Savali a le Au Peresitene Sili
Valaaulia mo le Galuega
Saunia e Peresitene Thomas S. Monson
Afu o le Muaulu, saunia e Gary Smith
Ina ua valaauina e le Perofeta o Iosefa Samita Elder Heber C. Kimball (1801–68) e “tatala le faitotoa o le faaolataga” i le avea ai ma se faifeautalai i Egelani, sa pueina Elder Kimball e lagona o le le atoatoa.
“E, le Alii e,” sa ia tusia, “O au o se tagata e tau le matala lau tautala, ma o nei mea uma o le a le talafeagai ai mo lenei galuega.”
Ae ui i lea, sa talia e Elder Kimball le valaauga, ma faaopoopo atu: “O nei lagona sa le taofia ai au mai le ala o le tiute; o le taimi ua ou malamalama ai i le finagalo o lou Tama Faalelagi, sa ou lagonaina se naunautaiga e alu atu ai i tulaga lamatia uma, ma le talitonuga o le a Ia lagolagoina au e ala i le mana o Lona Silisiliese, ma faaeeina mai ai ia te au le agavaa uma lava ou te moomia.”1
Ou uso talavou e ma tamaitai o e ua valaauina i le galuega faafaifeautalai faamisiona, ua valaauina outou i le galuega ona e, faapei o Elder Kimball, “ua ia [te outou] le manao e auauna atu i le Atua” (MF&F 4:3) ma ona ua tou saunia ma agavaa.
Ulugalii matutua, ua valaauina outou i le galuega mo le mafuaaga lava lea e tasi. O outou, ua aumai e le gata o se naunautaiga e auauna atu ae faapea foi le poto na maua mai vaitau o le ositaulaga, alofa, ma le aafiaga e mafai ona faaaogaina e lo outou Tama Faalelagi e pai atu ai i loto o Ona atalii ma afafine o loo saili mo le upumoni. E mautinoa lava ua outou aoaoina e le mafai lava ona tatou alolofa moni i le Alii seia vagana ua tatou auauna atu ia te Ia e ala i le auauna atu i isi.
I lo outou naunautaiga e auauna atu o ni faifeautalai, o le a outou faaopoopo atu le faatuatua ma le lototoa, lototele ma le mautinoa, faaatoatoa ma le tutulai, naunautai ma le tuuto. O faifeautalai tuuto e mafai ona latou maua vavega i le galuega faamisiona.
Sa aoteleina e Peresitene Ioane Teila (1808–87) ia uiga taua lelei o le faifeautalai faapenei: “O ituaiga o alii [ma tamaitai ma ulugalii] matou te mananao e avea ma e e tauaveina lenei savali o le talalelei o ni alii e faatuatua i le Atua; o ni alii e faatuatua i la latou tapuaiga; o ni alii e faamamaluina o latou perisitua; o ni alii o e ua … i ai le faatuatuaga o le Atua. … Tatou te manaomia ni alii e faatumulia i le Agaga Paia ma le mana o le Atua [,] … o ni alii o le mamalu, amio sao, amioatua ma mama aiai.”2
Ua tautino mai e le Alii:
“Aua faauta ua sinasina le fanua ua saunia e selesele; ma faauta, o ia o le e sasau atu lana selesaito ma lona malosi, o ia lava lea ua na faaputu ma teu ina ia le fano o ia, ae aumai e ia le olataga i lona agaga;
“Ma o le faatuatua, faamoemoe, alofa mama ma le alofa, ma le manatu tasi i le mamalu o le Atua, e agavaa ai o ia mo le galuega” (MF&F 4:4–5)
Ua oo mai lou valaauga e ala i musumusuga. Ou te molimau atu e faapea o le ua valaauina e le Atua, ua faaagavaaina foi e le Atua. O le a e maua le fesoasoani faalelagi a o e galue ma le agaga tatalo i le tovine a le Alii.
O le matagofie o le folafolaga na tuuina mai e le Alii i faifeautalai i le amataga o lenei tisipenisione, e pei ona i ai i le Mataupu Faavae ma Feagaiga, o le a fai ma outou: “O le a ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lou Agaga i o outou loto, ma sio faataamilo outou e auagelu, e sapasapai outou i luga” (MF&F 84:88).
A o e auauna atu, o le a e fausia ni manatuaga taua e faavavau ma faauoga. Ou te iloa e leai se isi fanua ua fua mai ai atili tele fualaau na seleseleina le fiafia nai lo le galuega faamisiona.
O le taimi nei, o se upu mo alii ma tamaitai faifeautalai, ma ulugalii o e, po o a lava mafuaaga, atonu e le mafai ona faamaea ai lo latou taimi ua tofia i le galuega faamisiona: E alofa le Alii ia te outou. Na te talisapaia la outou ositaulaga. Ua silafia e Ia o outou faanoanoaga. Ia iloa ua i ai pea Sana galuega mo oe e fai. Aua nei faatagaina Satani e tau atu ia te oe seisi mea. Aua e te lotovaivai; aua e te faavaivai; aua le faanoanoa.
A o ou maitauina i konafesi aoao ao lei leva ona valaauina au e taitai i le Ekalesia: “Aua le fefe. Ia outou lototetele. E manuia le lumanai e faapei o lou faatuatua.”3 O lena folafolaga o loo tumau pea le moni mo oe. O lea aua nei faavaivaia lou faatuatua, ona e lei aveesea e le Alii lona faatuatua ia te oe. Ia tausia au feagaiga ma agai i luma.
E manaomia e le lalolagi le talalelei a Iesu Keriso. Ia faamanuia le Alii i Ana Au Paia uma—tusa lava po o fea tatou te auauna atu ai—ma se loto o se faifeautalai.