Filifiliga a Matini
E alaala tusitala i Iuta, ISA.
Na iloa e Matini e le tatau ona inu i se lauti. O le a se mea e tatau ona ia faia?
“Faamaoni, faamamoni, ma tutu mo le mea sa’o” (Tusipese a Tamaiti, 159).
Sa ala malie ae Matini. Sa lulu e lona tina lona tauau.
“Matini,” sa ia fai mai, “ua oo i le taimi e ala ai i luga.”
Sa mili e Matini ona mata moe. Na pogisa pea le lagi, ae sa ia iloa lava le taimi ua i ai. E feala i luga lona aiga i le 5:30 i taeao taitasi e faitau faatasi le Tusi a Mamona. Sa le faigofie lava ona vave ala i luga.
Sa taavale ese atu Matini mai le moega ma savali lemu atu i le potu i luma. Sa ia faaloloa ma mavava tele. Sa tulemomoe foi ona uso ma tuafafine, ae na i ai uma iina.
Sa faitau tagata taitoatasi mo le lima minute. I le amataga, na manao Matini e toe foi e moe. Ae sa ia faalogo pea. O fuaiupu taitasi na foliga mai na maua ai pea lava pea e ia le lagona lelei. Mai le taimi na faaiuina ai le faitauga, na lagona e Matini le malosi faaleagaga.
Ma o le malosi faaleagaga o se mea lea na manaomia e Matini i aso uma. I Kenya, e toaitiiti tagata o le Ekalesia e tausaga faatasi ma Matini, ma e nonofo mamao ese uma i latou. Ina ua maea le aoga sa alu Matini i se kalapu mo tama e faafoeina e le Ekalesia Katoliko. E tasi le vaiaso na alu ai se malaga tolauapi tuufaatasi a le kalapu.
Sa fiafia tele ai Matini. Sa ia pese i pese o le tolauapiga. Sa ia tataina ogalaau. Sa ia fesoasoani foi e fausia se afi mo tolauapiga (campfire).
Ae i le aso lona lua, na ave ane ai e se tasi o taitai se tipoti. “O le a faia nei sa tatou ti,” o lana tala lea.
Sa fiafia lava isi tamaiti. Sa latou inu lauti i le fale mo ni fuafuaga faapitoa. Sa aumai uma a latou ipu ma faatalitali mo le taitai e ligiina mai le ti.
Sa lagona se popole laitiiti o Matini. Na ia iloa e le tatau ona ia inu i se lauti. Ae sa ia le manao e faatiga [lagona] o ana uo.
Ona ia manatua lea o ona lagona ina ua ia tausia poloaiga. Pe a mulimuli lona aiga i le perofeta ma faitau faatasi le Tusi a Mamona, sa ia lagona le fiafia. Pe a latou le faia o lea, sa ia le lagonaina le fiafia.
Na iloa e Matini le mea e tatau ona ia faia.
“Leai, faafetai,” sa ia ta’u atu i le taitai a o sau o ia e faatumu lana ipu. “Ou te le fia inu i le lauti.”
Sa faateia le taitai, ae na ia tuu atu Matini e inu vai a’o inu e le vaega atoa o tama le lauti. O nisi o tama sa fia iloa pe aisea na le inu ai e Matini le lauti, ae leai se tasi o i latou sa tau faifai ia te ia. Sa lagona e Matini le fiafia. Na ia iloa o le upu o le poto o le a maua ai e lona tino le malosi. Ma sa fiafia o ia ona sa maua e ia le malosi e fai ai le mea sa’o.