Faalolotoina o Lo Tatou Liua ia Iesu Keriso
O tusitusiga paia ma lo tatou malamalama i le Atua o meaalofa—o meaalofa e masani ona tatou manatu faatauvaa i ai. Ia tatou faapelepele i nei faamanuiaga.
Faafetai tele lava, Elder Nielson, mo lau savali matagofie. Sa matou manaomia lena savali.
O’u uso e ma tuafafine pele, na a’oa’oina i tatou talu ai nei e Peresitene Russell M. Nelson: “Ina ia faia soo se mea ia lelei, e manaomia se taumafaiga. O le avea ma se soo moni o Iesu Keriso, e leai se tuusaunoaga. O le faateleina o lou faatuatua ma le faalagolago ia te Ia e manaomia ai se taumafaiga.” Faatasi ai ma fautuaga na ia tuuina mai ia i tatou e faateleina ai lo tatou faatuatua ia Iesu Keriso o le avea lea o i tatou ma tagata a’oa’o gaua’i, ia tatou faatofuina i tatou lava i tusitusiga paia ina ia malamalama atili ai i le misiona ma le auaunaga a Keriso. (Tagai i le “Ua Toetu Keriso: O Le Faatuatua ia te Ia O Le A Aveesea ai Mauga,” Liahona, Me 2021, 103.)
Ua tatou aoao i le Tusi a Mamona o tusitusiga paia o se vaega taua o le aiga o Liae—o le mea lea na toe foi atu ai Nifae ma ona uso i Ierusalema ina ia maua mai papatusi apamemea (tagai 1 Nifae 3–4).
Ua faaali mai e tusitusiga paia le finagalo o le Atua mo i tatou, e pei ona faia e le Liahona mo Nifae ma lona tamā. Ina ua gau lana aufana, sa manaomia ona iloa e Nifae le mea e tatau ona alu i ai e maua ai meaai. Sa tilotilo lona tamā, o Liae, i le Liahona ma vaai ai i mea na tusia. Na vaai Nifae o galulue vae o le polo e tusa ai ma le faatuatua, filiga, ma le gauai na tuuina atu i ai. Sa ia vaaia foi ni tusitusiga ia sa faigofie ona faitau i ai ma sa tuuina atu ai ia i latou le malamalamaaga e faatatau i ala o le Alii. Sa oo ina ia nofouta faapea e aumaia e le Alii mea tetele e ala mai i auala laiti. Sa usiusitai o ia e tusa ai ma faatonuga na tuuina mai e le Liahona. Sa alu atu o ia i luga o le mauga ma maua mai ni meaai mo lona aiga, o ē sa mafatia tele i le leai o se mea na i ai. (Tagai i le 1 Nifae 16:23–31.)
E foliga mai ia te a’u o Nifae o se tamaitiiti a’oga na tuuto atu i tusitusiga paia. Tatou te faitau na fiafia Nifae i tusitusiga paia, mafaufau loloto i ai i lona loto, ma tusia mo le a’oa’oina ma le manuia o ana fanau (tagai i le 3 Nifae 4:15–16).
Na saunoa mai Peresitene Russell M. Nelson:
“Afai tatou te ‘fetaomi atu i luma, ma taumamafa fiafia i le afioga a Keriso, ma tumau e oo i le iuga, … o le a [tatou] maua le ola e faavavau’ [2 Nifae 31:20].
“O le taumamafa o lona uiga e sili atu nai lo sina pa’i. O le taumamafa o lona uiga o le tofo i ai. Tatou te tofo i tusitusiga paia e ala i le suesue i ai i se agaga o le mauaina fiafia ma le usitai faamaoni. Pe a tatou taumamafa i afioga a Keriso, o lona uiga ua tusia ai “i papatusi maa o le loto.’ [2 Korinito 3:3]. E avea i latou ma se vaega taua o lo tatou natura” (“Ola i le Taitaiga Faatusitusiga Paia,” Liahona, Ian. 2001, 21).
O A Nisi Mea Tatou Te Ono Faia pe A Fiafia o Tatou Agaga i Tusitusiga Paia?
O le a faateleina lo tatou manao ia avea ma se vaega o le faapotopotoina o Isaraelu i itu uma e lua o le veli. O le a avea ma mea masani mo i tatou le valaaulia o o tatou aiga ma uo e faalogo i faifeautalai. O le a tatou agavaa, ma o le a tatou maua se pepa faataga o le malumalu o aoga ina ia mafai ai ona o soo i le malumalu i le tele e mafai ai. O le a tatou galulue e saili, saunia, ma auina atu igoa o o tatou tuaa i le malumalu. O le a tatou faamaoni i le tausia o le aso Sapati, auai i le lotu i Aso Sa uma e faafou a tatou feagaiga ma le Alii a o tatou auai ma le agavaa i le tagofia o le faamanatuga. O le a tatou filifili e tumau i luga o le ala o feagaiga, ola i afioga uma e tulei mai le fofoga o le Atua (tagai i le Mataupu Faavae ma Feagaiga 84:44).
O Le A le Uiga ia te Oe o le Fiafia i Mea a le Alii?
O le fiafia i tusitusiga paia e sili atu nai lo le fiaai ma le fia inu mo le malamalama. Na lagona e Nifae le olioli tele i le taimi o lona olaga. Peitai, sa feagai foi o ia ma faigata ma faanoanoaga (tagai i le 2 Nifae 4:12–13). “E ui i lea,” sa ia fai mai ai, “Ua ou iloa lē ua ou faalagolago i ai” (2 Nifae 4:19). A o tatou suesue i tusitusiga paia, o le a tatou malamalama atili i le ata o le faaolataga ma le faaeaga a le Atua, ma o le a tatou faalagolago i folafolaga na Ia faia ia i tatou i tusitusiga paia, faapea foi i folafolaga ma faamanuiaga a perofeta o aso nei.
I se tasi aoauli, sa valaaulia ai i ma’ua ma lo’u toalua i le fale o se uo. O le la atalii e fitu tausaga le matua, o Tavita, e le’i faalogo lava i le tala o le Tusi Paia ia Tavita ma Koliata, ma sa ia manao e faalogo i ai. Ina ua amata ona ou faamatalaina le tala, sa ootia o ia ia Tavita, i lona faatuatua ma i le suafa o le Atua o Isaraelu, na manu’a ma fasiotia le Filisitia i se ma’atā ma se ma’a, ma sa leai se pelu i lona lima (tagai i le 1 Samuelu 17).
A o tilotilo mai ia te a’u ma ona mata lapopoa paauli, sa ia fesili mausali mai ia te a’u, “O ai le Atua?” Sa ou faamatala atu ia te ia o le Atua o lo tatou Tama Faalelagi ma e tatou te a’oa’o e uiga ia te Ia i tusitusiga paia.
Ona ia fesili mai lea ia te a’u, “O a tusitusiga paia?” Sa ou ta’u atu ia te ia o tusitusiga paia o afioga ia a le Atua ma o le a ia mauaina i totonu o i latou ni tala matagofie o le a fesoasoani ia te ia e iloa atili ai le Atua. Sa ou fai atu i lona tina e faaaoga le Tusi Paia sa i ai i lona fale ma ‘aua na te tuua Tavita e alu e moe e aunoa ma le faitauina o le tala atoa ia te ia. Sa fiafia o ia a o ia faalogo i ai. O tusitusiga paia ma lo tatou malamalama i le Atua o meaalofa—o meaalofa e masani ona tatou manatu faatauvaa i ai. Ia tatou faapelepele i nei faamanuiaga.
A o auauna atu o se alii talavou i se misiona, sa ou matauina o le a’oa’o atu i tusitusiga paia, na suia ai olaga o le toatele o tagata. Sa amata ona ou nofouta i le mana o loo ia i latou ma le auala e mafai ona suia ai o tatou olaga. O tagata taitoatasi sa matou a’oa’oina i ai le talalelei toefuataiina o se tagata tulaga ese e i ai manaoga eseese. Ioe, o tusitusiga paia—o valoaga na tusia e perofeta paia—na aumaia ai i latou i se faatuatua i le Alii ma i le salamo ma sa suia ai o latou loto.
Sa faatumulia e tusitusiga paia i latou i le olioli a o latou mauaina musumusuga, taitaiga, faamafanafanaga, malosi, ma tali i o latou manaoga. O le toatele o i latou na filifili e faia ni suiga i o latou olaga ma amata ona tausia poloaiga a le Atua.
Ua uunaia i tatou e Nifae ina ia fiafia i afioga a Keriso, aua o afioga a Keriso o le a ta’u maia ia i tatou mea uma e manaomia ona tatou faia (tagai i le 2 Nifae 32:3).
Ou te valaaulia outou ina ia i ai se fuafuaga tumau e suesue i tusitusiga paia. O le “Sau, Mulimuli Mai ia te A’u” o se punaoa sili lea ua tatou maua mo le a’oa’oina atu ma le a’oa’oina mai o le talalelei, faalolotoina o lo tatou liua ia Iesu Keriso, ma fesoasoani ia i tatou ia avea e faapei o Ia. A tatou suesue i le talalelei, tatou te lē na o le sailia o ni faamatalaga fou; ae, o loo tatou saili ia avea ma se “tagata fou” (2 Korinito 5:17).
O le Agaga Paia e taialaina i tatou agai i le upumoni ma molimau mai ia i tatou i le upumoni (tagai i le Ioane 16:13). Na te faamalamalamaina o tatou mafaufau ma faafouina lo tatou malamalama’aga ma pa’i mai i o tatou loto e ala i faaaliga a le Atua, o le puna o upumoni uma. O le Agaga Paia e faamamaina o tatou loto. Na te musuia i totonu o i tatou se manao e ola i le upumoni, ma musumusu mai ia i tatou ni auala e faia ai. “O le Agaga Paia … na te a’oa’o ia te outou i mea uma lava” (Ioane 14:26).
I le ta‘ua ai o upu na Ia faaalia i le Perofeta o Iosefa Samita, na fetalai mai ai lo tatou Faaola:
“O nei upu ua lē mai tagata pe mai se tagata, ae ua mai ia te aʼu; …
“O lo’u leo lea o loo tautala atu ia upu ia te outou; ona ua tuuina mai i latou e lo’u Agaga ia te outou … ;
“O le mea lea, e mafai ona outou molimau atu sa outou faalogo i loʼu leo” (Mataupu Faavae ma Feagaiga 18:34–36).
E tatau ona tatou saili le mafutaga a le Agaga Paia. O lenei sini e tatau ona pulea ai a tatou faai’uga ma taiala ai o tatou mafaufauga ma amioga. E tatau ona tatou sailia mea uma e valaaulia ai le faatosinaga a le Agaga ma teena soo se mea e ‘au’ese mai lenei faatosinaga.
Ou te molimau atu o Iesu Keriso o le Alo pele o lo tatou Tama Faalelagi. Ou te alofa i lo’u Faaola. Ou te faafetai mo Ana tusitusiga paia ma mo Ana perofeta soifua. O Peresitene Nelson o Lana perofeta. I le suafa, o Iesu Keriso, amene.