O Se Fale o le Faatulagaga Maopoopo
O le “faatulagaga maopoopo” o se ala faigofie, natura ma le aoga e aoao ai i tatou e le Alii o Ana fanau, i mataupu faavae taua.
I lo‘u olaga faalegaluega ma i la’u auaunaga i le Ekalesia, ua faaafe taimi ou te faia ai lenei mea—ae ou te lei faia lava i tamalii e 15 o loo nofoia tonu i o’u tua. Ou te lagonaina a outou tatalo ma a latou tatalo.
Uso e ma tuafafine, o a’u o se tagatanuu o le Malo o Toga i le Pasefika i Saute ae sa ou ola a’e i Amerika i Matu. O le faama’i oti ua taofia ai le faitau selau, pe faitau afe foi o faifeautalai talavou Toga o loo auauna atu i le salafa o le lalolagi mai le toe taliu atu i lo latou atunuu pele ona o loo tapunia nuu tuaoi. O nisi alii faifeau Toga ua tolu tausaga i a latou misiona a o tuafafine ua silia ma le lua tausaga! O loo latou faatalitali ma le onosai ma le faatuatua e pei ona lauiloa ai o matou tagata. O le taimi nei, aua tou te tete’i pe afai o i ai nisi o i latou o galulue ia outou uarota ma siteki ua matua’i pei lava o a’u—ua matutua ma sinā lauao. Tatou te faafetai mo faifeautalai i soo se mea mo la latou auauanaga tuuto, tusa lava pe uumi atu po o le pupuu foi nai le mea sa latou faamoemoe i ai ona o le faama’i oti.
I se tasi Aso Sa a o o’u tiakono, sa ou i ai i le faapaologa ma se fata o le vai o loo tufa le faamanatuga ae faatoa savali mai loa se tamaitai i totonu o le falelotu. Ma le faaaloalo, sa ou faalatalata atu ia te ia ma tuu atu i ai le fata. Sa lue mai lona ulu, ma tago i se ipu vai. Sa tuai tele mai mo le mauaina o le areto. E lei leva ona mavae lea aafiaga, sa aoao mai e lo’u faiaoga o aiga, o Ned Brimley, e faapea e tele itu ma faamanuiaga o le talalelei a Iesu Keriso ua tuuina mai ia i tatou i se faatulagaga maopoopo.
Mulimuli ane i lena vaiaso, sa o mai ai Ned ma lana soa i lo matou fale ma se lesona e le mafai ona galo. Na faamanatu mai e Ned ia i matou e faapea sa i ai le tulaga maopoopo i le ala na foafoa ai e le Atua le lalolagi. Sa matuai faaeteete le Alii i le faamalamalamaga ia Mose o le tulaga maopoopo na Ia foafoaina ai le lalolagi. Muamua, sa Ia amata i le tuueseeseina o le malamalama mai le pouliuli, ona sosoo ai lea ma sami mai le eleele matutu. Sa Ia faaopoopo laau ma meaola a o lei folasiaina atu i le paneta ua faatoa faatuina, Lana foafoaga aupito silisili: o le tagata, na amata ia Atamu ma Eva.
“Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i la’ua o le tane ma le fafine.”
“Ua silasila atu le Atua i mea uma ua na faia, faauta foi, ua matua lelei lava”(Kenese 1:27, 31).
Sa fiafia le Alii. Ona Ia malolo ai lea i le aso lona fitu.
O le faatulagaga maopoopo na foafoa ai le lalolagi sa le gata ina tatou maua ai sina tepa i le mea e sili ona taua i le Atua, ae faapea foi le mafuaaga ma pe mo ai foi na Ia foafoa ai le lalolagi.
Sa vavae foe o le lesona musuia a Ned Brimley i se faamatalaga faigofie: “Vai, o le fale o le Atua o le fale e faatulaga lelei. O loo faamoemoe o Ia e te ola i se olaga e faatulagaina lelei. I se faatulagaga lelei. E finagalo o Ia e te faamisiona ae e te lei faaipoipo.” O le taimi lea, o loo aoao mai ai pea e taitai o le Ekalesia e faapea “ua faamoemoe le Alii ia saunia alii talavou uma e mafai, ia auauna atu. … O tamaitai talavou … o e mananao e faamisiona e tatau foi ona sauniuni” (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 24.0, ChurchofJesusChrist.org). Sa faaauau pea Brother Brimley: “E finagalo le Atua ia e faaipoipo muamua ae le’i faia se fanau. Ma e finagalo o Ia e faaauau pea ona atiina a’e au taleni a o a’otauina oe.” Afai e te filifili e te ola i se olaga e ese mai le faatulagaga, o le a matua faigata le olaga ma pagatia mo oe.
Sa aoao mai foi e Brother Brimley i matou e faapea, e fesoasoani le Faaola ia i matou e ala i Lana taulaga togiola, e toefuatai mai le faatulagaga maopoopo i o matou olaga ua pagatia po o le le’i faatulagaina lelei ona o a matou lava filifiliga le lelei.
Mai lava i lena taimi, sa ou faananau ai lava i le “faatulagaga maopoopo.” Sa ou atiina a’e se mausa o le vaavaai mo mamanu faatulagaina lelei i lo’u olaga ma i le talalelei.
Na aoao mai e Elder David A. Bednar lenei mataupu faavae: “A o tatou suesue, aoao, ma ola i le talalelei a Iesu Keriso, e tele lava ina fesoasoani le faasologa o mea e tutupu. Manatu mo se faataitaiga, o lesona ua tatou aoaoina e uiga i mea faaleagaga e faamuamua, mai le faasologa o mea autu na tutupu ina ua toefuatai mai le talalelei a le Faaola i nei aso e gata ai.
Sa lisi mai e Elder Bednar le Uluai Faaaliga Vaaia ma le uluai faaali atu o Moronae ia Iosefa Samita o le aoaoina o le perofeta talavou muaua, le natura ma le uiga o le Atua, sosoo ai ma e matafaioi a le Tusi a Mamona ma Elia o le a faia i le faapotopotoina o Isaraelu i itu uma lua o le veli i lenei toe tisipenisione.
Na faaiu mai e Elder Bednar: “O lenei faasologa musuia, e malamalama ai i mataupu faaleagaga e aupito maualuga le faamuamua i le Atua” (“O Le a Liliu Atu Loto o Fanau i o Latou Tama,” Liahona, Nov. 2011, 24).
O se tasi matauga na ou faia e faapea o le “faatulagaga maopoopo” o se ala faigofie, natura ma le aoga e aoao ai i tatou e le Alii o Ana fanau, i mataupu faavae taua.
Ua tatou o mai i le lalolagi e aoao ma maua le poto masani semanu tatou te le maua. E tulagaese lo tatou tuputupu a’e ia i tatou taitoatasi ma o se vaega taua o le fuafuaga a le Tama Faalelagi. O lo tatou tuputupu a’e faaletino ma faaleagaga e amata i laasaga ma atiina a’e lemu ai a o tatou maua auaua’i le poto masani.
Ua aumai e Alema se lauga mamana e uiga i le faatuatua—e faaaoga ai le talafaataoto i se fatu, lea, afai e tausi ma faafaileleina lelei, e lalau a’e mai se tama’i laau e avea ma se laau tele, ua matua e fua mai ai ni fua suamalie (tagai i le Alema 32:28–43). O le lesona e faapea, o le a faateleina lo outou faatuatua pe a outou tuu atu le avanoa mo le fatu ma faafailele—po o le afioga a le Atua—i o outou loto. O le a faateleina lo outou faatuatua a o amata “ona malena ane i totonu o o outou fatafata” le afioga a le Atua (fuaiupu e 28). O le a “malena ae, ma totogo mai, ma amata ona ola” (fuaiupu e 30) e le gata ina vaaia ae aoao mai ai. E auauai faasolosolo foi.
Ua aoao mai e le Alii i tatou taitoatasi, e tusa ai ma lo tatou gafatia e aoao ma pe faapefea foi ona tatou aoaoina. O lo tatou tuputupu ae e faalagolago atoa i lo tatou naunautai, fiailoa masani, maualuga o le faatuatua, ma le malamalama.
Na aoao mai e Nifae mea o le a aoaoina e Iosefa Samita i Katelani, Ohaio, i le 2,300 tausaga mulimuli ane: “Aua faauta, ua faapea ona fetalai mai o le Alii le Atua: Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti ii ma sina mea itiiti i o; ma e manuia lava i latou o e e faalogologo i a’u mataupu, ma ua’i mai o latou taliga i la’u fautuaga, ona o le a latou aoaoina le poto.” (2 Nifae 28:30).
Tatou te aoao “lea mataupu i luga o lea mataupu, o sina mea itiiti ii ma sina mea itiiti i o,” e auauai foi.
Mafaufau i faamatalaga nei na tatou faalogo ai i o tatou olaga: “Muamua mea e muamua” po o le “Fafaga muamua i le suasusu a o lei fafagaina i mea aano.” Ae faapefea le “E tatau ona tatou savavali muamua a o lei tamomoe”? O na faaupuga moni masani o loo faamatala mai ai se mea e auauai.
E faagaoioia vavega i se faatulagaga maopoopo. E tutupu vavega pe a faaaoga muamua le faatuatua. E muamua le faatuatua i vavega.
E faauuina foi alii talavou i tofi o le Perisitua Arona i le faasologa, e tusa ai ma tausaga o le tagata ua faauuina: tiakono, aoao, ona sosoo ai lea ma le ositaulaga.
O sauniga o le faaolataga ma le faaeaga e auauai le natura. E papatiso muamua i tatou a o lei mauaina le meaalofa o le Agaga Paia. E faapena foi ona sauniga o le malumalu e faasolo auauai. Ioe, e pei ona sa aoao ai au ma le poto tele e la’u uo o Ned Brimley, e faasolo auauai foi le faamanatuga—e amata i le areto, sosoo ai ma le vai.
“O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo’u tino lenei.
“Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, ina inu ia outou uma i ai;
“Auā o lo’u toto lenei, o le toto o le feagaiga fou, ua faamaligiina mo tagata e toatele e faamagaloa’i agasala”(Mataio 26:26–28).
I Ierusalema ma Amerika, sa faatuina ai e le Faaola le faamanatuga i le faasologa tonu e tasi.
“Faauta, o loʼu fale o se fale o le maopoopo, ua fetalai mai ai le Alii le Atua, ae lē o se fale o le fenumiaʼi” (Mataupu Faavae ma Feagaiga 132:8).
O le salamo e faasolosolo auauai. E mafai i le faatuatua ia Iesu Keriso tusa lava pe na o sina vaega itiiti. O le faatuatua e manaomia ai le lotomaualalo, o se elemene e tatau ai o le maua o se “loto momomo ma le agaga salamo” (2 Nifae 2:7).
E moni, o mataupu faavae muamua o le talalelei e faasolosolo auauai. “Matou te talitonu o muai mataupu faavae ma sauniga o le Talalelei e faapea: muamua, Faatuatua i le Alii o Iesu Keriso; lona lua, o le Salamo; lona tolu, o le Papatisoina i le faatofuina mo le faamagaloina o agasala; lona fa, o le faaee atu o lima e maua ai le mea foaifua o le Agaga Paia” (Mataupu Faavae o le Faatuatua 1:4).
Na aoao atu e le Tupu o Peniamina lona nuu lenei upumoni taua: “Ma ia vaai ia faia nei mea uma i le poto ma le faatulagaga lelei; ona e lē tatau i se tagata ona momoʼe televave atu nai lo le malosi ua ia te ia. Ma lea foi, e tatau ona ia filifiliga o ia ina ia maua ai le taui; o lea e tatau ai ona ia faia mea uma ma le auauai lelei” (Mosaea 4:27),
Ia tatou ola i o tatou olaga ma le faatulagaina lelei ma saili ia mulimuli i le faatulagaga ua otooto mai e le Alii mo i tatou. O le a faamanuiaina i tatou pe a tatou vaavaai ma mulimuli i mamanu ma faasologa auauai ua aoao mai e le Alii mea e sili ona taua ia te Ia. I le suafa paia o Iesu Keriso, amene.