O Le Toefuataiga o Ki o le Perisitua
Saunia e Peresitene Henry B. Eyring
Fesoasoani Muamua i le Au Peresitene Sili
Mai se lauga o le konafesi aoao ia Oketopa 2004.
Na fausia e le Faaola Lana Ekalesia i luga o se faavae o aposetolo ma perofeta, o e umia ki uma o le perisitua i le lalolagi i le taimi nei.
Ata na pueina o Efeso ma ata i tua atu mai Getty images
I le tele o tausaga ua mavae, sa ou lauga ai i se fale faafiafia anamua i Efeso. Sa faatumulia le laueleele lea na tu ai le Aposetolo o Paulo e talai atu i le susulu malosi o le la. O la’u autu o Paulo, le Aposetolo na valaauina e le Atua.
O le aofia o le faitau selau o le Au Paia o Aso e Gata Ai. Sa latou saofafai i luga o laina o nofoa ma’a ia na saofafai muamua ai tagata Efeso i le silia ma le meleniuma ua mavae. Sa aofia ai ia i latou ni Aposetolo soifua se toalua, o Elder Mark E. Petersen ma Elder James E. Faust.
E pei ona outou mafaufauina, sa ou saunia ma le faaeteete. Sa ou faitauina Galuega a Aposetolo ma tusi, o tusi a Paulo ma ona uso Aposetolo. Sa ou faitau ma mafaufau loloto i le Tusi a Paulo i tagata Efeso.
Sa ou taumafai i le mea sili e faamamalu ai Paulo ma lona tofi. Ina ua maea le lauga sa tau mai e nisi o tagata ni mea lelei. Na manaia uma manatu o Aposetolo soifua. Ae na talanoa mulimuli mai Elder Faust ia te a’u, ma se ataata ma se leo malu ma fai mai, “Manaia le lauga. Ae na misi ia te oe le mea sili ona taua na mafai ona e tau atu.”
Sa ou fesili atu ia te ia po o le a lena mea. I nai vaiaso mulimuli ane, na ia ioe e ta’u mai ia te a’u. O lana tali ua aoaoina ai a’u talu mai lena taimi.
Sa ia fai mai na mafai ona ou faapea atu i tagata, pe ana maua e le Au Paia o e na faalogo ia Paulo se molimau o le taua ma le mana o ki sa ia umiaina, semanu e le aveesea mai le au Aposetolo mai le lalolagi.
O lena mea na uunaia ai a’u e toe faitau le tusi a Paulo i tagata Efeso. Sa ou iloaina na manao Paulo ia lagona e tagata le taua o filifili o ki o le perisitua o aumai mai le Alii e ala mai i Ana Aposetolo ia i latou, o tagata o le Ekalesia a le Alii. Sa taumafai Paulo e fausia se molimau e uiga i na ki.
Sa molimau atu Paulo i Efeso o Keriso sa i le ao o Lana Ekalesia. Ma sa ia aoao atu sa fausia e le Faaola Lana Ekalesia i luga o se faavae o aposetolo ma perofeta, o e umia ki uma o le perisitua i le lalolagi i le taimi nei (tagai i le Efeso 2:19–20).
Ua Toefuataiina mai le Perisitua
Ata na tusia e Brian Call
E ui i le manino ma le mana o ana aoaoga ma ana faataitaiga, na silafia e Paulo o le a oo mai se liliuese (tagai i le i le Galuega 20:29–30; 2 Tesalonia 2:2–3). Sa ia silafia o le a aveesea mai aposetolo ma perofeta mai le lalolagi. Ma sa ia silafia o le a latou, i se aso sili, i le lumanai, toefuatai mai. Sa ia tusi atu i lena taimi i tagata Efeso, talanoa i mea o le a faia e le Alii: “Ina ia faaopoopoina i le [Alii] i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi” (Efeso 1:10).
Na tulimatai atu Paulo i le galuega a le Perofeta o Iosefa Samita, pe a toe tatalaina le lagi. Na tupu. Na oo mai Ioane le Papatiso ma faaee i luga o tagata soifua le Perisitua o Arona ma ki o le auaunaga a agelu ma le papatisoga i le faatofuina mo le faamagaloina o agasala (tagai i le MF&F 13).
Na toe foi mai aposetolo ma perofeta anamua ma faaee atu i luga o Iosefa ki sa latou umia i le olaga nei (tagai i le MF&F 110). Na faauuina tagata soifua i le tofi faaaposetolo paia ia Fepuari o le 1835. Na tuuina atu ki o le perisitua i Aposetolo e Toasefululua i le tau faaiuiuga o Mati 1844.
O perofeta uma o e na mulimuli mai ia Iosefa, mai ia Polika Iaga e oo mai ia Peresitene Monson, ua umia ma faaaogaina na ki ma na umia le tofi paia faaaposetolo.
Faatuatua ma Ki o le Perisitua
Ae e pei lava o le taimi o Paulo, o le mana o na ki o le perisitua mo i tatou e manaomia ai lo tatou faatuatua. E tatau ona tatou iloa e ala i musumusuga o ki o le perisitua ua umia e i latou o e taitai ma tautuaina i tatou. E manaomia ai le molimau a le Agaga.
Ma e faalagolago lea i luga o la tatou molimau o Iesu o le Keriso, ma o loo soifua o Ia ma taitaia Lana Ekalesia. E tatau foi ona tatou iloa mo i tatou lava na toefuatai mai e le Alii Lana Ekalesia ma ki o le perisitua e ala mai i le Perofeta o Iosefa Samita. Ma e tatau ona tatou mauaina se faamautinoaga e ala i le Agaga Paia, ua faafouina soo, o na ki ua tuufaasolo mai e aunoa ma se faalavelaveina i le perofeta soifua ma e faamanuiaina e le Alii ma taitai Lona nuu e ala mai i le laina o ki o le perisitua lea ua oo mai i lalo e ala i peresitene o siteki ma itu ma e ala mai i epikopo ma peresitene o paranesi ia i tatou, po o fea lava tatou te i ai ma e tusa lava foi po o le a le mamao mai le perofeta ma le au aposetolo.
Faalagolago i Auauna Filifilia a le Alii
Toefuataiga o le Perisitua Mekisateko, saunia e Walter Rane
Ina ia tausia i tatou lava ia faavaeina i le Ekalesia a le Alii, e mafai ma e tatau ona aoao o tatou mata ia iloa le mana o le Alii i le galuega a i latou ua Ia valaauina. E ao ona tatou agavaa mo le mafutaga a le Agaga Paia. Ma e tatau ona tatou tatalo mo le Agaga Paia e fesoasoani mai ina ia tatou iloa o tagata o e o taitaia i tatou o loo umiaina lenei mana. Mo a’u la, o lea ituaiga tatalo e masani lava ona taliina mai pe a ou gauai atoa atu au lava i le galuega a le Alii.
E mafai ona tatou galulue ina ia agavaa mo le faaaliga lea e mafai ai ona tatou iloa, o ki ia o loo tuufaasolo mai e le Atua mai i le tasi tagata i le isi. E mafai ona tatou saili ina ia maua pea lava pea i lena aafiaga. Ma e ao ona tatou faia, ina ia mafai ai ona maua faamanuiaga a le Atua mo i tatou ma e finagalo ia tatou ofoina atu i isi.
O le tali i lau tatalo atonu o le a le ofoofogia e pei o le taimi na vaai atu ai nisi ia Polika Iaga ao ia saunoa, o foliga mai i le Perofeta o Iosefa lea na maliufasia.1 Ae e mafai ona avea ma mea mautinoa. Ma faatasi ai ma lena faamautinoaga faaleagaga o le a oo mai le filemu ma le mana. O le a e toe iloa ai o le Ekalesia moni ma ola lenei a le Alii, o loo Ia taitaia e ala i Ana auauna faauuina, ma e popole o Ia ia i tatou.
Afai ua lava le toatele o i tatou e faatinoina lena faatuatua ma maua na faamautinoaga, o le a siitia i luga e le Atua i latou o e taitaiina i tatou ma faamanuiaina o tatou olaga faapea ma o tatou aiga. O le a avea i tatou ma mea na matua manao ai Paulo mo i latou na ia tautuaina: “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20).