O Aso Sa e Mo Mea e Sili Atu
E alala le tusitala i L’viv, Iukureini.
Na matou iloa o le valaauliaina o Nikolai e ola i mataupu faavae o le talalelei sa sili atu ona aoga nai lo o le na ona tauina atu ia te ia e uiga i ia mea.
Ata na tusia e Simone Shin
I le tele o tausaga ua mavae, a o faigaluega ai o se tagata faatau oloa i magaala i se nuu laitiiti i Polani, sa ou feiloai ai i se alii e igoa ia Nikolai Shaveko. Na ma iloaina ai ma te o mai i Chernigov, Iukureini, ma sa vave ona avea ma se uo.
Na iu ina ou iloa o Nikolai sa leai se mea e nofo ai, o lea na ma valaauina ai ma lo’u toalua o ia matou te nonofo. Sa lei mafanafana tele pe nofogofie lo ma fale mautotogi, ae sa i ai se potu faaopoopo. Sa ia talia ma le agaga faafetai ma matou nonofo faatasi mo se taimi. Sa amata ona ia vaai i le auala na matou ola ai.
E Leai ni Galuega e Faia le Aso Sa?
E pei o le tele o faleoloa e faatau atu mea e faaaogaina i le fale, sa matou manaomia le galulue umi ma le malosi ina ia lava se tupe e ola ai. Ae e le pei o le toatele o tagata, ma te le faigaluega ma lo’u toalua i Aso Sa. I se tasi aso, sa fesili ai Nikolai pe aisea. Aisea o le a tatou faamisia ai le faigaluega ma saili tupe mo se aso atoa?
“O Aso Sa e le i faia mo ni galuega po o le sueina ai o ni tupe,” na ou fai atu ai ia te ia. “Na faia mo se faamoemoega ese.”
“Ae faapefea ona mafai ona gafatia le totogiina o meaai ma le totogiina o le fale pe afai e te le galue i le fitu aso o le vaiaso?” sa ia fesili mai ai.
Ina ia tali i lana fesili, na ma valaaulia ai o ia e sau matou te tapuai faatasi. O le taimi muamua lena na ia faalogo ai e uiga i le Ekalesia, ma sa lei vave ona ia iloa. Sa ia mafaufau pea sa matuai ese lava i maua i le filifili e o i le sauniga ae le o le sailia o tupe. Ae mai lena lava taimi, sa masani ona ma talanoa pea ia te ia e uiga i o ma’ua talitonuga ma faifaimalie lava, sa amata ona ia fiafia atili.
Faataitai I Ai, O Le A E Iloa Ai
Sa vaaia e Nikolai lo ma ola ai i mea ua ma iloa e moni. Na ia vaai i faamanuiaga na oo mai i o ma’ua olaga. Ioe, sa faigata ona lava ni tupe e maua e ola ai, ae sa ma iloa o le mea sa’o le tausia ia paia o le aso Sapati. Ma e sa faamanuiaina i maua e le Alii. Sa lava pea ia tupe mo mea sa ma manaomiaina. O lena mea sa faamalosia ai a ma’ua molimau i mataupu faavae ma fesoasoani ia i ma’ua e avea ai ma ni molimau silisili ia Nikolai. Sa ma maua se talitonuga maumaututu e valaaulia o ia, “Taumafai i ai, ma e o le a e iloa lava!”
I se tasi o vaiaso, na ia faia ai.
Nai lo le alu e faigaluega, sa matou o faatasi ma ia i le lotu. Na te lei manatu sa mafai ona ia galue i le na o le ono aso o le vaiaso, ae ona o le faamoemoe ma faamanuiaga na ia vaai ai i o ma’ua olaga, sa ia taumafai ai.
I lena vaiaso, a o ia faitauina ana tupe, sa faateia o ia. Sa tele atu tupe na ia maua i le vaiaso lena nai lo le mea e masani ona ia maua i le galue ai i aso e fitu o le vaiaso!
Faataitai Foi i le Sefuluai
O le mea foi lea na tupu ina ua matou talanoa e uiga i le sefuluai. I le taimi muamua, sa le mafai ona malamalama Nikolai pe faapefea ona matou faamatuu atu le 10 pasene o a ma’ua tupe maua.
“O le a le lava la a’u tupe e faia ai lena mea!” na ia tausisi pea.
Sa na o le ma faamimigi atu. “Afai e te faataitai i ai, o le a e iloaina ai.”
Sa ia matua le talitonu lava, ae na faatelegese ona ataata o ia. “O lona uiga e pei o le le faigaluega i Aso Sa,” o lana tala lea. “Afai e te totogia lau sefuluai, o le a lava se tupe mo oe lava ma mea e te manaomia.”
O se faaaliga tele lena mo Nikolai. Sa ia aoaoina mo ia lava pe afai tatou te mulimuli i poloaiga a le Atua, o le a faamanuia i tatou e le Atua, ma o le a lelei mea uma mo lo tatou manuia.
Ina ua foi atu Nikolai i le fale i Chernigov, sa ia valaaulia faifeautalai e aoaoina o ia ma lona aiga. E lei umi ae auai o ia ma lona aiga i le Ekalesia. Mulimuli ane, sa auauna Nikolai o se peresitene o le paranesi, ma o lona afafine sa auauna atu i se misiona i Rusia.
Ma te fiafia e talatalanoa ia Nikolai e uiga i le Ekalesia, ae i le faaiuga, o le valaauliaina o ia e ola i mataupu faavae o le talalelei sa sili atu ona mamana nai lo le na ona tau atu ia te ia e uiga i ia mea. Sa ia mauaina ma lona aiga ni molimau ma suia o latou olaga ona sa latou filifili e ola ai i upumoni o le talalelei.