Manatunatuga
O Loo Leoleoina e lo Tatou Tama Faalelagi
Ata na pueina e Tobias Keller/Unsplash
A o lei faatamaia e le gasegase o le Alesaima lona mafaufau, sa i ai lava pea se tala po o se pese a lo’u tama mo lana fanau. Ou te manatuaina o ia ao nofo i lona nofoa lapoa ma faaluelue lou uso pepe i ona vae, ao lona leo malie sa faatumulia ai le potu i tala mai lona talavou—mea uma mai le vaaia o povi ma lana pusi i luga o lona tauau e oo i le sesee i lalo o le papa mumu o Escalante, Iuta, USA. A o amata ona faanounou ifo mata o lou uso, sa taofia tala, ma sa amata le pese faamoepepe kaupoe lava lea e tasi:
Moeiini ou mata tautulemoe, lau kaupoe laiitiiti,
A o leoleo e lou Tama Faalelagi ia te oe.
E te le iloa o le taimi e momoe ai, ua maea lenei aso.
O lea moe loa, lau kaupoe laiitiiti.1
O lenei ua avea lou uso pepe o se tamā, ma o lo taoto lou tamā i se moega i le falemai i San Diego, Kalefonia, ISA. E ui o loo ia vaai atu i niu, ua ia manatu o ia o se tamaitiiti o loo fuiina sana, tamato, ma pi. Ae sa lei faia e ia. O loo ua vaivai o ia.
Mai lea aso i lea aso, ua faapotopoto ai lou tina, uso ma le tuafafine i autafa o lona moega. Na valaau mai lou tina ia te au i lou fale i atumauga o Iuta, ISA. Sa ia tau mai ia te au e faapea pe a faaali atu i lou tama ni ata tuai o le aiga, e oo mai se ataata i ona foliga tōtō. O isi taimi, e faailoa mai ai ona uso, ua leva ona maliliu, i lona mafaufau ma le loto. Sa ia taumafai e tuuina atu sana meaai, ae e musu o ia. Sa ia tau atu ia te ia sa maua e ona uso ni i’a ma ua tatau ona alu o ia e tausi solofanua ao le i faia le taumafataga o le afiafi.
Ua matou osia taitoatasi filemu le malamalama pe a tuua e ia lenei olaga faaletino, o le a “ave atu i fanua i lena Atua o le na ia tuuina ia te i latou le ola,” i le “parataiso, … o le a [ia] malolo ai mai i o latou popole uma, ma le faanoanoa” (Alema 40:11–12).
Sa ou valaau i lou tina ma sa tuuina atu le telefoni i lou tama. Sa ou tei lava, sa amata ona ia pese mai ia te au: “Moeiini ou mata tautulemoe, lau kaupoe laiitiiti, a o leoleo lou Tama Faalelagi ia te oe.”
Ou te le iloa pe na iloa ea e lou tama o au lea. Atonu e le i iloa e ia, ae o lenei pese na oo mai o se meaalofa ua tafe mai i lou loto. Sa ou tagi ma le agaga faafetai mo lenei alofa mutimutivale mai i lou Tama Faalelagi ma Lana fuafuaga o le faaolataga. E lei umi ae maea le pese faamoemoe pepe, ma e sa ou vaai faalemafaufau atu i mata o lou tama ua amata ona faanonou. Ua mou atu le taimi, ae sa ou mafanafana i le faamoemoe i le malamalama o le oti o se vaega o le fuafuaga a le Atua e toe avatu ai i tatou ia te Ia i lona afioaga. Ou te talitonu i le fuafuaga a le Atua ma Lona alofa mo i tatou pe a tatou tuua lenei olaga. Sa ou musumusu atu, “Manuia le po, Papa. Alu e moe. O loo leoleo lo tatou Tama Faalelagi ia te oe.”