Saunia mo le Afio Mai Faalua o Iesu Keriso

Saunia e Elder Christoffel Golden

O Le Fitugafulu

E sili atu nai lo se isi lava taimi muamua, e manaomia lo tatou faafetaiaia o le mea moni o loo tatou latalata atili atu i le Afio Mai Faalua o Iesu Keriso.

E pei ona faamaumauina i le Tusi a Mamona, e ono tausaga a o lumanai le soifua mai o Iesu Keriso, sa valoia e Samuelu, o se sa Lamana amiotonu, i tagata sa Nifae o ē na amata i lena taimi ona sili ona liliuese,¹ e uiga i faailoga o le a oo mai faatasi ma le soifua mai o lo tatou Faaola. O le tulaga matautia, o le toatele o sa Nifae sa teena na faailoga ona “e le o se mea ua tonu i le mafaufau le [tatau ona] afio mai o se tagata ua faapea o se Keriso.”²

O le mea e faanoanoa ai, e tusa ai ma le faamaumauga faatusi paia, o le toatele o tagata Iutaia, i se tulaga faapena, sa le taliaina faapea o se tagata e igoa ia Iesu, mai le itumalo e tau le iloa o Kalilaia, e moni lava o le Mesia lea ua loa ona faatalitali i ai.³ O Iesu, o lē na afio moni mai e faataunuu le tele o valoaga na faia e perofeta Eperu, na teena ma sa faasatauroina ona, e pei ona sa a’oa’o mai e le perofeta o Iakopo i le Tusi a Mamona, na “vaai [tagata Iutaia] i tala atu o le faailoga.” O le mea lea, sa molimau mai ai Iakopo e faapea “ua aveese e le Atua lana manino mai ia te i latou, ma tuu atu ia te i latou le tele o mea e lē mafai ona latou malamalama i ai, ona sa latou mananao i ai. Ma talu ai ona sa latou mananao i ai, o lea na faia ai e le Atua ia latou tautevateva.”⁴

E foliga uiga ese, e leai se a’oa’oga, leai se vavega, leai se faaali mai e oo lava i agelu o le lagi, e pei ona molimauina e Lamana ma Lemuelu,⁵ e foliga mai e i ai se mana faatauanau e faatalitonu ai ni tagata e toe sui lo latou ala, vaaiga, po o se talitonuga faapea e moni se mea. O le tulaga moni lena pe a oo ina lē femaliliea’i a’oa’oga po o vavega ma mua’imanatu faivavale, moomooga, po o aitia a se tagata.

Faamolemole ia faatusatusa mo sina taimi ia mau nei e lua, o le mau muamua mai le Aposetolo o Paulo o loo talanoa e uiga i aso e gata ai, e faamatala ai ala o tagata, ma le lona lua mai ia Alema le perofeta o loo faaalia ai le ala e faia ai e le Atua Lana galuega i tagata. O upu a Paulo:

“A e ia e iloa e oe lenei mea, o ona aso e gata ai e oo mai ai aso faigata.

“Aua e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga,

“O e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei,

“O e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; …

Ua latou “aoaoina e le aunoa, a e le au mafai ona oo ina iloa lelei o le upumoni.”⁶

Ma mai ia Alema, o loo ta’ua ai se mataupu faavae faaleaoaoga faavae o le talalelei a Iesu Keriso: “O lenei atonu e te manatu ua ou valea i lenei mea; ae faauta ou te fai atu ia te oe, o mea laiti ma faatauvaa e faataunuu ai mea tetele; ma o auala laiti i le tele o taimi, e faamaasiasia ai e popoto.”⁷

Ua tatou ola i se lalolagi ua tumu i le malamalama sili ma le anoanoai o tomai iloga. Ae ui o lea, o nei mea e tele ina natia ai le faavae lē mautu o loo fau ai i luga. O lea, o na malamalama ma tomai e lē tau atu i le mea moni ma agai atu i le Atua ma le mana e maua ai faaaliga, maua ai le malamalama faaleagaga, ma atia’e ai le faatuatua ia Iesu Keriso lea e tau atu i le faaolataga.⁸

O loo matuai faamanatu mai ia i tatou afioga a lo tatou Alii ia Toma ma isi Aposetolo i le po o Lana taulaga togiola: “Ua fetalai atu Iesu ia te ia, O a’u nei le ala, ma le upumoni, ma le ola: e le alu atu lava se tasi i le Tama, pe a le ui mai ia te a’u.”⁹

Mo i latou e i ai mata e vaai, taliga e faalogo, ma loto e lagona ai, e sili atu nai lo se isi taimi, ua manaomia ona tatou faafetaia’ia le mea moni ua tatou matua latalata atu i le Afio Mai Faalua o Iesu Keriso. E moni, o loo faatalitali mai faigata e tele ia i latou o i le lalolagi i le taimi o Lona toe afio mai, ae i lea tulaga, e le tatau i ē faatuatua ona matata’u.

Se’i o’u faitau atu nei mai i Autu o le Talalelei a le Ekalesia i lalo o le faaulutala “Afio Mai Faalua o Iesu Keriso”:

“Pe a toe afio mai le Faaola, o le a Ia afio mai i le mana ma le mamalu e avea le lalolagi ma Lona malo. O Lona Afio Mai Faalua o le a faailoga ai le amataga o le Meleniuma.

O le Afio Mai Faalua o le a avea o se taimi matautia, ma faanoanoa mo ē amioleaga, ae o le a avea o se aso o le filemu mo ē amiotonu. Na tautino mai le Alii:

“Aua o i latou o ē e popoto ma ua latou talia le upumoni, ma ua latou ave le Agaga Paia mo o latou taiala, ma sa le’i faaseseina—e moni Ou te fai atu ia te outou, o le a lē tatuuina i latou i lalo ma lafo i le afi, ae o le a latou gafatia le aso.

“‘Ma o le a tuu atu ia te i latou le lalolagi e fai mo so latou tofi; ma o le a latou uluola ma solo malolosi, ma o le a tutupu aʼe i le olataga a latou fanau e aunoa ma le agasala.

“‘Ona o le a i ai le Alii i lo latou lotolotoi, ma o le a i ai lona mamalu i luga o i latou, ma o le a avea o ia ma o latou tupu ma o latou faitulafono’ (Mataupu Faavae ma Feagaiga 45:57–59).”¹⁰

Ia tatou sauniuniga mo le Afio Mai Faalua o Iesu Keriso, ou te tuu atu ai se feau taua faamafanafana mo le au faatuatua mai le perofeta o Amosa i le Feagaiga Tuai: “E le faia lava se mea e le Alii o Ieova, a e faaalia lona finagalo i ana auauna o perofeta.”¹¹

I lea lava agaga, ua tuuina mai ai ia i tatou e le perofeta a le Alii i ona po nei i le lalolagi, Peresitene Russell M. Nelson, lenei fautuaga musuia talu ai nei: “O le talalelei a Iesu Keriso o se talalelei o le salamo. Ona o le Togiola a le Faaola, ua saunia ai e Lana talalelei se valaaulia ia faatumauina ai pea suiga, tuputupu a’e, ma le mamā a’ia’i atili. O se talalelei o le faamoemoe, o le faamalologa, ma le alualu i luma. O lea, o le talalelei o se savali o le olioli! E olioli o tatou agaga i laa laiti uma tatou te laa ai i luma.”¹²

Ou te molimau atu e aunoa ma se masalosalo ma tautino atu le moni o le Atua ma vavega i aso uma o le olaga i tagata lē mafaitaulia mai tulaga uma maualalo ma maualuga o le olaga. E moni, e tele aafiaga paia e seāseā ona talanoaina, i se tasi itu ona o lo latou faapogai paia ma tulaga e ono tulai mai ai le tauemuina e nisi e lē malamalama.

O lea tulaga, ua faamanatu mai ai ia i tatou e le toe perofeta o le Tusi a Mamona:

“Ma ou te toe tautala atu ia te outou o ē e faafitia faaaliga a le Atua, ma fai mai ua mavae atu i latou, ua leai ni faaaliga, po o ni valoaga, po o ni meaalofa, po o ni faamalologa, po o le tautala i gagana, ma le faamatalaga o gagana;

“Faauta ou te fai atu ia te outou, o le e faafitia nei mea ua le iloa e ia le talalelei a Keriso; ioe, e lei faitauina e ia o tusitusiga paia; afai na ia faitauina, ua le malamalama i ai o ia.

“Aua pe ua tatou le faitauina ea o le Atua ua tutusa lava ia o ananafi, i le asō, ma le faavavau, ma ua leai se feliuliuai po o sina fesuisuiai o ia te ia?”¹³

Ou te faai’u atu i se tautinoga moni musuia faaperofeta mai le Perofeta o Iosefa Samita, na tuuina mai ina ua tulata i le faaiuga o lana misiona a o ia tulimatai atu i le Afio Mai Faalua o Iesu Keriso: “Tatou te le o atu pea ea i lenei savali sili? O atu i luma ae lē o le solomuli. Lototetele, uso e [ma ou te fia faaopoopo atu, ma tuafafine]; ma ia aga’i atu, aga’i atu pea i le manumalo! Ia olioli o outou loto, ma ia fiafia tele.”¹⁴ O lea ou te faaopoopo atu ai la’u molimau i le suafa o Iesu Keriso, amene.