I Le Taimi Faamaumauina

Saunia e Richard L. Bairett Jr.

Na alala le tusitala i Kalefonia, ISA, i le taimi o lenei aafiaga.

E manaomia se mea ofoofogia ina ia ou oo ai i le fale mo le papatisoga a lo’u afafine.

Faatoa atoa le valu tausaga o lo’u afafine ma ua fiafia lava ou te papatisoina o ia. O le auai mai foi o ona matua matutua mo le sauniga faapitoa, ua faaopoopo atu ai i lona fiafia ma le naunautaiga. Ae peitai, ao faasolo ina latalata mai le aso tele, na foliga mai atonu o le a ou le i ai i le papatisoga.

O la’u galuega i le avea ai ma se pailate o le vaalele faamiliteli ma taitai fesoasoani o le vaegaau e seasea e vaivai ai, ae o le tulaga ua i ai nei ua sili atu ona saoasaoa ina ua aluese atu lo’u taitai mo se isi tofiga. Sa ou feagai ma le faagasologa faifaipea o galuega faamiliteli. Ina ia mauaina le fuainumera manaomia o le aufaigaluega o vaalele, sa faamalosi a’u e faaleaogaina aoaoga, taofi nisi o matafaioi o le vaegaau, ma faaleaogaina faiga-malologa lea na fuafuaina mo le fia masina.

Na tuuvaa ese atu aufaigaluega o vaalele tau i faigamalaga e tai 21 aso, ma sina avanoa laitiiti o le le toe foi vave mai i le fale. Ma pe a toe foi mai le au taitai ma se isi taitai fesoasoani, ua faigata ona faamaonia lo’u nofo mo se gaoioiga faaleaiga. E faapefea ona ou nofo pe afai na ou manaomia le ositaulaga o le toatele o isi tagata?

Sa ou lagona le le mautonu. Sa ou taumafai lava e faamuamua lo’u aiga i la’u galuega, ae o ni tulaga uiga ese nei, ma sa i ai foi lo’u tiute e auauna atu i lo’u atunuu. O la’u taitai, e le o se tagata o le Ekalesia, sa malamalama i le taua o lenei gaoioiga i lo’u aiga ma sa faataga a’u ou te faia lava e a’u le filifiliga. Ina ua mavae le tele o tatalo ma talanoaga faaleaiga, sa ou faia le mea sa ou lagonaina sa sao ma faatulagaina loa a’u ou te alu i le misiona na sosoo ai.

Ina ua logoina la’u vaega mo le amataina o le misiona i le taeao o le Aso Gafua, na foliga mai e leai ma se avanoa o le a ou toe foi mai ai mo le papatisoga a lo’u afafine i le Aso Toonai. Matou te felelei atu i se nofoaga e piki ai le uta, ona sosoo ai lea ma le nofoaga e malolo ai, lea e tatau ona matou malolo ai ao lei toe felelei ese atu. Mulimuli ane, matou te felelei atu i se isi nofoaga ma malolo ai, ona tiliva atu lea o le uta i se nofoaga maotua lava, ma i le toe foi mai, tu mo se isi malologa a le auvaa, ma toe foi mai e ao atu nisi uta ma toe sui le ala e toe foi mai ai i le fale. E masani lava ona alu ai le le itiiti ifo ma le fitu aso e faamaea ai le faatasi o lenei faagasologa, ae sa ou iloa o loo tatalo lo’u aiga ina ia ou toe foi mai. O lo latou faatuatua ma tatalo na fesoasoani ia te a’u ia maua ai le faatuatua, ma na vave lava ona foliga mai o lenei faigamalaga o le a le avea ma se misiona masani.

Muamua, nai lo le tu mo se aso pe lua, na atofaina la matou misiona e utuina i le ea ma faaauau ai pea e aunoa ma le tu laueleele i la matou nofoaga faavaomalo muamua. Ma, a maea le taimi malolo faatulafonoina a le auvaa, ua faatonuina i matou e felelei i se misiona e ese mai ai ma toe foi i se nofoaga mamao e tiliva ai le uta. Na sologa lelei lava le aveeseina mai o le uta mai le vaalele ma le utuina o le vaa i le laueleele, ma ina ua maea se isi malologa puupuu a le auvaa, sa faatonuina i matou e felelei sao mai i le nofoaga a lo matou militeli. Ua matou toe foi mai i le fale mo se aso pe a!

Sa lofituina a’u e tau atu i lo’u aiga ua toeitiiti lava ou taunuu i le fale. Ona tau mai lea e lo’u toalua ia te a’u ua sui mai i luma le sauniga o le papatisoga mai le 5 p.m. i le 2 p.m. ina ia maua ai se avanoa mo le gaoioiga a le autalavou a le siteki. Sa ou valaau atu i le pule a le matou ealifi [airlift] ma faamalamalama i ai le mea ua tupu. Ina ua mavae sina taimi puupuu, sa ia tali mai o loo lava le auvaa e tolopo ai le isi a matou faigamalaga seia oo i le 5 p.m. i le Aso Toonai—le taimi na muai faatulagaina ai le sauniga o le papatisoga e amata ai!

I le faigamalaga e toe foi i le aiga, ina ua matou o ese mai mauga e lata i lo’u fale, sa ou vaaia ua toe tasi lava se luitau o le faatuatua o loo i ai: o loo ufitia moli o le aai o i lalo i le puao. O se vaaiga sili lea ona le lelei ua ou lele ai. Sa vave lava ona matou tuufaatasia se fuafuaga ina ia liliu atu i se isi malaevaalele pe a talafeagai, faamaeaina la matou lisi o mea e fai, ma felelei atu i lalo e vaavaai.

A o matou agai saoasaoa atu i le malaevaalele i le 200 futu (60 m) i luga ae o le laueleele, na siomia atoa i matou i le puao. Na faafuasei lava, i le pasiina o le 120 futu (37 m), sa i ai se auala o le vaalele ua faamalamalamaina i o matou luma, ma i ni nai sekone mulimuli ane, sa matou tulaueleele ma le saogalemu. Na tau fai manava tagata uma ma le to’a.

O se faagasologa uiga ese o mea faafuaveta na mafai ai e la’u auvaa ona faia se faigamalaga e tele nofoaga i le isi itu o le lalolagi ma toe foi mai i le taimi faamaumauina, ma sa mafai ona ou i ai i le fale mo sina taimi puupuu lea na fetaui lelei ma le papatisoga a lo’u afafine. O le fesoasoani mai a le Alii sa mafai ai ona ou faataunuuina lo’u tiute i lo’u atunuu, la’u vaegaau, ma le mea sili ona taua i lo’u aiga. E ui e mafai lava ona faaauau pea le olaga pe afai e manaomia ona toe faatulaga le papatisoga a lo’u afafine, ae sa faailoa mai e le Tama Faalelagi ia i matou e alofa o Ia ia i matou ma sa Ia faafofogaina a matou tatalo. Sa Ia tuuina atu i lo’u afafine se manatuaga o na mea faavavega na tutupu o se molimau e Na te alofa ia te ia, ma sa ma mauaina uma ma lo’u toalua se molimau malosi atu e faapea “soo se mea tou te ole atu ai i le Tama i lou igoa, e sao, ma talitonu o le a outou maua, faauta, o le a tuuina mai lava ia te outou” (3 Nifae 18:20).