O Leo o Le Au Paia o Aso e Gata Ai
Tulaga Faatinā faa-Keriso
Ata na tusia e Carolyn Vibbert
Sa ou saluina pretzels, nutiga silio, popukoni ma chips i se faaputuga.
“Leai. Ou te lei ‘aia a nei mea,” sa ou fai atu ai ao o’u saluina i totonu o se tasipeni [dustpan].
Sa fai mai lemu lo’u toalua, ao saofai i le laulau, “O le taulaga lena a le tinā.”
Sa ou tu faasasao i luga. “O le a?” Sa ou fesili atu ai.
Sa faaleotele mai ma manino lana tautala ao tausami lana malū o le taeao: “O mea na e fai e tinā. Latou te faaaluina o latou olaga i le tapenaina o gasu latou te lei faia—e pei lava ona faia e le Faaola.”
Sa taua tele lenei manatu ia te au. Sa tatau ona ou fiafia e mafaufau o le saluina o nutiga meaai sa avea o se uiga faaKeriso nai lo le mea sa ou mafaufau ai. Ae nai lo lena, sa ou lagonaina se lagona o le tausalaina. Sa ou lagonaina le le toafimalie i le faatusatusaga. E faafia ona ou tauina atu i lo’u toalua pe na o a’u foi ia mea uma na ou faia mo la’u fanau, ma le faamoemoe mo le aloaiaina ma le agaga faafetai? Sa lei foliga o se mea sese le manao i la’u fanau ina ia maua le loto faafetai, ae i lena taimi o le manino mai, sa ou vaai ai i lo’u manaoga e sa mo a’u ina ia mauaina ni viiga po o se taui nai lo le faatatau ia i latou ia aoaoina le agaga faafetai. Ae e lei manaomia lava e le Faaola se viiga. Na te lei fesili mai lava pe na manao mai foi i ai.
Ou te manatua talanoaga ma la’u fanau talavou pe a latou lisi maia mea uma na latou faia mo a’u i se taumafaiga e aloese ai mai se talosaga mo se galuega.
E masani lava ona ou tali atu, “Ia, afai tou te mananao e faatusatusa lisi o auaunaga, e mafai ona tatou faia, ae o le a outou faiaina, o lea la o loa e fai le galuega!”
Sa ou iloaina i lena taimi o o’u faamoemoega sa le lava le mama mo le faatusatusaga na faia e lo’u toalua. E le tausia e le Faaola se lisi e faatusatusa ai mea na Ia faia i mea ua ou faia. Ou te faiaina i taimi uma.
Faatasi ai ma le i ai pea o le salu i lo’u lima, sa ou pupulaala ae i se manatu fou o le tulaga faatinā—tulaga faatinā e pei ona Ia faia. E le mo viiga, aloaiaina, se opo, pe oo lava i se tusi faafetai. Ou te saluina i luga nutiga meaai ma le alofa aua o le mea lena Na te faia.
O mea uma na Ia faia na faia i le usiusitai i Lona Ttama. E lei faatatau lava ia te Ia. E faaleleia e le Alii mea ua gausia ma faamamaina a tatou gasu ma le alofa atoatoa, mo Lona Tama ma mo i tatou. O le a ou taumafai nei e aoao atu ma auauna atu i la’u fanau ma le alofa sili ona mama e mafai ona ou tuuina atu Ua na o le pau lena o le tulaga o le a ou lagona ai lou auai moni i le tulaga faatinā faaKeriso.