Sa Alofagia Tele A’u e le Alii i O’u Aso Uma
E faapefea ona tatou tali atu i o tatou puapuaga? Pe tatou te lagonaina ea le faafetai ona ua sili atu lo tatou taulai atu i o tatou faamanuiaga nai lo o tatou faafitauli?
O le faama’ioti o le KOVITI-19 o se tasi o le mau tofotofoga ma luitau ua feagai ma fanau a le Atua i le gasologa o le talafaasolopito o le lalolagi. I le amataga o lenei tausaga, sa matou ola ai ma lo’u aiga pele i nisi o aso pogisa. O le faama’ioti ma isi mafuaaga na aumaia ai le oti ma le tiga i lo matou aiga e ala i le maliliu ai nisi o a matou pele. E ui i le tausiga faafoma’i, anapogi, ma tatalo, i le aluga o vaiaso e lima na laasia ai e lo’u uso o Charly, lo’u tuafafine o Susy, ma lo’u uso faale-tulafono o Jimmy le isi itu o le veli.
Sa i ai taimi na ou taumanatunatu ai pe aisea na tutulu ai le Faaola ina ua Ia silasila atu o mafatia Maria i le oti o lona tuagane, o Lasalo, a ua iloa o loo ia te Ia le mana e faatu mai ai Lasalo ma e le o toe mamao ona faaaoga lea e le Faaola o lenei mana e laveai ai Lana uo mai le oti.1 Ou te ofo i le agaalofa o le Faaola ma le lotomalamalama mo Maria; sa malamalama o Ia i le tiga lē mafaamatalaina na lagona e Maria i le maliu o lona tuagane, o Lasalo.
Tatou te lagonaina lena lava tiga ogaoga pe a tatou oo i le tete’aga le tumau mai a tatou pele. Ua i ai i le Faaola le agaalofa atoatoa mo i tatou. E le matau masei o Ia i lo tatou pupū i le taimi nei, po o le papa’u o le vaai i la tatou malaga e faavavau. Nai lo lena, ua ia te Ia le mutimuti alofa i lo tatou faanoanoa ma mafatiaga.
E finagalo le Tama Faalelagi ma Lona Alo, o Iesu Keriso, ia tatou maua le olioli.2 Na aoao mai Peresitene Russell M. Nelson: “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga. Afai o le taulaiga o o tatou olaga e i le ata o le faaolataga a le Atua, … e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”3
A o avea a’u o se faifeautalai talavou, ou te manatua le taimi na maua ai e se faifeautalai ofoofogia na ou iloa ma faamemelo i ai, se tala faamomoiloto. Sa maliliu lona tina ma lona uso laitiiti i se faalavelave matuia. Sa tuu atu e le peresitene o le misiona i lenei faifeau le filifiliga e toe foi ai i le fale mo le falelauasiga. Ae peitai, ina ua uma ona talanoa i lona tama i le telefoni, sa tonu i lenei faifeautalai e nofo e faauma le misiona.
I se taimi mulimuli ane, ina ua ma galulue i le sone e tasi, sa ma maua ma la’u soa se telefoni faanatinati; na gaoia e le au gaoi le uila a le faifeau lava lenei ma sa faamanu’aina o ia i se naifi [tulou]. Sa savavali i la’ua ma lana soa i le falemai pito lata ane, lea sa matou feiloai atu ai ma la’u soa ia i la’ua. A o ma agai atu i le falemai, sa ou faavauvau mo lenei faifeautalai. Sa ou manatu faalemafaufau o le a faanoanoa o ia ma o le mea moni o le a manao nei e toe foi i le fale i le maea ai o lenei aafiaga tuga.
Ae peitai, ina ua ma taunuu i le falemai, sa ou vaaia le faifeautalai lea o taoto i lona moega, o loo faatalitali e ave mo lona taotoga—ma o la sa ataata o ia. Sa ou mafaufau, “E mafai faapefea ona ataata o ia i se taimi faapenei?” A o faatalitali i le falemai seia malosi, sa ia tauaaoina atu ma le naunautai ni lautusi ma kopi o le Tusi a Mamona i alii fomai, tausi soifua, ma isi gasegase. E oo lava i nei faigata, sa lei manao lava o ia e alu i le fale. Ae, sa ia galue seia oo i le aso mulimuli o lana misiona ma le faatuatua, mana, malosi, ma le naunautai.
I le amataga o le Tusi a Mamona, o loo ta’u mai ai e Nifae, “Ona ua ou vaai i puapuaga e tele i le gasologa o oʼu aso, e ui i lea, sa alofagia tele aʼu e le Alii i oʼu aso uma.”4
Ou te manatu i le tele o tofotofoga na oo i ai Nifae, o le tele o loo aofia ai i lana tusiga. Ua fesoasoani ona tofotofoga tatou te malamalama ai faapea e tofu uma i tatou ma aso pogisa. O se tasi o nei tofotofoga na tulai mai ina ua poloaiina ia Nifae e toe foi i Ierusalema e aumai papatusi apamemea sa i lima o Lapana. O ni isi o uso o Nifae o ni alii faatuatua iti, ma na oo lava ina sa latou sasaina ia Nifae i se laau. Sa oo ia Nifae i se isi tofotofoga ina ua gau lana ‘aū ma sa le mafai ai ona maua ni meaai mo lona aiga. Mulimuli ane, ina ua poloaiina ia Nifae e fau se vaa, sa tauemu ona uso ia te ia ma sa mumusu e fesoasoani ia te ia. E ui i le tele o isi tofotofoga i le gasologa o lona soifua, sa faailoa pea lava pea e Nifae le agalelei o le Atua.
A o sopoia e lona aiga le vasa i lo latou aga atu i le nuu folafolaina, “sa amata e nisi o le aiga o Nifae ona faafiafia i latou lava,” ma tautatala ma le lē migao, ma galo ai o le mana o le Alii na faasaoina ai i latou. Ina ua a’oa’i i latou e Nifae, sa latou faatausuai ma saisai o ia i maea ia le mafai ai ona gaioi. Ua ta’u mai e le Tusi a Mamona e faapea “sa faia ma le saua tele o [ia] e ona uso”; o ona tapulima ma tapuvae “sa fulafula tetele, ma sa matua tiga tele.”5 Sa matua faanoanoa Nifae i le maaa o loto o ona uso, ma sa lagonaina le lofituina o ia i le faanoanoa.6 “E ui i lea,” sa fai mai o ia, “Sa ou tepa taulai a’e i lo’u Atua, ma sa ou viia o ia i le aso atoa; ma sa ou le muimui e faasaga i le Alii ona o o’u puapuaga.”7
O’u uso e ma tuafafine pele, e faapefea ona tatou tali atu i o tatou puapuaga? Pe tatou te muimui ea i luma o le Alii ona o na puapuaga? Pe, faapei o Nifae ma la’u uo faifeautalai sa i ai, pe tatou te lagonaina ea le faafetai i upu, mafaufauga, ma galuega ona e tele ona tatou taulai atu i o tatou faamanuiaga nai lo o tatou faafitauli?
Na aumai e lo tatou Faaola o Iesu Keriso ia i tatou le faataitaiga i le taimi o Lana misiona i le lalolagi. I taimi o faigata ma tofotofoga, e i ai ni nai mea iti tatou te maua ai le filemu sili atu ma le lotomalie nai lo le auauna atu i o tatou uso a tagata. Ua faamatala e le tusi a Mataio mea na tutupu ina ua silafia e le Faaola o Lona tausoga, o Ioane le Papatiso, ua vavaeese lona ao e le Tupu o Herota ina ia faamalie ai le tama fafine a Herotia:
“Ona o ane ai lea o Ona soo, ua ave le tino, ua tanu ai; ua latou o mai foi ua ta’u ia Iesu.
“Ina ua faafofoga i ai Iesu, ona maliu ese ai lea o ia i lea mea i le vaa i le mea tuufuaua na o ia: Ua faalogo le motu o tagata ona latou mulimuli atu ai lea ia te ia, ua ui a uta mai le aai.
“Ua maliu atu Iesu, ua na silafia le motu o tagata e toatele, ona mutimutivale ai lea o lona alofa ia te i latou, ua faamalolo foi e ia o latou ma’i.
“Ua oo i le afiafi, ona o mai ai lea o ona soo ia te ia, ua faapea mai, O le mea tuufua lenei, ua leva foi le aso; ia e tuuina atu le motu o tagata, ina ia latou o i aai e faatau ni mea e ‘ai mā latou.
“A ua fetalai atu Iesu ia te i latou, E le aoga ona latou o; ia outou avane ni mea latou te aai ai.”8
Sa faaali mai e Iesu Keriso ia i tatou e faapea, i taimi o tofotofoga ma faigata, e mafai ona tatou iloa ia faigata o isi. Ona e faaosofia i tatou i le agaalofa, e mafai ai ona tatou aapa atu ma si’i a’e i latou. A o tatou faia faapea, e siitia foi i tatou i a tatou auaunaga faaKeriso. Na ta’ua e Peresitene Gordon B. Hinckley: “O le vaifofo sili ua ou iloa mo le popole o le galue. O le vailaau sili mo le faanoanoa o le auauna atu. O le fofo sili lava mo le vaivai o le lu’i ia fesoasoani atu i se tasi o sili atu le lelava.”9
I le, Ekalesia a Iesu Keriso, ua tele avanoa ou te maua e auauna atu ai ma tautuaina o’u uso a tagata. O taimi na ou te faalogoina ai le tuumāmāina e le Tama Faalelagi o a’u avega. O Peresitene Russell M. Nelson o le perofeta a le Atua i le lalolagi; o ia o se faataitaiga sili o le ala e ao ai ona tatou auauna atu i isi i taimi o tofotofoga. Ou te soofaatasi la’u molimau ma i latou o le toatele o isi Au Paia, o le Atua o lo tatou Tama Faalelagi alofa. Ua ou lagonaina Lona alofa e le i’u i taimi o o’u aso pogisa. E malamalama lo tatou Faaola o Iesu Keriso i o tatou tiga ma o tatou puapuaga. E finagalo o Ia e faamāmā a tatou avega ma faamafanafanaina i tatou. E tatau ona tatou mulimuli i Ana faataitaiga e ala i le tautua ma auauna atu ia i latou e sili atu a latou avega nai lo i tatou. I le suafa, o Iesu Keriso, amene.