O Le Mea Tatou Te Talitonu I Ai
O Le Ola i le Talalelei e Faafaileleina ai Sootaga Paia Faaleaiga
Ata na tusia e J. Beth Jepson
O i tatou uma o ni fanau a o tatou Matua Faalelagi alolofa o e na auina mai i tatou i le lalolagi e aoao i le auala e toe foi atu ai ia te i Laua. O le aiga o se vaega tutotonu o le ata o le faaolataga. Ua tuuina mai e le Atua ia i tatou ni aiga ina ia mafai ona tatou maua ni tino, aoao mataupu faavae sao, ma saunia mo le ola e faavavau.
E finagalo le Tama Faalelagi i ana fanau taitasi ina ia tausia i ni siosiomaga o le alofa. O le auala sili e ausia ai nei siosiomaga o le alofa o le ola ai ma le faaaogaina o mataupu faavae o le talalelei. “E mafai ona maua le fiafia i le olaga faaleaiga pe a faavae i aoaoga a le Alii o Iesu Keriso.”1 O aiga ua faavae i mataupu faavae o le talalelei e avea ma nofoaga o le filemu, lea e mafai ai e le Agaga o le Alii ona taitai, faaaafia, ma sii ae tagata uma o le aiga.
O le aiga ua faauuina e le Atua ma e i “le faatulagaga o le lagi … , o se i’uleo faamanatu o se mamanu o le selesitila ma se faataitaiga o le aiga e faavavau a le Atua.”2 O nei sootaga faaleaiga ma o latou tiutetauave o loo i ai e paia. Tatou te aoaoina i tusitusiga paia e i ai i matua se tiute e tausia a latou fanau i le upumoni, malamalama, ma le alofa (tagai i le Efeso 6:4; MF&F 68:25). O tane ma ava e ao ona alolofa ma faaaloalo le tasi i le isi (tagai i le Efeso 5:25), ma o fanau e tatau ona ava i o latou matua (tagai i le Esoto 20:12).
“O faaipoipoga ma aiga manuia e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi.”3 O loo mulimuli mai mataupu faavae o le talalelei e faamalosia sootaga faaleaiga ma faateleina le malosi faaleagaga o tagata taitoatasi ma le tuufaatasia o aiga. O nei mataupu faavae o le a fesoasoani foi ia i tatou e latalata atili atu ai ia Keriso.
E tofu aiga taitasi ma o latou luitau. I fesouaiga faaleagaga o nei aso, e le maua e aiga uma ia tulaga moomia. E pei ona saunoa Elder Neil L. Andersen o le Korama a Aposetolo e Toasefululua, “I le faitau miliona o tagata o le Ekalesia ma le eseesega o i ai i fanau a le Ekalesia, e ao ona tatou mafaufau loloto ma le faaeteete.”4 O nisi tagata e leai se lagolago mai le aiga i le ola ai i le talalelei. O nisi luitau e sili ona faigata, e aofia ai (ae le faatapulaaina i le) teteaga, sauaina, ma mea ua fai ma vaisu.
E silafia e le Atua tulaga o aiga taitasi ma manaoga o le tagata lava ia ina ia i ai le alofa i le aiga. E tusa lava pe tatou te maua le mafutaga atoatoa ma o tatou aiga, o le ola ai i le talalelei e mafai ai lava ona faamanuiaina o tatou olaga ma o tatou aiga. E mafai ona faamalosia ai o tatou fegalegaleaiga faatasi ma o tatou taitoalua, matua, fanau, uso ma tuafafine, ma lo tatou Tama Faalelagi. O nisi o nei faamanuiaga o le a oo mai i le taimi nei, ae o nisi seia oo i le faavavau, ae o le a le taofia e le Atua se faamanuiaga mo i latou o tauivi mo le amiotonu.