Matafaioi Taua o Mataupu Faalelotu i le Lalolagi

Saunia e Elder Dallin H. Oaks

O Le Korama a Aposetolo e Toasefululua

Na fofogaina e Elder Oaks lenei saunoaga i le aso 9 o Iuni, 2016, i le Iunivesite o Oxford i Egelani, i se fonotaga e faatatau i le saolotoga o tapuaiga.

E le mafai ona aveesea mai ia i tatou le aafiaga o tapuaiga i o tatou olaga lautele e aunoa ma le lamatia matuia o o tatou saolotoga uma.

E silia ma le 30 tausaga, o avea a’u ma se tasi o Aposetolo e Toasefululua a Iesu Keriso. E tusa ai ma le faatonuga mai lo tatou Au Peresitene Sili, matou te taitaia ai la tatou Ekalesia i le lalolagi atoa o le toetoe lava 16 miliona tagata i le silia ma le 30,000 faapotopotoga. Tatou te aoao ma molimau atu i le paia o Iesu Keriso ma Lana perisitua ma le atoatoaga o ana aoaoga faavae. E tulaga ese i la tatou mataupu faavae o lo tatou malamalama lea faapea o loo faaauau pea ona valaauina e le Atua perofeta ma aposetolo ia maua faaaliga ma aoao le auala e faaaoga ai Ana poloaiga i tulaga o o tatou aso.

1. O Le Taua o Mataupu Faalelotu i le Lalolagi

O le saolotoga o tapuaiga o se naunautaiga o lo’u olaga atoa. O la’u uluai lomiga o se polofesa talavou o tulafono i le Iunivesite o Chicago i le 54 tausaga ua mavae, o se tusi sa ou toe tusiaina e faatatau i le sootaga i le va o le ekalesia ma le malo i le Iunaite Setete.¹

I le aso, e sili atu nai lo o lena taimi, e leai ma se tasi o i tatou e mafai ona le amanaiaina le taua o aoaoga faalelotu i le lalolagi atoa—i tulaga faaupufai, feeseeseaiga, atiina a’e o le tamaoaiga, toomaga o galuega agaalofa, ma sili atu. E valusefulu fa pasene o le faitau aofai o le lalolagi e auai i se lotu patino,² ae 77 pasene o tagata o le lalolagi e ola i atunuu o loo maualuga pe sili atu le maualuga e faatapulaaina ai le saolotoga o tapuaiga.³ O le malamalama i mataupu faalelotu ma lona sootaga i popolega o le lalolagi atoa ma malo e taua i sailiga e faaleleia ai le lalolagi o loo tatou ola ai.

E ui lava o le saolotoga o tapuaiga e le iloa i le tele o le lalolagi ma le taufaamatau mai o le faalelalolagi ma tulaga ogaoga, ou te tautala atu mo le mea aupito sili o le saolotoga ua sailia e mataupu faalelotu e puipuia ua foaiina mai e le Atua ma e tumau ae faatinoina e ala i sootaga felagolagomai faatasi ma malo o loo saili le manuia o tagatanuu uma.

O le mea lea, e ao i se faigamalo ona puipuia le saolotoga o tapuaiga mo ona tagatanuu. E pei ona taua i le tusiga 18 o le Tautinoga mo Aia Tatau o Tagata Faavaomalo a Malo Soofaatasi: “Ua i ai i tagata uma le saolotoga o manatu, mafaufauga ma tapuaiga; o lenei aia tatau e aofia ai le saolotoga e suia ai lana tapuaiga faalelotu po o talitonuga, ma le saolotoga, pe tutoatasi pe aufaatasi ma nuu ma isi i nofoaga faitele pe faalilolilo, e faailoa atu ai lana tapuaiga po o talitonuga i le aoao atu, faataitaiga, tapuaiga ma le faamamaluina.”⁴

O le matafaioi faifaatasi o tapuaiga, e ala atu i ona tagata tapuai, o le usitaia lea o tulafono ma faaaloalogia agaifanua o le atunuu o loo puipuia lona saolotoga. Pe a malupuipuia le saolotoga o tapuaiga, o lea tali o se aitalafu o le loto faafetai ma le fiafia ua maea ona totogi.

Ana faapea e ogatasi le taliaina ma le faaaogaina o nei mataupu faavae aoao, o le a le toe manaomia nei talanoaga i le saolotoga o tapuaiga. Ae e pei ona tatou iloa, o lo tatou lalolagi ua faatiapoloina e feeseeseaiga i nei mataupu faavae aoao. Mo se faataitaiga, o leo iloga ua latou luitauina nei le manatu atoa o le puipuiga faapitoa mo mataupu faalelotu. O se tasi o nei tusi o loo tauaveina le tagavai Saolotoga mai Tapuaiga, ma le isi, Aisea e Onosaia ai Tapuaiga?⁵

O nisi leo o loo saili e tuuitiitia lotu ma tagata talitonu, e pei o le faatapulaaina o le saolotoga faalelotu i le aoaoina i ekalesia, sunako, ma faletapuai, ae teenaina le faaaogaina o le talitonuga faalelotu i nofoaga faitele. O nei taumafaiga ua solia ai le Tautinoga Lautele o aia tatau e faailoa ai tapuaiga po o talitonuga “i nofoaga faitele pe faalilolilo.” E ao foi ona faaaoga le faatinoina saoloto o tapuaiga pe a galulue i le avea ai ma se nuu, o e talitonu e pei o a latou taumafaiga i aoaoga, vailaau faafomai, ma le aganuu.

2. Agafesootai o Tulaga Faatauaina o Mataupu Faalelotu

Ua faitioina foi talitonuga faalelotu ma faiga masani e faapea e le talafeagai ma e feeteenai ma faamoemoega agafesootai taua a le malo. Ou te faatumauina, o mataupu faalelotu ua tulaga ese lona taua i le nuu. E pei ona tautino mai e se tasi tagata e le talitonu i se lotu i se tusi talu ai nei, “E le faapea seiloga o e ua talitonu i mataupu faalelotu e malamalama i tulaga faatauaina autu o le lalolagi i Sisifo ua mauaa i mataupu faalelotu, ma popole o le faaitiitia o i latou e tausia tulaga faalelotu o le a faavaivaia ai na tulaga faatauaina.”⁶ O se tasi o na “agafaavae” o le manatu faavae o le mamalu ma le taua faaletagata.

O nisi faataitaiga nei e fitu o tulaga faatauaina faaagafesootai o mataupu faalelotu:

1. O le tele o le agai i luma o amioga lelei e aupito sili ona taua i le sosaiete i Sisifo ua faaosofia e mataupu faavae faalelotu ma faatosinaina e faaaoga aloaia ona o talaiga i le pulelaa. Na faapena foi i le faatamaiaina o le fefaatauaiga o pologa i le British Empire, le folafolaga o le saolotoga i le Iunaite Setete, ma le uunaiga o Aia Tatau Faalemalo o le afa seneturi ua mavae. O nei agai i luma sa le i faaosofia ma faagaoioia e talitonuga faalelalolagi ae na uunaia lava e tagata sa i ai se vaaiga mamao manino faalelotu o mea e sa’o.

2. I le Iunaite Setete, o la matou vaega tumaoti tele o galuega alofa—aoaoga, falemai, tausia o e matitiva, ma le anoanoai o isi auaunaga limafoai taua tele—na amatalia ma o loo lagolagoina pea i se tulaga maoae e faalapotopotoga faalelotu ma uunaiga faalelotu.

3. O faalapotopotoga o nuu i Sisifo e le o tuufaatasia ona o le faamalosia atoatoa o le tulafono, e le aoga, ae e sili ona taua i tagatanuu o e ofoina atu e usiusitai i manatu e le faamalosia ona o o latou tulaga faatonuina o le amio sa’o. Mo le toatele, o talitonuga faalelotu i le sa’o ma le sese ma se faamoemoega o le tali atu ai i se mana maualuga e maua ai ituaiga faatonutonuga faaletagata ofo fua atu. O le mea moni, o tulaga faatauaina faalelotu ma faaupufai e matua fesootai lelei i le tupuaga ma le faatupulaia o malo i Sisifo lea ua le mafai ai ona aveesea ma i tatou aafiaga o tapuaiga i lo tatou olaga lautele e aunoa ma le lamatiaina aiai o o tatou saolotoga uma.

4. E faatasi ai ma a latou vaega tumaoti, ua avea faalapotopotoga faalelotu e fai ma faalapotopotoga tutotonu e faafuaitino ma tuufaaitiitia mana faalavelave o le malo i luga o tagata taitoatasi ma faalapotopotoga tumaoti.

5. Ua musuia e mataupu faalelotu le tele o e talitonu e tuuina atu se auaunaga i isi, o lea, i lona atoaga, e faaee atu ai faamanuiaga silisili i luga o nuu ma atunuu.

6. E faamalosia e mataupu faalelotu fesootaiga agafaavae o le lalolagi. E pei ona aoao mai Rabbi Jonathan Sacks: “O [lotu] ua tumau pea o se mea aupito sili ona mamana e atiina a’e ai nuu ua iloa e le lalolagi. … O le tapuaiga o le vaifofo silisili lea o le manatu o le tagata ia te ia lava o augatupulaga ua malamalama i fefaatauaiga. O le manatu faapea e le mafai e le nuu ona faia e aunoa ma [se tapuaiga] o le tetee lava lea.”⁷

7. O le mea mulimuli, o Clayton M. Christensen, o se tasi o le Au Paia o Aso e Gata Ai ua lauiloa o se “taitai iloga” i le pulega ma le faaleleia o pisinisi,⁸ na tusia e faapea “o le tapuaiga o le faavae o le faatemokarasi ma le manuia.”⁹ E tele nisi mea e mafai ona tautalagia e uiga i le matagofie o le matafaioi a tapuaiga i le atiina a’e o le tamaoaiga.

Ou te faamautinoa atu o aoaoga faalelotu ma faatinoga faaosofia faalelotu o tagata talitonu e taua i se lalolagi saoloto ma manuia ma faaauau ia puipuiga faaletulafono faapitoa e talafeagai ai.

3. Tiutetauave Faifaatasi o Mataupu Faalelotu

Sa ou tautala atu mo na o tiutetauave o le malo i e faatuatua i mataupu faalelotu ma faalapotopotoga. O le a ou liliu atu nei i tiute faifaatasi e ao ona tuuina atu e lotu ma e ua talitonu i o latou malo.

Mo i latou o loo saogalemu lo latou puipuiga, e i ai lava aia tatau a malo e manaomia ai le usiusitai i tulafono ma le faaaloalo mo le aganuu. O loo i ai le vaega sili a malo i le faasaoina o le saogalemu o o latou tuaoi faalemalo ma le puipuiga o le soifua maloloina ma le saogalemu o o latou tagatanuu. O loo i ai lava ia i latou le aia tatau e faamalosia ai ia faalapotopotoga uma, e aofia ai tapuaiga, ina ia aloese mai le aoaoina atu o le ita ma faatinoga e ono tutupu ai le faasaua po o isi soligatulafono e agai atu i isi tagata. E leai se atunuu e manaomia le ofoina atu o malutaga i faalapotopotoga o loo faatupulaia faiga faatupu faalavelave. O le saolotoga o tapuaiga e le o se pa pupuni i le malosi o le malo i soo se tasi o nei tulaga.

I nei aso o matafaioi faifaatasi o mataupu faalelotu ma malo o loo ua matua tofotofoina i Europa. O le ulufale mai o le anoanoai o tagata sulufai, o le toatele lava o tapuaiga ma aganuu a Mosalemi i atunuu e ese a latou aganuu ma lotu ua fai lava ma luitau ogaoga i faaupufai, faaleaganuu, faaagafesootai, tulaga tau tupe, ma tapuaiga.

O le a se mea e mafai e tapuaiga ma faalapotopotoga faalelotu ona fai ma o latou sao e fesoasoani ai i tagata sulufai ma atunuu o loo taliaina i latou—i se tulaga puupuu ma le umi? Ua tatou iloa o nisi o tagata tomai faapitoa ua masalosalo i le matafaioi a faalapotopotoga faalelotu i nei mataupu, o nisi ua vaai atu i tapuaiga faalelotu o se aafiaga toatuga. O le a ou taumafai ia aua nei feteenai manatu e faavae i luga o mea moni ou te le masani ai. O le a ou le faasoa atu aiaiga ma aafiaga o Le Ekalesia a Iesu Keriso o le Au Paia o Aso e Gata Ai, ou te talitonu o le a faaalia ai aafiaga lelei e tatau ona i ai i faalapotopotoga faalelotu, i le tulaga puupuu ma le umi.

O i tatou o e ua taua o le Au Paia o Aso e Gata Ai, po o tagata Mamona, ua talia moni le aoaoga a Keriso e faapea e tatau ona tatou tuuina atu ni meaai i e fia aai ma malutaga i tagata ese (tagai i le Mataio 25:35). E pei foi ona taitaiina ai i tatou e faaaliga o aso nei mai le punaoa lava lea “ia manatua i mea uma e ua matitiva ma e ua le tagolima, e ua mamai ma e ua puapuagatia, ona o ia o le na te le faia ia mea, o ia lava lea e le o so’u soo” (MF&F 52:40).

O le tausiga o e matitiva ma e le tagolima e le tuu i le faitalia pe tupu fua i la tatou Ekalesia. Tatou te faia lenei mea i le lalolagi atoa. Mo se faataitaiga, i le tausaga e 2015 e 177 galuega faatino e tali atu ai mo faalavelave faafuasei i atunuu e 56. E le gata i lea, e faitau selau galuega faatino sa faamanuiaina ai le silia i le miliona o tagata i isi vaega e fitu o fesoasoaniga, e pei o suavai mama, tui puipui, ma le tausiga o mata. Mo le silia i le 30 tausaga, o le maoae o nei taumafaiga e tusa lona averesi ma le $40 miliona tupe amerika i tausaga taitasi.

Tatou te aloese mai se tasi o tetee i faalapotopotoga faalelotu e ala i le tuueseeseina ma le malosi o la tatou auaunaga o fesoasoani alofa mai ia tatou taumafaiga faafaifeautalai i le lalolagi atoa. E tuuina atu a tatou fesoasoaniga e aunoa ma le manatu i sootaga faalelotu aua tatou te naunau ina ia talia lelei a tatou taumafaiga faafaifeautalai e aunoa ma uunaiga malosi po o meaai po o isi mea faapena.

4. O le a se mea e mafai ona fai e Ekalesia?

O a ni mea e mafai e faalapotopotoga o lotu ona fai e faaopoopo i mea e mafai ona fai e Malo Aufaatasi po o atunuu taitasi? O lenei foi, ou te faasino i o tatou lava aafiaga i le Ekalesia. E ui o lo tatou auai—o le afa o loo i le Iunaite Setete ma le afa i isi nofoaga—e toalaitiiti lea e tusa ai ma le tomai e fesoasoani ai, ua ia i tatou ni manuia silisili se tolu e faalauteleina ai lo tatou aafiaga.

Muamua, o auaunaga masani a o tatou tagata auai ua aumaia ia i tatou se punaoa o volenitia tuuto ma le poto masani. Pe a faaliliuina lena i fuainumera, i le 2015 na foaiina mai e a tatou volenitia le silia ma le 25 miliona itula e galulue ai i la tatou uelefea, fesoasoaniga alofa, ma isi galuega faatino e lagolagoina e le Ekalesia,¹⁰ e le faitaulia ai mea patino na faia e o tatou tagata.

Lona lua, e ala i le saofaga tautupe a o tatou tagata o le Ekalesia i faamoemoega o fesoasoaniga alofa, ua mafai ai ona faatupeina e i tatou lava. E ui ua ia i tatou le tomai e galulue tumaoti ai e aunoa ma faiga faalemalo, tatou te naunau foi e faamaopoopo a tatou taumafaiga ma malo taitasi ma ofisa o Malo Aufaatasi mo ni aafiaga silisili. Tatou te valaau atu ia te i latou ina ia faateleina la latou vaai i le malosiaga o faalapotopotoga faalelotu.

Lona tolu, ua ia i tatou se faalapotopotoga mauaa lona faatulagaga i le lalolagi atoa e mafai ona faia faatinoga i se taimi vave. Mo se faataitaiga, i le faafitauli i le lalolagi atoa o tagata sulufai, ia Mati 2016 sa auina atu ai e la tatou Au Peresitene Sili ma le au Peresitene Aoao o le Aualofa, Tamaitai Talavou, ma le Peraimeri se savali i tagata o le Ekalesia i le lalolagi atoa ma faamanatu atu ia i latou le mataupu faavae autu o le faa-Kerisiano o le fesoasoani atu lea i e matitiva ma le “tagata ese” i lo tatou lotolotoi (Mataio 25:35). Sa latou valaauliaina teineiti ma tamaitai o vaitausaga uma e auai e fesoasoani i tagata sulufai i o latou nuu i le lotoifale.¹¹

O se sui faataitaiga o le tali atu a o tatou tagata i Europa, i se tasi afiafi ia Aperila 2016, na silia ma le 200 tagata Mamona ma a latou uo i Siamani sa volenitia ma tuufaatasia le 1,061 o “taga faafeiloai” mo tamaiti o loo nonofo i nofoaga autu o tagata sulufai e ono i setete o Hessen ma Rheinland-Pfalz i Siamani. O loo i ai i ato lavalava fou, mea e tausia ai le soifua maloloina, palanikeke, ma sapalai o mea tusiata. Na fai mai se tasi o tamaitai na taitaia le taumafaiga, “E ui ina le mafai ona ou suia le tulaga matautia ua mafua ai i [tagata sulufai] ona sosola ese mai i o latou aiga, e mafai ona ou faia se eseesega i [o latou] siosiomaga ma avea o se tagata fesoasoani malosi i o [latou] olaga.”

O ni faataitaiga nei se lua o a tatou taumafaiga agaalofa faatulagaina aloaia i le lalolagi atoa. I le 2015, i le galulue faatasi ai o se paaga ma le AMAR Foundation e faatuina i Peretania, na fausia ai e le auaunaga limafoai a le AAG nofoaga autu mo le tausia o le soifua maloloina mo le vaega o le Yezidi i le itu i matu o Iraki, o e na fasia faasinosinomia e le ISI. O nei nofoaga autu mo le tausia o le soifua maloloina—ua atoatoa ona faatotogaina i falesuesue, tausiga o gasegase faafuasei, faletalavai, ma masini faalogo—ua aumai ai le toomaga ia i latou ua faamanualia faaletino ma le faaleagaga. Sa latou faafaigaluegaina fomai Yezidi ma volenitia o e sa fesoasoani i o latou lava tagata i ni auala maaleale faaleaganuu.

I le 2004 sa maliliu ai le 230,000 o tagata i atunuu e 14 i se mafuie matautia ma se galulolo i Asia i Saute i Sasae i le aso 26 o Tesema. Na taunuu la tatou auaunaga limafoai a le AAG i le aso na sosoo ai ma galulue punouai ai mo le lima tausaga. I le aafiaga matuia i le lotoifale o Banda Aceh lava ia, sa fausia ai e la tatou galuega o le alofa le 900 o fale tumau, 24 suavai mo nuu, 15 aoga tulagalua, 3 nofoaga autu mo le soifua maloloina, ma le 3 o nofoaga autu o nuu e faaaoga foi o ni faletapuai. E le gata i lea, sa matou tuuina atu ni kopi o le Koran paia ma solovae suilima tatalo e fesoasoani ai i na alalafaga i a latou tapuaiga.

E na o nisi na o ata na tusia i le taua o mataupu faalelotu i se aganuu lea i le tatou i ai i se faiganuu faalelotu tatou te le na o le fautua ae fesiligia malosi foi le saolotoga o tapuaiga, lea ua tatou manatu o le muai saolotoga.