O Leo o Le Au Paia o Aso e Gata Ai
Faamamaina o le Falelotu ma Aoaoga o le Talalelei
Ata na tusia e Allen Garns
I le aoauli o se Aso Toonai, sa ou sauni ai e alu i le matafaga faatasi ma lo’u aiga. Sa latou faimalaga mai mai le Amasona i La Guaira e faaaluina ni nai aso faatasi ma a’u. Sa susulu le la, na matagofie savili o le sami, ma sa ou fiafia lava e iloa le sagisagi fiafia mai o o’u tuafafine.
O le taimi lava sa i ai i luga o le auala, sa ou manatua ai o a’u e vaaia le faamamaina o le falelotu i lena aso. Ua i ai nei se filifiliga ou te faia: Pe ou te faataunuu lo’u tiutetauave po o le faaauau pea i le matafaga faatasi ma lo’u aiga? Sa ou fuafua loa e talanoa i lo’u tina ma o’u tuafafine i lenei mea. Latou te lei i ai muamua lava i totonu o se fale tatalo o le Ekalesia a le AAG ma sa ofo mai ma le naunautai e fesoasoani ia te au e faamama, pe a faapea matou te agai saʼo atu i le matafaga pe a maea.
Ina ua matou ulu atu i le falelotu, sa ou faamalamalamaina atu mea e tatau ona fai ma le auala e fai ai. O se galuega na matou faapea o le a avea ma se galuega faamama vave ae na i’u ina alu ai le fa itula ona sa latou matuai fiafia lava! Sa ou faaali atu i lo’u aiga potu taitasi, atavali, ma le vai o le papatisoga. Sa faatumulia lo’u loto i le olioli tele. Sa ou le talitonu na fesoasoani lo’u aiga ia te a’u i se mea e taua tele lona uiga ia te a’u. A o matou i ai iina, sa aoao ai e o’u tuafafine talavou, Thalia ma Gineska ni viiga ma fesili mai ia te au e uiga i le Ekalesia.
I le Aso Sa sa auai lo’u aiga i le lotu mo le uluai taimi. Sa talia lelei i latou i le uarota. Sa vave ona faafeiloai e tamaitai talavou o’u tuafafine. Sa latou feiloai ma tamaitai faifeautalai ma faatulagaina se taimi e feiloai ai ma i latou i le aso na sosoo ai. Sa fai la matou afiafi faaleaiga, ma sa ou aoao atu ia i latou le faiga o le tatalo. Sa matou tatalo soo faatasi. Sa matou faalogologo foi i viiga ma matamata i vitio a le Ekalesia.
A o lei toe foi atu lo matou aiga i le fale, sa ou aveina atu lo’u tuafafine o Caracas e vaai i le malumalu ma ona laufanua. Sa tuuina atu la’u molimau i faamanuiaga o le malumalu ma uunaia i latou e saili le Ekalesia pe a latou toe foi atu i le Amasona.
Ina ua latou tuua e toe foi i le fale, sa ou faafesootaia ia faifeautalai i lo latou eria. Sa asia lo matou aiga e faifeautalai ma tagata o le aufono a le uarota ma fesoasoani ia i latou i lo latou liliu mai. Sa tatalo pea o’u tuafafine mo lo latou tama mo se faatagana e papatiso ai.
Faatasi ai ma le agaga faafetai tele ma le olioli, sa ou malaga ai i Amazonas e papatiso Thalia ma Gineska. O le susulu i o laua mata ua faailoa ai lo latou faamoemoe ma le agaga faafetai i le Tama Faalelagi mo le taitaiina atu o i latou i le talalelei. E ala i le faataunuuina o se valaauga e faamama le falelotu, sa aumai faalatalata ma faamalosia ai lo matou aiga. O le a ou le faagaloina lava lenei aafiaga ma ou te iloa o le a faapena foi i o’u tuafafine.