O Ata o le Faatuatua
Mikael Rinne
Masatusa, ISA
O loo fesoasoani Epikopo Mikael Rinne i lona atalii, o Kai, i ana meaaoga. I le fale o Rinne, o loo i ai le avanoa mo le faatuatua ma le faasaienisi.
Ua faasoa atu e Epikopo Rinne se manatu i le faigalotu o le afiafi faatasi ma lona aiga, e aofia ai Nea (tauagavale), Aila (taumatau), ma Kai (tua).
“E le tele se faatuatua iiinei i le laueleele o le [Iunivesite] o Harvard,” o le tala lea a Epikopo Rinne, ae o ia ma lona faletua, o Tiffany, o loo faaavanoaina se taimi e aoao atu le faatuatua i la laua fanau.
O le aiga o Rinne ua na o le pau lea o tagata o le Au Paia o Aso e Gata Ai e iloa e le toatele o a latou uo e le lolotu. Fai mai Tiffany Rinne, faatasi ai ma lana tama teine o Sólia, “O le ma tama tama o Kai, na toetoe lava a toatele atu tagata le lolotu nai lo tagata lolotu i lona papatisoga.”
Fesoasoani Epikopo Rinne ia Sólia e sauni mo le taimi e moe ai.
“I le faaiuga o le aso, o le faatuatua o se filifiliga,” o le tala lea a Mikael Rinne. “I le avea ai ma se epikopo, e le mafai ona ou tuu atu i tagata le faatuatua; e tatau ona latou filifili e talitonu.”
O Mikael o se fomai faasaienitisi. O lona tomai faapitoa faafomai o le suesueina lea o le kanesa o le faiai ma le tuasivi, ma e i ai sona faailoga PhD i le paiolo molekula [biology molecular]. Na te vaaia tagata ua maua i le tuma o le faiai i le Inisitituti o le Dana-Farber Cancer, i le falemai o le kanesa a le Iunivesite o Harvard, ma e na te faia suesuega i le atinaeina o vailaau o le kanesa.
Leslie Nilsson, tagata pueata
O le faatuatua o se vaega tulaga ese i la’u matata. O tagata o matou faigaluega faatasi e mafaufau i talitonuga faalelotu o se mea e fiailoa—e uigaese ma o se mea ua tuai, o le auala lea atonu o tatou vaai atu ai i mea faataulaitu.
O se tasi o auala e faailoaina ai a’u e a’u uo faigaluega, o se tagata “uiga ese” o le faatuatua. Mo se faataitaiga, ou te le palauvale. Pe a tupu mai se mea leaga, ou te fai atu, “Oi, malaia!” O se talasuaga malie tele lena i le falema’i, ae ua suia ai le siosiomaga. Ma ou te talanoa e uiga i le Ekalesia i taimi uma.
Afai e te ola i aoaoga faavae o le talalelei ma e te onosai ma agalelei, o le a sili atu fatuina e lena mea le fiailoa atili i le talalelei nai lo soo se talanoaga faalelotu. O le fiafia ia o a’u uo faigaluega i le auala o soifua ai le Au Paia o Aso e Gata Ai ma le auala o tatou amio ai ma fesootai ai.
E toetoe lava o a matou ma’i uma o loo maua i le tuma o le faiai o loo lamatia ai le soifua. Matou te onosaia tiga i aso uma. O nisi tagata e fesili mai, “E faapefea ona e taulimaina lena vaega?” O se tasi o a’u tali o le, “Ou te lagona o lo’u faatuatua o loo fesoasoani ia te a’u ia feagai ai ma le oti ma ia fesootai atu i tagata o loo tali oti. Ma ou te talitonu i le olaga pe a mavae le oti.”
O le tausiaina o tagata o e o tali atu e tuuina atu ai isi luitau i se vaaiga. “E mafai lava ona e maua i se glioblastoma [tuma],” ou te tauina atu i tagata. O le tuma sili na ona leaga e mafai ona e maua ai. O se mea o loo ou vaaia i le tele o taimi.
O le toatele o a’u ma’i e talanoa e uiga i o latou talitonuga i le Atua ma vavega. E tatau ona ou faaeteete, ae ou te faaopoopo i ai la’u molimau i upumoni o loo latou faasoa mai. “Ou te talitonu foi i lena mea,” na ou fai atu ai. “Ou te talitonu e tutupu vavega, o lea ia tatou faamoemoe mo se tasi.”
E i ai se talitonuga sese faapea o loo feteenai le faatuatua ma le saienisi. Ua tatou mauaina se lagona faapea e maua e le saienisi tali i mea uma, o le mea lena ua “mafai ona tatou iloaina.” Ae e sili atu mea tatou te le iloa nai lo mea ua tatou iloa.
Ou te lagona o le iloaina o le faigata tele o le tulaga o i ai nei mea—po o le a lava le manaia ua mamanu ai— ua fausia moni ai le faatuatua. E le mafai ona tatou malamalama i le natura moni o lo tatou i ai iinei e aunoa ma le faatuatua. O le mea moni lava, o le tele o lou iloa e ala i le saienisi, o le tele foi lea o lou iloa ua i ai se Foafoa atamai ma le paia atonu na taitaiina lo tatou foafoaga.
I le avea ai ma se epikopo, ua ou vaai i tagata o le ekalesia o i ai faafitauli o le faatuatua. Latou te o mai ia te au ma fai mai, “Ua sili atu ona ou mafaufau faasaienisi, o lea ua faigata ai lava ia te a’u le faatuatua.” E fesoasoani i nisi o i latou o loo masalosalo i le iloaina o lo latou epikopo o se saienisi mai Harvard e talitonu i le Atua. E fesoasoani lena mea ia te a’u, “E mafai ona ou talitonu ae ia atamai foi.”