malosi atoa.”¹

E mafai faapefea e i tatou taitoatasi ona iloa i le ta’ele o o tatou agaga lena upumoni sili o le faavavau?

Sa faaalia i le perofeta o Nifae i se faaaliga vaaia le faamaoniga sili ona mamana o le alofa o le Atua. Ina ua vaai atu i le laau o le ola, sa manao Nifae ia iloa lona faaliliuga. O le tali, na faaali atu ai e se agelu ia Nifae se aai, se tinā, ma se pepe. A o vaai atu Nifae i le aai o Nasareta ma le tina amiotonu o Maria, o afisiina le pepe o Iesu i ona lima, sa tautino atu e le agelu, “Faauta i le Tamai Mamoe a le Atua, ioe, o le Alo lava o le Tama Faavavau!”²

I lena taimi paia, na malamalama ai Nifae o le soifua mai o le Faaola, sa faaalia ai e le Atua Lona alofa mamā ma le atoatoa. O le alofa o le Atua, na molimau mai ai Nifae, “ua faamaligi ifo lautele o ia lava i loto o le fanauga i loto o le fanauga a tagata.”³

E mafai ona tatou vaai faalemafaufau i le alofa o le Atua o se malamalama o loo susulu mai le laau o le ola, ma faamaligiina o ia lava i le salafa o le lalolagi atoa i loto o le fanauga a tagata. O le malamalama ma le alofa o le Atua ua faatumulia ai Ana foafoaga uma.⁴

O nisi taimi tatou te mafaufau sese ai faapea e na o le alofa lava o le Atua e mafai ona tatou lagonaina pe a uma ona tatou mulimuli i le āi u’amea ma a’ai i le fua. Peitai, o le alofa o le Atua, e le gata ina taliaina e i latou o ē o mai i le laau ae o le mana tonu lava lea e faaosofia ai i tatou e saili lena laau.

“O lea, o le mea lea ua silisili atu ona manaomia i mea uma,” na a’oa’o atu ai Nifae, ma sa alaga atu le agelu, “ioe, ma le silisili atu ona olioli i le agaga.”⁵

I le luasefulu tausaga talu ai, sa aluese ai se tagata e pele o le aiga mai le Ekalesia. Sa tele ni ana fesili sa le’i taliina. O lona toalua, o se tagata liliu mai, sa tumau faamaoni i lona faatuatua. Sa la galulue malosi e faasaoina le la faaipoipoga i eseesega na alia’e.

O le tausaga na te’a nei sa ia tusia ai i lalo ni fesili se tolu e uiga i le Ekalesia lea sa faigata ia te ia ona toe faalelei ma auina atu i ni ulugalii se toalua sa avea ma ni uo mo le tele o tausaga. Sa ia valaaulia i latou e tomanatu i na fesili ma o mai i le taumafataga o le afiafi e faasoa mai o latou manatu.

Ina ua maea lenei asiasiga ma uo, sa alu o ia i lona potu ma amata ona galue i se galuega faatino. O le talanoaga i le afiafi ma le alofa na faaalia ia te ia e ana uo na muamua oo mai i lona mafaufau. Sa ia tusia mulimuli ane e faapea, sa faamalosia o ia e taofi lana galuega. Fai mai o ia: “Sa faatumulia lo‘u agaga i se malamalama susulu. … Sa ou masani i lenei lagona loloto o le faamalamalamaina, ae i lenei tulaga sa faaauau pea ona tuputupu a’e malosi atu nai lo se isi lava taimi muamua ma sa tumau ai mo ni nai minute. Sa ou nofo filemu ma le lagona, lea na ou malamalama i ai o se faaaliga o le alofa o le Atua mo a’u. … Sa ou lagonaina se uunaiga faaleagaga lea na ta’u mai ia te a’u e mafai ona ou toe foi i le lotu ma faailoa atu lenei alofa o le Atua i mea ou te faia iina.”

Ona ia mafaufau lea e uiga i ana fesili. O le lagona na ia maua o le faamamaluina e le Atua o ana fesili, ma o le lē i ai o ni tali manino e lē tatau ona taofia ai o ia mai le agai i luma.⁶ E tatau ona ia faasoa atu le alofa o le Atua i tagata uma a o faaauau pea ona ia mafaufau i ai. A o ia faatinoina lena uunaiga, sa ia lagonaina se sootaga ma Iosefa Samita, lea na saunoa ina ua mavae lana Uluai Faaaliga, “Sa faatumulia lo’u agaga i le alofa, ma mo aso e tele sa mafai ona ou olioli ma le olioli tele.”⁷

O le mea e maofa ai, i ni nai masina mulimuli ane, sa maua e lenei tagata o le aiga le valaauga lava lea e tasi sa ia umia i le 20 tausaga na muamua ai. O le taimi muamua sa ia umia ai le valaauga, sa ia faatinoina ona tiutetauave o se tagata tuuto o le Ekalesia. O lea la o le fesili mo ia e le o le “E mafai faapefea ona ou faataunuuina lenei valaauga?” ae “E mafai faapefea ona ou faaalia le alofa o le Atua e ala i la’u auaunaga?” Faatasi ai ma lenei auala fou, sa ia lagonaina ai le olioli tele, uiga, ma le faamoemoega i vaega uma o lona valaauga.

Uso e ma tuagane, e mafai faapefea ona tatou maua le mana liua o le alofa o le Atua? Ua valaaulia i tatou e le perofeta o Moronae ia “tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o ē o soo moni o lona Alo, o Iesu Keriso.”⁸ E lē gata ina valaaulia i tatou e Mamona e tatalo ina ia faatumulia i tatou i Lona alofa mo isi ae ia tatalo ina ia tatou iloa le alofa lē ponā o le Atua mo i tatou lava.⁹

A o tatou mauaina Lona alofa, tatou te maua le olioli sili atu i le taumafai e alofa ma auauna atu e pei ona Sa Ia faia, ma avea ai ma “soo moni o lona Alo, o Iesu Keriso.”¹⁰

E lē maua le alofa o le Atua i tulaga o tatou olaga, ae i Lona i ai i o tatou olaga. Tatou te iloa Lona alofa pe a tatou maua le malosi e sili atu nai lo o tatou lava malosi ma pe a aumaia e Lona Agaga le filemu, mafanafana, ma le taitaiga. E i ai taimi atonu e faigata ai ona lagona Lona alofa. E mafai ona tatou tatalo ia pupula o tatou mata e vaai i Lona aao i o tatou olaga ma vaai i Lona alofa i le matagofie o Ana foafoaga.

A o tatou mafaufau loloto i le taulaga lē i’u ma faavavau a le Faaola, o le a tatou mafai ona amata malamalama i Lona alofa mo i tatou. Tatou te usuina ma le migao upu a Eliza R. Snow: “O lona toto faapelepele sa faamasaa saoloto o ia; Sa ia foai fua atu lona soifua.”¹¹ O le lotomaualalo o Iesu i puapuaga mo i tatou to ifo i luga o o tatou agaga, ma tatala ai o tatou loto e saili le faamagaloga i Lona a’ao ma faatumuina i tatou i se manao e ola ai e pei ona sa Ia soifua ai.¹²

Na tusia e Peresitene Russell M. Nelson, “O le faateleina o lo tatou tuuto atu i le mamanuina o o tatou olaga e mulimuli ai ia te Ia, o le mamā atili foi lea ma sili atu ona paia o lo tatou alofa.”¹³

Sa ta’ua e lo ma atalii: “Ina ua 11 o’u tausaga, sa matou filifili ai ma a’u uo e faamisi le vaega muamua o le matou vasega Peraimeri. Ina ua matou taunuu mulimuli ane, sa matou tete’i, sa faafeiloai ma le agalelei i matou e le faiaoga. Ona ia faia lea o se tatalo faamomoiloto lea sa ia faaalia ai le lotofaafetai faamaoni i le Alii ona ua matou filifili e o mai i le vasega i lena aso i lo matou lava loto malie. Ou te lē manatua po o le a le lesona po o le igoa o lo matou faiaoga ae o le taimi nei, i le tolusefulu tausaga mulimuli ane, o loo ou ootia pea i le alofa lē ponā sa ia faaalia ia te a’u i lena aso.”

I le lima tausaga talu ai, sa ou matauina ai se faataitaiga o le alofa paia a o auai i le Peraimeri i Rusia. Sa ou vaaia se uso faamaoni o tootuli i luma o ni tamaitiiti se toalua ma molimau atu ia i la’ua faapea e tusa lava pe toe na o i la’ua o loo ola i le lalolagi, e puapuagatia lava Iesu ma maliu mo na o i la’ua.

Ou te molimau atu e moni lava na maliu lo tatou Alii ma le Faaola mo i tatou taitoatasi. O se faailoaga o Lona alofa e lē i’u mo i tatou ma mo Lona Tama.

“Ua ou iloa [o loo soifua] lo’u Faaola. E ma’eu le mafanafana o lenei fuaiupu malū! … O loo soifua o Ia e faamanuia [i tatou] i Lona alofa.”¹⁴

Tau ina ia tatala o tatou loto ina ia maua le alofa mamā o loo i ai i le Atua mo i tatou ona faamaligi mai lea o Lona alofa i mea uma tatou te faia ma i ai. I le suafa paia o Iesu Keriso, amene.