O le uluai faaaliga: O le Ki i le Upumoni
Saunia e Elder Richard J. Maynes
O Le Au Peresitene o Fitugafulu
Mai se faigalotu i le lalolagi atoa mo talavou matutua, “O le toefuataina o le upumoni,” na tuuina atu i le Tapeneko i Sate Leki i le aso 1 o Me, 2016; mo le anotusi atoa ma vitio, alu i le lds.org/broadcasts. O le anotusi atoa o tala o le uluai faaaliga e fa e mafai ona maua i le history.lds.org/firstvision.
Ia aua ne’i galo ia i tatou pe faatalale i le anoanoai o upumoni taua ua tatou aoaoina mai le uluai faaaliga vaaia a Iosefa Samita.
Iosefa Samita ma le Tama ma le Alo, saunia e Walter Rane
O le Toefuataiga o le atoaga o le talalelei a Iesu Keriso i aso e gata ai sa mua’i vaaia ma valoia e perofeta i le talafaasolopito atoa. O lea, e ao i le oo mai o le Toefuataiga, e le o se mea e faatei’a ai i latou e suesue i tusitusiga paia. O le tele o saunoaga faaperofeta i le Feagaiga Tuai, le Feagaiga Fou, ma le Tusi a Mamona na manino ona valoia ai ma faasino atu i le Toefuataiga o le talalelei.1
I le faaiuga o le vaitau o le 1790, pe tusa o le 2,400 tausaga ina ua mavae ona vaai le tupu o Nepukanesa i se miti e faapea “O le Atua o le lagi [o le a] faatuina ai se malo, o le a le faaumatiaina lava” (Tanielu 2:44), o se faasologa umi o fefinauaiga faalelotu sa amata i le Iunaite Setete. Ua lauiloa nei fefinauaiga tusitala faasolopito o se vaega o le Fanuga Lona Lua Tele. Na ala mai i nei fefinauaiga manatu faatautava o le faaolataga sa faatautaia ai e Iosefa Samita ma lona aiga lo latou tuuto faalelotu.
Sa aafia malosi Iosefa i aoaoga ma talanoaga a lona tama, o e na saili ae sa le mafai ona maua i totonu o lotu toe atiae nisi sa faatulagaina e faapei o le faatulagaga anamua o Iesu Keriso ma Ana Aposetolo. Sa faalogo Iosefa ma mafaufau loloto i taimi o suesuega o le Tusi Paia a le aiga. I le 12 o ona tausaga, sa amata ona popole o ia e uiga i ana agasala ma le soifua manuia o lona agaga ola pea, na mafua ai ona ia suesue i tusitusiga paia mo ia lava.
A o ia saili, sa ia filifili e “fai e pei ona faatonu mai e Iakopo, o lona uiga, fesili atu i le Atua” (i le Joseph Smith—History 1:13; tagai foi i le Iakopo 1:5). Mulimuli ane o le faaali mai o le Atua le Tama ma lona Alo, le Alii o Iesu Keriso, ia Iosefa na amatalia ai le tisipenisione o le atoaga o taimi.
Tala e fa
Na tusia pe sa faalau atu e le Perofeta o Iosefa Samita tala silafia e fa o lana Uluai Faaaliga. E le gata i lea, na tusia e i latou na soifua i lena taimi mea sa latou manatua na faalogo ai ia Iosefa e uiga i le faaaliga vaaia; e lima nei tala o lo o iloa. O se faamanuiaga le iai o nei faamauga. Sa latou faia le uluai faaaliga a Iosefa o se faamaumauga sili i le talafaasolopito. Ou te uunaia outou e asiasi i le history.lds.org e aoao atili ai e uiga i tala ma iloa le ala latou te galulue faatasi e vali ai se ata e sili ona atoatoa.
O le tusiga o Ulutala o Aoaoga Faalelotu “Tala o le Uluai Faaaliga” na faapea mai: “O tala eseese o le Uluai Faaaliga ua latou faamatalaina se tala lava e tasi, e ui e masani ona eseese mea e faamamafaina ma faamatalaga auiliili. O tusitalafaasolopito e faamoemoe afai e toe faamatalaina e se tasi se aafiaga i ni tulaga eseese ini tagata faalogologo i ni tausaga se tele, o tala taitasi o le a faamamafa ai ni manatu eseese o le aafiaga ma e maua ai ni faamatalaga tulaga ese. E moni lava, o eseesega e pei ona iai i le uluai faaaliga o loo maua i le tele o tala faatusitusiga paia o le faaaliga a Paulo i le ala i Tamaseko ma le aafiaga a Aposetolo i le Mauga o Liua. Ae e ui lava i eseesega, e i ai pea se faavae tumau i tala uma o le Uluai Faaaliga. O nisi ua finau sese e faapea, soo se eseesega lava i le toefaamatalaina o le tala o se faamaoniga o se talafatu. I le isi itu, o le faamaumauga anoa o le talafaasolopito, ua mafai ai ona tatou aoao atili e uiga i lenei mea taua na tupu, nai lo le mea semanu tatou te aoaoina pe ana faapea e laitiiti faamatalaga na faamauina” (“First Vision Accounts,” Gospel Topics, lds.org/topics).2
Tala o le 1832
O le mea muamua, o le tala o le 1832 o le tala auiliili muamua lea na tusia o le uluai faaaliga. O se vaega o se tala o le soifuaga e ono-itulau, o le tele lava na tusia e Iosefa. O lenei pepa o faamatalaga ua i ai i le tausiga a le Ekalesia talu lava ona tusia. Ina ua mavae le savaliga a paionia i sisifo, sa mau pea lona teuina i se pusa mo ni nai tausaga, ma sa masani ona le iloa seia oo ina lolomiina i se suesuega i se faailoga o le Master i le 1965. E talu mai lena taimi ua lolomiina pea lava pea, e aofia ai i le LDS.org i Pepa a Iosefa Samita.
I lenei pepa o faamatalaga, na faailoa ai e Iosefa le faanoanoa i le le iloaina po o fea e maua ai le faamagaloga a le Faaola. Ua ia molimau mai, “Ua tatala e le Alii le lagi i o’u luga ma sa o’u vaai i le Alii.”3 O nisi sa faaliliuina lenei faamatalaga e faapea sa faailoa mai e Iosefa e faatatau i le afio mai o ia na o le tasi tagata paia, ae ina ua faitauina e tusa ai ma isi pepa o faamatalaga, e mafai ai ona malamalama lenei fuaitau i le uiga faatatau o le Atua le Tama ua ia tatala mai le lagi ma faaali mai lona Alo, o Iesu Keriso, ia Iosefa.
Ua faamamafa mai ma le matagofie e lenei tala le Togiola a le Faaola ma le Togiola patino sa ia ofoina atu ia Iosefa. O loo tau mai i se vaega: “Na fetalai mai le Alii… ia te au e faapea, ‘Iosefa lou atalii ua faamagaloina au agasala. … Sa faasatauroina au mo le lalolagi ina ia mafai ona maua e i latou uma o e talitonu mai i lo’u igoa le ola e faavavau.” Na molimau mai Iosefa na oo ia te ia le olioli ma le alofa ae e le maua se tasi e talitonu. “Sa faatumulia lo’u loto i le alofa ma mo aso e tele sa ’ou fiafia i le olioli tele ma e sa faatasi mai le Alii ia te a’u, ae e le mafai ona [ou] maua se tasi e talitonu i faaaliga faalelagi. E ui i lea, sa ou mafaufau loloto i nei mea i lo’u loto.”4
Tala o le 1835
O le isi, o le tala o le 1835 o le faamatalaga a Iosefa o lana faaaliga vaaia ia Robert Matthews, o se tagata asiasi i Katelani, Ohaio, i le 1835. Sa faamaumauina i api talaaga a Iosefa e lana tusiupu. Sa le aofia ai i uluai lomiga o le talafaasolopito o Iosefa ma sa lomia muamua i le BYU Studies i le vaitau o le 1960. I lenei tala, o loo molimau Iosefa e faapea sa muai faaali le Atua ia te ia, ona ia vaai foi lea i le Faaola: “Sa ’ou valaau atu i le Alii i le tatalo faatauanau. Na faaali mai se afi faaniutu i luga a’e o lou ulu; sa nofo i o’u luga ma faatumulia ai a’u i le olioli le mafaamatalaina. Na faaali mai se peresona i le totonugalemu o lenei taulotoaʼiga o le poutu o le apeafi mumu, ua salalau solo ma mu a’e ai e leai se mea na faaleagaina. O se isi peresona na le’i pine ona faaali mai e faapei o le na muamua. Sa ia fai mai ia te au, ‘ua faamagaloina au agasala.’” I lenei tala, na faamauina foi e Iosefa, “Sa ’ou vaai i le tele o agelu i lenei faaaliga”5
Tala o le 1838
O le tala o le 1838 o le tala sili ona silafia, ma e aumai mai le talafaasolopito o tusitusiga a Iosefa. Na tusia le tusiga muamua ina ua tuanai le sola ese o Iosefa mai Katelani i le amataga o le 1838, ma o le tusiga lona lua na saunia e lei leva lona sola ese mai Misuri i le 1839. O lea na tusia ai i le tulaga o le tetee tele. Sa muai lomia i le 1842 i le Times and Seasons, le nusipepa a le Ekalesia i Navu, Ilinoi. Sa aofia foi i le Penina Tau tele i le 1851, lea sa muai o se tamaitusi mo le au paia i Peretania. Na faapaiaina o se tusitusiga paia i le 1880.
O le tele o tusiga faataitai o lenei tala sa lolomiina i le O Pepa a Iosefa Samita. E pei o le tala o le 1835, o le fesili totonugalemu o lenei tala o le fea lotu e sa’o. I le avea ai ma se talafaasolopito o le Ekalesia, ae le na o Iosefa, o lenei tala “e taulai atu i le silasila mamao o le amataga o le ‘tulai mai ma le alualu i luma o le Ekalesia.’”6 O le mea lea, e le o aofia ai le faamatalaga e uiga i le faamagaloga faaletagata lava ia e pei ona taua i tala e lua na muamua atu.
Tala o le 1842
Ma le mea mulimuli, o le tala o le 1842 o le tali atu i se talosaga mo faamatalaga mai ia John Wentworth, le faatonu o le Chicago Democrat. Na tusia e Iosefa se tusi ia te ia na aofia ai e le gata i mataupu faavae o le faatuatua, ae faapena foi se faamatalaga o le uluai faaaliga. Sa lolomiina le tusi i le Times and Seasons i le 1842. Faatasi ai ma le faatagaga a Iosefa, sa toe lomia i le 1844 e le tusitalafaasolopito o Isaraelu Daniel Rupp i lana tusi e uiga i le tapuaiga faa-Kerisiano i le Iunaite Setete.7 O lenei tala sa faamoemoe mo se faapotopotoga e le masani ma talitonuga a Mamona. Sa tusia i le taimi o se faafeiloai fifilemu mai tetee sa faafeagai ma le Perofeta.
E faapei o isi tala, sa faamauina e Iosefa le le mautonu na oo i ai ma le faaali mai o ni tagata se toalua o le tali i lana tatalo: “Sa fusifusia au i se faaaliga faalelagi ma vaai i le mamalu o ni tagata se toalua e foliga tutusa lava i vaaiga, ma faatusa, ua siomia e se malamalama pupula ua punitia le la i le aoauli. Sa latou fai mai ia te au o tapuaiga lotu uma ua talitonu i aoaoga faavae sese, ma e leai so latou e aloaia le Atua o Lana Ekalesia ma le malo. Ma sa faatonuina manino a’u e ‘aua le mulimuli atu ia te i latou,’ ma i le taimi lava lea na mauaina ai se folafolaga o le a faaalia mai ia te a’u le atoatoaga o le talalelei i se taimi o le lumanai.”8
O se faamanuiaga le i ai o nei tala o le uluai faaaliga a Iosefa. E faapei o Evagelia taitasi o le Feagaiga Fou ua atoatoa lo latou faamatalaina o le soifuaga ma le galuega a Keriso, o tala taitasi o lo o faamatalaina le uluai faaaliga a Iosefa ua faaopoopo iai auiliiliga tulaga ese ma manatu i le aafiaga atoa. Ua tasi i latou i le faamatalaina o le tala tumau ma le gatasi a Iosefa. Na latou faamamafa sa iai le le malamalama ma le fefinauai i le va o Ekalesia Kerisiano; sa naunau ai Iosefa e fiailoa po o ai, pe afai e iai, sa tonu; o lea na ia sailiili ai i tusitusiga paia ma tatalo; na oo ifo ai se malamalama mai le lagi; ma sa faaali mai lena tagata paia, ma tali mai i lana tatalo.
“E le mafai ona ou faafitia”
O le lomiga faamauina o le 1838 o le tala a Iosefa Samita o le uluai faaaliga o le aafiaga faaleaoaoga aupito sili ona mamana e mafai ona maua e soo se tasi i luga o le fogaeleele. O lenei aafiaga na suia ai le soifuaga o Iosefa, na suia ai lo’u olaga, ma ou te iloa po o le a suia ai lo’u olaga a o ole atu i le Alii mo se faamautinoaga o lona faamaoni.
E pei ona faamauina i le tusiga “First Vision Accounts”, o lo o maua i le LDS.org: sa molimau pea “Iosefa Samita” sa ia iloaina se faaaliga maoa’e o le Atua le Tama ma lona Alo, o Iesu Keriso. Ua le o le moni o le uluai faaaliga po o ni finauga e faasaga i ai e mafai ona faamaonia e ala i sailiiliga o talafaasolopito lava ia. O le iloaina o le moni o le molimau a Iosefa Samita e manaomia taitasi ai le saili ma le faamaoni o le upumoni mai faamaumauga ona faaaoga lea o le faatuatua atoa ia Keriso e ole ai i le Atua i le tatalo faatauanau, ma le lotomaulalo pe ua moni le faamaumauga. Afai e saili ma le loto faamaoni e faatino le tali e pei ona faaali mai e le Agaga Paia, o le a faamaonia le faaaliga a Iosefa Samita. I lenei auala, e mafai e tagata taitasi ona iloa sa tautala faamaoni Iosefa Samita ina ua ia tautino mai, ‘Sa ou vaai i se faaaliga; Na ou iloaina, ma sa ou iloa na silafia e le Atua, ma e le mafai ona ou faafitia lava’ [i le Joseph Smith—History 1:25].’”
E tusa ai ma Peresitene Iosefa F. Samita (1838–1918), “O le mea aupito maoa’e na tupu i le lalolagi, talu mai le Toetu o le Alo o le Atua mai le tuugamau ma lona afio a’e i luga, o le afio mai o le Tama ma le Alo i lena taule’ale’a o Iosefa Samita.”9
Upu moni mai le uluai faaaliga
O se aafiaga matagofie ma le faagaeetia e iloiloina ai mea tatou te aoaoina mai i lenei aafiaga paia, ma le ofoofogia. Ou te fia faasoa atu se faataitaiga o le upumoni ua tatou aoao mai i le uluai faaaliga ia Iosefa Samita e faatatau i le natura e faavavau o lo tatou Tama Faalelagi ma Lona Alo, o Iesu Keriso; o le iai o Satani; o le feteenaiga i le va o le lelei ma le leaga; ma isi vaega taua o le fuafuaga sili o le faaolataga.
Ua tatou aoao e moni tusitusiga paia ma e mafai ona malamalama ma faaaoga ai i o tatou olaga.
Ua tatou aoao o le mafaufau loloto i tusitusiga paia e aumai ai le mana ma le malamalamaaga.
Ua tatou aoao o le na ona iloa ua le lava lea; o le faatinoina o mea ua tatou iloa e ala mai ai faamanuiaga a le Atua.
Ua tatou aoao e tuu atu lo tatou faalagolago i le Atua ma vaavaai atu ia te Ia mo tali i fesili sili ona taua o le olaga, ma ia aua nei o tatou faalagolago i tagata.
Ua tatou aoao e talia a tatou talosaga e tusa ai ma lo tatou faatuatua le maluelue, ma e tusa ai ma le finagalo o le Tama Faalelagi.
Ua tatou aoao i le moni o le i ai o Satani ma ua ia te ia le mana e faaaafia ai le lalolagi faaletino, e aofia ai ma i tatou.
Ua tatou aoao o le mana o Satani e gata ma e faatoilaloina e le mana o le Atua.
Ua tatou aoao e leai se mea e taofia ai Satani i lona faaumatia o le galuega a le Atua ma atonu na iloa e Satani le taua o Iosefa Samita i lana matafaioi o le Perofeta o le Toefuataiga.
Ua tatou aoao e mafai ona tatou faatoilalo Satani e ala i le valaau atu i le Atua ma le tuuina atu o lo tatou faatuatua ma le faalagolago atoa ia te Ia.
Ua tatou aoao o le mea e i ai le malamalama, e tatau ona aveesea le pouliuli.
Ua tatou aoao o le Atua le Tama ma lona Alo, o Iesu Keriso, o ni tamalii maoti ma eseese, e tutusa i foliga ma faatusa.
Ua tatou aoao o i tatou na foafoaina i le faatusa o le Atua.
Ua tatou aoao ua toetu Keriso.
Ua tatou aoao e silafia lelei i tatou e le Atua ma e silafia o tatou manaoga ma atugaluga. Sa ia valaau atu ia Iosefa i lona igoa.
Ua tatou aoao i le sootaga i le va o le Tama ma le Alo. Sa gauai atu Iesu i Lona Tama, ma sa fesootai atu le Tama i tagata i luga o le fogaeleele e ala mai i lona Alo.
Ua tatou aoao o Iesu Keriso o le Alo Pele o Lona Tama e ala i le atofaina e le Tama o Iesu o lona Alo Pele.
Ua tatou aoao o le Ekalesia moni a Iesu Keriso e pei ona sa Ia muai faatulagaina sa le iai i luga o le fogaeleele i le taimi o Iosefa Samita, ua faamautu ai le moni o le Liliuese Tele e pei ona muai tau mai e le Aposetolo o Paulo.
Ua tatou aoao pe a tatou faamoemoe pea lava e naunautai i le aafiaga o le Atua i o tatou olaga, o le a Ia faaali mai se ala laulelei mo i tatou. I le taimi o Iosefa o lotu ma ituaiga uma na sese.
Ua tatou aoao o tisipenisione o taimi taitasi ua maua faaaliga vaaia, faamanuiaga, ma mamalu o le Atua.
Ua tatou aoao le malamalama i le auala e filifilia ai e le Atua Ana perofeta.
Ua tatou aoao e filifili e le Atua e ua loto mama o e amiotonu ma tonu o latou naunautaiga e fai Lana galuega, e faamautuina ai aoaoga mai le Tusi Paia o le Atua e silasila i le loto ma e le filifilia e faavae i foliga vaaia po o tulaga faaleagafesootai po o se tulaga (tagai i le 1 Samuelu 16:7).
O le Uluai Faaaliga a Iosefa Samita o le ki lea e tatalaina ai le tele o upumoni sa tanumia mo le tele o seneturi. Ia aua ne’i galo ia i tatou pe le ano i le tele o upumoni taua ua tatou aoaoina mai le Uluai Faaaliga.